Reꞌ hu̱j xitzꞌihmbaj i maꞌ Lu̱ꞌ queh niminel
Aj Colo̱sa
1
Reꞌ cꞌalenenic riban je maꞌ Lu̱ꞌ queh niminel aj Colo̱sa
1 Reꞌ hin maꞌ Lu̱ꞌ, reꞌ Jesus reꞌ Pahbamaj chi Kꞌatal Kꞌoric, reꞌreꞌ xiripahba̱ꞌ chi aj kꞌorol riCꞌuhbal ruꞌum nok jeꞌ reꞌ camanic xa̱j i Dios chi nanibanam chiwach. Chi jeꞌ aj reꞌ, reꞌ hin chꞌi̱l i kich aj niminel Timote̱yo ribihnal, cꞌahchiꞌ nitzꞌihmbam je i hu̱j wili
2 aweh hat-tak lokꞌ laj kich aj niminel wilca̱t tak ar Colo̱sa, reꞌ nachꞌica̱ꞌ acꞌux tak chiri̱j i Jesus. Reꞌ aj wili cꞌalenenic niban je: Reꞌ ta nak ratoꞌbil eh jeꞌ woꞌ i sukquil cꞌuxlis riyew cho kAja̱w Dios chꞌi̱l i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric, reꞌ ta nak reꞌ wihꞌok pan acꞌacharic tak.
Reꞌ ritioxjic johtok i Dios chiri̱j
quiniminic take aj Colo̱sa
3 Reꞌ hin naniban niti̱j chawi̱j tak, xa eli̱c woꞌ nitioxej johtok i Dios reꞌ rAja̱w i kAja̱w Jesus reꞌ Pahbamaj chi Kꞌatal Kꞌoric
4 ru̱cꞌ take nibiraj chiri̱j acapew-bal tak. Jeꞌ reꞌ nikꞌor maj nibiraj chi reꞌ hat-tak cow choplic acꞌux tak chiri̱j kAja̱w Jesus eh jeꞌ woꞌ nicꞌ wach nachakꞌlamej awi̱b tak cu̱cꞌ chiꞌnchel take aj niminel.
5 Reꞌ riwi̱ꞌ chi jeꞌ reꞌ naꞌn tak ruꞌum chi xa cow chic nachꞌica̱ꞌ acꞌux tak chiri̱j ricꞌuꞌljic i cuseꞌsbal reꞌ xitikꞌa̱ꞌ cho wach i Dios chi na̱cꞌulum nok wilca̱t tak chic ar pan taxa̱j. Nicꞌ wach nachawehtꞌalij tak chi na̱cꞌulum tak i cuseꞌsbal reꞌreꞌ? Ruꞌum chi xa reꞌ woꞌ naxkꞌormojic aweh tak ribiral i Jesus reꞌ hat-tak xabiraj woꞌ tak cho ribiral ruꞌ reꞌ xkꞌormojic aweh tak ru̱cꞌ i coric laj cꞌuhbal nyeꞌbic sukquil cꞌuxlis queh take quicꞌulbic reh.
6 Chiri̱j i cꞌuhbal reꞌreꞌ, reꞌ xponic rikꞌormojic awu̱cꞌ tak jeꞌ woꞌ cu̱cꞌ take toco̱m chic cꞌacharel chi junsut wach acꞌal, nwa̱j nikꞌorom chi ruꞌum reh rikꞌormojic ruꞌ, reꞌ Dios cꞌahchiꞌ ribanam chi qꞌuihal take cꞌacharel nquijal wach quinoꞌjbal. Jeꞌ aj reꞌ cꞌahchiꞌ ricꞌuluric jeꞌ ricab woꞌ xcꞌuluric awu̱cꞌ hat-tak naxabiraj tak i cꞌuhbal eh ru̱cꞌ reꞌreꞌ xarak woꞌ tak chiri̱j chi coric chi reꞌ Dios kꞌe̱ꞌ woꞌ chic richakꞌlamil cho chana̱ tak.
7 Jeꞌ aj reꞌ xarak tak chiri̱j ru̱cꞌ i cꞌuhbal chiri̱j i Jesus reꞌ Pahbamaj chi Kꞌatal Kꞌoric, reꞌ xikꞌor ribiral aweh tak i kich aj niminel maꞌ Epa̱wras ribihnal.
