31
Matien onen Sol
1 Samuel 31:1-6
Avong tai, me-Filistia keil amumon vaeen ral min me-Isrel keil en Vatihou Kilboa. Houlu en me-Isrel keil umatmat ka houlu mun en keil alohosai. Me-Filistia keil alikat Sol ral min meatin sav keil onen va vio … avuli kat natnali keitel ka amuas keitel telmat, iseatel Sionatan, Abinadab, ka Malkisua. Evus, vaeen enek mai keih imok en out koa Sol mul ien. Koakeil akur hisuput, uvan eni, ka atuv bon Sol, vesesal vamat. Sakini, Sol viles vis litetai koa mul lah tounah keil tavaeen onen vit, “!Leh lat naef tavaeen onom ka kisal vini nau nimat! !Ek rovattei koakeil enek koa areingeingen Ahi avamai avoumon tohtohien minau navong uas nau nimat!” Ka litetai enek metau voumoni. Sakini Sol enges viles naef onen, mot va ien, ka sal vini kei sasen. Navong litetai enek lesi keke Sol mat, kei mun mot va en naef onen, ka sal vini kei sasen mat. En sakien enek, Sol, natnali keitel, litetai takataunien onen, ka meatin vasi keil onen umatmat en avong tas.