Melayu Papua Kisah Para Rasul 9

Saulus percaya Tuhan Yesus

9:1-19a

1 Waktu itu Saulus trus saja brusaha ancam deng bunu orang-orang yang ikut Tuhan Yesus. De pigi sama Pemimpin Imam, 2 trus minta surat kuasa untuk pigi ke orang Yahudi pu kepala-kepala tempat ibada* di Kota Damsik, supaya kalo disana de dapa liat laki-laki ato prempuan yang ikut Tuhan pu ajaran, de bisa tangkap deng bawa dong ke Kota Yerusalem. 3 Waktu Saulus pigi ke Damsik, su dekat deng kota itu, tiba-tiba cahaya puti kilat dari surga† kliling dia. 4 De langsung jatu ke tana. Trus de dengar ada suara yang bilang sama de begini, “Saulus, Saulus! Knapa ko siksa Saya?”

5 Saulus bilang, “Bapa ni sapa?”

Suara itu jawab, “Sa Yesus yang ko ada siksa itu. 6 Tapi skarang ko bediri trus masuk ke kota, disana nanti ko dapa kastau apa yang harus ko bikin.”

7 Waktu itu ada orang-orang yang jalan sama-sama deng dia, dong kaget skali sampe tra bisa bicara. Karna dong juga dengar suara itu tapi tra liat orang. 8 Habis dengar itu Saulus bediri trus buka de pu mata, tapi de pu mata su tra bisa liat apapa lagi. Jadi dong pegang de pu tangan, tolong bawa de masuk ke Damsik. 9 Slama tiga hari de tra bisa liat trus de tra makan deng minum.

10 Di Damsik ada satu orang yang ikut Tuhan Yesus, de pu nama Ananias. Tuhan datang sperti mimpi deng bilang begini, “Ananias!”

Ananias jawab, “Ya Tuhan!”

11 Tuhan bilang, “Ko pigi skarang ke Yudas pu ruma di jalan yang de pu nama Jalan Lurus. Trus disana ko tanya orang yang pu nama Saulus dari Tarsus. De skarang ada berdoa. 12 Sa juga su kas liat sama Saulus, kalo nanti ada orang satu yang pu nama Ananias datang trus taru tangan berdoa supaya de pu mata buka deng liat lagi, jadi ko pigi suda.”

13 Ananias de jawab, “Tuhan sa dengar banyak orang crita tentang orang itu, kalo de tu biasa siksa-siksa Allah pu orang-orang di Yerusalem. 14 Trus skarang de su ada disini karna dapa kuasa dari imam-imam kepala untuk tangkap smua orang yang percaya sama Tuhan.”

15 Tapi Tuhan bilang sama Ananias, “Pigi saja! Karna, Sa su pili de untuk layani Saya. Supaya de bisa kastau tentang Saya ke bangsa-bangsa lain yang bukan Yahudi deng dong pu raja-raja, deng orang-orang Israel juga. 16 Trus Sa sendiri yang nanti kas tunjuk sama dia tentang smua sengsara yang harus de dapat karna Saya.”‡

17 Jadi Ananias pigi ke ruma itu trus taru tangan berdoa Saulus. De bilang, “Sodara Saulus, Tuhan Yesus yang su kas tunjuk diri sama ko di jalan yang ko lewat itu, De yang suru sa datang sama ko. Supaya ko pu mata buka deng liat lagi trus Roh Allah kuasai ko.” 18 Pas waktu itu juga ada sperti sisik ikan jatu dari Saulus pu mata trus de bisa liat lagi. De bangun trus Ananias baptis dia. 19a Habis itu de makan, trus de jadi kuat lagi.

Saulus kastau Brita Baik di Damsik

9:19b-25

19b Saulus de su tinggal brapa hari begitu deng orang-orang yang ikut Yesus di Kota Damsik. 20 Waktu itu de langsung pigi ke tempat-tempat ibada trus mulai kastau kalo Yesus itu Allah pu Anak. 21 Smua orang yang dengar de bicara, dong heran trus bilang, “De ni yang bunu sodara-sodara yang ikut Yesus di Kota Yerusalem to? De juga yang datang kesini untuk tangkap sodara-sodara yang ikut Yesus baru mo bawa dong sama imam-imam kepala.”

22 Tapi tamba hari Tuhan tamba kas mampu Saulus untuk ajar orang tentang Yesus, de kas bukti dari Kitab Suci kalo Yesus betul-betul Raja Yang Allah Pili. Karna itu orang Yahudi yang ada di Damsik tra bisa mlawan Saulus. 23 Stela lewat brapa lama orang Yahudi atur rencana mo bunu Saulus, 24 tapi de su dapa kastau dong pu rencana jahat itu. Siang malam dong jaga di depan pintu gerbang kota§ supaya bisa bunu dia. 25 Tapi satu malam begini, orang-orang yang ikut de tolong kas slamat dia. Dong kas masuk dia ke dalam kranjang besar trus ikat deng tali baru kas turun dari jendela kluar tembok yang kliling kota itu.

