17
Koanek selusien onen Iahova koa ka en provet Seremaea vit,
“Mahien hel en koakeil envatien one romultei enau ka koakeil aviles ranau.
Keil aling desien one en keihoen onen meatin enges.
Keil asuval holeai keil koa amoul en out volvol,
keil asakras avales tahosien en moulien one.
Moulien one hehi heite hon hesuval out tames,
ka hesuval out koa sol purun atan teni keke tounah tovuol vamoul ien.
 
“Ka koakeil aling desien one mul enau,
inau nitokol kat keil.
Keil isuval vatiai keil koa aluhi mul en vali oaisal,
koa lite keil amoul arokol oai.
Avaseini mahien keil umai hesuval meteiai ritin keih,
keil asakras avametau veni iles tahosien hesuval vatiai koa oute keil memeasen lises.
Avaseini ous romustei,
keil amules arekao.
 
“Tin meatin keil vilehilu, lises mul liluvos.
Meatin tovuol vailea vasi en tisaen keil koa mul suai eni.
10 Ka inau, Iahova, nalei kilea en rendemien onen meatin keil,
ka nalei revi tounah koa mul en tine.
Sakini, nisa kesi min keil housil sakien keil koa amumoni,
ka nisan heite ten umen one min keil.
17:8 Sam 1:3 17:10 Sam 62:12; Rev 2:23