23
1 Nok pahbamaj aj chic i maꞌ Lu̱ꞌ chi quiwach take cꞌamol be̱h reꞌreꞌ, jeꞌ wili xikꞌor queh chi xa cow chic cꞌahchiꞌ ritzꞌehtam take:
«Was tak nicha̱kꞌ, cu ayuꞌ chi kꞌi̱j reh nicꞌacharic reꞌ hin xa coric woꞌ wach nicapew-bal chiwach i Dios, nqui xikꞌor queh.
2 Naxquibiraj reꞌreꞌ, reꞌ nahsil cꞌamol quibe̱h take aj kꞌahsem si̱ Anani̱yas ribihnal xikꞌor queh take sol wilque̱b cok ru̱cꞌ maꞌ Lu̱ꞌ chi xquiper je ware̱.
3 Reꞌ maꞌ Lu̱ꞌ jeꞌ woꞌ chic wili xikꞌor:
«Reꞌ hat ajabe̱s reꞌ cojo̱j chi richꞌukuric kꞌoric chi nina̱ ru̱cꞌ i Cꞌuhbal Yeꞌo̱j reh Moyses, reꞌ hat jeꞌ acab tzꞌak reh jenoꞌ pa̱t xa chu̱n chic npoybic wach chi xa qꞌuisi̱n maꞌ nkꞌehbic je. Jeꞌ reꞌ awi̱ꞌ chi niwach maj ru̱cꞌ chi xatakꞌa̱ꞌ cho ripereric wach we̱ cꞌahchiꞌ apoyom wach chi reꞌ hat maꞌ nanimej ta i Cꞌuhbal Yeꞌo̱j reh Moyses. Jeꞌ ricab nantuhyjic cok i tzꞌak reh jenoꞌ pa̱t nesmejic lok wach sakom chi xa qꞌuisi̱n poꞌ nak chic maꞌ nkꞌehbic je, reꞌ ok woꞌ i Dios esenok lok wach sakom chi reꞌ hat maꞌ cꞌahchiꞌ ta animem i cꞌuhbal reꞌreꞌ, nqui reh nahsil aj kꞌahsem si̱.
4 Naxquibiraj reꞌreꞌ take mololque̱b ar, jeꞌ wili xquikꞌor:
«Reꞌ hat maꞌ cꞌahchiꞌ ta ayohbalem wach nahsil cꞌamol quibe̱h take aj kꞌahsem si̱ chiwach i Dios, nqui take reh maꞌ Lu̱ꞌ.
5 Chalic maꞌ Lu̱ꞌ jeꞌ woꞌ chic wili xicꞌuꞌlej take wi̱ꞌ:
«Chacuy tak nimahc was tak nicha̱kꞌ. Pan coric, reꞌ hin maꞌ wehtꞌalim ta chi reꞌ poꞌ nchel i winak reꞌreꞌ i nahsil cꞌamol quibe̱h take aj kꞌahsem si̱ chiwach i Dios. Wi ta nak xkꞌormojic wi̱n chi jeꞌ reꞌ, reꞌ hin maꞌ xnikꞌor ta nak i kꞌoric reꞌreꞌ maj reꞌ Cꞌuhbal Yeꞌo̱j reh Moyses jeꞌ wili rikꞌor:
“Maꞌ ayakꞌabej pan awo̱k rilokꞌil i nahsil chipam atinami̱t, nqui rikꞌor, nqui xicꞌuꞌlej take wi̱ꞌ.
6 Chiri̱j chic ruꞌ reꞌ maꞌ Lu̱ꞌ xicoj rehtal chi quixilac take wilque̱b ar, yejal queh reꞌ jeꞌ ru̱cꞌ aj kꞌahsem si̱ jeꞌ ru̱cꞌ ca̱ꞌ quiꞌsil cho aj kꞌahsem si̱ Saroc eh yejal jeꞌ ru̱cꞌ take cow laj aj niminel reh Cꞌuhbal Yeꞌo̱j reh Moyses. Chi jeꞌ aj reꞌ, jeꞌ woꞌ chic wili xikꞌor queh chi cow:
«Was tak nicha̱kꞌ, reꞌ hin chꞌiclic nicꞌux chi reꞌ take camnak nacuctic woꞌ chic cho. Ruꞌum aj chi nicoj wach i tijbal reꞌreꞌ, reꞌ hat-tak xamol awi̱b tak chi richꞌukuric i kꞌoric chi nina̱ eh reꞌ hin, jeꞌ woꞌ hin ru̱cꞌ cow laj aj niminel reh Cꞌuhbal Yeꞌo̱j reh Moyses jeꞌ ricab xcaꞌn take cho nitu̱t waja̱w, nqui xikꞌor.
