☰ Lukas 17
17
Kas ampun orang yang sala sama kitong
1 Yesus bicara sama De pu murid-murid,
“Pasti ada saja yang bisa umpan sampe orang mo bikin dosa. Tapi claka skali orang yang umpan itu! 2 Lebi baik ikat batu besar di de pu leher trus lempar de ke laut, dari pada de bikin sampe satu dari orang-orang yang kecil ini bikin dosa. 3 Karna itu, kam harus hati-hati!
Kalo ko pu sodara bikin dosa, ko tegur dia. Kalo de rasa sala baru de mo sadar, ko trima dia. 4 Kalo de bikin sala sama ko tuju kali* dalam satu hari trus slalu datang minta maaf deng bilang sama ko, ‘Sa sala,’ ko harus kas ampun dia.”
5 Trus Yesus pu utusan dong bicara ke Yesus, “Tuhan, kas kuat tong pu iman ka.”
6 Yesus jawab, “Kalo kam pu iman sperti biji yang paling kecil saja, kam bisa bilang sama pohon itu, ‘Ko pinda ke laut!’ Pasti pohon itu de ikut ko pu printa.”
Tugas budak
7 Yesus bilang sama De pu murid-murid begini,
“Kalo satu orang dari kam ada yang pu budak. Budak itu, de pu kerja bikin kebun ato pigi jaga binatang piara. Waktu budak itu de pulang, tra mungkin kam bilang sama dia, ‘Mari tong makan sama-sama.’ 8 Tra to! Yang ada tu kam nanti bilang sama budak itu, ‘Cepat ko kas siap sa makanan, ko pigi ganti pakean yang bagus trus ko siap smua, jaga sampe sa makan slesai baru ko bisa makan.’ 9 Ada ka de dapa puji karna su kerja apa yang de musti bikin? Trada to! 10 Begitu juga deng kam. Waktu su bikin smua yang musti kam bikin, kam bilang begini, ‘Kitong cuma budak, tong cuma bikin apa yang harus tong bikin.’ ”
Yesus De kas sembu spulu orang yang sakit kulit busuk
11 Waktu lanjut ke Yerusalem, Yesus lewat jalan tenga, batas antara daera Samaria deng daera Galilea. 12 Begitu masuk kampung satu, di situ ada spulu orang yang sakit kulit busuk, dong ketemu Yesus. Dong bediri dari jau. 13 Baru dong bateriak deng kras, “Yesus, Guru, kasian kitong ka!”
14 Yesus liat dong baru bilang, “Kam pigi sama imam-imam supaya dong priksa kalo kam su sembu.”†
Begini waktu masi di tenga jalan spulu orang yang sakit kulit busuk ni dong smua sembu.
15-16 Satu orang dari dong, de ni orang Samaria, de kembali puji-puji Allah deng suara kras karna de su liat kalo de sembu. Trus depan Yesus de tunduk sampe muka ke tana de bilang, “Bapa trima kasi.”
17 Trus Yesus bilang ke orang, “Dong spulu orang yang tadi su sembu, mana dong sembilan itu? 18 Knapa cuma de yang bukan orang Yahudi‡ yang mo kembali puji Allah?” 19 Trus Yesus bilang orang itu, “Bangun deng pigi, karna ko percaya Saya, ko slamat.”
Waktu Allah printa jadi Raja
20 Orang-orang Farisi dong tanya sama Yesus kapan Allah mo jadi Raja. Trus Yesus jawab dong begini, “Allah mo printa jadi Raja itu trada tanda-tanda yang orang dong bisa liat. 21 Deng begitu orang tra bisa bilang, ‘Coba kam liat De ada di sini!’ ato ‘Coba liat De ada di sana!’ Karna Allah su mo jadi Raja di tenga kam smua.”§
22 Habis itu Yesus bilang sama De pu murid-murid dong,
“Nanti satu hari kam rindu mo liat hari yang Sa, Anak Manusia yang Allah utus, datang kembali, tapi kam tra bisa. 23 Trus nanti orang dong bilang sama kam, ‘Pigi liat De ada di sana!’ ato ‘Mari liat De ada di sini!’ Jang kam mo ikut pigi cari. 24 Karna nanti waktu Sa Anak Manusia yang Allah utus datang itu sperti kilat pica di langit, de pu cahaya tu dari ujung ke ujung sampe smua orang bisa liat. 25 Tapi Sa musti kena banyak sengsara dulu trus dapa tolak dari orang-orang jaman ini.
