2
Roh Allah turun di atas orang-orang percaya
2:1-13
1 Pas waktu orang Yahudi pu hari besar, yang dong biasa bilang hari Pentakosta, smua orang yang percaya sama Yesus kumpul di satu ruma.
2 Tiba-tiba dong dengar ada bunyi dari langit sama sperti angin yang tiup kencang. De pu bunyi kuat skali sampe dong dengar di smua tempat dalam ruma yang dong ada kumpul.
3 Begini dong liat satu barang yang sama sperti api yang turun. De pu bentuk macam lida-lida, yang tabagi-bagi di atas dong smua satu-satu.
4 Trus Roh Allah kuasai dong smua, trus dong smua bisa bicara pake bahasa-bahasa lain yang dong dapat dari Roh Allah.
5 Waktu itu, orang-orang Yahudi dari smua tempat di dunia ada tinggal di Yerusalem. Dong ini yang sunggu-sunggu ikut Tuhan pu mau.
6 Dong juga bisa dengar bunyi itu, karna itu dong datang kumpul di ruma itu. Dong kaget dengar dong pu bahasa sendiri dari Yesus pu utusan-utusan pu mulut.
7 Dong smua heran-heran, trus dong bilang,
“Tong tau, kalo smua orang yang ada bicara itu orang Galilea.
8 Bagemana sampe dong bisa bicara pake bahasa yang tong pake di tong pu kampung sendiri?
9 Kitong ini orang-orang dari: Partia, Media, Elam, Mesopotamia, Yudea deng Kapadokia, Pontus deng Asia,
10 Frigia deng Pamfilia, Mesir deng daera-daera di Libia yang baku dekat deng Kota Kirene, juga orang-orang yang baru datang dari Roma.
11 Tong ini orang-orang Yahudi deng bukan Yahudi tapi su ikut agama Yahudi. Trus ada lagi orang Kreta deng orang Arab. Tong smua dengar dong ada bicara pake tong pu bahasa sendiri, dong kastau tentang hal-hal besar yang Allah su bikin.”
12 Dong smua heran-heran deng bingung trus baku bilang, “Ini smua pu arti apa?”
13 Tapi orang lain dong ejek hina begini, “Dong smua ini ada mabuk.”
Petrus kotba di depan banyak orang
2:14-40
14 Habis itu, Petrus deng seblas utusan dong bediri, trus deng suara kras Petrus bilang ke orang banyak itu,
“Dengar ini sodara-sodara orang Yahudi deng kam smua yang ada tinggal di Yerusalem. Sa mo kastau deng jlas sama kam apa yang ada jadi di sini.
15 Tong smua ini tra mabuk sperti yang kam ada kira. Karna skarang ini baru jam sembilan pagi, jadi tra mungkin tong su minum anggur.
16 Tapi apa yang kam dengar tadi, memang dulu Allah su kastau lewat Nabi Yoel, itu begini,
17 ‘Di akir jaman,
Sa mo kas turun Sa pu Roh di atas smua orang.
Supaya kam pu anak laki-laki deng prempuan juga mo bawa Sa pu pesan.
Anana muda mo dapa kas liat dari Saya,
trus orang-orang yang tua nanti dapat mimpi dari Saya.
18 Lebi lagi ke Sa pu pesuru-pesuru, laki-laki ato prempuan,
sa mo kas turun Sa pu Roh pas waktu itu trus dong mo bawa Sa pu pesan.
19 Sa mo bikin tanda-tanda heran deng hal-hal luar biasa di bumi deng langit:
mo ada dara, api deng asap yang tebal.
20 Matahari mo bruba jadi glap skali,
trus bulan mo jadi mera sama deng dara,
seblum Tuhan pu hari jadi hakim untuk smua orang.
Hari itu, hari yang besar deng luar biasa.
21 Trus sapa yang minta tolong sama Tuhan,
de yang dapa slamat.’ ”
22 Trus Petrus bilang juga,
“Dengar ini sodara-sodara orang Israel! Allah su pili Yesus orang Nasaret itu. De pu bukti: Lewat Yesus, Allah De bikin tanda luar biasa deng tanda heran yang kas tunjuk De pu kuasa. Itu smua kam su tau karna ada jadi di tenga-tenga kam.
23 Allah su tau dari dulu, jadi De su atur biar kam sendiri yang srakan Yesus untuk dapa bunu. Kam kasi De ke orang-orang yang tra ikut Allah pu mau, supaya dong bisa kas salib Dia.