Saulus di Yerusalem

9:26-31

26 Saulus de pigi ke Yerusalem, disana de brusaha mo gabung deng orang-orang yang ikut Yesus. Tapi dong takut sama dia, karna dong tra percaya kalo de betul-betul su jadi Yesus pu pengikut. 27 Tapi Barnabas* trima de trus bawa ke Yesus pu utusan-utusan. De crita sama dong, bagemana Saulus liat Tuhan di tenga jalan waktu ke Damsik. Trus bagemana Tuhan bicara sama dia, juga de su brani kas ajar orang-orang tentang Yesus di Damsik.

28 Habis itu Saulus tinggal di Yerusalem deng dong, trus kliling kota itu kas ajar orang-orang tentang Yesus deng brani. 29 De juga biasa bicara deng baku tanya jawab deng orang Yahudi yang bicara pake bahasa Yunani. Tapi dong cari jalan untuk bunu dia. 30 Waktu sodara-sodara sama-sama percaya dong tau tentang itu, dong bawa Saulus ke Kota Kaisarea, trus kirim de ke Tarsus.†

31 Waktu itu smua jemaat di smua daera Yudea, Galilea, deng Samaria dong hidup damai. Roh Allah kas smangat dong untuk hidup takut Tuhan, orang-orang percaya tamba kuat deng tamba dong pu jumla.

Petrus di Lida deng Yope

9:32-43

32 Begini satu kali waktu Petrus jalan kliling, de pigi ketemu Allah pu orang-orang yang di Kota Lida. 33 Disana de ketemu satu laki-laki de nama Eneas, su dlapan taun de cuma tidur saja karna tra bisa jalan. 34 Petrus bilang sama dia, “Eneas, Yesus Raja Yang Allah Pili kas sembu ko. Jadi, ko bangun trus gulung ko pu tempat tidur!” Waktu itu juga de bangun. 35 Smua orang di Lida deng daera Saron dong liat apa yang su jadi sama Eneas, trus dong smua percaya sama Tuhan.

36 Di Kota Yope ada satu prempuan de pu nama Tabita, dalam bahasa Yunani tu Dorkas. De ikut Yesus pu ajaran, trus de banyak bikin hal yang baik deng slalu bantu orang-orang yang trada apapa. 37 Pas waktu itu Dorkas de sakit trus mati. Trus habis itu de pu mayat dong kas mandi trus kas tidur di ruang atas. 38 Kota Yope tra jau dari Kota Lida.‡ Jadi waktu orang-orang yang ikut Yesus di Yope dengar kalo Petrus ada di Lida, dong suru dua orang pigi ke Petrus deng minta sunggu-sunggu, “Tolong ka! Cepat ikut tong ke Yope.” 39 Petrus langsung ikut dong, sampe disana dong bawa de ke ruang atas. Smua janda disitu krumun Petrus deng mnangis. Dong kas tunjuk sama de pakean-pakean deng baju-baju luar yang panjang, yang Dorkas jahit waktu de masi hidup. 40 Tapi Petrus suru janda-janda itu kluar, trus de tanam lutut ke tana trus doa. Habis itu, de balik ke Dorkas pu mayat trus de bilang, “Tabita! Ko bangun.” Waktu itu juga Dorkas buka mata. Begitu de liat Petrus, langsung de duduk. 41 Trus Petrus pegang de pu tangan bantu kas bediri dia. Habis itu Petrus panggil janda-janda deng Allah pu orang-orang, trus kas tunjuk sama dong kalo Dorkas su hidup lagi. 42 Brita ini tasebar ke smua daera di Yope sampe banyak orang jadi percaya sama Tuhan Yesus. 43 Petrus de tinggal cukup lama di Yope, di Simon pu ruma. Simon ni biasa bikin binatang pu kulit.§

* 9:2 pigi ke orang Yahudi pu kepala-kepala tempat ibada ‒ Waktu itu sampe akir abad pertama, orang yang percaya Yesus banyak dari orang Yahudi trus masi ibada di orang Yahudi pu tempat ibada. † 9:3 surga ‒ Kata yang bahasa Yunani pake di sini bisa arti ʻsurgaʼ ato ʻlangitʼ. ‡ 9:16 smua sengsara yang harus de dapat karna Saya ‒ Liat 2 Korintus 11:23-28, untuk liat apa saja yang Paulus sengsara nanti. § 9:24 pintu gerbang kota ‒ Kota Damsik, deng banyak kota lain waktu itu ada tembok yang kliling kota untuk kas aman kota. Tembok itu tinggi deng tebal, dong bikin dari batu. * 9:27 Barnabas ini juga ada di crita di pasal 4:36-37. Juga di pasal 11-15. † 9:30 Tarsus tu kota asal untuk Paulus. Itu terkenal sebage kota pendidikan, ada banyak tempat kulia. ‡ 9:38 Kota Lida ini kira-kira 16 kilometer ke ara tenggara dari Kota Yope, kalo jalan kaki sampe tiga jam. § 9:43 Simon ni biasa bikin binatang pu kulit ‒ Orang yang bikin kulit dari binatang, orang Yahudi liat de tra bersi karna de pu kerja itu pegang kulit binatang yang su mati. Dari dong pu praturan agama, kalo orang Yahudi masuk tempat dong bikin kulit binatang, arti orang itu tra bersi. Karna Petrus tinggal sama dia arti Petrus su mulai kas pisa diri dari praturan agama Yahudi trus siap layani orang bukan Yahudi.