16
Iesu viten tatavolien tai usil mukave meatin keil koa asak mesein keil ven navong iha en out nesa suval avat tai koa mumon vatin
Navong Iesu mul veah en sise vaha en out Serusalem, kei viten tatavolien koanek min meatin keil onen vit, “Avong tai, hetamen tai mul koa bisnis onen mul. Ka kei ling meatin sav vi avat valekat bisnis ka tounah sav keil onen. Avat enek mum va vio … hetamen onen kur longlongien vit avat onen mul purun tounah keil onen. Sakini, kei vise avat onen mai veni ka viteni mini vit, ‘?Asa ke namul nalonge usiluk? Kiha kitis usil umen vasi keil koa komumoni en usite onak, veni, hervitei tuetin, niso latuk ran umen ekek.’
“Navong avat enek longe mukok, viten sasen eni vit, ‘Hetamen onak heso lat nau ran umen onak. ?Munak hemukonek, numon sa varei? Avek rokeihtei makah atan, ka namemou mahiram ven mani min meatin keil. !Ah! Nakilea asa moumoni. Munak numon koanik, navong nivus ran umen ekek, time keil onak hel, ka keil ikur revi nau en teim se.’
“Sakini, avat enek vise retai en meatin keil koa kaon one mul ral min hetamen onen. Koa mai mulamu, avat enek visi vit, ‘?Kokur sa ran hetamen onak?’
“Ka meatin enek vit kesi vit, ‘Nakur teram oel ten olip heite handred tai (100).’
“Ka avat enek viteni mini vit, ‘Kikalah, kikur pepa ten kaon onom, kitei mani teni hemita netan hehi hanumau elu ka halualim emun (50) enges.’
“Evus, kei vise tateisav emai ka visi vit, ‘?Ka keik, kokur asa ran hetamen onak?’
“Ka kei vit kesi vit, ‘Mulamu, nakur bak pulaoa taosen tai (1000).’
“Ka avat enek viteni mini vit, ‘Kikur pepa ten kaon onom ka kitei mani teni hemita netan enges vavinvin en bak hehi handred outel (800) enges.’
“Sakini, navong hetamen long usili keke avat onen mumon vatum, kei viteni mini vit, ‘Avaseini keke komumon vatin, sakien onom rie lat meteisauen onom veni komul komundem usil avong keil koa hemai veah navong niso latuk ran umen enek.’ ”
Evus, Iesu viten aneite ten tatavolien enek min meatin keil onen vit, “Naviten koanik veni meatin keil ten out netan amumon vatie navong keil amum ral min tue keil keke atahos min keil navong aro veah en out netan. Ka sakien keil one tahos imok mulin sakien onen koakeil amul en meneai. Ka naviteni min kami, mani onami sakras val vataveah. Sakini, mihelah meatin keil imai avahi tuomi keil ka mihekataun keil hetal tounah keil onami en out netan ekek. Veni navong mihelokovein tounah keil onami en out netan, time keil onami ikur revi kami en teim se keil en out nesa.
10 “Meatin koa mul losil kat revi tounah koa havivi, kei kilea valosil kat revi tounah koa marite mun. Ka meatin koa purun tounah koa havivi, kei kilea emun vapurun tounah koa marite. 11 Sakini, munak meatin keil armundesinuktei vatal min tounah keil ten out netan, Ahi mun sakras vandesinuk vatal min more tounah keil koa hetetamen imok. 12 Ka munak korlei kat revitei tounah keil koa Ahi lingi en hem en out netan, kei sakras vasan etai mun tounah minuk en out nesa.
13 “Slev tai sakras voum ven asuv valu. Munak hemukonek, kei hesesein tai, ka envatien onen hel en tateisav. Vuo helong kat tai, ka helele hetisa en tateisav. Kosakras kovaha netan min Ahi vatal min mani.” 14 Navong Farasi keil along selusien keil ekek, keil amunge kat Iesu, veni envatien one mul en mani.
Iesu selus usil sakien koa Farasi keil arali koteh mengkatien keil onen Ahi eni
15 Ka Iesu viteni min Farasi keil vit, “Kami mimum keih vasakin mesav keil avandemi avahit mimal revi, ka Ahi kilea en rendemien onami. Veni tounah keil koa meatin keil amundemi avit tahos, kei tisaso en meten Ahi.
16 “Mulamu, mengkatien keil onen Mosis ka tisien keil onen provet keil arie lat sise onen Ahi min meatin keil rokol avong koa Sion mai ka vi baptaes en meatin keil. Ka kosa heha, avitehiten more longlongien usil hiasuvien onen Ahi. More longlongien enek mul karahit out vasi ka meatin houlu amul asak visi keih keke avasakin Ahi vamai vahi asuv houlu en moulien one.