24 Tapi Allah kas hidup De lagi trus kas bebas De dari siksa waktu mati. Karna maut tra bisa tahan Dia.
25 Dulu Raja Daud perna bilang begini tentang Yesus:
‘Sa liat Tuhan yang slalu di depan saya.
Karna De bediri di sa pu sebla kanan, sa tra geser.
26 Jadi karna itu sa pu hati snang,
sa mo puji-puji Dia,
deng percaya sa pu badan nanti tinggal deng aman.
27 Karna Tuhan tra kas biar sa di orang mati pu tempat,
deng tra kas biar De pu Orang Suci pu badan busuk dalam kubur.
28 Tuhan su kas tunjuk jalan supaya sa tetap hidup trus.
Tuhan mo bikin sa betul-betul snang
karna ada sama-sama deng saya.’
29 Sodara-sodara, sa mo kastau deng jlas sama kam tentang Daud, tong pu bapa dari tong pu bangsa. Karna tong tau betul de sendiri su mati trus su dapa kubur. Trus de pu kubur masi ada sampe skarang disini.
30 Jadi Daud ini Allah pu nabi. Trus Daud de tau Allah su ada janji ke de, deng bikin sumpa kalo satu dari de pu turunan mo dapa angkat jadi raja.
31 Daud su liat apa yang mo jadi nanti. De su kastau lebi dulu kalo Raja Yang Allah Pili nanti hidup kembali. Allah tra kas tinggal De di orang mati pu tempat, trus De pu badan tra jadi busuk.
32 Jadi De itu Yesus yang Daud ada bilang itu. Yesus itu yang Allah su kas hidup kembali, trus tong su liat deng mata kepala sendiri kalo De su hidup kembali.
33 Stela itu, De su dapa angkat ke Allah pu sebla kanan, trus trima dari Bapa Roh Allah yang De janji. Itu yang kam dengar deng ada liat disini.
34 Daud sendiri tra trangkat ke surga, tapi de ada bilang tentang Yesus begini,
‘Tuhan Allah su bilang sama sa pu Tuhan:
Duduk di Sa pu sebla kanan,
35 sampe Ko pu musu-musu Sa taru di bawa Ko pu kaki.’
36 Jadi karna itu sodara-sodara orang Israel, kam musti tau pasti kalo Yesus yang kam su kas salib itu, De yang Allah su angkat jadi tong pu Tuhan deng Raja Yang Allah Pili!”
37 Waktu itu orang-orang yang dengar smua itu, dong gelisa skali trus dong tanya ke Petrus deng utusan lain, “Sodara-sodara, apa yang tong musti bikin ka?”
38 Petrus jawab dong begini,
“Kam smua harus tobat dari kam pu dosa-dosa trus kasi kam pu diri untuk dapa baptis dalam nama Yesus, Raja Yang Allah Pili. Deng begitu Allah mo kas ampun kam pu dosa-dosa, trus kam nanti trima hadia Roh Allah.
39 Karna janji itu untuk kam deng kam pu anana cucu, juga untuk orang-orang yang tinggal di tempat-tempat yang jau. Itu untuk smua orang yang Tuhan tong pu Allah mo panggil datang sama Dia.”
40 Petrus bicara banyak juga sama dong. De kas ingat deng kas smangat dong, deng bilang, “Kam musti kasi kam pu diri sama Tuhan supaya kam bisa slamat dari hukuman yang nanti orang jahat yang tinggal di jaman ini dong trima.”
Orang-orang percaya pu cara hidup
2:41-47
41 Jadi orang-orang banyak yang trima apa yang Petrus bilang itu dong dapa baptis. Waktu itu juga, orang-orang yang percaya sama Yesus su tamba lagi 3.000 orang.
42 Deng satu hati dong blajar dari Yesus pu utusan-utusan, juga slalu kumpul sama-sama. Dong makan sama-sama deng bikin perjamuan trus doa sama-sama.
43 Waktu itu, Yesus pu utusan-utusan ada bikin banyak hal yang luar biasa deng tanda heran, sampe smua orang heran deng takut.
44 Smua orang yang su percaya itu, dong smua slalu kumpul sama-sama. Dong pu harta yang ada smua, dong pake sama-sama.
45 Trus slalu ada dari dong yang jual dong pu harta, trus uang dong bagi-bagi sama orang-orang yang memang perlu tu masing-masing.
46 Trus stiap hari deng satu hati dong smua biasa kumpul di halaman Ruma Allah. Dong makan sama-sama dari satu ruma ke ruma lain deng snang skali juga deng hati baik.
47 Dong slalu puji Allah, trus smua orang snang sama dong. Stiap hari Tuhan tamba dong pu jumla orang yang percaya sama Yesus untuk dapa slamat.