111
Rehehati lat isen Iahova ven tounah keil koa kei mul mumoni
!Rehehati lat isen Iahova!
 
Hetal min moulien vasi onak, nil nisan masmasien heha min Iahova.
Ka numoni en meten meatin keil onen, en out koakeil amal en meten alah ruai.
Tounah vasi koa Iahova mumoni tahos imok.
Ka koakeil vasi asi keil ven tounah keil enek e vati mok avandem usil aneite teni.
Umen vasi keil onen Ahi mul rie lati keke kei vi hetetamen imok ka mal keke avouhou mini.
Sakien keil onen mal revi mok kosa ka lisenges.
 
Iahova mul sakin meatin keil en out vasi netan avou lat isen veni along usil mormore sakien keil onen.
Along kilea keke tahosien ka enmahisien onen marite.
Kei mul san anien min koakeil avouhou mini.
En rovobongentei hatkatien takeih onen koa mumoni ral min keil.
Ahi rie lat keihoen ten umen onen min meatin keil onen.
Ka alei kilea eni navong san atan osen meatin keil ten kantri sav keil mai vi ose.
 
Ka tounah vasi koa Iahova mumoni mal ka musil rendemien koa tahos.
Mengkatien vasi keil onen, rokilea rovaling desien orer eni.
Mengkatien keil onen hel lisenges, asakras avavuol.
Kei sani min meatin keil keke avousili ral min anatinien ka maluen.
Ahi mumon meatin keil onen amaluv.
Kei mumon hatkatien takeih tai ral min keil koa sakras vamahoi en avong etai,
veni Isen vi votut ka hetetamen imok.
10 Houhouen min Ahi vi vatte ten meteisauen.
Koakeil amul along kat ren, rendemien one mekaikai revi.
Rehesan masmasien heha mini lisenges.
111:10 Siob 28:28; Pro 1:7; 9:10