27
Isak kasi hak anak pertama ke Yakub
27:1-40
1 Waktu Isak su tua, de pu mata su kabur skali sampe tra bisa liat lagi, de panggil Esau, de pu anak pertama ni. Trus de bilang begini, “Anak!”
“Ya bapa,” Esau de jawab.
2 Isak bilang,
“Dengar baik-baik yang bapa mo bilang ini! Bapa ni su tua, baru bapa tra tau kapan bapa mninggal.
3 Jadi skarang, ambil ko pu pana deng busur, trus pigi ke daera sepi tempat buru binatang baru buru binatang satu untuk bapa.
4 Ko bikin makanan yang enak untuk bapa, bikin macam yang bapa snang makan. Habis itu, ko bawa kemari untuk bapa makan. Supaya seblum bapa mninggal, bapa kasi berkat yang bapa punya ini, untuk ko.”
5 Ribka de dengar yang Isak bilang ke Esau. Itu yang, waktu Esau de pi ke daera sepi,
6 Ribka bilang sama Yakub begini,
“Mama tadi ada dengar, kalo ko pu bapa bilang ke ko pu sodara Esau begini,
7 ‘Pi buru binatang satu, trus masak enak-enak untuk bapa. Habis bapa makan itu, nanti bapa kasi bapa pu berkat ke ko di depan TUHAN, seblum bapa mninggal.’ ”
8 Trus Ribka lanjut bilang,
“Jadi anak, ko dengar yang mama mo bilang ni, nanti ko bikin macam yang mama suru ini:
9 Ko pigi ke tong pu kambing domba pu tempat, pili anana kambing yang gemuk dua. Bawa ke sini supaya mama masak, bikin jadi makanan yang enak, macam yang ko pu bapa snang makan.
10 Habis itu, ko bawa ke ko pu bapa supaya ko pu bapa de makan. Trus, nanti de kasi berkat yang de punya tu ke ko, seblum ko pu bapa de mninggal.”
11 Tapi, Yakub de bilang de pu mama begini, “Mama, Esau pu badan penu deng bulu-bulu, tapi sa pu badan trada bulu-bulu ni, bagemana?
12 Jang sampe nanti bapa pegang sa pu badan baru de tau kalo sa su tipu de lagi? Bukan berkat tapi, nanti kutuk yang sa dapat lagi.”
13 Trus de pu mama jawab, “Tra usa takut, biar nanti mama yang tanggung kalo ko dapa kutuk. Ko bikin saja yang mama suru. Ko pigi! Ambil kambing-kambing itu!”
14 Jadi Yakub de pi ambil kambing-kambing, trus de bawa ke de pu mama. Ribka de masak makanan yang Isak suka dari situ.
15 Trus Ribka de ambil de pu anak pertama Esau pu pakean paling bagus yang ada tasimpan dalam ruma, baru de kas pake ke Yakub, de pu anak bungsu ini.
16 Trus de pasang kulit-kulit dari anana kambing ni ke Yakub, untuk tutup Yakub pu tangan deng leher yang trada bulu itu.
17 Baru, makanan enak deng roti yang de bikin tu, de kasi ke Yakub.
18 Habis itu, Yakub pi ke de pu bapa baru bilang, “Bapa!”
“Yo, bagemana?” Isak de jawab. “Ko sapa, Esau ka Yakub?”
19 Yakub jawab, “Sa Esau, bapa pu anak yang tua. Yang bapa suru tu, sa su bikin. Bapa bangun trus duduk suda, makan daging binatang buru yang sa ada bawa ini. Supaya habis itu, bapa bisa kasi bapa pu berkat ke saya.”
20 Isak bilang, “Anak, ko dapat cepat skali?”
Yakub jawab, “Itu karna TUHAN Allah yang bapa semba, De yang tolong sa untuk dapat ini!”
21 Trus Isak bilang Yakub, “Mari, datang ke dekat sini biar bapa bisa pegang ko, untuk tau kalo ko memang Esau ka bukan?”
22 Jadi, Yakub de ke dekat de pu bapa. Waktu Isak pegang dia, Isak bilang begini, “Suara ni, Yakub pu suara. Tapi tangan ni, macam Esau pu tangan.”
23 Jadi de tra tau kalo itu Yakub. Habis, de pu tangan ada bulu-bulu penu, sama macam de pu kaka Esau pu tangan. Waktu de su siap mo kasi berkat ke Yakub,
24 de tanya lagi, “Betul to, ko ni sa pu anak Esau?”
“Iyo bapa.” Yakub de bilang.
25 Trus Isak bilang, “Mari, kasi daging tu ke sini! Biar bapa makan daging yang bapa pu anak su dapat. Supaya habis makan, bapa bisa kasi bapa pu berkat ni ke ko.” Jadi Yakub kasi makanan ke dekat de pu bapa, baru de pu bapa makan. Trus de pu bapa minum anggur yang de ada bawa juga.
26 Habis itu, de pu bapa Isak bilang dia, “Mari anak, datang ke dekat sini trus ko cium bapa.”
27 Jadi Yakub ke dekat de pu bapa trus cium de pu bapa. Waktu Isak cium bau pakean yang Yakub pake, de kasi de pu berkat ke Yakub. De bilang begini,
“Memang benar, bau ini ni dari sa pu anak Esau.
