4
Maꞌ reꞌ ta chic i Cꞌuhbal Yeꞌo̱j
reh Moyses wilic rajawric
chi kana̱ i hoj aj niminel
Nanisakomem woꞌ chic wach i nikꞌor ru̱cꞌ i jalwach kꞌoric wili: Kakꞌor, jenoꞌ ajabe̱s wilic jenoꞌ tꞌuch racꞌu̱n eh rikꞌor reh chi reꞌreꞌ narehchenic cahnok reh i paꞌ bih wilic reh naquimok je. To̱b ta nak kꞌoro̱j chic reh chi reꞌreꞌ aj ehchenel reh chiꞌnchel, reꞌ tꞌuch acꞌun reꞌreꞌ wi jaꞌ nponic ta rihabil chi nariwihꞌic rajawric china̱ i paꞌ bih wilic reh i raja̱w, xa jenaj woꞌ wach riwaꞌric ncahnic chꞌi̱l jenoꞌ tꞌuch acꞌun xa aj camanom cok pa ripa̱t. Jeꞌ woꞌ chic, nok cu tꞌuch pe i acꞌun reꞌreꞌ cu ncahnic chi rehquen rajawric jenoꞌ aj qꞌuihsem reh eh nwihꞌic woꞌ jenoꞌ aj ilol reh i paꞌ bih canamaj cahnok reh ruꞌum i raja̱w cu rehtal nponic rikꞌijil kꞌoro̱j ruꞌum i ajabe̱s chi narikꞌahsjic pan kꞌab chiꞌnchel i yeꞌo̱j cahnok reh.
Nicꞌ paꞌ wach ncꞌuluric ru̱cꞌ i tꞌuch acꞌun reꞌreꞌ, jeꞌ woꞌ reꞌ xcꞌuluric ku̱cꞌ i hoj maj naxojwihꞌic chipam rinimjic take noꞌjbal nchalic cu̱cꞌ take maꞌ tob laj uxlabal reꞌ wilic cajawric chi quina̱ take cꞌacharel maꞌ quiniminic ta reh i Dios, xa jeꞌ na nchel pan uxal xojwihꞌic cho ruꞌum nok reꞌ take noꞌjbal reꞌreꞌ, reꞌ nak reꞌ quitakꞌanic chi kana̱. Raj laꞌ nchel nok jeꞌ reꞌ riwi̱ꞌ i kacꞌacharic, xponic rikꞌijil tikꞌimaj cho wach ruꞌum i kAja̱w Dios reꞌ xitakꞌa̱ꞌ cho wi̱ꞌ i rAcꞌu̱n. Reꞌreꞌ xcꞌulic asjok ayuꞌ wach acꞌal jeꞌ ricab woꞌ naxo̱j yeꞌeric wach sakom i hoj ruꞌum katu̱t. Jeꞌ woꞌ, reꞌreꞌ xqꞌuihic johtok ro̱k kꞌab chipam i Cꞌuhbal Yeꞌo̱j reh Moyses. Reꞌ riwi̱ꞌ chi reꞌ Dios xitakꞌa̱ꞌ cho chi xchalic asjok i rAcꞌu̱n ayuꞌ reh chi xojcꞌulic resaj chiꞌnchel i hoj cꞌacharel chi riꞌsil rajawric i cꞌuhbal reꞌreꞌ eh chi riꞌsil aj chic rajawric i Dios xojricoj reh chi jeꞌ reꞌ xoj-oquic jenaj chi racꞌu̱n rixkꞌu̱n i Dios chi ricꞌuluric chiꞌnchel i paꞌ bih kꞌoro̱j ruꞌum chi nariyeb keh hoj racꞌu̱n rixkꞌu̱n. Jeꞌ woꞌ, reꞌ hoj aj niminel reh Jesus rehtalil chi hoj chic racꞌu̱n rixkꞌu̱n i Dios, reꞌreꞌ xitakꞌa̱ꞌ woꞌ cho pan ka̱mna i Lokꞌ laj rUxlabal