15
Sakien keil koa Ahi en vati
Asuv houlu Deved mutisi
1 ?Ahi Asuv, isei heha neim en Eim Votut onom?
?Isei heha netan minuk en Hou Saeon koa vi votut?
2 Vati meatin koa long kat Ahi en tounah vasi,
koa mumon sakien koa tahos.
Selusien onen vi anatin ka mal,
3 romumontei hithitusilien vaha kat meatin sav keil.
Meatin enek romumtei vatisa min tunali keil,
ka rosel kututtei meatin sav keil.
4 Kei en rovattei koakeil Ahi sesein keil,
ka vouhou min koakeil along kat ren Ahi.
Lises, meatin enek mumon asa koa vat kati,
ka rovilestei rani.
5 Kei maen mani min meatin sav keil ka rokurtei teisao eni.
Ka en rovattei vakur mani en sise koa valuvos meatin koa romumontei tounah vatisa.
Vati meatin koa mumon sakien keil koa amukonek,
lises, moulien onen helomal hekeih.