Reꞌ maꞌ Lu̱ꞌ maꞌ ripit ta riti̱j
chiqui̱j niminel aj Colo̱sa
Reꞌ kich aj camanom Epa̱wras reꞌ kꞌe̱ꞌ tiꞌ nkicꞌraj chipam ricamaj i Dios ruꞌum chi til chꞌiclic ricꞌux chiri̱j i Jesus chipam ricamaj cꞌahchiꞌ ribanam chaxilac tak
8 reꞌ aj reꞌ xcꞌulic kꞌorok keh hoj nicꞌ wach i cꞌaxoj i̱b naꞌn chawach tak reꞌ kꞌorel nicꞌ paꞌ wach ricoj pan awa̱mna tak i Lokꞌ laj rUxlabal i Dios.
9 Ruꞌum aj reꞌ, xa reꞌ woꞌ cho pan pe̱t ribirmijic abiral tak kꞌoro̱j keh ruꞌum maꞌ Epa̱wras, reꞌ hoj ayuꞌ maꞌ kamayam ta ribanaric kati̱j chawi̱j tak chiwach i Dios chi ripahkaljic reh chi ru̱cꞌ ta nak i manlic wach noꞌjbal chꞌi̱l manlic wach capew-bal riyew aweh tak i Lokꞌ laj Uxlabal, charak ta nak tak chiri̱j chi manlic haj wilic i raj i Dios chi na̱banam pan acꞌacharic tak.
10 Jeꞌ reꞌ pahkanic nkaꞌn pan kati̱j reh chi eticꞌacharic tak chiwach i Dios jeꞌ ricab riwi̱ꞌ chaweh tak chi eticꞌacharic tak chi anaꞌbem tak chic wach i Dios. Jeꞌ woꞌ pan kati̱j, kojpahkanic woꞌ reh chi xa ewoꞌ nponic chiwach i Dios anoꞌjbal enaꞌn tak chiwach. Jeꞌ woꞌ chic, naniban niti̱j chawi̱j tak nipahkaj woꞌ johtok chi reꞌ ribanaric holohic laj camanic chiwach i Dios qꞌuihok ta nak wach awu̱cꞌ tak jeꞌ ricab ncaꞌn take che̱ꞌ chi quiqꞌuihic johtok cu rehtal quiwachanic. Jeꞌ woꞌ, nipahkaj woꞌ chi nimbok ta nak wach awu̱cꞌ tak i noꞌjbal chi rehtꞌaljic wach i Dios chi coric.
11 Jeꞌ aj reꞌ naniban niti̱j reꞌ hin nipahkaj woꞌ chi riman chic cowsjok acꞌux pan animinic tak ru̱cꞌ rinimal rajawric i Dios. Jeꞌ reꞌ riwi̱ꞌ pahkanic niban reh chi xa ru̱cꞌ woꞌ kꞌuni̱l enachop acꞌux tak chi ricuyuric ransil chiꞌnchel xa paꞌ jaric tiꞌcꞌaxic enchalic chana̱ tak.
12 Jeꞌ woꞌ chic, reꞌ niti̱j chawi̱j tak reh chi reꞌ hat-tak xa ru̱cꞌ chic risukquil acꞌux tak enatioxej tak johtok i Dios ru̱cꞌ i rajawric maj ruꞌum reh ruꞌ, reꞌ hoj chiꞌnchel aj niminel wilic woꞌ kajawric reh chi yuꞌna nakehtric cok cuseꞌsbal kꞌoro̱j cahnok chi reꞌ hoj reꞌ wilco̱j chi ritinami̱t chic i Dios na kawihꞌic ar reꞌ wilic wi̱ꞌ i Dios chi sutumaj ri̱j chi rinimal risakomil ar pan taxa̱j.
13 Ruꞌum aj reꞌ katioxej johtok reh Dios maj reꞌreꞌ xojricoꞌlej chiwach aj Yahm naximakꞌ i rajawric wilic nak chi kana̱ i hoj chi cꞌachalco̱j nak pa rikꞌekomil i cꞌahbilal. Jeꞌ woꞌ chic, chi kunchelal i hoj aj niminel xojriyew i Dios chi riꞌsil rajawric i rAcꞌu̱n reꞌ kꞌe̱ꞌ tiꞌ ricꞌraj.