reꞌ xiyew woꞌ reh Jesus chi rehtalil chi reꞌreꞌ til rAcꞌu̱n eh chi jeꞌ reꞌ chi hoj chic racꞌu̱n rixkꞌu̱n i Dios, yuꞌna echic riban chi nkakꞌor reh Dios chi reꞌreꞌ “kaPah” nankaqꞌuer johtok kachi̱ꞌ ru̱cꞌ. Jeꞌ aj reꞌ kꞌuruꞌ hat-tak aj Cala̱sya, ruꞌum chiꞌnchel ribanam i Dios reh chi xiban chi hoj chic racꞌu̱n rixkꞌu̱n, nipahkaj aweh tak chi maꞌ riban ta chi cu ti cꞌacharic tak chi rehquen rajawric i Cꞌuhbal Yeꞌo̱j reh Moyses jeꞌ ricab nok jenoꞌ aj camanom choplic na̱ ricꞌacharic ruꞌum ajabe̱s aj ehcham camanic. Jeꞌ reꞌ nipahkaj aweh tak maj reꞌ hat-tak yuꞌna hat-tak chic racꞌu̱n rixkꞌu̱n i Dios chi manlic eh ruꞌum reꞌ, nicꞌ paꞌ nimal rikꞌorbal riyeb cho Dios queh take racꞌu̱n rixkꞌu̱n na̱wehtric woꞌ tak ru̱cꞌ reꞌreꞌ.
Reꞌ take aj Cala̱sya cu nca̱j woꞌ
nak chic quicojom qui̱b chi riꞌsil
rajawric i Cꞌuhbal Yeꞌo̱j reh Moyses
Jeꞌ chic reꞌ ruꞌ riwi̱ꞌ acꞌacharic tak yuꞌna xa reꞌ laꞌ til pa ricorquil, pan jenaj cho kꞌi̱j nok jaꞌ nanaꞌbej ta nak tak wach i Dios, reꞌ hat-tak jeꞌ nak acab tak jenoꞌ aj camanom cow chopo̱j na̱ chi camanic, cow nak chopolca̱t tak cho ru̱cꞌ acapew-bal tak chi rinimjic wach take tzꞌakoj tiyo̱x eh chi maꞌ reꞌ ta woꞌ coric dios take. Raj yuꞌna awehtꞌalim tak chic wach i til manlic Dios on til reꞌ ricorquil chi reꞌ Dios xehtꞌalij chic ana̱ tak, chaj chic waꞌric kꞌuruꞌ chi nawa̱j woꞌ tak chic acaꞌpechem tak ribanaric i najtir laj noꞌjbal nchoponic nak cho na̱ acꞌacharic tak reꞌ xa maꞌxta bih xitik cho aweh tak, on maꞌxta bih jenoꞌ holonquilal xicꞌam cho aweh tak? 10 Chawilow tak kꞌuruꞌ nanacoj tak pa riman chi lokꞌonbal wach i Dios i noꞌjbal chi rinimjic wach take hiꞌlbal kꞌi̱j, on chi rinimjic wach i racꞌu̱n poh, on chi rinimjic wach toco̱m chic ninkꞌi̱j, on rinimjic wach i juꞌjun chi ha̱b rijal ri̱b, xa cu cꞌahchiꞌ woꞌ chic acaꞌpechem tak i najtir laj noꞌjbal. 11 Ru̱cꞌ i noꞌjbal naꞌn tak reꞌreꞌ, kꞌe̱ꞌ quincapewenic awuꞌum tak ruꞌum chi reꞌ camanic xniban chaxilac tak xa jeꞌ nchel maꞌxta bih xicamanej chi corsbal wach anoꞌjbal tak.
