136
Rehemasmas Iahova ven tounah keil koa kei mumoni
Mihemasmas Iahova veni kei tahos.
Envatien onen hel lisenges.
Mihemasmas Ahi koa mulin ahi sav keil.
Envatien onen hel lisenges.
Mihemasmas Ahi Asuv koa mulin asuv sav keil.
Envatien onen hel lisenges.
 
Kei sasen enges mumon mari tounah keil.
Envatien onen hel lisenges.
Ka en ileilien onen, kei mumon out nesa.
Envatien onen hel lisenges.
Kei varei sakin out netan mea ran atas.
Envatien onen hel lisenges.
Kei mumon tounah vasi keil koa ritin en teilang.
Envatien onen hel lisenges.
Ling meteiai keke valosil kat meneai.
Envatien onen hel lisenges.
Ka ling avati ka hitu keil keke avalosil kat vongien.
Envatien onen hel lisenges.
 
10 Kei varei mu vini moeite keil ten out Isip.
Envatien onen hel lisenges.
11 Evus, lah lat me-Isrel keil ran out Isip.
Envatien onen hel lisenges.
12 Kei mumoni mukonek ral min keihoen koa mul en hen.
Envatien onen hel lisenges.
13 Kei sasen mumon Atas Tahilhili maseh va en usite elu.
Envatien onen hel lisenges.
14 Kei sakin meatin keil onen amual kotehei.
Envatien onen hel lisenges.
15 Ka sakin atas enek rein vini asuv houlu ten out Isip ral min meatin tavaeen vasi keil onen.
Envatien onen hel lisenges.
 
16 Kei mulamun meatin keil onen aka vas out volvol.
Envatien onen hel lisenges.
17 Asuv houlu keil koa akur keihoen, kei vitan en keil vasi.
Envatien onen hel lisenges.
18 Mu vinvini asuv houlu keil koa avi hetetamen.
Envatien onen hel lisenges.
19 Anatin, mu vini asuv houlu Sihon ten out Amor.
Envatien onen hel lisenges.
20 Ka mumoni vatte tas min asuv houlu Og emun ten out Basan.
Envatien onen hel lisenges.
21 Evus, san atan ose min meatin keil onen vahi ose esuk.
Envatien onen hel lisenges.
22 Kei sani min me-Isrel keil koa avi meatin toumien keil onen.
Envatien onen hel lisenges.
 
23 Kei mundem kat ir navong romul en hen mesav keil.
Envatien onen hel lisenges.
24 Mumon ir romaluv ran hen vativieh keil orer.
Envatien onen hel lisenges.
25 Ka mul vengan tounah vasi keil koa amoul en out netan.
Envatien onen hel lisenges.
 
26 Mihemasmas Ahi ten out nesa.
Envatien onen hel lisenges.
136:5 Sen 1:1 136:6 Sen 1:2 136:7 Sen 1:16 136:10 Eks 12:29 136:11 Eks 12:51 136:13 Eks 14:21-29 136:19 Nam 21:21-30 136:20 Nam 21:31-35