Selusien koa helamu ten
2 Pita
?Isei mutis selusien koanik?
Eiloheh Pita mutis selusien koanek en sua 67 AD (sua keil koa katau en avong Iesu avasi), vesesal sua etel (3) katau en avong koa mutis 1 Pita.
?Isei vuli selusien koanik mulamu?
Pita mutis selusien koanek va min Kristin vasi keil. En 1 Pita, kei vati lat rendemien one ka sel kat keil avalomal vakeih, avaseini mahien keil koa amul umai. Ka en 2 Pita, kei sel kat keil avalei kilea sakien tisa keil onen tiser taluvosien keil.
?Pita mutis selusien koanik vensa?
Pita en vat Kristin keil avahuli kat anatinien ten more longlongien usil Iesu Kristo – Pita sel kat meatin keil onen Ahi avamatu imok en demkatien one navong amusil kat hihiseien keil koa vi anatin koa musil asa koa mul en Tus Votut onen Ahi.
Pita en vati vasel kat Kristin keil anousiltei tiser taluvosien keil – Pita viteni keke vati tiser taluvosien keil amul tuetin tuai, ka tounah koa amul avisein meatin keil eni rovitei anatin. Pita sel kat keil vit sakien tatisaso koa avisein meatin keil eni mul par kat keil. Ka en avong koa Iesu hemai ris eni, kei hesan mahien min tiser keil enek.
Pita en vati vahati lat rendemien onen Kristin keil keke amairisien onen Iesu Kristo vi anatin – Veni tiser taluvosien keil amul aviteni keke Iesu hermaitei ris, Pita sel kat keil anamaentei rendemien one namot veni Iesu Kristo hemai ris en avong koa Ahi lesi mal. Sakini, keil anatimanintei en amairisien onen nasuval meatin sav keil.
Pita en vati vasel kat Kristin keil keke moulien one hetolas – Veni tiser taluvosien keil avisein Kristin keil avit mal keke avousil envatien ten ave, Pita sel kat meatin keil onen Ahi keke usil sakien keil koa akilea mutolas en meten Ahi.
Mari rendemien tai ten selusien koanik mul en 2 Pita 3:17
Ka kami, onak eli keil, veni mikilea en tounah koa naviteni ekek, mihelei kat revi kami keke meatin tatisa keil analamun kami natal min hihiseien keil koa romaltei nasakin kami minamot en demkatien onami ran out tahos koa mimul ien kosa.
?Asa mul en selusien koanik?
1. Selkatien keke Kristin keil avamatu en demkatien one. (1:1-21)
2. Selkatien keke Kristin keil anousiltei tiser taluvosien keil. (2:1-22)
3. Selkatien keke Kristin keil itosin avong koa Asuv Iesu hemai ris eni ka moulien one hetolas. (3:1-18)
1
Hitkileaen onen Pita usil leta koanik
1 Inau, Saemon Pita, slev ka eiloheh tai onen Iesu Kristo, namutis leta koanik.
Namutisi vat min koakeil akur demkatien tai koa tahos imok suval onomai. Demkatien koanek ka ven tounah keil koa Iesu Kristo koa mal revi mumoni. Kei vi Ahi orer koa mutut ir ka san demkatien koanek min ir.
2 Navisi keke more envatien ka tomat hehilelau en moulien onami heka en asa mikilea eni usil Ahi ka Iesu koa vi Asuv orer.
Ahi mul vise meatin keil umai avahi onen
3 Ka en keihoen onen, Ahi sani min ir tounah vasi koa rehekuri keke rehemoul ka rehousil sise koa mal en meten. Mul sani min ir navong rokilea revi kei koa vise ir ral min hetetamenien ka tahosien onen.
4 En sise ten hetetamenien ka tahosien enek, Ahi sani min ir marmari hatkatien keil koa moreite mok. Kei sani min ir keke rokilea rovalohosai ran sakien keil tatisaso koa mul en out netan koa mul purun meatin keil, ka rehoumon sakien keil koa hemal revi hesuval koa Ahi mun mal revi.