7 Nok rikꞌorom chic reꞌreꞌ i maꞌ Lu̱ꞌ, reꞌ take cow laj aj niminel reh Cꞌuhbal Yeꞌo̱j reh Moyses xquesaj lok qui̱b chi quixilac take aj kꞌahsem si̱ jeꞌ ru̱cꞌ ca̱ꞌ quiꞌsil cho aj kꞌahsem si̱ Saroc eh pꞌuht quichopom qui̱b chiri̱j reꞌreꞌ
8 maj reꞌ take cow laj aj niminel reh cꞌuhbal reꞌreꞌ nquicoj wach cuctic take camnak eh jeꞌ woꞌ nquicoj woꞌ wach chi reꞌ Dios wilic take raj tzꞌeꞌ wa̱ch on chi wilic kanxelex i hoj. Tzꞌa̱b ruꞌ take junchꞌuk, maꞌ nquicoj ta wach chiꞌnchel reꞌreꞌ.
9 Nok yohbal chic wach ahnic caꞌnam lok chi quibil qui̱b, reꞌ take aj tijem ri̱j Cꞌuhbal Yeꞌo̱j reh Moyses jeꞌ ru̱cꞌ quicomo̱n take cow laj aj niminel reh cꞌuhbal reꞌreꞌ, xa cakranak chic take xquipahba̱ꞌ johtok qui̱b eh jeꞌ wili xquikꞌor:
«Ru̱cꞌ take chaj bih riban i Dios, reꞌ hoj maꞌxta bih enkakꞌihtaj wi̱ꞌ ki̱b. Wi nchel jenoꞌ raj tzꞌeꞌ wa̱ch xitakꞌa̱ꞌ cho chi rikꞌoꞌrjic i maꞌ Lu̱ꞌ, reꞌ hoj maꞌxta ta bih enkakꞌor chiri̱j. Jeꞌ reꞌ nok reꞌ hoj xkachꞌuk chic wach chi reꞌ winak wili maꞌxta bih cꞌahbilal ribanam, nqui take.
10 Jeꞌ reꞌ xquikꞌor chi quiwach chiꞌnchel take aj kꞌahsem si̱ mololque̱b ar, reꞌ xquisutej ri̱j maꞌ Lu̱ꞌ eh riman chic wolic pꞌuht caꞌnam chi quiwach. Ar aj ruꞌ reꞌ nahsil cꞌamol quibe̱h take sol, ruꞌum riyoꞌjic xoquic cho chi enquicansaj i maꞌ Lu̱ꞌ, xikꞌor queh riso̱l quichaꞌjanic reh maꞌ Lu̱ꞌ chi naquesam je chi quixilac take tinamit quimolom qui̱b reꞌreꞌ. Nok jeꞌ reꞌ xcaꞌn, reꞌ take aj chaꞌjanel reꞌreꞌ xquicꞌam woꞌ chic je chipam i pa̱t quiwihꞌic wi̱ꞌ take sol.
11 Ar aj chipam i pa̱t reꞌreꞌ, reꞌ kAja̱w Jesus xicꞌuhtaj ri̱b reh maꞌ Lu̱ꞌ pa riwiric eh jeꞌ wili xikꞌor reh chiwach akꞌab reꞌreꞌ:
«Maꞌ tiyoꞌjic maꞌ Lu̱ꞌ chacowej laꞌ acꞌux. Nicꞌ paꞌ wach naxakꞌor nikꞌorbal ayuꞌ Jerusalen curman woꞌ chi jeꞌ reꞌ na̱wojic akꞌorom ar pan tinamit Ro̱ma, nqui xikꞌor reh.
Jenaj chic pech niqꞌuinjic woꞌ nak
chic ricansjic i maꞌ Lu̱ꞌ
12 Chiri̱j chic ruꞌ nok sakꞌanak chic lok, juntuhm take winak jeꞌ ru̱cꞌ ra̱ꞌ riꞌsil cho maꞌ Israhel xquitikꞌa̱ꞌ wach quinoꞌjbal chi naquicansam i maꞌ Lu̱ꞌ eh chi riyeꞌeric quikꞌorbal chi ricansjic ruꞌ, jeꞌ wili xquikꞌor:
«Reꞌ hoj wi xkaꞌn kawaꞌ kaha̱ꞌ chi jaꞌ nkacansaj ta maꞌ Lu̱ꞌ, kojsihtjok ruꞌum i Dios, nqui take.
