8
Kei koa suval sipsip kum vas siil koa oulu (7) en keil
Navong kei koa suval sipsip ten sanien votut kum vas siil ekor koa oulu (7) en keil, tounah vasi en out nesa aro raeng avong havivi. Evus, nales vativar keil onen angelo keil koa avi oulu koa amulomal lises en meten Ahi. Ka asan amaru oulu min keil.
Angelo tateisav tamun mai mulomal vesesal ven ahor ten sanien. Kei kur more pesin koa amumoni en gol koa amunit tounah keil koa vite tahos ien. Asan ouai houlu koa vite tahos mini vaniti vatal hisien keil onen meatin keil onen Ahi. Angelo enek kuri valing revi en ahor ten sanien votut koa amumoni en gol koa mul vesesal en vulin ten keihoen onen Ahi. Kei vou lat pesin en nan Ahi, ka tupas teni vina nesa ral min hisien onen meatin keil onen Ahi. Evus, angelo kur pesin ka sieni en menehang koa kuri ran ahor ten sanien votut. Evus, rang lini vita en out netan. Koanik sakin voulul mut ka muroh keih, ahil vil, ka alu mulu keih.
Vativar oulu (7) onen angelo keil asak mesein keil avouh amaru one vasakin mahien keil hekur out
Evus, vativar oulu (7) onen angelo keil asak mesein keil avouh amaru one.
Navong vativar koa tai en keil muh amaru onen, amutah merali laklas keil ka ahang koa ara mul ien avita en out netan. Ahang enek kan lin oumunai vasi keil koa amoul en out netan, ka kan lin vatiai keil en hatte koa tai en atan keil en out netan. Ka hatte koa elu eni amules.
Evus, vativar koa elu (2) en keil muh amaru onen. Navong muhi, tounah tai koa alesi suval mari hou tai koa ahang mul ien, asoni va en atas. Koanek sakin hatte koa tai en atas keil mai vi ara, ka hatte koa elu eni mules. Koanek sakin hatte koa tai en tounah keil koa amoul en atas umatmat, ka hatte koa elu en keil amules. Ka hatte koa tai en sip keil emun koa amul ien avi soksokeite, ka hatte koa elu en keil amules.
10 Evus, vativar koa etel (3) en keil muh amaru onen. Navong muhi, mari hitu tai koa ahang mul vilhili ien mot ran teilang ka bon hatte koa tai en oaisal ka vulioai keil, ka hatte koa elu en keil amules. 11 Isen hitu enek vi ‘Kun’ ka sakin hati oai keil enek viles mai kun, ka meatin houlu umatmat veni amun oai takun enek.
12 Evus, vativar koa ehat (4) en keil muh amaru onen. Navong muhi, tounah tai mai bon hatte koa tai en meteiai, en avati ka en hitu keil emun. Ka hatte koa elu en keil mules. Sakini keil arritintei vasuval mulamu. En hatte koa tai en avong vasi, meneai mai malikelik, ka hatte koa elu eni meneai mules. Ka hatte koa tai en vongien vasi, maim tovuol, ka hatte koa elu eni maim mules.
13 Evus, naseipat ka nales veivakum tai mul muka en mesaiuai. Nalong ren koa viso keih vit, “!Aue li! !Aue li! !O aue li! !Hetisa vis hetisa mok min koakeil amul en out netan navong vativar keitel koa telmules telhouh amaru oneatel!”
8:3 Sam 141:2; Rev 5:8; 8:4; Eks 30:1-3; Rev 9:13 8:4 Sam 141:2; Rev 5:8; 8:3 8:5 Lev 16:12; Eks 19:16-19; Rev 4:5; 11:19; 16:18 8:7 Eks 9:23-25; Esek 38:22 8:8 Eks 7:20,21 8:11 Ser 9:15 8:12 Aes 13:10; Esek 32:7,8; Soel 2:10; 3:15; Mat 24:29; Mak 13:24-25; Luk 21:25; Rev 6:12-13