3
1 Ntá imá kóxakonhenni. Ntá kjuenka̱yáxinni kíxin chrókójína jehóni chrókuito̱heni chjasin Atenas
2 na ntá ichrꞌánni tí kíchó ni Timoteo a tsjijitsjehe chꞌán tí jahará kíxin kja̱xin ixra̱ kuènte Dios tjechꞌe chꞌán tjejókoni chꞌán tjako chꞌán tí tan kuènte Cristo tsaáxinni. Ntá ichrꞌánni chꞌán kíxin sintaxraxinkaonrá chꞌán tí itén Ìnchéni la ko sinchechéhe̱ chꞌán a̱sánrá
3 kíxin tso̱xrjéhya a̱sánrá má kíxin tí kjuaxróxinhya tjejotꞌatsínkará. Kíxin xi̱kaha ó nohará kíxin tꞌichjánxi̱n tsjasótexínni tí xra̱ kuènte Ìnchéni.
4 Na̱xa̱ kꞌuéjóni jnkoko̱á ntiha la ó tjo̱nka̱rá kíxin kaín ni kjuaxróxinhya tso̱nhenni tsjasóteni. A̱ ntá jie la ó nohará kíxin chaxín xi̱kaha kónhen.
5 Méxra̱ imá kóxakonna ntá ichrꞌan kíchó ni Timoteo kjuíjitsjehe chꞌán nkexrí tjejorá, á na̱xa̱ tinkachónkirá Ìnchéni o̱ áchꞌe chꞌín Tsochren chrókjuachroerá chrókui̱to̱hérá tí nti̱e Ìnchéni a̱ ntá chrókóchónkó kaín tí xra̱ kjuichꞌeni kjua̱ko̱ha̱ráni.
6 Na ntá ó kja̱nxi̱n chꞌín Timoteo chjasánrá Tesalónica chrónka chꞌán kíxin jína tjejorá na̱xa̱ tinkachónkirá Ìnchéni, la ko na̱xa̱ tjejorá tjuèhérá kíchuárá la ko chrónka chꞌán kíxin xraxinkáonrá tí jeheni tjinkáonrá chrókjuijitsjeheni tí jahará. Kja̱xin jeheni xi̱kaha tjinkaonni chrókꞌuikonni tí jahará.
7 Mé xi̱kaha kíchó ni tjejótꞌatsínkani kjuaxróxinhya ntihi na ntá kjónté kóchéhe̱ a̱sénni kuínhinni kíxin kaín a̱sánrá na̱xa̱ tinkachónkirá Ìnchéni.
8 A̱ ntá kuínhinni xi̱kaha kíxin jína tjejorá na̱xa̱ tinkachónkirá Ìnchéni Jesús a̱ ntá a̱ntsí kóchéhe̱ni.
9 Ntá imá tsjancheheni Dios kjuasáya kíxin xi̱kaha imá chéhe̱ a̱sénni kíxin tí jahará tinkachónkirá chꞌán.
10 Tie la ko ncha̱kotjin chronóe̱he̱ni Dios kíxin tsjanjon chꞌán kjuachaxin tsjijitsjeheni tí jahará ínaá kíxin na̱xa̱ tꞌitjáyan iso nkehe chrókjua̱ko̱ha̱ráni na̱xa̱ chrókꞌuítjárá nkexrí jína chrókuinkachónkirá Ìnchéni.
11 Tjejótjancheheni Tꞌéni Dios la ko Ìnchéni Jesucristo kíxin chrókjuinki̱tsani chꞌán chrókjuijitsjeheni tí jahará
12 la ko tjancheheni Ìnchéni kíxin chrókjuinki̱tsa chꞌán tí jahará kíxin a̱ntsí má chrótjuèhérá kíchuárá la ko chrótjuèhérá kaín xín chojni éxí yóhe̱ tjuàhará.
13 Tjancheheni chꞌán kíxin sintaxraxinkaonrá chꞌán kíxin kaín a̱sánrá chrókuitekáonrá chꞌán kíxin ntá tsochóntahya a̱sánrá ninkehó jie̱ nkayakon Itꞌéni Dios tió tsokjan Ìnchéni Jesús tsi̱ka̱o chꞌán kaín tí sín ó tsíkótjóá.