2
Sosua sila meatin keil taleisuaien uva en out Seriko
Sosua 2:1-24
Evus, Sosua sila meatin elu taleisuaien ran out Akasia, out koa aro ien. Meng kat keilu keke luvalei suain atan ten out Kenan, ka luhelei revi mok taon ten out Seriko. Navong luva ka lurokol taon enek, luva luro en teim tai onen hoeaso tai, isen Rehab. En vongien enek, asuv houlu ten out Seriko raengoni keke me-Isrel elu lumai luvalei suai en out. Sakini, san selusien koanik va ven Rehab koa vit, “!Meatin elu koa lumul en teim onom, lumai luvalei suai en out vasi! !Lah lat keilu luvasital!”
4-6 Ka navong raeng kotehei keke meatin keil onen asuv houlu avamai veni, Rehab kur meatin keilu enek ka kav koe keilu en vangi flakis* koa ling revi en hoi eim onen. Sakini, navong meatin keil onen asuv houlu umai avisi, kei vit, “Anatin, meatin oteta keil umai en teim onak ka inau narkileatei keke keil ten out kave. Ka keilu lulokovein teim sak navong meteiai munu ka akoteh en meteau ten taon. Inau narkileatei luva kave. Ka munak mihekatau sil keil hekalah, mikilea mivatokol keil.” Sakini meatin keil onen asuv houlu, alokovein taon ka akoteh en meteau. Keil uva amul alekat me-Isrel keilu taleisuaien uva soutin rokol out koa sise ka pas Oaisal Sodan.
Navong meatin keilu taleisuaien lusak mesein keilu luvamatil, Rehab vina nesa en hoi eim, sao en keilu ka vit, “Nakilea keke Iahova san atan ekek min kami. Meatin vasi keil en kantri ekek ametau vareis en kami. 10 Komai melonge mukave Iahova mumon Atas Tahilhili memes ven kami navong mimul milokovein out Isip. Melonge mun mukave mimu vini Sihon ka Og, asuv houlu keilu ten out Amor en out ist ten Oaisal Sodan. 11 Komai memetau houlu navong melonge mukok, ahang onomai mat varei ka keihoen onomai vasi tovuol emun. Anatin eli, Iahova, Ahi onami, kei vi Ahi ten out nesa ka ten out netan. 12 Kosa milhehat kati minau en isen Iahova keke milhoumoni min onak keil hetahos hesuval koa inau namumoni min kamil. Ka milhoumon etai metai minau keke malei kilea ka maling desien onak en kamil. 13 Milhehat kati minau keke navong meatin keil onamil imai ekok, milhoutut tata ka mama onak, tuak keil ka tukahin keil, hetal min one keil emun. !Milnamaentei anou vini komai li!”
14 Keilu luviteni mini luvit, “Iahova hekur moulien onomal munak melhermumontei tounah koa melviteni. Munak kirvitentei min meatin etai asa koa melmumoni, melvat kati minuk keke navong Iahova hesan atan ekek min komai, milhoumoni hetahos minuk, milhehi anatin en selusien keil onomal.”
15-16 Rehab viteni vit, “Milhehina lah en hou keil keiva veni meatin onen asuv houlu anahotin kamil. Milheto suai en out enek avong hetel hetokol avong keil imai ris. Hekatau suk, milkilea milvaha en sise onamil.” Eim koa Rehab ro ien amumoni kapil ral min vieh ten taon koanik. Sakini navong aselus evus, kei ling viau ka en titi metareh ten eim onen, ka maen lumali lusuvul ien luvita netan luva.
22 Meatin keilu taleisuaien luva en hou keil ka luro suai. Meatin keil onen asuv houlu, alekat keilu en out vasi avong etel, ka arvotintei keilu. Sakini uva ris en out Seriko. 23 Evus, meatin keilu taleisuaien lumita netan ran hou keil, lumu koteh Oaisal Sodan ka luva ris ven Sosua. Navong lulesi, luvitehiteni mini tounah vasi koa kistal ven keilu. 24 Ka luviteni mun luvit, “Komal melkilea keke Iahova sa vasi atan enek min ir. Meatin vasi ten out enek ametau vareis en ir.”
2:1 Hib 11:31; Tiem 2:25 * 2:4-6 Flakis vi oumunai tai koa vatte taveah rokol mita tai ka tahos avoumon eisin eni. Alingi en hoi eim keke meteiai vaani suval heih. 2:10 Eks 14:21 2:10 Nam 21:21-35