26 Waktu Sa, Anak Manusia datang, orang-orang pu hidup sama sperti Nuh pu jaman.✡ 27 Dong makan, minum, deng baku kawin, begitu trus sampe Nuh deng de pu kluarga masuk dalam kapal besar, trus banjir besar datang tutup bumi sampe orang-orang smua mati tenggelam.✡ 28 Begitu juga waktu Lot pu jaman. Dong makan deng minum, dong pigi bli deng pigi jual, juga dong bikin kebun deng bikin ruma. 29 Tapi waktu Lot deng de pu kluarga kluar dari kota Sodom, hari itu api deng lahar panas turun dari langit trus kas hancur dong smua.✡ 30 Begitu suda yang jadi waktu Sa Anak Manusia yang Allah utus, nanti balik kembali.
31 Sapa saja pas hari itu kalo de ada di atas de pu ruma jang mo turun ambil barang-barang yang ada dalam ruma. Juga kalo sapa yang pigi kebun jang de mo pulang ke de pu ruma. 32 Ingat to apa yang jadi sama Lot pu maitua!✡ 33 Sapa saja yang usaha mo kas slamat de pu hidup, nanti de tra bisa hidup yang trada akir. Tapi orang yang kasi de pu hidup, de yang nanti slamat.✡ 34 Sa kastau kam, waktu malam itu ada dua orang di satu tempat tidur, yang satu Allah bawa trus yang satu dapa kas tinggal. 35 Trus ada dua prempuan dong giling biji gandum, yang satu Allah bawa trus yang satu dapa kas tinggal. [ 36 Dua orang dong kerja di kebun, satu Allah bawa trus yang satu lagi dapa kas tinggal.]”*
37 Yesus pu murid-murid dong tanya, “Tuhan di mana nanti itu jadi?”
Yesus jawab sama dong, “Di mana ada bangkai, di situ ada burung bangkai.”
* 17:4 tuju kali - Yesus pu maksud bukan cuma tuju kali saja tapi kas maaf ulang-ulang stiap kali. Itu sama deng di Matius 18:21. Yesus bilang 70 kali tuju sperti itu. † 17:14 pigi sama imam-imam supaya dong priksa kalo kam su sembu - Praturan agama kalo orang yang kena sakit ini tra bole masuk tempat sembayang juga tra bole bergaul deng orang-orang sampe imam priksa kalo dong su sembu betul (Imamat 14:1-32). ‡ 17:18 de yang bukan orang Yahudi - Orang Yahudi anggap orang Samaria orang tra baik karna dong turunan dari perkawinan yang Tuhan larang (orang Yahudi tra bole nika deng suku lain). § 17:21 di tenga kam smua - Bahasa Yunani juga bisa arti ‘di dalam kam pu hati smua.’ ✡ 17:26 Kejadian 6:5-8 ✡ 17:27 Kejadian 7:6-24 ✡ 17:29 Kejadian 19:24-25 ✡ 17:32 Kejadian 19:26 ✡ 17:33 Matius 10:39, 16:25; Markus 8:35; Lukas 9:24; Yohanes 12:25 * 17:36 Ayat 36 yang dalam tanda kurung trada di teks-teks paling kuno jadi dapa anggap bukan bagian asli dari crita prikop ini, karna itu bikin tanda kurung besar.
☰