10
Yesus De utus tuju pulu murid-murid
1 Habis itu Tuhan Yesus pili lagi murid-murid 70 orang, trus De mo utus dong dua-dua orang untuk mo pigi lebi dulu ke smua tempat deng kota yang nanti De mo pigi.
2 De bilang sama dong,
“Bua yang siap panen ada banyak. Tapi sedikit orang yang mo panen itu. Karna itu, minta ke Bapa yang punya itu smua, untuk kirim orang-orang yang kerja panen itu.
3 Skarang kam pigi deng ingat, Sa utus kam sperti anak domba ke tenga-tenga anjing hutan.
4 Kalo pigi jang kam bawa tas ato dompet ato sendal ganti. Jang kam buang-buang waktu mo bicara banyak sama orang di jalan.
5 Kalo kam mo masuk ruma satu, bilang dulu begini, ‘Tuhan kasi damai sama smua orang dalam ruma ini.’
6 Trus kalo di situ ada yang snang damai, brarti kam pu damai itu tetap sama dia. Tapi kalo trada, kam pu damai tu kembali sama kam.
7 Trus kalo ada orang yang su trima kam, tinggal di ruma itu saja. Makan deng minum apa yang dong kasi sama kam, karna orang yang kerja de pantas trima de pu bagian. Jang kam pinda-pinda ruma.
8 Kalo kam masuk kota satu trus kam dapa trima deng baik, makan saja apa yang dong kas siap untuk kam.
9 Kas sembu orang-orang sakit di kota itu deng kastau dong, ‘Tra lama lagi Allah jadi Raja!’
10 Tapi kalo kam masuk kota satu trus di situ dong tra trima kam, pigi ke jalan-jalan besar di kota itu baru kam kastau deng suara kras begini,
11 ‘Mo debu dari kam pu kota yang tempel di tong pu kaki, tong kebas kas bersi, supaya itu jadi tanda kalo nanti kam dapa hukum. Juga kam harus tau kalo tra lama lagi Allah jadi Raja!’
12 Dengar ini baik-baik, pas hari trakir, orang-orang di kota itu yang tra trima kam, nanti dong dapat hukuman lebi brat dari orang-orang di kota Sodom pu hukuman!”
Allah hukum kota-kota yang tolak Yesus
13 Yesus bilang lagi,
“Claka skali orang-orang di kota Korazim deng kota Betsaida! Karna Sa su bikin tanda-tanda heran di tenga-tenga kam tapi kam tra tobat. Kalo tanda-tanda heran itu jadi di orang-orang jahat kota Tirus deng Sidon itu, pasti orang-orang di sana langsung dong pake pakean duka deng duduk di atas abu, itu karna dong rasa sala deng dong pu dosa-dosa.
14 Tapi nanti pas waktu hukuman trakir, orang-orang jahat di kota dua itu Allah kas hukuman lebi ringan dari kam.
15 Juga orang-orang di Kapernaum! Kam pikir nanti kam dapa kas naik sampe ke surga? Trakan! Kam nanti dapa buang ke neraka!
16 Sapa saja yang dengar kam, de dengar Saya; trus sapa saja yang tolak kam, de tolak Saya; juga sapa saja yang su tolak Saya, de tolak Dia, yang su utus Saya.”
Tuju pulu murid-murid dong kembali ke Yesus
17 Tra lama begini 70 murid-murid yang dapa utus itu dong kembali deng snang skali trus kastau sama Yesus, “Tuhan, mo roh-roh jahat juga dong smua tunduk waktu tong pake Tuhan pu nama.”
18 Trus Yesus bilang sama dorang,
“Sa liat Iblis jatu dari langit sperti kilat.
19 Kam tau to! Sa su kasi kam kuasa untuk injak ular deng kalajengking, juga untuk kas kala Iblis pu kuasa, sampe trada yang bisa kas claka kam.
20 Tapi jang kam rasa snang karna roh-roh jahat itu tunduk sama kam, lebi baik kam rasa snang skali karna Tuhan su daftar kam pu nama di surga.”