12 Was tak nicha̱kꞌ aj niminel, chacuy chacꞌam tak tzꞌeht reh ninoꞌjbal i hin chi naxnichꞌica̱ꞌ nicꞌux chiri̱j i Jesus xiban chi maꞌ reꞌ ta chic Cꞌuhbal Yeꞌo̱j reh Moyses wilic rajawric chi nina̱ eh ruꞌum reꞌ, naxinwihꞌic cho chaxilac tak xniban wi̱b chi jeꞌ acab hat-tak chi maꞌ reꞌ ta i cꞌuhbal reꞌreꞌ wilic rajawric chana̱ tak. Reꞌ hin cꞌahchiꞌ nipahkam aweh tak chi na̱banam tak jeꞌ ricab xnikꞌor aweh tak, maꞌ ruꞌum ta chi reꞌ hat-tak abanam ta nak tak cho jenoꞌ tiꞌcꞌaxic wi̱n. Maꞌxta, reꞌ laꞌ xaꞌn tak wi̱n xinatoꞌbej tak ru̱cꞌ paꞌ bih wi̱n jeꞌ ricab xaꞌn tak wi̱n pan pe̱t cho niponic pan atinami̱t tak. 13 Jeꞌ reꞌ nikꞌor maj reꞌ hat-tak til awehtꞌalim tak chi pan pe̱t niponic awu̱cꞌ tak wilic jenaj cꞌaxquilal pa nitiꞌjolal nibakil eh ruꞌum reh reꞌreꞌ, xincahnic awu̱cꞌ tak chi rikꞌormojic riCꞌuhbal i Dios chaxilac tak. 14 Nok jeꞌ reꞌ xniban, reꞌ hat-tak maꞌ xinakꞌeb ta lok chiri̱j acꞌux tak, xa ta woꞌ nak maꞌ suk ta xinawilow tak ruꞌum nicꞌaxquilal wilic pa nitiꞌjolal reꞌ xcamanic chi xa jeꞌ na jenaj pajbal reh achakꞌlamil tak wu̱cꞌ. Jeꞌ reꞌ kꞌuruꞌ to̱b jeꞌ reꞌ niyaꞌbilal wilic, reꞌ hat-tak xacuy tak wilmijic eh xinacꞌul woꞌ tak chi suk jeꞌ ricab chi cꞌahchiꞌ ta nak acꞌulum tak chaxilac jenoꞌ raj tzꞌeꞌ wa̱ch i Dios nchalic ar pan taxa̱j, on til jeꞌ ricab chi reꞌ ta woꞌ nak i Jesus reꞌ Pahbamaj chi Kꞌatal Kꞌoric cꞌahchiꞌ acꞌulum awu̱cꞌ tak. 15 Haj woꞌ xo̱j risukquilal acꞌux tak reꞌreꞌ kꞌuruꞌ? Jeꞌ reꞌ nikꞌor maj til pa ricorquil laj kꞌoric chawi̱j tak, reꞌ hat-tak til kꞌe̱ꞌ woꞌ chic tiꞌ xinawicꞌraj tak chi til nak xaꞌn tak chiwi̱j reꞌ maꞌ hab ta woꞌ chic wach enbanic, kakꞌor ti chic chi curman ta nak chi enawesaj lok jenoꞌ nakꞌ awach tak chi riyeꞌeric wi̱n.
