21
Iesu vihisei usil vati sanien sa koa mal en meten Ahi
Navong Iesu rondan veah visein meatin keil en teahu ten Eim Votut onen Ahi, kei seipat ka les meatin keil koa tounah one houlu amul asan sanien keil one vakataun umen ten Eim Votut. Kei lele mun ka les vatina tai mai koa tounah onen tovuol. Kei ling titi mani elu nges vahi sanien onen. Sakini Iesu viteni vit, “Naviteni min kami, vatina enek koa vi livere, sanien koa kei lingi mulin sanien vasi keil koa mesav keil asani. Veni meatin sav keil asan sanien one ran asa koa vi teisao one, ka koa marite akuri vi one enges. Ka vatina ekek koa vi livere, kei san tounah vasi koa kei kuri vamoul vatal mini.”
Iesu vit luvati min meatin keil onen keke avong keil ten mahien mul mai
Tei en meatin keil onen Iesu amul alele rahit en Eim Votut onen Ahi ka tounah koa mul en teahu teni. Alesi keke amumoni tahos imok ral min ahat keil koa vihil ka ral min more sanien sav keil. Navong amul aselus usili, Iesu viteni min keil vit, “Avong tai mul mai koa u lin vasi tounah keil ekek koa kami mimul milesi. Anatin, ahat hetovuol emun helomal hel.”
Sakini, meatin keil onen Iesu avisi avit, “?Tiser, tounah keil enek hekistal en avong sa varei? ?Ka asa varei hehi metai koa hetie lati keke kei mul mai vesesal?”
Iesu viteni min keil vit, “Mihelekat revi kami, veni meatin keil houlu imai keke avaluvos vis kami. Keil ihiteni keke amul aselus en isok ihit, ‘!Inau navi Mesaea koa Ahi vat kati!’ Ka ihiteni mun ihit, ‘!Keite ten tounah vasi mul mai vesesal ke!’ Ka minakurtei anatin en keil ka minousiltei keil. Navong kami mihelonge keke vaeen mul kur out en kantri tai, vuo vangi meatin keil amul uvae kat keil eris, minametautei. Sakien keil ekek ikur out helamu, ka rovitei veah avong ekor keil.”
10 Kei viteni mun vit, “Kantri tai hevae kat kantri sav tamun, ka asuv houlu tai hevae kat tateisav. 11 Alu keil takeih helu, ka an tatisa houlu mun hemai hekistal. En out houlu en out netan, amai heat mari vangi meatin keil ka mesaien keil takeih hemai hou vinvini keil. Ka en teilang nesa, tounah keil houlu imea ikistal koa hesakin meatin keil imetau vis imetau imok.
12 “Ka helamu, navong tounah keil ekek hermaitei mau, meatin keil imai ihuli kat kami ka umoni hetisa min kami. Keil iling kami en hen hetetamen keil ten eim keil tahihiseien ka ison kami miheha en eim takeih. Ilamun kami mihelomal en meten asuv houlu keil ka avat keil ten kavmen veni mivi meatin keil onak ka mimul mimum en isok. 13 Ka koanek hehi ahho onami keke mihehitehiten more longlongien min keil. 14 Ven koanik, tahos miheling rendemien onami keke mihermundemko ramattei usil selusien sa koa mihesak meseini keke mivahiteni min keil en usite onami. 15 Veni inau nisan selusien ten meteisauen min kami koa vativieh keil onami asakras avahiten etai mun tounah vaha kat kami vuo avasa kes selusien onami. 16 Tata onami keil ka mama onami keil, tuomi keil ka onom kati keil emun, keil imae lat kami miheha en hen vativieh keil onami. Ka tei en kami, u vinvini keil imat. 17 Meatin vasi keil tine heat kami veni mimum en isok. 18 Ka keil asakras avapurun moulien onami ten lisenges. 19 Anatin, munak mihelomal hekeih en demkatien onami, mihekur moulien koa sakras vavus.
20 “Navong milesi keke meatin keil tavaeen akarahit taon ten out Serusalem, miheilea keke hervitei tuetin u rasilin vasi. 21 En avong enek, koakeil amul ien ikalah ilokoveini, ka koakeil amul en out keil vesesal eni, anasak vistei anamai ris neim eni. Ka koakeil amul en provins ten out Sudea ilohosai iha en vatihou keil. 22 Avong keil enek hehi ‘Avong keil ten Mahien’ koa Ahi houmoni hekistal en koakeil ten out Serusalem suval koa kei vit luvati en Tus Votut onen. 23 En avong keil enek, hetisa min ahin keil koa ameas ka koakeil amul arounat en tivava keil. Veni avong keil takeih hemai hekistal en meatin keil ekek ka ilonge hetisa hemarite mok ven mahien ten vurohien onen Ahi heha min keil. 24 En avong ten vaeen, isal vini tei en keil imat hetal min naef keil, ka teimun en keil ipar kat keil ka ilamun keil iha en hen asuv keil ten kantri sav. Ka Ahi hemaen taon ten out Serusalem min koakeil arvitei Siu keke ito eni ka ipuruni hetokol avong koa Ahi hehiteni keke avong one vinvin.