5 Ven koa Ahi mumon tounah keil enek, en moulien onami mihesak visi mivaling kat sakien tetahos keil vaha vatal min demkatien onami. Ka hetal min sakien tetahos keil, miheling kat ileilien ten anatinien onen Ahi.
6 Ka hetal min ileilien koanek, miheling kat sakien koa mikilea mivalei kat revi ualien onami eni. Ka hetal min sakien koanek, miheling kat sakien koa mivahikiti mivoum vakeih en demkatien onami eni. Ka hetal min sakien koanek, miheling kat sakien keil koa mikilea Ahi en vat kami mivoumoni.
7 Ka hetal min sakien koanek, miheling kat sakien koa mivalah ruai vatahos vatal min tuomi keil. Ka hetal min sakien ten lahruaien, miheling kat sakien ten envatien.
8 Veni navong mimumon sakien keil enek en avong vasi ka umai avi houlu mok en moulien onami, ileilien onami en Iesu Kristo, Asuv orer, hemariso mok, ualien onom housil demkatien ka moulien onami hekur heite hehi houlu.
9 Ka munak meatin tai romumontei sakien hos keil enek, koanek rie lati keke rendemien onen tamurei, sakras varendem vaha, ka en mul vobong keke Ahi kas moteini tuai ran tisaen keil onen koa mumoni mulamu.
10 Sakini, tuak keil en demkatien, mihesak visi hekeih keke mihoumon sakien keil enek vatie lati keke Ahi vise kami ka rie lat kami mivi onen. Munak ualien onami housil anatinien koanek, misakras mivamot en demkatien onami.
11 En sise enek, Ahi hesi kei keke hekur revi kami mihemai en out koa Iesu Kristo, Asuv orer koa mutut ir, vi asuv houlu ien lises ka lisenges.
12 Sakini, avaseini kami mikilea tuai en tounah keil enek ka mimulomal keih en anatinien koa mikuri, namundemi tahos keke nitos nihitehiteni min kami keke emi navobongentei.
13 Anatin, en avong vasi koa namul veah namoul, namundemi navit mal venau keke lisenges nil nihitehiteni min kami en tounah keil ekek,
14 veni nakilea keke hervitei tuetin nimat hesuval koa Iesu Kristo, Asuv orer, vit kilea minau tuai.
15 Sakini, namutis leta koanik vat min kami keke numon tounah vasi nakilea. Hesakini, navong nimat, kami mikilea mivandem kat tounah keil enek lises.
Eiloheh keil ka provet keil telamu avit luvat anatinien usil Iesu Kristo
16 Navong komai eiloheh keil onen Iesu Kristo meselus min kami usil keihoen ka amairisien onen Iesu Kristo, Asuv orer, meroruntei usil tunien keil koa meatin enges mumoni keke valeh rendemien onen meatin sav keil. !Vuo! Komai meles hetetamenien onen en metomai kati.
17-18 Anatin, komaitel metro ral min Iesu en vatihou onen Ahi navong Ahi Tata san houhouen ka muohien mini. Komaitel metlonge navong Ahi ten Muohien selus usili vit, “!Koanik vi Natkuli kati koa ek vati mok, ka nasi nau mok veni!” Anatin, komaitel varei metlong rea enek koa ka en out nesa.
19 Ka tounah vasi koa komai melesi ka melonge mul sakin ir rokilea revi keke selusien koa provet keil telamu aviteni usil Mesaea vi anatin. Tahos imok keke mihelei revi en selusien keil one ka mihelong kati, veni selusien one mul vothot en tounah suval laet koa ritin en out koa mankoli. Sakini, tahos keke mihoum hetal min laet ten selusien enek hetokol more avong koa Iesu hemai ris hekistal eni ka hesakin rendemien onami hemaluv revi. Anatin, kei hemai hesuval Melan, hitu ten visokon, koa rie lati keke out valan.
20 Ka koa hetetamen imok ekek, miheilea keke selusien vasi keil koa Tus Votut mul vit luvati rokistaltei en rendemien onen provet keil enges
21 veni vati selusien ten hitluvatien koanek rokatei en meatin keil enges. Vuo, Ahi varei selus ka en ongon meahos ka ahin keil navong Ninin Votut sien keil.