Yesus rasa syukur sama Allah
21 Waktu itu juga Yesus pu hati snang skali karna penu deng Allah pu Roh trus De bicara begini,
“Sa rasa syukur sama Bapa, Tuhan yang punya langit deng bumi! Karna smua itu Bapa kas tunjuk untuk orang-orang renda deng tra pu ilmu, tapi Bapa kas rahasia dari orang-orang yang pu ilmu deng orang yang pintar, sperti itu yang Bapa snang.
22 Smua-smua Bapa su kasi sama Saya, trus trada orang yang knal Anak, cuma Bapa. Trada yang knal Bapa, cuma Anak deng orang yang Anak de pili untuk kastau tentang hal itu.”
23 Habis itu Yesus balik bilang ke De pu murid-murid dong saja, “Kam untung skali karna su liat apa yang kam liat skarang ini.
24 Kam dengar, jaman dulu banyak raja-raja deng nabi-nabi, dong mo skali liat deng dengar smua itu tapi dong tra bisa.”
Conto orang Samaria yang pu hati baik
25 Satu kali begini guru agama satu, bediri mo coba Yesus, de bilang, “Guru, sa harus bikin apa supaya sa bisa hidup trus sampe trada akir?”
26 Yesus jawab, “Apa yang ada tulis di hukum Musa? Apa yang Bapa baca di situ?”
27 Orang itu de jawab, “Sayang ko pu Tuhan Allah deng penu hati, deng smua ko pu diri, deng smua tenaga, deng juga smua ko pu akal, juga sayang orang lain sama sperti ko sayang ko pu diri sendiri.”
28 Yesus bilang, “Itu betul, buat begitu supaya ko pu hidup trus deng Allah.”
29 Tapi orang itu mo bela diri deng bilang begini, “Sapa orang lain itu?”
30 Yesus jawab,
“Ada pace satu de turun dari Yerusalem ke Yeriko. Di tenga jalan de dapa srang dari orang jahat, dong rampas de pu pakean deng de pu barang-barang smua trus de dapa pukul sampe de hampir mo mati baru dong kas tinggal de di jalan.
31 Pas begini ada satu imam de jalan dari situ, de liat orang itu tapi de pinda ke sebla jalan deng pigi trus.
32 Begitu juga deng orang satu dari suku Lewi de jalan di situ, sampe di tempat itu de liat tapi de juga pinda ke sebla jalan deng pigi trus.
33 Tapi tra lama satu orang Samaria mo pigi lewat dari tempat itu. Waktu de liat orang itu, de rasa kasian skali sama orang itu.
34 De pigi dekat orang itu, trus kas bersi de pu luka-luka kas obat pake anggur deng minyak. Trus de tutup de pu luka-luka habis tu kas naik de ke atas de pu kledai trus bawa de ke tempat mnginap deng urus orang itu.
35 Begini besok, orang yang tolong tu kasi uang perak dua deng bilang sama yang pu tempat itu, ‘Jaga deng urus dia. Kalo ada ongkos lain, nanti sa kasi ko waktu sa kembali.’ ”
36 Yesus tutup crita deng tanya, “Ko pikir sapa dari tiga orang itu, yang sayang sama orang lain yang dapa curi itu?”
37 Guru hukum Musa de jawab, “Orang yang su buat baik sama dia.”
Trus Yesus bilang, “Ko pigi baru ko harus buat sperti itu juga.”
Marta deng Maria
38 Begini Yesus dong lanjut jalan, dong masuk di satu kampung. Di situ ada satu prempuan yang undang Yesus ke de pu ruma, de pu nama Marta.
39 Marta de pu ade prempuan pu nama Maria. De pu ade ni trus duduk dekat Tuhan Yesus pu kaki mo dengar Yesus pu kata-kata.
40 Tapi Marta sibuk kerja kas siap smua. Begini Marta datang sama Yesus deng bilang, “Tuhan ini tra liat ka, sa pu ade kas biar sa kerja smua sendiri. Coba suru de bantu sa dulu.”
41 Tapi Yesus jawab de, “Marta, Marta, ko sibuk kerja deng kuatir hal yang banyak.
42 Tapi hanya satu yang penting! Maria su pili yang baik, itu trakan dapa ambil dari dia.”