16 Ru̱cꞌ rikꞌormojic aweh tak i ricorquilal reꞌreꞌ, kꞌi̱j woꞌ reꞌ hat-tak enawixowej tak niwach ruꞌum. 17 Jeꞌ reꞌ ruꞌ wilca̱t tak wu̱cꞌ yuꞌna raj cu̱cꞌ take chucul laj aj tijinel reꞌ toco̱m laj cꞌuhbal cꞌahchiꞌ quikꞌorom aweh tak maꞌ jeꞌ ta reꞌ naꞌn tak to̱b ta nchel maꞌ coric ta wach quinoꞌjbal awu̱cꞌ tak. Reꞌ take reꞌ, tiꞌ tiquicꞌraj tak nanquikꞌor xa reꞌ laꞌ xa maꞌ jeꞌ ta woꞌ reꞌ maj reꞌ take reꞌ nca̱j ca̱t tak quikꞌunem ru̱cꞌ quicꞌuhbal reh chi chiqui̱j chic take reꞌ enachꞌica̱ꞌ acꞌux tak xa cojbal cho chꞌakbal i̱b chi kaxilac chipam coric laj rinimjic i Jesus. 18 Tare̱t chi reꞌ take toco̱m chic aj cꞌuhbalanel reꞌreꞌ kꞌa̱b quicꞌux chawi̱j tak, reꞌ cok ruꞌ ru̱cꞌ ok holonquilal laj noꞌjbal chꞌi̱l xa jenaj wach cꞌuxlis, maꞌ ok xa jotꞌbal reh acapew-bal tak. Chi junelic ta nak caꞌn i holohic laj noꞌjbal awu̱cꞌ tak, maꞌ ok xa reꞌ nok wilqui̱n awu̱cꞌ tak.
19 Was tak nicha̱kꞌ aj niminel reꞌ kꞌe̱ꞌ tiꞌ tiwicꞌraj tak chi jeꞌ ricab hat-tak wacꞌu̱n wixkꞌu̱n ru̱cꞌ i noꞌjbal wilca̱t tak wi̱ꞌ yuꞌna, reꞌ hin kꞌe̱ꞌ woꞌ chic tiꞌquilal i wa̱mna naꞌn tak xa jeꞌ na ricab ritiꞌquilal jenoꞌ ixok nok cꞌahchiꞌ riyeb wach sakom i rihaꞌlacꞌu̱n eh xa cu nariwihꞌic woꞌ i tiꞌ reꞌreꞌ pan wa̱mna cu rehtal naricꞌuhtunic woꞌ chic lok pan acꞌacharic tak chi reꞌ Jesus reꞌ Pahbamaj chi Kꞌatal Kꞌoric, reꞌ chic reꞌ cꞌacharic riban awu̱cꞌ tak. 20 Ru̱cꞌ cꞌahchiꞌ ricꞌuluric awu̱cꞌ tak, reꞌ hin til kꞌe̱ꞌ nak nwa̱j chi wilqui̱n ta nak chic ponok awu̱cꞌ tak chi ricorsjic wach anoꞌjbal tak ru̱cꞌ toco̱m chic xa suk wach kꞌoric maj yuꞌna maꞌ nirak ta chic chiri̱j chaj bih cꞌahchiꞌ ricꞌuluric ru̱cꞌ anoꞌjbal tak reꞌ kꞌe̱ꞌ nsahchic nicꞌux chiri̱j.
Reꞌ tijbal ricꞌam cho ribiral
quicꞌacharic tiꞌ Aca̱r chꞌi̱l tiꞌ Sa̱ra
21 Chiri̱j aj woꞌ i noꞌjbal cꞌahchiꞌca̱t tak reꞌreꞌ nwa̱j nibiram aweh tak i wili: Nanabiraj tak i Cꞌuhbal Yeꞌo̱j reh Moyses, maꞌ nacoj ta na tak rehtal chaj bih kꞌoric riban ar chiri̱j ribiral i maꞌ Awraham? 22 Jeꞌ reꞌ nibiraj aweh tak maj chipam i cꞌuhbal reꞌreꞌ rikꞌor chi reꞌ maꞌ Awraham xwihꞌic qui̱b racꞌu̱n reꞌ jeꞌ wili quibiral: Reꞌ jenaj racꞌu̱n xwihꞌic ru̱cꞌ i Aca̱r reꞌ xa aj chipohonel cok ru̱cꞌ. Reꞌ jenaj chic racꞌu̱n xwihꞌic ru̱cꞌ i Sa̱ra reꞌ til rehqꞌue̱n i maꞌ Awraham eh maꞌ xa aj chipohonel ta cok.