Reꞌ Jesus ncꞌuhtunic lok wi̱ꞌ nicꞌ wach riwi̱ꞌ i kAja̱w Dios
14 Reꞌ chic rAcꞌu̱n i Dios, reꞌ Jesus ribihnal, reꞌ woꞌ reꞌ xiyew ri̱b chi quimic chiki̱j hoj chiꞌnchel cꞌacharel. Ruꞌum reh riquimic ruꞌ, reꞌ hoj aj niminel reh xojcoꞌljic chic eh maꞌ xa reꞌ ta reꞌ, chiꞌnchel laꞌ woꞌ kamahc cuyuj chic take yuꞌna ruꞌum i Dios.
15 Chiri̱j i rAcꞌu̱n i Dios nikꞌor woꞌ aweh tak take kꞌoric wili:
Reꞌreꞌ ncꞌuhtunic lok wi̱ꞌ reꞌ nicꞌ wach riwi̱ꞌ i kAja̱w Dios reꞌ maꞌ jancꞌal ta ilo̱j wach.
Reꞌ chic chiri̱j rajawric i Dios, xa reꞌ woꞌ Acꞌunbe̱s ncꞌuhtunic lok reh chi manlic
ruꞌum nok reꞌ aj woꞌ reꞌ wilic rajawric china̱ nicꞌ paꞌ nimal tikꞌimaj cho.
16 Jeꞌ woꞌ, nicꞌ paꞌ nimal take tikꞌimaj reꞌ woꞌ rAcꞌu̱n i Dios xtikꞌinic reh.
Jeꞌ reꞌ ajic chiꞌnchel paꞌ bih wilque̱b wach acꞌal reꞌ nilmijic quiwach chꞌi̱l woꞌ take wilque̱b pan taxa̱j reꞌ maꞌ nilmijic ta quiwach,
jeꞌ ricab nicꞌ paꞌ nimal take uxlabal reꞌ wilic cajawric, on wilic quiwaꞌric, on wilic quilokꞌil chi queh take tinamit,
on take quichopbic na̱ chiꞌnchel take paꞌ bih nilmijic wach, on maꞌ nilmijic ta wach,
reꞌ woꞌ rAcꞌu̱n i Dios xtikꞌinic reh eh wilque̱b woꞌ chi riyohbaljic wach ruꞌ.
17 Jeꞌ reꞌ kꞌuruꞌ reꞌ rAcꞌu̱n i Dios xa wilic woꞌ nak chic cho nok jaꞌ quitikꞌinjic ta nicꞌ nimal take tikꞌimaj
eh xa ruꞌum woꞌ reh rajawric chiꞌnchel quichopom qui̱b chi tuslic quiwach.
18 Jeꞌ woꞌ nikꞌor woꞌ aweh tak i wili chiri̱j i rAcꞌu̱n i Dios:
Reꞌ woꞌ reꞌ nchoponic kana̱ hoj aj niminel jeꞌ ricab nok chi reꞌ rina̱ jenoꞌ cꞌacharel reꞌreꞌ nchoponic je reh ritiꞌjolal.
Jeꞌ woꞌ chic, ruꞌum chi reꞌ rAcꞌu̱n i Dios reꞌ woꞌ reꞌ i pe̱t be̱h chi uctic chi quixilac take nacuctic cho chi quixilac camnak,
reꞌ woꞌ reꞌ wilic rajawric chi riyeꞌeric woꞌ chic cꞌacharic.
Ru̱cꞌ reꞌreꞌ, reꞌ Dios xiban chi reꞌ rAcꞌu̱n xa reꞌ woꞌ reꞌ i pe̱t be̱h wilic rajawric china̱ chiꞌnchel.
19 Reꞌ riwi̱ꞌ chi jeꞌ reꞌ xiban ruꞌum chi reꞌ Ajabe̱s Dios xa̱j
eh xponic chiwach chi reꞌ riminjilal i rAcꞌun wilic manlic wach.
