7
Reꞌ kꞌoric chiri̱j riwaꞌric i Melquiserec
1 Yuꞌna nanikꞌorom take wili chiri̱j maꞌ Melquiserec: Pe̱t, reꞌ maꞌ Melquiserec, reꞌ woꞌ reꞌ xwihꞌic chi kꞌatal kꞌoric china̱ tinamit Salem ribihnal eh jeꞌ woꞌ chi Pe̱t Nahsil aj Kꞌahsem Si̱ chiwach i Dios reꞌ nim wach rajawric china̱ chiꞌnchel. Chi narirakmajic chiri̱j rinimal wach riwaꞌric i Melquiserec ruꞌum reh take ricamaj reꞌreꞌ ayuꞌ nkꞌormojic aweh tak i ribiral wili: Junpech nok reꞌ maꞌ Awraham soljic riban cho chꞌi̱l take riso̱l chi kꞌakꞌanic naxponic quisach cho wach take toco̱m chic kꞌatal kꞌoric chꞌi̱l woꞌ take quiso̱l, reꞌ Melquiserec xelic cho chi ricꞌuluric maꞌ Awraham eh xicuseꞌsaj!
2 Maꞌ xa ta ar nilmijic rinimal wach riwaꞌric jeꞌ laꞌ woꞌ ru̱cꞌ i wili: Reꞌ maꞌ Awraham china̱ lok i nicꞌ paꞌ qꞌuihal xiban canar pan kꞌakꞌanic xesaj lok pa reh i rilaje̱b reꞌ kꞌoro̱j chi tojbal ri̱j paꞌ bih chiwach i Dios eh xikꞌahsaj reh!
Ricab, reꞌ chic i ribihnal Melquiserec, jeꞌ wili nelic wi̱ꞌ: “Reꞌ nkꞌatbic kꞌoric ru̱cꞌ coric wach cꞌuxlis”. Wi nkatuna̱ꞌ wach rikꞌormojic i kꞌoric reꞌreꞌ chꞌi̱l i nelic wi̱ꞌ ribihnal i tinamit Salem, reꞌ ra̱j rikꞌorom “sukquil cꞌuxlis”, ra̱j woꞌ rikꞌorom chi reꞌ Melquiserec reꞌreꞌ xiyew woꞌ risukquil quicꞌux take tinamit aj Salem ru̱cꞌ ricamaj xiban chi quikꞌatal kꞌoric.
3 Wilic woꞌ jenaj chic kꞌoric chiri̱j ribiral i Melquiserec. Chipam i Lokꞌ laj Hu̱j reꞌ tzꞌihmbimaj wi̱ꞌ riCꞌuhbal i Dios, maꞌ xtzꞌihmjic ta ribiral hab wach ritu̱t raja̱w on hab wach take rima̱m ratiꞌt eh maꞌ xnabjic ta woꞌ jancꞌal xasjic on jancꞌal xquimic. Ru̱cꞌ reꞌreꞌ nkilow chi reꞌ ribiral chi aj kꞌahsem si̱ maꞌ xsahchic ta wach jeꞌ ricab woꞌ nok reꞌ rAcꞌu̱n i Dios cꞌahchiꞌ chi camanic chi Pe̱t Nahsil aj Kꞌahsem Si̱ chi junelic kꞌi̱j sakom.
4 Jeꞌ reꞌ kꞌuruꞌ, ru̱cꞌ chiꞌnchel i kilom reꞌreꞌ chacoj tak rehtal chi coric nicꞌ nimal riwaꞌric wilic i Melquiserec. Jeꞌ reꞌ nikꞌor maj xquilow chic chi reꞌ kama̱m maꞌ Awraham reꞌ kꞌe̱ꞌ woꞌ chic riwaꞌric yeꞌo̱j chi quiwach take kama̱m katiꞌt, xiban chi reꞌ nicꞌ paꞌ qꞌuihal xicꞌam cho pan kꞌakꞌanic, xesaj lok pa reh i rilaje̱b reꞌ kꞌoro̱j cho chi tojbal ri̱j paꞌ bih chiwach i Dios eh xikꞌahsaj reh aj kꞌahsem si̱ reꞌreꞌ.
5 Til coric, reꞌ maꞌ Awraham xiban jeꞌ ricab rikꞌor i takꞌanic xyeꞌeric rikꞌormojic chipam Lokꞌ laj Hu̱j wilic wi̱ꞌ riCꞌuhbal i Dios chiqui̱j take aj kꞌahsem si̱ chiwach i Dios jeꞌ ru̱cꞌ ra̱ꞌ riꞌsil take cho rihrima̱m Awraham reꞌ maꞌ Lewih ribihnal. Chaj aj bih rikꞌor i takꞌanic reꞌreꞌ? Rikꞌor chi to̱b ta reꞌ take ritinami̱t i Dios chꞌi̱l take aj kꞌahsem si̱ reꞌreꞌ ra̱ꞌ riꞌsil woꞌ take cho maꞌ Awraham, curman chi queh chi reꞌ jenaj reh rilaje̱b reh paꞌ bih ncaꞌn canar naquikꞌahsam queh take quich ra̱ꞌ riꞌsil cho maꞌ Israhel, reꞌ pahbamaj take chi aj kꞌahsem si̱.
