3
Pol vis Kristin keil avahis ven umen onen
Tuemeitel ka ahinameitel keil, navit mahit ekor en selusien onak. Mihehis ven komeitel eli keke selusien onen Ahi heles heka vasi out hekalah, ka meatin keil koa alonge ikuri ka ihati lati hesuval koa kami mikuri. Mihehis emun keke Ahi heting koe komeitel ven meatin tisa keil koa sakien one kalkali. Keil amul asak purun komeitel veni keil houlu arkurtei anatin en more longlongien enek.
Ka mihendem kati keke Ahi vinvin keke mivaling desien onami eni. Kei hesan keihoen min kami ka heting koe kami keke Temat koa vi vatte ten tisaen hesakras vapurun kami. Ka veni mimusil kat Asuv Iesu, metkilea revi keke mimul milong kat tounah koa metviteni min kami tuai, ka miheles mihoum vasi tounah koa metviteni en leta ekek.
Metvisi keke Asuv Iesu hesakin kami miheilea revi mok envatien onen Ahi ka hesakin kami mihelomal hekeih en demkatien onami hesuval koa Iesu Kristo mun mumoni.
Pol sel kat Kristin keil keke anahitei tarmah
Tuemeitel ka ahinameitel keil, metmeng kat kami en isen Iesu Kristo, Asuv orer, keke minahatei vesesal ven koakeil ten sios koa avi tarmah, koa armusiltei sise koa metsani min keil. Kami mikilea revi sakien onomaitel keke miheleisungeini. Navong metro ral min kami, metrovitei tarmah keil. Anien vasi keil koa metkani, metvuli. Metmum keih ka avetin onomaitel mue houlu. Meneai ka vongien, metmum keih en umen sav keil keke metvahotin uite teni keke metrosantei umen koa meas min kami. Avaseini metkilea metvis kataunien onami veni metvi eiloheh keil onen Iesu, metromumontei, veni emeitel vati metvatie lat sakien ten moulien koa emeitel vati kami mivaleisungeini. 10 Mihendem kat selusien koa metsani min kami navong metro veah ral min kami metvit, “Koakeil aseseini avoum, mihersantei anien min keil.”
11 Metviten tounah enek veni metkur longlongien keke tei en kami avi taripeng. Keil armumtei, ka amules uva en usite onen meatin savsav keil. 12 En isen Asuv Iesu Kristo, metmeng kat meatin keil enek ka metsel kat keil anoumontei mun vati sakien koanik. Tahos imok keil ito raeng ka um hekeih keke akilea avalei kat revi teim one.
13 Ka kami, tuemeitel ka ahinameitel keil, avemi namahtei keke mivoumon asa koa mal. 14 Vahesa tei en kami, irlong kattei selusien koa metmutisi en leta ekek. Munak hemukonek, mihelei kilea koakeil enek. Minapiltei mun natal keil vasakin keil avamemou eni. 15 Ka minoumontei min keil nasuval koa avi vativieh en kami. Vuo, mihesel kat keil hesuval koa avi tuomi keil en demkatien.
Selusien ekor
16 Metvisi keke Asuv Iesu, koa vi vatte ten tomat, heto hetal min kami vasi, ka hesakin tomat onen hel en moulien onami en avong vasi ka en sise vasi keil.
17  Inau, Pol, namutis navit mahiten more min kami.
Sakien koa namutis selusien ekek vi metai onak en leta vasi keil koa namutisi.
18 Metvisi keke more envatien onen Iesu Kristo, Asuv orer, heto ven kami vasi.
3:1 Kol 4:3; 1Tes 5:25 3:3 1Kor 1:9; 1Tes 5:24 3:4 2Kor 7:16; Kal 5:10; 2Kor 7:15; 1Tes 4:10 3:6 Mat 18:17; Rom 16:17 3:7 Plp 3:17; 1Tes 1:6 3:8 1Kor 4:12; 1Tes 2:9 3:9 Mat 10:10; 1Kor 9:4,6; 4:16; 1Tes 1:6 3:10 1Tes 4:11 3:11 1Tim 5:13 3:12 Efes 4:28; 1Tes 4:11 3:13 Kal 6:9 3:14 1Kor 5:9,11 3:15 1Tes 5:14 3:16 Rom 15:33; 1Tes 5:23 3:17 1Kor 16:21