25 “Tounah keil hehi houlu hekur out en meteiai, en avati, ka en hitu keil emun. Sakini, en out netan, hesakin mari tahe keil imea ka imavul kat out ut en kantri keil houlu. Navong meatin keil ilesi, ilanglango en demkoen ka iat lohe en metauen. 26 Navong meatin vasi keil iles tounah keil ekek mul mai en out netan ka iles tounah vasi keil ten teilang mul viles, houlu en keil, mete hemalikelik ven metauen. 27 Ka navong keil iseipat hehina nesa, iles ‘Natin Meatin hel hemita en mahmah keil ten out nesa’ Daniel 7:13 hetal min keihoen ka mari muohien onen. 28 Navong tounah keil ekek hekur out, mihelomal hekeih ka mihehati lat vatumi hehina nesa veni Ahi vesesal vamai keke voutut moulien onen meatin keil onen.”
Iesu vit usil mukave meatin keil ilei kilea keke avong ekor keil mul mai
29 Evus, Iesu viten tatavolien koanik min meatin keil onen vit, “Mihendem vis vati fik keil hetal min vatiai sav keil emun. 30 Navong aling oute keil one, mikilea keke avong ten romrom vesesal ke. 31 Ka en vati sise ekek emun, navong miles mahien keil ten avong ekor keil mul kistal, miheilea keke avong Ahi hemai houmon hiasuvien onen hel en out netan vesesal ke.
32 “Naviteni anatin min kami, meatin keil etin koa amoul kosa iles mahien keil ekek hekistal en taon ten out Serusalem. 33 Out nesa ka out netan luhevus, ka selusien keil onak sakras vavuol en avong etai.”
34 Iesu sel kat meatin keil onen vit, “!Mihesak mesein kami! Minamaentei rendemien onami nal ramattei en usite ten asa koa mihean vini kami eni vuo mihemun vini kami eni, vuo en tounah sav keil ten out netan. Veni, munak hemukonek, en avong koa Natin Meatin hemai ris eni, mihetimanin eni hesuval meatin tai mutimanin navong lesi mul murur en eitapolis tai. 35 Veni avong enek hekistal en meatin vasi keil en out netan. 36 Sakini, mihesak mesein kami lisenges. Ka mihehis keke mihekur keihoen hevinvin keke mikilea mivalomal vakeih vatokol keite ten mahien keil ekek, keke mihermemoutei navong mihelomal en meten Natin Meatin.”
37 Ka en avong vasi, Iesu mul visein meatin keil en teahu ten Eim Votut. Ka navong vongien mai, kei va matil en Hou Nei Olip ral min meatin keil onen. 38 Ka en visokon semau en avong vasi, meatin keil uva en teahu ten Eim Votut keke avalong hihiseien keil onen.
21: Mak 12:41-44 21:3 2Kor 8:12 21:4 Mat 24:1-21; Mak 13:1-19 21:6 Luk 19:44 21:8 Dan 7:22; Plp 4:5 21:9 Dan 2:28 21:10 Aes 19:2; 2Kron 15:6 21:12 Mat 10:18; Luk 12:11 21:14 Mat 10:19 21:15 Umen 6:10 21:16 Mat 10:21-22 21:18 1Saml 14:45; Luk 12:7 21:22 Dut 32:35; Hos 9:7; Ser 46:10 21:23 1Kor 7:26 21:24 Ser 21:7; Esra 9:7; Sak 12:3; Sam 79:1; Aes 63:18; Dan 9:26; 12:7; Rom 11:25; Rev 11:2 21:25 Aes 13:10; Esek 32:7; Soel 2:30-31; Rev 6:12-13; Sam 46:2-3; 65:7; Aes 24:19 21:26 Hag 2:6,21 21:27 Mat 26:64; Rev 1:7 21:28 Rom 13:11 21:28 Mat 24:32-35; Mak 13:28-31 21:33 Luk 16:17 21:34 Mat 24:48-50; Luk 17:27; 1Tes 5:3 21:35 Aes 24:17 21:36 Mak 13:33; Rev 6:17 21:37 Luk 19:47; 22:39