23 Chi jeꞌ aj reꞌ, reꞌ asjic xcaꞌn take racꞌu̱n i maꞌ Awraham rehreh wach riwi̱ꞌ i noꞌjbal capewemaj chiqui̱j. Jeꞌ reꞌ nikꞌor maj reꞌ jenaj acꞌun xyeꞌeric wach sakom ruꞌum i xa aj chipohonel cok cu̱cꞌ, reꞌreꞌ xasjic chi xa xitikꞌa̱ꞌ wach rasjic ru̱cꞌ i caj chipoh, ra̱j laꞌ i racꞌu̱n xyeꞌeric wach sakom ruꞌum i til rehqꞌue̱n reꞌ maꞌ xa ta aj chipohonel cok, reꞌreꞌ xasjic reh chi nariponic wach i kꞌoro̱j cho ribiral reh maꞌ Awraham ruꞌum kAja̱w Dios chi nariyeꞌeric jenaj quihaꞌlacꞌu̱n chꞌi̱l i Sa̱ra reꞌ til rehqꞌue̱n.
24 Reꞌ ribiral chiri̱j take qui̱b racꞌu̱n i Awraham reꞌreꞌ ncamanic woꞌ chi risakomsjic wach i nikꞌor wili: Reꞌ Dios naxiyew cho i cꞌuhbal reh Moyses ar china̱ i yu̱kꞌ Sinayih ribihnal, jenaj tikꞌinic xiban cho ru̱cꞌ. Nicꞌ paꞌ qꞌuihal quiniminic reh til xa chi riꞌsil woꞌ rajawric i cꞌuhbal reꞌreꞌ quicahnic jeꞌ ricab nok reꞌ take ra̱ꞌ riꞌsil cho Aca̱r reꞌ xa aj chipohonel cok ru̱cꞌ maꞌ Awraham, xa xicahnic woꞌ riꞌsil i cow laj camanic. 25 Ruꞌum aj reꞌ nikꞌor chi reꞌ Aca̱r maꞌ xa ta reꞌ rijalwachej i yu̱kꞌ Sinayih reꞌ wilic pa riyukꞌul i Ara̱wya, jeꞌ laꞌ woꞌ rijalwachej i tinamit Jerusalen wilic yuꞌna maj reꞌ take cꞌacharel wilque̱b chipam i nim laj tinamit reꞌreꞌ xa cu reꞌ woꞌ i Cꞌuhbal Yeꞌo̱j reh Moyses chꞌiclic wi̱ꞌ quicꞌux jeꞌ ricab chi wilque̱b woꞌ chipam jenoꞌ cow laj camanic. 26 Tzꞌa̱b ruꞌ reꞌ Sa̱ra reꞌreꞌ rijalwachej i jenaj chic cꞌuhbal nkꞌoric chiri̱j ritinami̱t i Dios reꞌ ribihnej woꞌ chi Jerusalen ar pan taxa̱j. Reꞌ Sa̱ra reꞌreꞌ maꞌ mino̱j ta chipam i cow laj camanic jeꞌ ricab jenoꞌ aj chipohonel. Ruꞌum aj reꞌ nikꞌor chi nicꞌ paꞌ qꞌuihal xojniminic reh i cꞌuhbal reꞌreꞌ jeꞌ na wilic chi katu̱t i Sa̱ra eh ruꞌum chi reꞌreꞌ katu̱t, reꞌ hoj yuꞌna nicꞌ paꞌ qꞌuihal hoj ra̱ꞌ riꞌsil cho ruꞌ maꞌ minilcoj ta chic chipam rinimjic i Cꞌuhbal Yeꞌo̱j reh Moyses.
27 Jeꞌ aj reꞌ ruꞌ to̱b ta nak reꞌ Sa̱ra maꞌ ta nak aj acꞌunom laj ixok cho, xiban chi jeꞌ na katu̱t cho maj pan Lokꞌ laj Hu̱j tzꞌihmbimaj wi̱ꞌ riCꞌuhbal i Dios jeꞌ wili tzꞌihmbimaj cho chiri̱j:
“Reꞌ hat ixok reꞌ maꞌ reꞌ ta nak hat acꞌunom, sukbok acꞌux yuꞌna
eh chaqꞌuer achi̱ꞌ ruꞌum risukquil acꞌux to̱b ta nchel maꞌ jaꞌ awicꞌram ta aweh tiꞌquil acꞌununic.
