5
Alekat tai koa vinvin vahuli selusien usil tounah keil koa hemai veah
Navong nales tounah keilek evus, nales kei koa mul rondan en vulin ten keihoen mul vuli kat pepa tai en hen matu koa selusien mul en usite keilu teni. Arei kati ka apil kati en siil oulu (7).* Ka nales hetetamen tai onen angelo keil, kei visohiso en rea tai koa keih imok vit, “?Isei vinvin vakum vahas siil keil, valuv lin pepa, ka vahuli selusien teni?” Ka arvotin etai meatin en out nesa vuo en out netan vuo en huinev ten atan koa vinvin vakum vahas siil keil ka vahuli selusien koa mul en pepa enek. Sakini namis roha veni asakras avahotin meatin etai koa vavinvin valuv lin pepa ka vahuli selusien keil koa amul ien.
Evus, tai en elda keil mai ka viteni minau vit, “Konouaitei. Kilesi, kei koa avise en laeon ten vatiamal onen Sudah mul mai. Kei vi havin asuv houlu Deved tai ka mul kur hiasuvien onen. Ka en vaeen ten demkatien, kei mulin Temat tuai. Kei enges vinvin vakum vas siil keil ka valuv lin pepa enek.”
Evus nales kei koa mae lat moulien onen suval etin sipsip ten sanien votut. Kei mulomal vesesal ven vulin ten keihoen, luhu en elda keil ka tounah ehat (4) koa amoul. Nalesi suval amu vini tuai, ka moul eris ran matien mules. Hon ten keihoen onen oulu (7) ka meten emun oulu. Meten oulu enek avi ninin oulu onen Ahi koa sila keil uva aka vasi out netan. Kei koa suval sipsip va min kei koa rondan en mari vulin ten keihoen ka kur pepa ran hen matu. Navong va kuri, tounah ehat (4) koa amoul ka elda hanumau tai ka ehat (24) uva netan mini. Tetai en keil akur kat harp ka more pesin koa amumoni en gol. En pesin keil enek amunit tounah koa vite tahos ien koa vi hisien keil onen meatin keil onen Ahi. Keil amusau en souen hau tai avit,
“Keik kovinvin kovakur pepa koanek
ka kovakum vas siil keil teni.
Kovinvin veni amu vinik, ka ram vul lat meatin keil keke avi onen Ahi.
Anatin, kovul lat meatin ran vatiamal vasi keil ka ran selusien vasi keil,
ran kantri vasi keil ka ran meatin tateisav vasi keil emun.
10 Komumon keil umai avi vangi meatin keil
koa hiasuvien onen Ahi mul en moulien one.
Keik kosakin keil amum veni suval pris keil onen,
ka ilosil kat out vasi netan.”
11 Navong namul nalele, nalong ren angelo keil koa avi houlu vis avi houlu mok, meatin sakras vahul vasin keil. Keil amul rahit mari vulin ten keihoen, tounah ehat (4) koa amoul ka elda keil emun. 12 Angelo keil amusau roha avit,
“Mevati lat isen kei koa amu vini suval sipsip ten sanien votut tai,
koa moul eris ran matien.
Kei vinvin keke hekur keihoen ten hiasuvien, meteisauen, hetetamenien, ka ihilelau en tounah vasi,
ka hekur houhouen, tahosien, ka eis koa nesa vis nesa mok.”
13 Evus, nalong rea onen tounah vasi keil koa amoul amusau: koakeil ten out nesa ka ten out netan; koakeil ten huinev ten atan ka en atas. Anatin, nalong keil vasi amul amusau avit,
“!Hetetamenien ka keihoen mul
en kei koa rondan en mari vulin ten keihoen
ka en kei koa suval sipsip ten sanien votut!
!Keilu luvinvin keke luvakur
masmasien ka houhouen onomai
lises ka lisenges!”
14 Navong aviteni mukok, tounah ehat (4) koa amoul avit, “!Anatin eli!” Ka elda vasi keil uva netan ka avati lat isealu.
* 5:1 Mulamu, navong hetetamen tai mutis leta tai, kei pil kat leta enek en wax ten kandel koa mai kur ‘siil’ onen navong rang kati en ring koa isen mul ien. Mukonek, meatin koa kur leta enek helei kilea isei sani mini ka helei kilea munak meatin sav tai kum vasi tuai. 5:1 1Ki 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:7,13; 6:16; 7:10,15; 19:4; 21:5; Aes 29:11; Esek 2:9-10 5:5 Sen 49:9-10; Aes 11:1,10; Rev 22:16 5:6 Aes 53:7; Sion 1:29,36; Rev 5:12; 13:8; Sak 4:10; Rev 1:4; 4:5 5:7 1Ki 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:1,13; 6:16; 7:10,15; 19:4; 21:5 5:8 Sam 141:2; Rev 8:3,4 5:9 Sam 33:3; 40:3; 96:1; 98:1; 144:9; 149:1; Aes 42:10; Rev 14:3 5:9 Eks 19:6; Aes 61:6; 1Pit 2:5,9; Rev 1:6; 20:6; 22:5 5:11 Dan 7:10; Hib 12:22 5:12 1Kron 29:11; Aes 53:7; Sion 1:29,36; Rev 5:6; 13:8 5:13 1Ki 22:19; 2Kron 18:18; Sam 47:8; Aes 6:1; Esek 1:26-27; Rev 4:2,9; 5:1,7; 6:16; 7:10,15; 19:4; 21:5