4
Pol sel kat Timoti keke hehuli kat selusien onen Ahi
Timoti, Iesu Kristo hemai hekistal hehi asuv houlu onen meatin vasi keil. Sakini, en meten Ahi ka meten Iesu Kristo koa helei rahit usite onen koakeil amoul ka koakeil umat, navit masel katuk vamukok: kiles kihitehiten more longlongien onen Ahi. En avong tetahos ka avong tatisa, kisak mesein keik veni. Koakeil amul en tisaen, kisel kat keil keke usil sise koa mal. Navong kovasel kat meatin keil en more hihiseien, kumon rendemien onom hetaveah. Avong tai koa hemai, meatin keil iseseini avataengon more hihiseien ten anatinien. !Anatin! Keil usil envatien tateisav one, ka ilah ruain tiser keil houlu keke ilea isan hihiseien keil koa e vati avataengoni. Ihiles ran selusien ten anatinien ka ilong kat hihiseien keil koa usil tunien keil telamu koa rovitei anatin. Ka keik, Timoti, kilei kat revi sakien keil onom lisenges. Kihatuk hekeih en mahien keil onom, kihitehiten more longlongien lises ka kum vasi tounah keil koa Ahi lingi mul en hem.
Nasel katuk mukok veni inau, vesesal moulien onak vavus vasuval sanien votut ekor tai onak va min Ahi; vesesal malokovein out netan. Nasuval meatin tavaeen onen Asuv Iesu koa nuvae en usite onen. Ka en lohlohien ten demkatien orer, narmusehtei ka narokol keite teni ke. Nakur kat demkatien onak ka narmottei eni. Sakini, en avong koanik, uite ten lohlohien onak mul rosinau en out nesa veni namul namusil asa koa Asuv Iesu en vati. Kei koa mal vasi hesan uite koanek minau en Avong ten Mari Kot onen Ahi koa helei rahit usite onen meatin keil. Ka hervitei inau nges, hesan uite min meatin keil vasi emun koa e vati mok avales amaien onen.
Pol vis Timoti keke vakalah vamai valesi
Timoti, kisak visi keke kovakalah kovamai kovales inau ekok. 10 Navisok kovamai veni Kresken va mum en provins ten out Kalesia, ka Taetas emun va mum en provins ten out Dalmesia. Ka Dimas koa en vat tounah ten out netan, kei lohosai ranau ka va en meteimal ten out Tesalonaeka. 11 Luk enges ro ral minau. Sakini, kikur Mak hetal minuk, veni kei kilea hekataunau en umen keil onak suval mumoni mulamu. 12 Ka nasila Taetikas va en taon ten out Efeses. 13 Ka navong kimai, tahos kikur eisin omak ten anni koa nalingi mul en hen Karpas koa mul en out Troas. Ka kikur tus keil onak hetal min tisien keil onak emun.
14 Aleksanda, koa vi meatin koa mumon tounah keil en aean, kei purunau vareis. Ka Ahi Asuv hesa kesi suk mini. 15 Kilei kat revi keik ven meatin enek, veni kei mul vuhu houlu ral min more longlongien koa rovitehiteni.
16 Navong akur nau nuva en kot avong mulamu, meatin tovuol valomal vaselus en usite onak. Keil vasi alohosai ranau, ka navis Ahi herleletei hetisa en keil veni. 17 Ka Asuv Iesu ro vesesal venau ka san keihoen minau. Kei sakinau navit revi more longlongien usil Asuv orer min koakeil arvitei Siu araengoni. Vesesal avasan matien minau, ka Ahi kur koe nau. 18 Ka Ahi hekur koe nau ran tounah tisa keil vasi ka hekur revi nau nihina en out koa kei vi asuv houlu eni en out nesa. !Rehehati lat isen Ahi hehina nesa lises ka lisenges! !Anatin!
Selusien ekor
19 Naviten ‘more’ min Prisila ka meatin onen, Akuila. ‘More’ mun min Onesiforas ka min koakeil aro en teim sen. 20 Erastas mules en out Korin, ka naling Toropimas en out Maelitas veni kei mesai. 21 Kisak visi kimai kikalah veni avong ten an tisa mul mai. Epulas, Pudens, Laenus ka Klodia, ral min tuer sav keil emun, aviten ‘more’ minuk.
22 Navisi keke Ahi heto venuk Timoti, ka more envatien onen hel ven kami vasi.
4:1 Umen 10:42; Rom 14:9-10; 1Pit 4:5 4:2 Umen 20:20,31 4:3 1Tim 4:1 4:4 1Tim 4:7; Taet 1:14 4:6 Plp 2:17 4:7 1Tim 6:12 4:8 1Kor 9:25; Plp 3:14; 2Tim 2:5; Tiem 1:12; 1Pit 5:4; Rev 2:10 4:10 Kol 4:14; Flm 1:24; 2Kor 8:23; Kal 2:3; Taet 1:4 4:11 Kol 4:14; Flm 1:24; Umen 12:12,25; 13:13; 15:37-39; Kol 4:10; Flm 1:24 4:12 Umen 20:4; Efes 6:21-22; Kol 4:7-8 4:13 Umen 20:6 4:14 Umen 19:33-34; 1Tim 1:20; 2Saml 3:39; Sam 28:4; 62:12; Pro 24:12; Rom 2:6 4:16 2Tim 1:15 4:17 Umen 27:23; 23:11; Sam 22:21; Dan 6:22 4:19 Umen 18:2; 2Tim 1:16-17 4:20 Umen 19:22; Rom 16:23; Umen 20:4; 21:29