13 Reꞌ take winak reꞌreꞌ maꞌ xa ta wilque̱b caꞌwinak ok chi winak naxquiyew quikꞌorbal chi cansanic.
14 Chiri̱j aj chic riyeꞌeric quikꞌorbal, reꞌ take winak reꞌreꞌ xichalic cu̱cꞌ take cꞌamol quibe̱h take aj kꞌahsem si̱, jeꞌ woꞌ cu̱cꞌ take nahsil chipam tinamit eh jeꞌ wili xquikꞌor:
«Reꞌ hoj jeꞌ wili kakꞌorbal xkayew chikawach chi ricansjic i maꞌ Lu̱ꞌ:
‹Reꞌ hoj wi xkaꞌn kawaꞌ kaha̱ꞌ chi jaꞌ nkacansaj ta maꞌ Lu̱ꞌ, kojsihtjok ruꞌum i Dios, nqui xkakꞌor.
15 «Yuꞌna kꞌuruꞌ reꞌ hat-tak chꞌi̱l take acomo̱n reꞌ namol awi̱b tak quichꞌi̱l, chaꞌn awi̱b tak chiwach i nahsil cꞌamol quibe̱h take sol chi jeꞌ nawa̱j asakomem tak wach rimahc maꞌ Lu̱ꞌ eh chapahkaj tak reh chi ikal chicꞌam woꞌ chic cho chawach tak reh chi reꞌ hoj nok katikꞌa̱b chic ki̱b, enkacansaj i maꞌ Lu̱ꞌ nok jaꞌ ta ncꞌulic lok chipam i pa̱t wili, nqui take.
16 Chi jeꞌ aj nak reꞌ nacaꞌnam take winak reꞌreꞌ, reꞌ ribiral chi nca̱j nak quicansam maꞌ Lu̱ꞌ, xponic peꞌ pan xiquin i jenaj racꞌu̱n rana̱b i maꞌ Lu̱ꞌ. Reꞌ acꞌun reꞌreꞌ naxibiraj ribiral reꞌreꞌ xo̱j chipam i pa̱t wilque̱b wi̱ꞌ take sol eh xponic rikꞌor reh maꞌ Lu̱ꞌ nicꞌ wach i noꞌjbal xquitikꞌa̱ꞌ wach take winak reꞌreꞌ.
17 Naxibiraj reꞌreꞌ maꞌ Lu̱ꞌ, xiyukꞌej je jenaj queh take cꞌamol quibe̱h sol chi rikꞌormojic reh chi jeꞌ wili:
«Ajabe̱s, reꞌ acꞌun wili wilic kꞌoric xibiraj cho chiwi̱j eh yuꞌna ra̱j rikꞌorom reh nahsil chana̱ tak. Chacuy, chacꞌam je wi̱n chiwach anahsil tak, nqui reh.
18 Chalic i cꞌamol quibe̱h sol reꞌreꞌ xicꞌam je acꞌun chiwach rinahsi̱l eh jeꞌ wili xponic rikꞌor reh:
«Ajabe̱s, reꞌ kaj tzꞌahpel maꞌ Lu̱ꞌ xiriyukꞌej je ru̱cꞌ eh xipahkaj atoꞌbil wi̱n chi xnicꞌam cho acꞌun wili chawach ruꞌum nok ra̱j rikꞌorom aweh jenaj kꞌoric xibiraj cho chiri̱j kaj tzꞌahpel reꞌreꞌ, nqui reh rinahsi̱l.
19 Jeꞌ reꞌ ajic reꞌ nahsil reꞌreꞌ xichop chi kꞌab acꞌun reꞌreꞌ, xicꞌam lok pa reh eh jeꞌ wili xibiraj reh:
«Chaj bih na̱kꞌorom wi̱n? nqui reh.
