6
Ahi san taon ten out Seriko va min hen me-Isrel keil
Sosua 6:1-17,20-25
1 En taon ten out Seriko, meteau mules koteh ka meatin tavaeen keil alosil kati keke me-Isrel keil irvatei neim. Amumoni meatin tovuol vaha neim vuo vamea hae rani.
2 Ka Iahova viteni min Sosua vit, “Inau nasa lat taon ten out Seriko vaha en hem, ral min asuv houlu ka meatin keil tavaeen teni.
3 Keik ka meatin keil tavaeen onom mihekarahit mari taon enek avong hetas en avong vasi hetokol avong ahetai (6).
4 Ka pris oulu (7) ikur hon ten mari sipsip ka uhi ilamu en Bokis ten Hatkatien onen Ahi. Ka en avong oulu (7) teni, keik ka meatin tavaeen keil onom miheha mihekarahit taon avong oulu (7) navong pris keil il uh hon keil one.
5 Evus, pris keil uhi hekeih hatte hetah ka hetaveah. Ka navong miraengoni, meatin vasi keil imakul hekeih, ka mari vieh ten taon hemerangle. Hesakini meatin tavaeen keil onom akilea ika mal iha neim en taon enek.”
6 Sakini Sosua vise ruain pris keil ka viteni min keil vit, “Mihekur Bokis ten Hatkatien ka kami oulu (7) mihekur hon onami ka miheha mihelamu eni.”
7 Evus, kei meng kat meatin keil keke aval avakarahit mari taon ten out Seriko. Ka meng kat vangi meatin tavaeen keil iha ilamu en Bokis ten Hatkatien onen Iahova.
8 Ka suval koa Sosua viteni min meatin keil, pris keil oulu (7) amuh hon one ka ilamu en Bokis ten Hatkatien.
9 Ka meatin keil tavaeen, vangite tai akaka amulamu en pris keil, ka vangite tai akaka akatau en Bokis ten Hatkatien. Ka hon keil, pris keil amuhi muleleh.
10 Ka Sosua meng kat meatin keil keke anamakultei mau ka anahiten etai selusien hetokol avong kei hehiteni min keil.
11 Sakini meatin keil enek akur Bokis ten Hatkatien onen Iahova ka akarahit mari taon enek heite tas. Evus, keil umai ris en out koa amumon votevav one mul ien ka akur vongien en out enek.
12 Out mulan eris en avong elu eni, en visokon semau, pris keil avous Bokis ten Hatkatien onen Iahova.
13 Keil uva amual amusil vati sakien koa amumoni mulamu: meatin keil tavaeen amual amulamu, ka pris keil koa, amuh hon one akatau en keil. Evus, pris keil koa mun, avous Bokis ten Hatkatien, ka vangi meatin tavaeen keil akatau en keil vasi. Ka hon keil, pris keil amuhi muleleh.
14 En avong elu enek, amual rahit eris taon, ka uva ris en out one. Amumoni mukonek rokol avong ahetai (6).
15 Out mulan en avong oulu (7) teni, amea ka amual akarahit eris taon enek en vati sakien koa amumoni tuai. Ka en avong enesek, amual rahiti avong oulu (7).
16 Ka navong akarahiti evus, en avong oulu (7) teni, navong pris keil armuhtei mau hon ten mari sipsip one, Sosua viso keih va min meatin keil vit, “!Almakul, veni Iahova san taon ekek min kami!
17 Taon enek ka tounah vasi koa mul ien, mihou rasilini suval sanien votut tai min Iahova. Rehab enges ral min onen keil, minou vinitei keil veni kei ling suain meatin taleisuaien orer.”
20 Ka navong pris keil amuh hon keil one, meatin keil araengoni ka amakul keih. Navong amumoni mukonek, mari vieh ten taon ten out Seriko merangle ka meatin keil tavaeen avina varei en hou. Uva neim en taon ka asoso koe meatin keil teni.
21 Uva ral min naef tavaeen keil one ka amu vini tounah vasi koa amul ien: meahos ka ahin keil; titiali keil ka ulmatu keil; ka buluk, sipsip ka dongki keil emun.
22 Navong amumoni mukonek, Sosua viteni min meatin elu onen koa lulei suai en out vit, “Milheha neim en eim onen Rehab. Milhekur kei hetal min onen keil imemea ran out enek hesuval koa kamil milvat kati mini.”
23 Sakini luva lukur Rehab ral min tata ka mama onen, ka onen vasi keil. Alah keil avaha ran out ten rea ka luling keil vesesal en out me-Isrel keil amumon votevav ome mul ien.
24 Evus, alah tounah keil koa amumoni en gol, silva, brons ka aean, ka alingi en out aso ruain tounah keil onen Iahova mul ien. Evus, asan ahang kan rekau en taon ka kan lini vita rokol atan ral min tounah vasi koa amul ien.
25 Ka Sosua kur koe moulien onen Rehab ka onen keil. Kei mumoni mukonek veni kei ling suain meatin keilu taleisuaien koa sila keilu luva Seriko. Ka titan keil koa akistal eni amul veah en out Isrel rokol kosa.
Evus, Sosua ka me-Isrel keil uvae ral min me-Kenan keil en usite tai va rokol usite sav ten kantri enek. Meatin houlu ten out enek, amu vini keil, ka keil koa, akur koe keil keke avato vatal min keil.
Navong amumon rea evus, Sosua riti atan min vatiamal keil onen me-Isrel koa avi tai tan elu (12). Keil uva en out savsav keil one ka aro en meteimal keil koa me-Kenan keil amumoni.
Sua houlu muli va, Sosua lah ruain me-Isrel keil umai ris out tas.