45
Yusup kastau de pu sodara dong kalo de tu Yusup
45:1-15
1 Dengar Yehuda bilang begitu, Yusup su tra bisa tahan de pu hati depan de pu orang-orang kerja lagi. Jadi, de suru dong yang kerja di situ kluar kas tinggal de deng de pu sodara dong sendiri. Jadi, trada orang lain, waktu Yusup de kastau de pu sodara dong kalo de tu Yusup, dong pu sodara.
2 Habis itu, Yusup de mnangis hancur sampe orang Mesir yang di luar ruangan tu, dong juga dengar de mnangis. Sampe orang-orang di raja pu istana juga su dengar kabar kalo Yusup de ada mnangis.
3 Trus Yusup bilang de pu sodara dorang, “Sa ini Yusup! Bapa betul masi hidup to?” Tapi waktu Yusup de pu sodara dong dengar de bilang begitu, dong langsung jadi takut skali. Dong gementar sampe su tra bisa buka mulut untuk jawab apa yang Yusup de tanya.
4 Trus Yusup bilang dorang, “Mari, dekat sa sini!” Trus dong maju ke dekat Yusup. Yusup bilang lagi,
“Sa ni Yusup, kam pu sodara yang waktu itu kam jual ke Mesir.
5 Tapi kam jang rasa brat begitu, jang kas sala kam pu diri juga karna su jual sa dulu. Karna Allah De yang kirim sa duluan dari kam, untuk kas slamat orang-orang pu hidup skarang ni.
6 Klaparan ni baru dua taun. Nanti trakan ada orang yang bisa tanam ka panen ka, dalam lima taun ke depan ini.
7 Itu jadi, knapa Allah bawa sa ke sini duluan dari kam, supaya sa bisa liat kam pu hidup deng kam pu anana cucu di bumi ni, trus kas slamat tong pu hidup deng cara luar biasa begini.
8 Jadi, bukan kam yang bikin sa sampe ke sini, tapi Allah yang bikin sampe sa bisa ada di sini. Allah De yang bikin sampe, sa bisa jadi orang penting yang raja de percaya skali. Raja Mesir kasi sa kuasa untuk urus de pu istana deng smua tana Mesir ini.
9 Skarang, kam pulang cepat trus bilang begini ke bapa, ‘Bapa pu anak Yusup bilang begini: Allah su bikin sampe sa jadi orang paling penting di Mesir. Jadi skarang juga, mari datang ke sini suda! Jang tunggu lama lagi.
10 Bapa bisa tinggal di daera Gosyen nanti, dekat deng saya. Bapa, anana cucu dong, kambing domba, sapi, deng smua barang apa saja yang bapa punya.
11 Kalo bapa su di Gosyen, sa bisa jaga bapa dorang. Klaparan ni masi tetap ada sampe lima taun lagi. Itu jadi, biar sa yang nanti jaga liat bapa deng kluarga smua, bapa pu binatang-binatang piara juga trakan kurang apapa lagi.’ ”
12 Trus Yusup bilang lagi,
“Skarang kam su liat sendiri to, Benyamin ko juga, sa yang ada bicara ni saya suda, kam pu sodara Yusup.
13 Jadi, kam pi bilang bapa suda kalo sa ni pu kuasa yang besar skali di Mesir sini. Smua yang kam su liat di Mesir sini juga tu, kastau bapa dia. Baru kam cepat bawa bapa de ke sini.”
14 Yusup de langsung polo Benyamin baru de mnangis. Benyamin juga ikut mnangis di Yusup pu bahu langsung.
15 Masi mnangis-mnangis, Yusup de polo de pu sodara dong smua trus de cium dorang, baru dong mulai crita-crita deng dia.
Yakub deng kluarga dapa suru ke Mesir
45:16-23
16 Waktu raja pu satu istana dong dengar kalo Yusup pu sodara-sodara ada datang, raja deng orang-orang di istana dong juga rasa snang.
17 Trus raja Mesir bilang Yusup begini,
“Suru ko pu sodara dong bikin begini, ‘Taru gandum ni di atas binatang-binatang yang pikul kam pu barang-barang tu trus bawa pulang ke Kanaan.
18 Jemput kam pu bapa, sama orang-orang yang satu ruma deng kam juga, baru pinda ke sini. Nanti sa kasi kam tana di Mesir sini yang paling bagus. Karna tana tu de subur jadi, kam bisa dapat hasil yang paling bagus nanti.’
19 Trus ko harus bilang dong untuk bikin begini, ‘Bawa kreta brapa dari Mesir sini untuk pi jemput kam pu anana yang masi kecil deng kam pu maitua-maitua, jemput juga kam pu bapa baru bawa datang ke sini pake kreta itu.
20 Tra usa rasa sayang deng barang-barang yang kam kas tinggal itu, karna nanti di sini kam dapat barang-barang paling bagus yang Mesir punya, untuk jadi kam pu barang-barang.’ ”
21 Jadi suda, Yakub pu anana dong bikin sperti yang raja Mesir printa dong bikin. Yusup kasi dong kreta sperti yang raja suru, trus de juga kasi dong makanan untuk nanti dong makan di jalan.
22 Dong masing-masing juga dapat pakean baru satu-satu stel, tapi de kasi Benyamin uang perak tiga ratus deng pakean baru lima stel.
23 Yusup juga kirim kledai jantan spulu deng barang-barang paling bagus di Mesir di atas kledai-kledai itu untuk de pu bapa. Baru de kasi kledai betina spulu lagi yang nanti pikul gandum deng roti sama makanan untuk de pu bapa waktu dong balik ke Mesir.
Yakub dapa kastau kalo de pu anak Yusup masi hidup
45:24-28
24 Habis itu smua, Yusup suru de pu sodara dong pulang baru bilang dong begini, “Kam jang baku mara di jalan eh!”
25 Jadi Yusup de pu sodara dong kas tinggal Mesir baru dong pulang ke dong pu bapa Yakub. Pas sampe di Kanaan,
26 Yusup pu sodara dong bilang dong pu bapa, “Bapa, Yusup de masi hidup! Baru skarang ni Yusup de su jadi wakil raja yang pu kuasa untuk smua Mesir!” Tapi Yakub de tra percaya yang dong bilang, jadi de tra bilang apapa.
27 Tapi pas Yusup pu sodara dong kastau sama bapa Yakub smua yang Yusup suru dong kastau tu, tamba lagi waktu de pu bapa liat kreta yang Yusup kirim untuk jemput de pu bapa, langsung bapa Yakub ni de jadi smangat lagi.
28 Trus Yakub de bilang, “Sa pu anak Yusup masi hidup! Sa harus pi liat de dulu seblum sa mninggal.”