4
Yesus dapa uji dari Iblis
1 Allah pu Roh kuasai Yesus, trus De pigi dari sungai Yordan; Allah pu Roh bawa De ke tempat sepi yang kring.
2 Di situ Yesus dapa uji dari Iblis empat pulu hari. Empat pulu hari itu Yesus tra makan apapa jadi De rasa lapar.
3 Begini Iblis bilang sama Yesus, “Ko ni Allah pu Anak to, coba Ko suru batu ini jadi roti.”
4 Yesus bilang dia, “Ada tatulis begini, ‘Manusia hidup bukan dari roti saja.’ ”
5 Trus Iblis de bawa Yesus ke tempat satu yang tinggi, di sana deng cepat skali Iblis kas liat smua krajaan di dunia.
6 Iblis bilang Dia,
“Smua kuasa itu deng harta yang banyak itu, sa nanti kasi smua untuk Ko, karna smua itu sa su dapa kasi. Trus sa bisa kasi smua itu sama sapa saja yang sa mau.
7 Karna itu sa mo kasi smua sama Ko tapi, kalo Ko mo semba sama saya.”
8 Tapi Yesus jawab, “Ada tulis di Kitab Suci, ‘Ko harus takut ko pu Tuhan Allah, trus sama De saja yang ko harus semba!’ ”
9 Habis itu de bawa Yesus ke Yerusalem trus bawa De di ujung bagian atas Tempat Ibada Pusat. Baru de bilang ke Yesus, “Ko ni Allah pu Anak to, coba Ko lompat dari sini ke bawa.
10 Karna ada tatulis begini, ‘Tentang Ko, Allah nanti kas printa De pu malaikat-malaikat untuk jaga Ko.
11 Trus dong nanti tada Ko deng dong pu tangan supaya Ko pu kaki juga jang kena batu.’ ”
12 Yesus jawab de, “Ada tatulis, ‘Jang ko coba-coba ko pu Tuhan Allah!’ ”
13 Stela Iblis slesai uji Yesus, de mundur dari Yesus trus de tunggu waktu yang baik.
Yesus mulai De pu kerja dari Galilea
14 Stela itu deng kuasa Allah pu Roh, Yesus De kembali ke Galilea. Di daera itu, di mana-mana tempat orang-orang crita tentang Yesus.
15 Waktu itu De kas ajar di tempat-tempat ibada situ, smua orang dong puji-puji Dia.
Yesus dapa usir di Nasaret
16 Yesus De pigi juga ke Nasaret tempat dulu De besar di situ. Sperti biasa Yesus masuk ke tempat ibada pas orang Yahudi pu hari ibada, trus bediri untuk baca Kitab Suci.
17 Dong kasi Yesus baca kitab yang nabi Yesaya de tulis. Habis buka kitab itu, De dapat ayat yang tulis begini,
18 “Tuhan pu Roh ada sama Saya,
karna De su pili Saya untuk kastau Brita Baik ke orang miskin.
De utus Sa untuk kas lepas orang yang dapa tangkap,
kas sembu mata yang tra bisa liat,
untuk kas lepas orang yang dapa injak,
19 trus kastau kalo Tuhan su mulai kas liat De pu sayang ke De pu umat.”
20 Habis tu Yesus tutup kitab itu baru kas kembali sama yang tugas di situ, trus duduk. Smua orang dalam tempat ibada tu liat baik-baik ke Dia.
21 Trus Yesus mulai kas ajar dong, De bilang, “Hari ini smua yang tadi kam su dengar tu, skarang su jadi.”
22 Smua orang kas benar De baru dong heran kata-kata bagus skali yang De bilang, trus dong bilang, “Tra sangka eh! De tu Yusup pu Anak.”
23 Jadi Yesus bilang sama dong begini, “Pasti kam mo bicara Sa kata pepata yang bilang,‘Dokter, kas sembu Ko pu diri dulu.’ Coba buat di sini di Ko pu kampung smua yang tong su dengar yang Ko su bikin di Kapernaum! ”
24 Yesus tamba bicara lagi,
“Ingat to, trada nabi yang dapa hormat di de pu kampung sendiri.
25 Tapi kam dengar, yang Sa kastau ini benar: Waktu jaman nabi Elia, di situ hujan tra turun sampe tiga stenga taun, ada musiba lapar di smua negri itu. Waktu itu ada banyak janda-janda di Israel,
26 tapi Allah tra utus Elia ke satu orang dari dong, tapi ke satu mace janda di Sarfat, di tana Sidon.
27 Waktu nabi Elisa pu jaman, banyak orang yang sakit kulit busuk di Israel, juga trada satu orang yang dapa kas sembu dari dong; cuma Naaman, orang Siria itu.”
28 Dengar itu smua orang di tempat ibada dong mara skali.
29 Dong bediri trus usir Yesus ke luar kota baru bawa De ke pinggir gunung, tempat kota itu dong bangun. Dong mo dorong De ke jurang itu.
30 Tapi Yesus De jalan dari tenga-tenga dong trus pigi.
Yesus dalam tempat ibada di Kapernaum
31 Trus Yesus pigi ke kota Kapernaum di daera Galilea. Di situ Yesus kas ajar stiap hari ibada.
32 Dong smua heran dengar apa yang De kas ajar, karna De pu kata-kata penu deng kuasa.
33 Di dalam tempat ibada itu, ada orang satu yang krasukan roh jahat, de batariak deng suara kras,
34 “He Yesus, orang Nasaret, Ko mo bikin apa deng kitong? Ko datang mo kas hancur kitong ka? Sa tau Ko tu sapa, Ko itu orang suci yang Allah utus.”
35 Tapi Yesus bentak dia, “Diam! Kluar dari orang itu!” Roh jahat itu banting orang itu di tenga-tenga orang banyak, trus de kluar baru tra bikin sakit orang itu.
36 Trus smua orang yang liat tu heran, dong baku bicara, “Sunggu, hebat skali kata-kata ini! Karna deng penu kuasa De kas printa roh-roh jahat trus dong kluar.”
37 Trus tasebar brita tentang Yesus di smua daera itu.
Yesus De kas sembu Simon pu mama mantu deng banyak orang lain
38 Yesus kas tinggal tempat ibada, trus pigi ke Simon pu ruma. Simon pu mama mantu sakit panas tinggi, jadi dong minta Yesus tolong mace.
39 Jadi Yesus pigi ke tempat mace ada tidur baru usir sakit itu. Panas tinggi tu hilang, langsung mace bangun deng kas siap makanan untuk Yesus dorang.
40 Pas matahari masuk, banyak orang bawa dong pu kluarga yang mendrita sakit macam-macam. Trus Yesus De taru tangan di dong smua yang sakit satu-satu trus kas sembu dorang.
41 Dari banyak orang kluar roh-roh jahat deng batariak, “Yesus, Ko ni Allah pu Anak.” Tapi Yesus bentak tra bole dong bicara, karna dong tau kalo Yesus tu Raja yang Allah pili.
Yesus kas ajar di kota-kota lain
42 Pas matahari baru mo naik, Yesus pigi ke tempat sepi yang kring. Orang-orang dong cari De, pas dong dapat, baru dong coba tahan Yesus supaya jang kas tinggal dorang.
43 Tapi Yesus bilang, “Di kota-kota lain juga Sa harus kastau Brita Baik tentang Allah jadi raja, karna untuk itu Sa dapa utus ke dunia ini.”
44 Trus De kastau Brita Baik dalam tempat-tempat ibada di daera Yudea.