Xa reꞌ laꞌ yuꞌna reꞌ hat reꞌ jeꞌ na acab ixok canamaj ruꞌum ribahi̱l,
yohbal chic wach awa̱ꞌ awiꞌsil nariwihꞌic chiwach jenoꞌ ixok wilic ribahi̱l, nqui tzꞌihmbimaj cho.
28 Was tak nicha̱kꞌ aj niminel, ru̱cꞌ take kꞌoric xnikꞌor lok reꞌreꞌ nwa̱j nikꞌorom aweh tak wili: Jeꞌ ricab nok reꞌ Sa̱ra xiyew cho wach sakom i Isahac ruꞌum chi jeꞌ reꞌ rikꞌorom cho i Dios, reꞌ hoj yuꞌna xo̱j woꞌ kaꞌn chi hoj chic racꞌu̱n rixkꞌu̱n i Dios ruꞌum woꞌ reh i kꞌoric kꞌoro̱j cho reh maꞌ Awraham. 29 Jeꞌ woꞌ, jeꞌ ricab nok reꞌ Ismahel reꞌ xasjic chi xa tikꞌimaj wach rasjic ru̱cꞌ i caj chipoh, reꞌreꞌ maꞌ xa̱j ta cho wach Isahac reꞌ acꞌunbe̱s xasjic ruꞌum reh Lokꞌ laj rUxlabal i Dios, jeꞌ woꞌ reꞌ yuꞌna reꞌ take cow qui̱b chipam rinimjic i Cꞌuhbal Yeꞌo̱j reh Moyses maꞌ nca̱j ta woꞌ kawach i hoj reꞌ xoj-oquic chi racꞌu̱n rixkꞌu̱n i Dios ruꞌum richꞌiquinjic kacꞌux chiri̱j i Jesus. 30 Xa reꞌ laꞌ chaj bih rikꞌor i tzꞌihmbimaj chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios chiri̱j jeꞌ ricab xcꞌuluric cho chi quixilac take quib chi acꞌun reꞌreꞌ? Ar rikꞌor chi reꞌ Sa̱ra jeꞌ wili xikꞌor reh maꞌ Awraham:
“Chatꞌerej je kaj chipoh chꞌi̱l i racꞌu̱n
maj maꞌ riwi̱ꞌ ta chi reꞌ racꞌu̱n ixok reꞌreꞌ enehtric ru̱cꞌ acꞌaxbal na̱yeb
reh i wacꞌu̱n i hin reꞌ til hin awehqꞌue̱n, nqui Sa̱ra, nqui rikꞌor i cꞌuhbal reꞌreꞌ.
31 Ru̱cꞌ take kꞌoric reꞌreꞌ kꞌuruꞌ was tak nicha̱kꞌ, enkarak chiri̱j chi riwi̱ꞌ chi keh hoj aj niminel reh Jesus chi jeꞌ woꞌ reꞌ nkaꞌn cu̱cꞌ take nquikꞌor chi riwi̱ꞌ chi keh chi nkanimej chiꞌnchel take takꞌanic wilic chipam i Cꞌuhbal Yeꞌo̱j reh Moyses maj reꞌ hoj yuꞌna reꞌ xkachꞌica̱ꞌ chic kacꞌux chiri̱j i kAja̱w Jesus, maꞌ reꞌ ta hoj ra̱ꞌ riꞌsil cho Aca̱r reꞌ xcꞌacharic cho chi xa aj chipohonel cok ru̱cꞌ maꞌ Awraham, til laꞌ hoj laꞌ ra̱ꞌ riꞌsil cho i Sa̱ra reꞌ maꞌ xa ta aj chipoh cok.