7
Iahova mumon hatkatien takeih ral min Deved
2 Samuel 7:1-5,8-17
1 Avong vahis muli, Deved ro tahosis en mari eim onen asuv houlu en out Serusalem, ka Iahova sakin vativieh keil onen arvaetei mun vatal mini.
2 Evus, en avong tai, asuv houlu Deved viteni min provet Netan vit, “?Kolesi? Kosa, inau naro en more eim tai koa amumoni en more vati sida keil. Ka Bokis ten Hatkatien Takeih onen Ahi mul enges en eim tavolin tai.”
3 Sakini, Netan vit kesi mini vit, “Tahos imok keik kumon asa koa komundemi veni Iahova ro venuk lisenges.”
4 Ka, en vongien enek, Iahova viteni min provet Netan vit,
5 “Kiha kihiteni min Deved koa vi eiloheh onak keke Iahova san selusien koanek mini vit, ‘Hervitei keik kumon eim onak keke mato ien.’
8 “Kihiteni mun mini keke inau, Iahova, Asuv Houlu ten Out Nesa, naviten selusien koanek mini navit, ‘Inau, nakulatuk ran out koa kolosil kat sipsip keil ien, ka nalinguk kumai kovi avat kovalosil kat meatin onak keil ten out Isrel.
9 Naro ral minuk en out vasi kuva ien. Ka navong komul kuvae, namu lin vativieh keil onom. Inau nisakin isom hemai hehi hetetamen imok hesuval eis hetetamen sav keil ten out netan.
10-11 Navong meatin keil onak umai rohtoh en atan koanek ka naling metai keil avalosil kat keil rokol kosa, vativieh keil umai apurun keil houlu. Ka kosa, narie lat out tai koa maling meatin onak keil ten out Isrel avato ien. En out enek, nisakin keil itos en tomat en kantri kati one.
“ ‘Inau, Iahova, navat kati minuk keke nisakin vatiamal keil koa ikistal ika enuk isosor en losilkatien onom min me-Isrel keil.
12 Navong keik kimai kimatu revi ka kimat, itahinuk vesesal ven avu onom keil. Hevus, numon natmali kati tai hekur vulum hemai hehi asuv houlu. Numoni helomal hekeih en losilkatien onen.
13 Hehi kei keke heti eim koa inau nito ien. Ka numon losilkatien onen koakeil ikistal ika en vatiamal onen hel heha vio … keite teni hetovuol.
14 Numoni mini hesuval koa kei vi natkuli kati ka navi tamen. Munak mot en tisaen, inau nitali mal eni hesuval tata tai san mahien min natnali vatalimal eni.
15 Ka nirkulattei envatien onak heha rani nasuval koa namumoni min Sol koa nakulati keke keik kikur vulin kovahi asuv houlu.
16 Nisakin vatiamal onom keil koa ikistal ika enuk il lisenges, ka keil ihi asuv houlu keil ilosil kat me-Isrel keil heha vio … keite teni hetovuol.’ ”
17 Sakini, provet Netan va les asuv houlu Deved ka vit vasin selusien onen Iahova mini.