20 Chalic acꞌun jeꞌ wili xikꞌor reh:
«Ajabe̱s, reꞌ nahsil aj kꞌahsem si̱ chꞌi̱l take quinahsil i tinamit xquitikꞌa̱ꞌ wach quinoꞌjbal chi naquikꞌorom aweh, chi ikal naquimolom woꞌ chic qui̱b chi risakomsjic wach aweh rimahc maꞌ Lu̱ꞌ. Ruꞌum aj reꞌ naquipahkam aweh chi na̱cꞌamam woꞌ chic je maꞌ Lu̱ꞌ chi quiwach,
21 xa reꞌ laꞌ hat ma̱cꞌuꞌlej na̱ queh maj maꞌ xa ta wilque̱b caꞌwinak (40) chi ra̱ꞌ riꞌsil cho maꞌ Israhel naquicꞌolom qui̱b chi ruyuꞌnjic maꞌ Lu̱ꞌ reh chi naquicansam. Yuꞌna, xa chic reꞌ akꞌorbal hat cꞌahchiꞌ cuyꞌem chi nacaꞌnam reꞌ xquitikꞌa̱ꞌ wach, ruꞌum nok xquiyew chic quikꞌorbal chi naquisihtjic ruꞌum i Dios wi xcaꞌn quiwaꞌ quiha̱ꞌ chi cu jaꞌ nquicansaj ta pe i maꞌ Lu̱ꞌ, nqui xikꞌor reh nahsil reꞌreꞌ.
22 Chi jeꞌ reꞌ, reꞌ nahsil sol naxitakꞌa̱ꞌ je i qꞌuijol laj acꞌun reꞌreꞌ, xikꞌor reh chi maꞌ hab ta wach eh narikꞌorom chi xcꞌulic riyew rehtalil i chaj bih xquitikꞌa̱ꞌ wach take juntuhm chi ra̱ꞌ riꞌsil cho maꞌ Israhel.
23 Chiri̱j chic ruꞌ xikꞌoꞌrej je take quib chi cꞌamol quibe̱h sol eh jeꞌ wili xikꞌor queh:
«Chatakꞌa̱ꞌ tak kꞌoric chi beleje̱b o̱ra reh chakꞌab nacojic ar Sesare̱ya lajcꞌahl (200) chi sol jeꞌ ru̱cꞌ chꞌi̱l quimache̱t, lajcꞌahl (200) jeꞌ ru̱cꞌ chꞌi̱l quikꞌas juꞌ chꞌihchꞌ tzꞌob-bal eh lajeb ricajwinak (70) jeꞌ ru̱cꞌ ri̱j cawa̱y wilque̱b. Chakꞌor tak queh sol reꞌreꞌ kꞌuruꞌ chi quitikꞌa̱ꞌ qui̱b reh ojic.
24 Reh aj chi maꞌ eta ncansjic i maꞌ Lu̱ꞌ, cꞌamarok je ru̱cꞌ ajabe̱s maꞌ Pe̱lix reꞌ raj toꞌo̱l kꞌatal kꞌoric aj Ro̱ma ar Sesare̱ya eh chatikꞌa̱ꞌ tak jenoꞌ ricawa̱y i maꞌ Lu̱ꞌ cꞌambal je reh, nqui nahsil cꞌamol quibe̱h sol reꞌreꞌ.
25 Chiri̱j chic ruꞌ xitzꞌihmbaj je jenaj hu̱j reh maꞌ Pe̱lix reꞌ rikꞌor chi jeꞌ wili:
26 «Ajabe̱s kꞌatal kꞌoric maꞌ Pe̱lix: Reꞌ hin Cala̱wriyo Lisi̱yas nibihnal cꞌahchiꞌ nitakꞌa̱b je risukquil acꞌux. Jeꞌ woꞌ cꞌahchiꞌ nikꞌorom je aweh take kꞌoric wili chiri̱j
27 i winak wili reꞌ ritinami̱t woꞌ i Ro̱ma jeꞌ ricab xnibiraj chi xikꞌor. Reꞌ aj wili kꞌoric nikꞌor je aweh: Reꞌ hin xnichop cho winak wili naxinponic chꞌi̱l take niso̱l ar chipam i yeꞌa̱b naricansjic nak wi̱ꞌ cuꞌum take juntuhm chi ra̱ꞌ riꞌsil cho maꞌ Israhel xichopbic je reh. Chi jeꞌ aj reꞌ cꞌahchiꞌ caꞌnam reh, xnimakꞌ cho pan quikꞌab take juntuhm reꞌreꞌ
28 eh ruꞌum chi xwa̱j nibiram chaj bih riwi̱ꞌ chi cꞌahchiꞌ quitzꞌakam i mahc chiri̱j, reꞌ hin xnipahba̱ꞌ chi quiwach take nahsil nquimol qui̱b chi chꞌukuj wach mahc
29 xa reꞌ laꞌ hin maꞌ xnirak ta jenoꞌ mahc chiri̱j i winak wili chi eta nak ncahnic pan che̱ꞌ chi junpech on chi eta nak ncansjic jeꞌ ricab rikꞌor i takꞌanic nchoponic kana̱ hoj aj Ro̱ma. Xa reꞌ cok xwilow chi reꞌ winak wili cꞌahchiꞌ richꞌukuric wach rimahc chiri̱j i cꞌuhbal tijimaj take wi̱ꞌ ra̱ꞌ riꞌsil cho maꞌ Israhel.