17 “Avaseini munak out nesa ka out netan luhevus en avong etai, ka hati selusien ten mengkatien keil onen Ahi, keihoen teni sakras vavus. 18 Ven koanik, meatin koa lokovein ahin onen ka eva kur ahin sav mul mumon tisaen ral mini. Ka meatin koa retalihe ral min ahin koa lokovein meatin onen, kei mun mul mumon tisaen ral mini.”*
Iesu vihisei usil mahien koa hemai en koakeil enmahisien one tovuol
19 Iesu viten tunien tai min meatin keil vit, “En avong tai, meatin tai mul koa tounah onen houlu. Kei musin en more eisin keil koa mani ten keil keih, ka kilea vahul tounah vasi enges koa kei en vati. En moulien onen, kei longe tahos lises. 20 Ka vesesal en meteau ten teahu onen, lisenges meatin tamun mul matil ien ka mul viram en meatin keil ven mani, isen Lasaros. Kei, tounah onen tovuol, sakras vakaka, ka aven vi manu enges. 21 Ka navong rotos mukonek, huli keil umai ka aramus manu keil onen. Ka en avong vasi, Lasaros en vati van soke anien keil koa meatin enek rivini va.
22 “Luro mukonek va vio … meatin koa tounah onen tovuol enek mat, ka angelo keil akuri alingi rondan ral min avu Ebraham en mari anien tai en out nesa. Rovitei tuetin, meatin koa tounah onen houlu emun mat, ka arahini. 23 Ka meatin enek va en out onen Temat, ka mahien onen mariso. Ka navong lele soutin vina nesa, les avu Ebraham ka Lasaros koa mul rondan en usite onen. 24 Sakini, kei viso keih vit, ‘!Avu Ebraham, em hemahis nau li! Sila Lasaros hemita ekok keke hesan hati oai mamuni vasakin mek vamandil neli. Veni namul nalonge tisa houlu en ahang ekek.’
25 “Ka Ebraham viteni mini vit, ‘Natkuli, kindem visi mau. En moulien onom en out netan, keik koles tahosien en avong vasi, ka Lasaros les mahien enges. Ka kosa, kei les tahosien en out ekek, ka keik, komul kokur mahien esuk keisom. 26 Ka tamun, mari poal tai mul koa keite teni tovuol koa ka vas keik ran komal. Sakini, komal melsakras melvoual koteh keke melvahat venuk. Ka keik ka koakeil emun aro ral minuk misakras mivalokovein out onami keke mivamai ekok ven komal.’
27 “Ka meatin koa tounah onen houlu viteni mini vit, ‘O avu Ebraham, hemukonek napeahik kisila Lasaros heha en teim sen tata onak. 28 Veni en out enek, tuak elim (5) telro ien. Kimaeni heha hesel kat keil ihiles ran sakien tisa keil one keke anamaitei en out ten mahien ekek.’
29 “Ka Ebraham vit kesi mini vit, ‘Mengkatien keil onen Mosis ral min selusien keil onen provet keil telamu mul tuai keke vasan selkatien min vatiamal keil onom. Mal keke ilong kat selusien keil teni.’
30 “Ka meatin enek vit kesi mini vit, ‘!Vuo! !Avu Ebraham, koanek rovinvintei veah! Ka vahit meatin tai vamoul eris ran matien ka vaha vahisu ven keil, keil ilei kilea suk, ka ihiles moulien one ran sakien tisa keil one.’
31 “Ka Ebraham selus ekor mini vit, ‘Munak keil arlong kattei mengkatien keil onen Mosis ka selusien onen provet keil, keil asakras avalong kat selusien onen meatin tai koa moul eris ran matien.’ ”
16:8 Efes 5:8; 1Tes 5:5 16:10 Mat 25:20-30; Luk 19:17-26 16:13 Mat 6:24 16:14 Mat 11:12-15; 5:31-32; Mak 10:11-12 16:15 Mat 23:28; Luk 18:9-14; Pro 24:12 16:16 Mat 11:12-13 16:17 Mat 5:18 * 16:18 Ahi vit meatin koa retalihe nalokoveintei ahin onen. Ka en avong onen Iesu, Farasi keil houlu amul amumon sakien koanek. 16:18 Mat 5:32; 19:19; Mak 10:11-12; 1Kor 7:10-11 16:21 Mat 15:27; Mak 7:28; Luk 15:16 16:31 Sion 11:44-48