42
Siob vit leini keke selusien onen romaltei
Siob 42:1-6
1 Evus, Siob vit kesi min Iahova vit,
2 “Iahova, nakilea keke keik kokeih vis kokeih emok.
Kokilea kovoumon vasi tounah koa em vati.
3 Kovis nau nakeih kat meteisauen onom mukave,
navong inau meteisauen onak tovuol.
Naselus en tounah keil koa narkileatei,
en marmari tounah koa nasakras mailea eni.
4 Koviteni minau nitaengonuk navong koselus,
ka nisak visi nihit kes selusien keil onom.
5 Mulamu, nalong kilea keik ka en asas koa naraengon meatin sav keil aviteni minau,
ka kosa, nalei kilea keik esuk en metok varei.
6 Sakini namemou en tounah keil naviteni.
Nikur ris selusien onak, ka nikul en vulimeas vatie lati
keke nalonge tisa houlu ven asa namumoni.”
Ahi san tokolkatien min Siob mulin tounah koa kuri mulamu
Siob 42:7-17
7 Navong Iahova selus min Siob evus, kei viteni min Elivas ten out Teman vit, “Tinok katuk ral time keilu onom, veni korselus entei anatinien enau vasuval more eiloheh onak, Siob, mumoni.
8 Kosa, mihekur buluk oulu (7) ka sipsip oulu heha min Siob, ka mihesan keil hesuval sanien votut tai minau en usite onami. Siob hehis ven kami ka inau nilong hisien onen ka nirpuruntei kami hesuval koa mal keke mihekuri ven selusien tavaruen onami. Veni kami merselus entei anatinien enau vasuval koa kei mumoni.”
9 Elivas, Bildat, ka Sofar telmumon asa koa Iahova viteni min keitel telvoumoni. Ka Iahova raengon hisien onen Siob en usite onealu.
10 Navong Siob vis ven time keitel, Iahova rokol kat ris Siob en tounah keil onen ka ling kati hatte elu eris en tounah keil kei lahi mulamu.
11 Tunali Siob vasi keil, ka ahinali keil emun, ral min time sav keil onen umai asao eni. Keil amumon mari anien ral mini en teim sen. Asan enmahisien one mini ka akatauni ven mahien vasi keil Iahova sani mini. Tetai en keil san hati mani ka ring koa vi gol mini.
12 Iahova rokol kat avong ekor onen Siob mulin sakien koa rokol kati mulamu. Siob, sipsip osen keil avi taosen teindan ehat (14,000), kamel keil avi taosen ahetai (6,000), buluk keil avi taosen elu (2,000), ka dongki keil osen avi taosen tai (1,000).
13 Natnali keil oulu (7) ka natnahin keil etel (3).
14 Natnahin koa moeite vise en Semaemah. Koa elu eni vise en Kesiah. Ka koa tasite en keitel vise en Keren-Hapuk.
15 En out vasi en out netan, ahin keil atovuol koa avales keil avatahos imok vasuval natnahin Siob keitel. Ka tata oneatel sani min keil atan ka buluk ka sipsip keil suval koa sani min tueatel keil.
16 Siob moul handred tai ka hanumau elu (140) eris. Ro taveah keke les havinali ka havinahin keil ral min titae keil emun.
17 Navong Siob matu vis matu revi mok, emat esuk.