Ini bau dari daera sepi tempat buru binatang, yang TUHAN kasi De pu berkat ke situ.
28 Sa minta Allah untuk kasi ko embun dari langit,
trus kasi ko tana-tana subur di bumi
sama gandum deng anggur yang banyak skali.
29 Bangsa-bangsa nanti kerja untuk kam,
suku-suku dari bangsa itu juga,
nanti tunduk hormat kam sampe ke tana.
Kam nanti jadi kepala dari kam pu sodara dorang.
Ko pu mama pu anana cucu
juga nanti tunduk hormat ko sampe ke tana.
Kalo sapa saja yang kutuk ko, nanti de dapa kutuk.
Trus sapa saja minta berkat untuk ko, de nanti dapa berkat.”
30 Waktu Isak slesai kasi de pu berkat untuk Yakub, pas Yakub baru saja kluar kas tinggal de pu bapa Isak ni, Yakub pu kaka Esau ni de datang dari tempat buru binatang.
31 De juga bikin makanan enak baru bawa ke de pu bapa. De bilang ke de pu bapa begini, “Bapa, mari bangun. Supaya bapa bisa kasi berkat ke sa, bapa makan daging binatang yang sa baru dapat ini dulu.”
32 Trus Isak tanya, “Ko sapa?”
De jawab, “Sa Esau, bapa. Bapa pu anak yang tua.”
33 Isak de kaget skali sampe gementar. Trus Isak de bilang, “Baru, sapa yang tadi datang bawa daging yang de dapat trus kasi ke sa?! Sa su makan daging tu smua, seblum ko datang. Trus sa su kasi sa pu berkat tu ke dia. Sampe nanti juga, de tetap jadi orang yang dapat berkat itu.”
34 Waktu Esau dengar de pu bapa bilang begitu, de bateriak kras-kras, de pu hati hancur skali. De bilang ke de pu bapa, “Bapa eee! Baru saya?! Kasi bapa pu berkat ke sa juga ka.”
35 Trus de pu bapa jawab dia, “Ko pu ade de su datang pura-pura jadi ko. Trus de su ambil berkat yang jadi ko pu hak itu.”
36 Esau bilang lagi, “Memang, de cocok deng nama Yakub suda mo, su dua kali ni de tipu saya! Sa yang anak pertama yang pu hak, tapi de su ambil. Baru skarang! De ambil lagi berkat yang bapa mo kasi untuk saya.” Baru de bilang ke de pu bapa lagi, “Bapa, trada berkat lain lagi ka untuk sa?”
37 Isak jawab Esau, de bilang begini, “Anak, bapa su angkat de untuk jadi kepala di atas ko. Sa su kasi de pu sodara smua untuk nanti jadi de pu budak. Berkat gandum deng anggur juga, sa su kasi dia. Jadi untuk ko, apa lagi yang sa bisa kasi, anak?”
38 Esau bilang sama de pu bapa, “Bapa, bapa pu berkat cuma satu itu saja ka? Tolong kasi bapa pu berkat ke sa juga ka, bapa!” Trus de bongkar mnangis.
39 Esau pu bapa Isak ni bilang sama de begini,
“Anak, tempat yang ko tinggal nanti tu, jau dari tana-tana yang subur di bumi ini,
trus tempat itu juga jau dari embun dari langit yang bikin tana subur.
40 Ko nanti cari hidup deng baku prang, baru ambil ko pu lawan pu barang-barang.
Trus ko yang nanti kerja untuk ko pu ade.
Tapi, satu hari nanti, kalo ko memang usaha sunggu-sunggu,
nanti ko bisa bebas. Ko trakan kerja untuk ko pu ade lagi.”
Yakub lari ke Mesopotamia
27:41-28:5
41 Esau ni de su emosi skali sama Yakub, gara-gara berkat yang dong pu bapa kasi ke Yakub. Jadi, Esau bilang ke de pu diri sendiri begini, “Bapa pu waktu su tra lama lagi. Habis bapa mninggal, trus waktu duka su slesai, sa nanti bunu Yakub dia.”
42 Waktu Ribka dapa dengar yang Esau ada rencana tu, de suru orang pi panggil Yakub trus de kastau Yakub begini,
“Ko pu kaka Esau de su emosi ko skali. De ada rencana mo bunu ko, supaya de bisa rasa tenang.
43 Jadi Yakub, skarang ko dengar yang mama mo bilang: Ko siap-siap trus lari pi tinggal di Laban, mama pu sodara laki-laki yang tinggal di kota Haran itu.
44 Tinggal di situ brapa lama saja, sampe ko pu kaka pu mara deng
45 de pu emosi ni hilang dulu, sampe de lupa apa yang ko su bikin ke dia. Nanti mama suru orang pi jemput ko dari situ.”
Ribka bicara lagi, “Sa tra mau kam dua dapa bunu. Masa tu dalam satu hari saja kam dua hilang dari saya.”
46 Trus Ribka bilang Isak, “Sa su cape skali gara-gara tong pu anana mantu Het itu. Kalo Yakub pu maitua juga satu dari prempuan-prempuan yang ada di tempat ini, macam prempuan Het yang Esau pu maitua dorang, lebi baik sa mati saja.”