20 Maꞌ xa ta reꞌreꞌ, reꞌ Dios xa̱j laꞌ woꞌ chi reꞌ rAcꞌu̱n,
reꞌreꞌ xcojbic queh pan jenaj suk laj wihꞌic ru̱cꞌ i Dios chiꞌnchel take maꞌ wilque̱b ta nak pan jenaj suk laj wihꞌic ru̱cꞌ i Dios,
jeꞌ chi wilque̱b ar pan taxa̱j eh jeꞌ chi wilque̱b woꞌ ayuꞌ wach acꞌal.
Nicꞌ wach riwi̱ꞌ naxiban i rAcꞌu̱n i Dios chi jeꞌ reꞌ?
Ru̱cꞌ riquimic wach curu̱s reꞌ xichihcaj wi̱ꞌ riquiqꞌue̱l.
Jeꞌ aj reꞌ riwi̱ꞌ ajic reꞌreꞌ xicoj chiꞌnchel take naquiniminic reh pan jenaj suk laj wihꞌic ru̱cꞌ i Dios,
21 jeꞌ ricab xiban cho awu̱cꞌ hat-tak.
Jeꞌ reꞌ nikꞌor maj najtir cho reꞌ hat-tak maꞌ wilca̱t ta nak tak pan suk laj wihꞌic ru̱cꞌ i Dios eh nawixowej nak tak wach ruꞌ ruꞌum reh anoꞌjbal tak chi ribanaric i cꞌahbilal. Raj yuꞌna maꞌ jeꞌ ta chic reꞌ awi̱ꞌ tak, xatyeꞌeric laꞌ tak pan jenaj sukquil chꞌi̱l i Dios
22 ruꞌum reh quimic xicꞌul i rAcꞌu̱n i Dios naxcꞌacharic ayuꞌ wach acꞌal.
Jeꞌ reꞌ ajic reꞌ hat-tak yuꞌna wilca̱t tak chic pan suk laj wihꞌic ru̱cꞌ i Dios. Chaj camaj nok wilca̱t tak chi jeꞌ reꞌ? Reh chi reꞌ hat-tak etiwihꞌic tak chiwach i Dios chi sak wach acapew-bal tak, chi maꞌxta jenoꞌ chꞌuwaꞌ laj noꞌjbal awu̱cꞌ tak eh jeꞌ woꞌ chi maꞌxta jenoꞌ kꞌilo̱j naribanaric chawi̱j tak.
23 Reꞌ cok ruꞌ reh chi naribanam chi jeꞌ reꞌ curman chi til nimjok woꞌ take cꞌuhtunic chiri̱j i Jesus. Maꞌ xa ta reꞌreꞌ, jeꞌ laꞌ woꞌ curman chi reꞌ take lokꞌ laj cꞌuhtunic abiram tak reꞌreꞌ eh achꞌica̱b woꞌ tak acꞌux chiri̱j ru̱cꞌ chiꞌnchel awa̱mna tak, ma̱kꞌeb lok chiri̱j acꞌux tak reꞌ laꞌ chaꞌn tak riman laꞌ chic chayew acꞌux tak chiri̱j.
Reꞌ Lokꞌ laj Ajabe̱s xpahbanic reh maꞌ Lu̱ꞌ chi aj cꞌuhbalanel
Reꞌ take kꞌoric chiri̱j take lokꞌ laj cꞌuhtunic abiram tak reꞌreꞌ, reꞌ hin nikꞌor aweh tak chi reꞌ woꞌ reꞌ cꞌahchiꞌ quibiram qꞌuihal take cꞌacharel chi junsut wach acꞌal choplic quina̱ ruꞌum i kꞌatal kꞌoric aj Ro̱ma. Jeꞌ woꞌ, nikꞌor aweh tak chi reꞌ Lokꞌ laj Ajabe̱s xpahbanic wi̱n chi aj cꞌuhbalanel reh riCꞌuhbal.
24 Reꞌ aj reꞌ riwi̱ꞌ nok cꞌahchiꞌ nicꞌulum i tiꞌcꞌaxic ayuꞌ pan che̱ꞌ. Raj i hin to̱b ta nchel jeꞌ reꞌ cꞌahchiꞌ nicꞌulum kꞌe̱ꞌ nsukbic nicꞌux ruꞌum i wili: Chi reꞌ take tiꞌcꞌaxic xikꞌor i Jesus reꞌ Pahbamaj chi Kꞌatal Kꞌoric chi nanicꞌulum, reꞌ aj woꞌ reꞌ cꞌahchiꞌ nicꞌulum yuꞌna. Jeꞌ reꞌ niban ruꞌum reh acꞌuhbaljic hat-tak aj niminel reꞌ najalwachej tak ritiꞌjolal i Jesus. Jeꞌ reꞌ nikꞌor maj jeꞌ ricab chi reꞌ ritiꞌjolal i Jesus tikꞌimaj ruꞌum qꞌuihal chi bakil, jeꞌ woꞌ reꞌ nok reꞌ ritinami̱t i Dios tikꞌimaj wach ru̱cꞌ riqꞌuihal aj niminel.