30 «Jeꞌ reꞌ kꞌuruꞌ to̱b ta chiwach kacꞌuhbal hoj maꞌxta jenoꞌ rimahc, reꞌ hin xa chiwach woꞌ ti juncꞌam naxcꞌulic kꞌormojok wi̱n chi juntuhm take ra̱ꞌ riꞌsil cho maꞌ Israhel nca̱j quicansam pan cꞌolic i winak wili, cꞌahchiꞌ nitakꞌa̱b je awu̱cꞌ reh chi ar chic chawach chꞌukurok wach rimahc. Yuꞌna ti tikilqui̱n chic chi nanitakꞌa̱b je kꞌoric cu̱cꞌ take aj tzꞌakol wach rimahc chi chawach ok chic i hat ojok quichꞌuk wach rimahc. Reꞌ aj wili kꞌoric xnitzꞌihmbaj je aweh ajabe̱s maꞌ Pe̱lix. Chawicꞌraj awi̱b ar kꞌuruꞌ, nqui rikꞌor hu̱j xitzꞌihmbaj je maꞌ Cala̱wriyo Lisi̱yas.
31 Jeꞌ aj reꞌ kꞌuruꞌ naxponic beleje̱b o̱ra reh chakꞌab, jeꞌ ricab nicꞌ paꞌ wach xitakꞌa̱ꞌ rikꞌormojic i nahsil cꞌamol quibe̱h take sol reꞌreꞌ, reꞌ maꞌ Lu̱ꞌ xesmejic woꞌ je cuꞌum take sol jeꞌ ru̱cꞌ quiꞌo̱j chi cok eh cu ar pan tinamit Anti̱patris xponic quicana̱ꞌ cho chiwach chakꞌab reꞌreꞌ.
32 Naxsakꞌic, reꞌ take sol reꞌreꞌ xisoljic woꞌ chic cho chipam i pa̱t wilque̱b wi̱ꞌ, nok quicana̱b chic cho maꞌ Lu̱ꞌ pan quikꞌab take sol quibehic ri̱j cawa̱y chi naquicꞌamam je ar Sesare̱ya. Reꞌ take sol reꞌreꞌ xquicꞌam je maꞌ Lu̱ꞌ
33 ar Sesare̱ya eh naxiponic ar xquipahba̱ꞌ cok chiwach i rijelow-bal kꞌatal kꞌoric pahbamaj ar. Naxquikꞌahsaj i hu̱j xitzꞌihmbaj je maꞌ Cala̱wriyo Lisi̱yas,
34 reꞌ pahbamaj chi rijelow-bal i kꞌatal kꞌoric ar Sesare̱ya, pꞌuht rilom wach i hu̱j reꞌreꞌ eh chiri̱j chic ruꞌ xibiraj reh maꞌ Lu̱ꞌ haj wilic i yukꞌul asjanak wi̱ꞌ. Nok ribiram chic chi reꞌ maꞌ Lu̱ꞌ ar pa riyukꞌul Sili̱sya asjanak,
35 jeꞌ wili xikꞌor reh:
«Reꞌ hin nanibiram i kꞌoric na̱banam chi ricoꞌljic awi̱b, xa reꞌ laꞌ nwuyꞌej pe naquicꞌolok lok take aj tzꞌakol wach mahc chawi̱j, nqui reh.
Chiri̱j ruꞌ, jeꞌ aj wili xikꞌor queh take riso̱l:
«Reꞌ winak wili ar chachaꞌjej tak chipam i pa̱t xitikꞌa̱ꞌ cahnok i kꞌatal kꞌoric Hero̱res, nqui queh.