3
Iesu sakin hen meatin tai mai tahos en Sabat
1 Iesu va ris en eim tahihiseien, ka en out enek meatin tai hen kali.
2 Ka koakeil aro en out enek, amul alei mamah eni keke avalesi munak kei houmon hen meatin enek hetahos en Sabat veni alekat tounah koa akilea avasan selusien tisa vaha kati.
3 Ka Iesu viteni min meatin enek helomal en meten meatin keil.
4 Evus, vis keil vit, “?Mengkatien onen Mosis maen ir keke rovoumon sa en Sabat? ?Maeni keke rovakataun meatin, vuo rovapuruni? ?Maeni keke rovoutut moulien onen meatin tai, vuo rovou vini?” Ka keil aro raeng enges.
5 Navong Iesu lei rahit keil, tin kat keil. Ka longe tisa keke rendemien one koteh en tounah onen Ahi. Evus, Iesu viles ka viteni min meatin koa hen tisa vit, “!Kitea hem!” Ka navong mutea eni, hen mai ris tahos.
6 Ka navong Farasi keil ales asa koa mumoni, amea ran out enek, ka, hatte tas, uva alah ruai ral min Siu keil koa asuv kat hiasuvien onen asuv houlu Herod. Ka alekat vis sise tai koa akilea avouas Iesu vamat vaka ien.
Meatin houlu amusil Iesu
7 Iesu ral min meatin onen keil uva en Mari Oai ten out Kaleli, ka meatin keil houlu amusili. Tei en meatin keil aka en provins ten out Kaleli, Sudea,
8 ka Itumea. Ka koakeil emun aka en taon ten out Serusalem, Taer ka Saedon. Ka teisav en keil aka en usite sav ten Oaisal Sodan. Meatin vasi keil enek umai ven Iesu, veni araengon asa koa kei mul mumoni.
9 Meatin keil avi houlu ramat, sakini Iesu viteni min meatin keil onen vit isak mesein vot veni keke meatin keil anating kattei kei.
10 Koakeil amesai amul amuting keil avatokol Iesu, veni kei mumon meatin houlu atahos eris.
11 Ka navong meatin keil koa ninin tisa mul en keil alesi, uva netan mini, ka amis kai avit, “!Keik, kovi Natin Ahi!”
12 Ka Iesu vul kat ninin tisa keil vit anahitentei min meatin keil anahit kei vi isei.
Iesu rie lat meatin teindan elu (12) keke avahi eiloheh keil onen
13 Evus, Iesu vina en vatihou nesa ka rie lat meatin koa kei en vati avousili, ka umai veni.
14 Ka kei rie lat meatin teindan elu (12) keke avousili avamai avahi eiloheh keil onen, avaha avahitehiten more longlongien min meatin keil,
15 ka avahile lat ninin tisa ran meatin keil vatal min keihoen ten isen.
16 Koanik vi isen eiloheh teindan elu (12) koa Iesu rie lat keil: Saemon (koa Iesu ling isen tamun vi Pita);
17 Tiemes ka tunali Sion koa Iesu vise keilu en ‘natin voulul’ (koa tata onealu Sepeti);
18 Andru, Pilip, Batolomiu, Matiu, Tomas, Tiemes (natin Alveas), Tatios, Saemon (koa vi lariken),
19 ka Sudas Eskariot koa hemae lat Iesu heha en hen meatin tisa keil.
Farasi keil avise Iesu en Temat
20 Iesu rie lat eiloheh teindan elu (12) onen evus, uva en teim tai en taon ten out Kapaniam. Ekonek, meatin houlu umai avalesi, sakini avong tovuol keke Iesu ka meatin keil onen avaanian.
21 Navong mama onen ral min tunali keil akur longlongien usil asa koa Iesu mul mumoni ka mukave meatin keil amul aviteni keke mul mum vau, uva keke avaselus koe ka avahuli kati.
22 Tei en tiser keil ten mengkatien onen Mosis aka en out Serusalem. Ka keil asan selusien va kat Iesu avit, “Belsepul koa vi asuv onen ninin tisa keil mul ien ka mul san keihoen mini keke vahile lat ninin tisa keil ran meatin keil.”
23 Sakini, Iesu vise Farasi keil umai veni ka selus min keil ka en tatavolien keil vit, “?Temat kilea vahile lat kei eris hemukave?
24 Munak meatin keil onen asuv houlu tai amul uvae min keil eris, keihoen onen asuv houlu enek sakras val vataveah.
25 Ka munak vatiamal tai mul vae ral min keil eris, isen vatiamal enek heha hevuol varei.
26 En vati sakien enek, munak Temat mul vile lat ninin tisa keil onen ka mul vae ral min keil eris, keihoen onen sakras val vataveah ka hevuol varei rani.
27 “Mahit kilea min kami vaka en tatavolien tai. Meatin sakras vaha en teim sen avkeih tai keke vahenan tounah keil onen navong avkeih koanek mul veah lei kokoe eni. Helamu, heha hepar kat avkeih enek. Hevus, meatin enek kilea vaha en teim sen ka valah vasin tounah keil onen.
28 “Anatin eli naviteni min kami, Ahi kilea voumon methos onen vatal min meatin keil koa amumon vati tisaen keil houlu, vuo aselus karen isen Ahi varei.
29 Ka methos onen Ahi sakras val en meatin koa mul selus karen Ninin Votut ka tounah koa kei mul mumoni. Sakien tisa enek heha kat usite onen ka mahien koa hekuri veni sakras vavus.”
30 Iesu viteni mukok veni Farasi keil aviteni keke kei mul mum ral min keihoen onen ninin tisa koa mul ien.
Iesu vit lat isei vi mama ka tunali keil
31 Mama onen Iesu ka tunali keil umai keke avalesi, ka amules hae. Asan selusien va neim keke Iesu vaha hae vales keitel.
32 En avong enek, meatin keil houlu aro rahit Iesu ka aviteni mini avit, “Lesi, mama onom ral min tumali keil aro hae, ka e vati avalesuk.”
33 Ka Iesu vit kesi min keil vit, “?Isei vi mama onak? ?Isei vi tuak keil?”
34 Evus, lei rahit meatin keil enek ka viteni min keil vit, “Milesi. Koakeil enek avi mama onak ka tuak keil.
35 Koakeil amumon asa koa Ahi en vati avi mama onak ral min tuak ka ahinkuli keil.”