8
Ahi ling tounah vasi ten out netan en hen meatin keil
Asuv houlu Deved mutisi
!Ahi Asuv onomai, isom marite mok en out vasi netan!
Muohien ten hetetamenien onom vilelau en out nesa.
Masmasien heha minuk
heka en titiali keil ka tivava keil.
Keik koro en out tetahos ran koakeil uvae ral minuk;
Koring koe koakeil avit avapurunuk.
 
Navong nales teilang koa komumoni,
naseipat nales more avati ka hitu keil koa kolingi en vulie,
narendem usil meatin enges ten out netan.
?Vensa komundem keil?
?Komul kolei kat keil vensa?
 
Keik komumon meatin keil amulin tounah sav keil,
kosan keihoen, muohien ka houhouen min keil.
Keikos Ahi, kovi hetamen en keil.
Koling tounah vasi keil koa komumoni en hen meatin keil;
korie lat keil avi hetetamen imok mulin tounah vasi ten out netan:
sipsip ka buluk ka tirendan vasi keil koa amual;
aman keil koa amuka en teilang,
ka mesau keil ka tounah vasi keil emun ten atas.
 
!Ahi Asuv onomai, isom marite mok en out vasi netan!
8:2 Mat 21:16 8:4 Siob 7:17-18; Sam 144:3; Hib 2:6-8 8:6 1Kor 15:27; Efes 1:22; Hib 2:8