17
Allah suru Abram bikin tanda janji
17:1-27
1 Waktu Abram pu umur 99 taun, TUHAN kas tunjuk Diri ke de lagi trus bilang begini, “Sa ini Allah Yang Pu Kuasa Paling Besar. Ko pu hidup harus ikut yang Sa mau, trus tetap setia deng Sa.
2 Trus Sa mo ikat Sa pu janji deng ko: Sa nanti bikin ko pu anana cucu jadi paling banyak skali.”
3 Dengar begitu, Abram langsung tunduk hormat Allah sampe ke tana. Trus Allah bilang Abram lagi,
4 “Ko dengar! Ini yang Sa janji ke ko: Sa nanti bikin ko jadi bapa dari bangsa-bangsa yang banyak skali.
5 Itu jadi, skarang ko pu nama bukan Abram lagi, tapi Abraham. Karna Sa su kas tetap ko jadi bapa dari bangsa yang banyak skali.
6 Sa nanti bikin ko ada anana cucu yang paling banyak skali. Ko pu anana cucu dong nanti jadi bangsa-bangsa. Nanti raja-raja juga lahir dari ko pu anana cucu ini.
7 Janji yang Sa bilang ko ini, ini janji yang trakan perna hilang. Biar sampe ko deng ko pu anana cucu yang lahir nanti juga, janji ini tetap ada. Sa janji Sa tetap jadi Allah untuk ko deng ko pu anana cucu.
8 Tana yang ko ada tinggal jadi pendatang ini, nanti Sa kasi ke ko deng ko pu anana cucu. Smua tana Kanaan ini, Sa nanti kasi ke kam, untuk tetap jadi kam pu milik sampe batas waktu yang trada akir. Trus Sa nanti tetap jadi Allah untuk dorang.”
9 Allah bicara lagi ke Abraham begini,
“Trus untuk ko Abraham, ko deng ko pu anana cucu yang nanti lahir juga, kam harus tetap bikin tanda janji yang Sa bilang ini.
10 Sa su ikat janji deng ko sama ko pu anana cucu. Untuk kas tanda janji yang Sa su bikin ini, kam harus tetap bikin ini: tiap laki-laki, sapa saja yang ada tinggal sama-sama deng kam, harus dapa sunat.
11 Sunat pu cara tu begini: Potong kam pu kulit di bagian ujung kelamin. Nanti itu yang kas tanda kalo sa deng ko su ikat janji.
12 Kam pu anana yang baru lahir pas masuk dlapan hari, dong harus dapa sunat. Smua laki-laki dalam ko pu orang-orang ini, sampe kam pu anana cucu juga, smua yang lahir di kam pu kluarga ato orang luar yang dapa bli deng uang, yang tra masuk ko pu kluarga juga, smua yang laki-laki harus dapa sunat.
13 Smua laki-laki yang masuk dalam kam pu rombongan harus dapa sunat, itu jadi tanda cap di kam pu daging yang nanti kas ingat kam, kalo janji yang Sa kasi tu trakan perna hilang.
14 Laki-laki sapa saja yang tra dapa sunat, yang de pu kulit bagian ujung kelamin tra dapa potong, de tra bole gabung deng orang-orang yang dapat Sa pu janji ini. Karna de tra bikin tanda janji yang Sa suru ini.”
15 Allah bilang Abraham lagi begini,
“Trus untuk ko pu maitua Sarai, ko tra bole panggil de pake nama Sarai lagi. Mulai skarang de pu nama su ganti jadi Sara.
16 Sa nanti kasi de berkat, mala de nanti lahir anak laki-laki satu untuk ko. Sa nanti kasi berkat sampe de nanti jadi mama dari bangsa-bangsa. Mala, dari de pu anana cucu tu nanti ada raja-raja yang pimpin bangsa-bangsa.”
17 Dengar begitu, Abraham langsung tunduk hormat Allah sampe ke tana baru Abraham de pikir, “Sa pu umur su mo masuk 100 taun. Sara pu umur su 90 taun. Baru Sara de mo lahir anak untuk sa di umur begini? Bisa eh?” Langsung Abraham de tertawa rasa lucu.
18 Trus Abraham de bilang ke Allah, “Ah Tuhan, janji yang Tuhan kasi tu biar untuk Ismael saja suda. Biar dari de saja suda sa pu anana cucu lahir.”
19 Tapi Allah jawab begini,
“Tra bole. Ko pu maitua Sara nanti de lahir anak laki-laki satu untuk ko. Ko harus kas nama anak itu Isak. Anak itu deng de pu anana cucu yang nanti tetap dapat janji yang trakan perna hilang ini.
20 Yang ko minta tentang Ismael tu nanti Sa bikin juga. Nanti Sa kasi de berkat anana cucu yang paling banyak skali juga. De nanti jadi moyang dari 12 kepala suku. De pu anana cucu juga nanti Sa bikin jadi bangsa yang besar.
21 Tapi Sa pu janji deng ko, itu janji yang nanti turun ke Isak, ko pu anak yang nanti Sara de lahir taun depan, pas di waktu-waktu macam skarang ini.”
22 Habis Allah bicara begitu, Allah naik kas tinggal Abraham di situ.
23 Trus Abraham panggil de pu anak Ismael deng smua orang laki-laki yang ada deng dia. Smua laki-laki yang lahir di Abraham pu ruma ato yang dapa bli, Abraham panggil dong trus potong dong pu kulit kelamin bagian ujung. Sperti yang Allah bilang, hari itu juga Abraham kas sunat dong smua.
24 Jadi, Abraham pu umur su 99 taun waktu de dapa sunat.
25 Abraham pu anak Ismael ni, de pu umur 13 taun waktu de dapa sunat.
26 Hari itu juga, Abraham deng de pu anak Ismael dapa sunat langsung.
27 Trus, Abraham pu orang-orang smua juga, mo yang lahir di de pu ruma ato yang de bli, smua dapa sunat sama-sama deng dia.