1 Evus, Ahi san tokolkatien min Noah ka ehon onen keil vit, “Titami keil ihi houlu vis ihi houlu mok hesakin out vasi netan hehilelau en keil.✡ 2 Tounah vasi keil koa amoul en out netan imetaun kami: tirendan keil, aman keil ka mesau keil emun. Keil vasi, naling moulien one en hemi. 3 Mulamu, nasan heiai ka aneite ten anien enges min meatin keil akani. Ka kosa, nisan vuseri emun min kami taanien. 4 Ka minaantei vuseri koa ara mul veah eni veni ara vi vatte ten moulien onen.✡

5 “Ka en usite ten ran meatin, munak meatin tai houas meatin sav hemat, inau, nisan mahien mini. Ka tirendan keil emun koa uas meatin tai hemat, nisan mahien emun mini. 6 Meatin keil, namumon keil asuval nau.✡ Sakini, munak meatin tai houas meatin sav hemat, kei mun, uasi hemat varei.✡

7 “Ka kami, ek vati keke titami keil ihi houlu, hesakin keil ihilelau en out vasi netan.”✡

8 Evus, Ahi viteni mun min Noah ka min titan keitel vit, 9 “Ekek, inau namumon hatkatien takeih ral min kami ka ral min onami keil koa ikatau en kami. 10 Namumoni mun ral min tounah vasi keil koa amoul: tirendan ka aman keil, ka tounah vasi keil koa amemea ral minuk ran mari sip enek. 11 Navat kati keke nirmu lintei mun tounah vasi koa amoul hetal oai. Anatin, oai hermu lintei mun out netan. 12 Hatkatien enek, namumoni ral min kami ka tounah sav keil koa amoul en out netan, ka nitie lati hetal min metai tai. 13  ?Milesi? Naling mitiet koanik mul en mahmah ten teilang. Ka navong vasi koa meatin keil ilesi, indem kati keke hatkatien onak vi anatin. 14 Sakini, navong nakav koe out netan en mahmah ten ous, mitiet emun hekistal. 15 Ka navong nilesi, nindem kat hatkatien takeih onak koa namumoni ral minuk ka ral min tirendan vasi keil keke nirmu lintei mun keil en mari oai tai.”