12
Dragon tai sak visi van titiali onen ahin tai
1 Evus, nales mari tounah sal tai kistal en teilang koa sakinau namundem usil aneite teni. Ahin tai koa musin en meteiai suval eisin omon, ka avati mul en hehen alen keilu koa rie lati keke hetetamenien onen mariso. Ka vatluvoluv ten hiasuvien mul en vatin koa hitu teindan elu (12) amul ien.
2 Ahin enek, vesesal vakur tivava, ka mahien ten hasuen sakini mis houlu.
3 Evus, tounah sal tamun kistal en teilang. Mari dragon tai koa vilhili kistal. Vatin oulu (7) ka hon keil onen halualim (10), ka vatluvoluv mul retai en vatin vasi keil.
4 En avuken, kei mutavis lin hatte koa tai en hitu keil amemea ran teilang ka son keil amita en out netan, ka hatte koa elu en keil amules. Kei mai mul vesesal ven ahin keke kilea van lat tivava onen navong hehasi lati.
5 Evus, ahin kur tivava tai vi ehon, kei koa helosil kat out vasi netan hetal min keihoen. Ka tivava enek, navong avasi lati, asavul lati ka akur seheni va ven Ahi ka alingi rondan en mari vulin ten keihoen onen.
6 Ahin enek lohosai va en out volvol, va en out koa Ahi sak meseini tuai veni. Ekonek, ilei kat revi hetokol avong taosen tai handred elu ka hanumau etel (1,260).
7 Evus, en out nesa, vaeen kur out. Vativar Maekel ka angelo keil onen uvae ral min dragon enek ka angelo onen keil.
8 Onen Maekel, amulin keihoen onen Dragon ka angelo keil onen, ka armaentei mun avato en out nesa.
9 Anatin, mari dragon, tetal telamu koa avise en Temat, vuo Setan, keil aso lati ran out nesa. Kei koa mul luvos meatin vasi keil ten out netan, vativar Maekel soni mita netan ral min angelo keil vasi onen.
10 Evus, naraengon rea takeih tai en out nesa viteni vit,
“!Kosa, Ahi mutut meatin keil onen ral min keihoen onen!
!Kosa, kei vothot en hiasuvien onen ka mita keke valosil kat keil!
Kosa, kei ling keihoen koa marite mok en hen Mesaea koa kei rie lati.
Veni tai koa mulomal en meten Ahi orer
ka mul selus karen isen tuer ka ahiner keil meneai ka vongien,
kosa, aso lati tuai ran out nesa.
11 Tuer ka ahiner keil alohlin Temat
veni aling demkatien one en kei koa ran mue suval sipsip ten sanien votut tai,
ka armemoutei keke avitehiten anatinien teni min meatin sav keil.
Keil amundem maen moulien one keke avahati keil vakeih en demkatien keil one,
avaseini akur matien veni.
12 !Kami vasi koa miro en out nesa,
mihesi kami!
Ka, aue li, hetisa min kami koa miro en out netan ka en atas,
veni Temat vita netan ven kami.
Kei vilelau en vurohien,
veni kilea keke avong onen tamurei sesuk.”
13 Navong dragon lei kilea keke asoni tuai vita en out netan, kei mul likat ahin koa kur ehon.
14 Ka ahin enek, Ahi sakin mari apouen veivakum elu lukistal luka en aven. Ral min keilu, kei va en out volvol, va en out koa alei kat revi sua etel ka hap teni (3½). Ekonek kilea val seh ran dragon enek.
15 Evus, dragon enek mulu lat mari oai mue musil kat ahin enek keke valah lati vaha.
16 Ka atan kataun ahin enek. Atan seha ka sim lat oai vasi koa kistal en ongon dragon.
17 Navong lesi, dragon enek tin vepeng houlu kat ahin enek. Sakini va vit voumon vaeen vatal min titan keil: koakeil along kat mengkatien onen Ahi ka amul avitehiten anatinien usil Iesu min meatin sav keil.
18 Ka dragon va mulomal en hehetas.