25 Reꞌ aj nipahbabjic chi acꞌuhbaljic hat-tak ritinami̱t i Dios, reꞌ woꞌ Dios xtikꞌinic wach. Jeꞌ reꞌ nikꞌor maj reꞌ aj reꞌ xyeꞌbic woꞌ nicamaj chi aj ilo̱l reh acꞌacharic hat-tak aj niminel. Jeꞌ reꞌ ajic reꞌ hin, hin pahbamaj ruꞌum i Dios reh chi ru̱cꞌ lokꞌ laj riCꞌuhbal enisakomej wach aweh tak chi manlic i noꞌjbal wili:
26 Chi wilic jenaj nim wach noꞌjbal reꞌ najtir kꞌi̱j sakom xa reꞌ woꞌ cho pan chꞌiquinbal cho jarub paꞌ tahn ro̱k quicꞌacharic take cho kama̱m katiꞌt xa cu ar woꞌ cho cꞌolo̱j cho ri̱j, xa reꞌ laꞌ yuꞌna reꞌ Dios ritehem wach keh hoj nicꞌ nimal ritinami̱t.
27 Reꞌ riwi̱ꞌ chi jeꞌ reꞌ xiban reh chi reꞌ hoj nicꞌ nimal ritinami̱t enkanaꞌbej chi reꞌ noꞌjbal reꞌreꞌ, reꞌ kꞌoro̱j woꞌ queh take aj niminel jeꞌ ru̱cꞌ maꞌ reꞌ ta ra̱ꞌ riꞌsil cho maꞌ Israhel riyew keh hoj chiꞌnchel aj niminel jenaj rinimal sakom chiri̱j ribiral hab wach i Jesus. Jeꞌ woꞌ chic, reꞌreꞌ xa̱j chi nkehtꞌalij wili: Reꞌ Jesus reꞌ Pahbamaj chi Kꞌatal Kꞌoric wilic woꞌ pan ka̱mna hoj aj niminel. Chi jeꞌ aj reꞌ nok riwi̱ꞌ chaweh tak chi na̱chꞌica̱b acꞌux tak chiri̱j reh chi jeꞌ reꞌ, reꞌ nim laj sakom sutumaj wi̱ꞌ ri̱j i kAja̱w Dios narisutem woꞌ awi̱j tak natiquimok tak je.
28 Jeꞌ reꞌ nok chi kehtꞌalim chic i noꞌjbal ritehem wach i Dios chiri̱j i Jesus, reꞌ hoj aj niminel reh nkakꞌor queh chiꞌnchel quibirinic keh chi reꞌ Pahbamaj chi Kꞌatal Kꞌoric reꞌ woꞌ i Jesus eh ruꞌum chi karakam chiri̱j chi manlic i ribiral reꞌreꞌ, reꞌ hoj nakaꞌn woꞌ cꞌuhtunic, nkakꞌor queh cꞌacharel chi caꞌn i coric wach noꞌjbal. Reꞌ nka̱j chiri̱j ru̱cꞌ rikꞌormojic reꞌreꞌ, reꞌ chi naquipahꞌok chiwach i Dios, coric ok wach i noꞌjbal tijimaj wi̱ꞌ ru̱cꞌ rinimjic i Ajabe̱s Kꞌatal Kꞌoric Jesus.
29 Ruꞌum aj chi jeꞌ reꞌ nka̱j, reꞌ hin til cꞌahchiꞌ niyeb nicꞌux chipam nicamaj ru̱cꞌ rinimal rajawric i Jesus eh ruꞌum reh rajawric ruꞌ, reꞌ hin wilic woꞌ rinimal wajawric chi ribanaric take paꞌ bih niban chipam ricamaj.