4
TUHAN kas tunjuk De pu sayang
4:1-11
1 Karna TUHAN De tra jadi kas hancur Niniwe, bikin sampe Yunus de tra snang skali, trus de mara skali.
2 Baru de berdoa sama TUHAN, de bilang,
“TUHAN, sa su bilang to, waktu sa masi di sa pu negri, kalo nanti TUHAN bikin sperti begini. Sa tau kalo TUHAN tu Allah yang paling baik sama sayang manusia. TUHAN juga paling sabar, tra perna stop kas tunjuk TUHAN pu baik sama smua orang. Sa su tau skali mo, kalo TUHAN pasti bruba pikiran jadi tra hukum dorang. Itu yang, knapa dulu sa lari ke Tarsis.
3 Jadi, TUHAN, bunu sa saja suda, karna lebi baik sa mati daripada sa hidup.”
4 Tapi TUHAN De bilang begini, “Ko sapa lagi jadi ko mara?”
5 Suda, trus Yunus de jalan kluar kas tinggal Niniwe. De jalan ke sebla timur, de ke tempat yang de bisa pake pantau kota itu. Baru de bikin pondok kecil satu di situ, untuk duduk tunggu apa yang nanti jadi di kota Niniwe.
6 Baru TUHAN Allah De kas tumbu tanaman yang de pu daun banyak, baru tanaman itu tumbu lewat Yunus pu kepala supaya bikin sombar Yunus dia, sampe de pu kepala tra kena panas lagi. Baru Yunus de snang skali sama tanaman itu.
7 Tapi besok pagi waktu masi pagi-pagi skali, Allah suru ulat satu kesitu makan tanaman tu pu batang sampe tanaman tu de layu, layu itu yang tra bisa bikin sombar Yunus de lagi.
8 Waktu pas matahari su tinggi, Allah kasi angin timur yang panas tatiup ke ara Yunus. Baru panas matahari lagi bakar Yunus de pu kepala sampe Yunus de hampir pingsan. Baru de harap supaya de mati saja, de bilang begini, “Lebi baik sa mati saja daripada sa hidup!”
9 Tapi Allah De bilang ke Yunus, “Ko kecewa karna tanaman itu de mati ka? Ko sapa lagi jadi ko mara?”
Trus Yunus de bilang, “Sa pu hak to untuk mara, sa mara sampe sa tra mau hidup lagi!”
10 Trus TUHAN De bilang begini,
“Ko sayang eee, sama tanaman itu, jadi ko pu hati susa pas de layu. Padahal ko tra bantu sdikit juga untuk bikin de tumbu. Tanaman yang de tumbu satu malam trus de mati satu malam juga.
11 Baru Sa lagi tra bole sayang sama Niniwe ka? Niniwe, kota yang besar tu, yang ada 120.000 orang lebi yang tinggal di situ, blum lagi dong pu binatang-binatang piara yang banyak skali tu. Dong tu orang-orang yang tra bisa kas beda mana yang baik deng mana yang jahat. Sa lagi tra bole sayang dong ka?”