6 Til cꞌolok pan acꞌux tak chi reꞌ Melquiserec, reꞌreꞌ jenaj aj kꞌahsem si̱ chiwach i Dios jeꞌ ru̱cꞌ maꞌ reꞌ ta ra̱ꞌ riꞌsil cho maꞌ Lewih! To̱b ta jeꞌ reꞌ riwi̱ꞌ, reꞌreꞌ xicꞌul ru̱cꞌ maꞌ Awraham i jenaj reh rilaje̱b reh paꞌ bih nbanjic canar. Ru̱cꞌ aj reꞌreꞌ ncꞌutunic chi nim wach riwaꞌric i Melquiserec eh ncꞌutunic woꞌ lok chi jeꞌ reꞌ riwi̱ꞌ ru̱cꞌ i wili: Reꞌ Melquiserec xicuseꞌsaj woꞌ maꞌ Awraham reꞌ kꞌoro̱j cho reh ruꞌum i Dios chi naricuseꞌsjic.
7 Ru̱cꞌ reꞌreꞌ ncꞌutunic chi reꞌ Melquiserec nim riwaꞌric wilic ru̱cꞌ i cuseꞌsenic xiban maj chiꞌnchel nehtꞌalanic reh chi reꞌ nbanic banoj cuseꞌsenic, kꞌe̱ꞌ nim wach riwaꞌric chiwach ncꞌulbic reh cuseꞌsbal!
8 Pan ricaj kꞌoric nikꞌor i wili: Reꞌ Lokꞌ laj Hu̱j reꞌ wilic wi̱ꞌ riCꞌuhbal i Dios, rikꞌor chi reꞌ Melquiserec reꞌ xa jeꞌ na cu cꞌachlic woꞌ yuꞌna chi kꞌi̱j ruꞌum nok maꞌ xsahchic ta wach ribiral chi aj kꞌahsem si̱, raj take ra̱ꞌ riꞌsil cho maꞌ Lewih reꞌ xicꞌulbic reh jenaj reh rilaje̱b reh paꞌ bih nbanjic canar, maꞌ je ta reꞌ xcꞌuluric cu̱cꞌ, xa xiquimic laꞌ woꞌ take je jeꞌ ricab nkacꞌul chi kunchelal i hoj cꞌacharel ayuꞌ wach acꞌal.
9 Jenaj chic kꞌoric chiri̱j i Melquiserec. Reꞌreꞌ kꞌe̱ꞌ woꞌ chic nim riwaꞌric chiwach maꞌ Lewih eh nikꞌor chi jeꞌ reꞌ maj reꞌ take ra̱ꞌ riꞌsil cho maꞌ Lewih reꞌ wilque̱b woꞌ chi aj kꞌahsem si̱ chiwach i Dios naxyeꞌeric cho queh i jenaj reh rilaje̱b reh paꞌ bih nbanjic canar, jeꞌ na waꞌric xquikꞌahsaj woꞌ cho reh maꞌ Melquiserec i to̱j reꞌreꞌ nok reꞌ kama̱m maꞌ Awraham xiban woꞌ cho kꞌahsanic reꞌreꞌ ru̱cꞌ chiꞌnchel paꞌ bih xiban cho canar pan kꞌakꞌanic.
10 Reꞌ woꞌ reꞌ eriban chi enkꞌormojic maj to̱b ta nak naxelic cho maꞌ Melquiserec chi ricꞌuluric maꞌ Awraham jaꞌ nasjic ta nak i maꞌ Lewih, xa wilic woꞌ nak chic cho rijaꞌquil maꞌ Lewih chꞌi̱l take ra̱ꞌ riꞌsil pa riquiqꞌue̱l i maꞌ Awraham.
Reꞌ Jesus i Pe̱t Nahsil aj Kꞌahsem
Si̱ chi junelic kꞌi̱j sakom
11 Yuꞌna chi xkilow chic lok chi reꞌ Melquiserec nim wach riwaꞌric chiwach i maꞌ Lewih, curman kꞌuruꞌ chi reꞌ naroquic chi Nahsil aj Kꞌahsem Si̱ chiwach i Dios jeꞌ ricab ok riwaꞌric cho maꞌ Melquiserec maj yuꞌna maꞌ reꞌ ta chic jenoꞌ queh rijaꞌquil cho maꞌ A̱ron nariwihꞌic chi Nahsil. Coric ruꞌ nok reꞌ take ra̱ꞌ riꞌsil cho maꞌ Israhel xquicꞌul cho Cꞌuhbal Yeꞌo̱j reh Moyses xkꞌormojic cho queh ra̱ꞌ riꞌsil maꞌ Israhel chi xa reꞌ wach take ra̱ꞌ riꞌsil i maꞌ A̱ron chꞌi̱l take ra̱ꞌ riꞌsil woꞌ cho maꞌ Lewih nacoquic chi aj kꞌahsem si̱ chiwach i Dios xa reꞌ laꞌ ruꞌ ruꞌum chi maꞌ xcaꞌn ta chi coric i camanic yeꞌo̱j chi quina̱, maꞌ xtikiric ta chic juꞌ quipahbabjic take ra̱ꞌ riꞌsil cho maꞌ Lewih chi aj kꞌahsem si̱ take.
12 Ruꞌum reꞌreꞌ, naxjalmajic wach i noꞌjbal chi maꞌ reꞌ ta chic ru̱cꞌ i maꞌ Lewih narichalic quijaꞌquil take aj kꞌahsem si̱ nyeꞌeric chiwach i Dios, jeꞌ woꞌ xjalmajic i takꞌanic wilic chi xa chi ru̱cꞌ nak maꞌ Lewih nariwihꞌic quijaꞌquil take aj kahsanel take si̱.
13 Jeꞌ reꞌ ajic chi xinkꞌoric chic lok chiri̱j i Jesus chi xa wilic woꞌ cho chi Nahsil aj Kꞌahsem Si̱ chiwach i Dios, reꞌ aj wili ncꞌuluric woꞌ ru̱cꞌ i Jesus: Reꞌreꞌ maꞌ reꞌ ta ru̱cꞌ i maꞌ Lewih elenak cho rijaꞌquil chi aj kꞌahsem si̱, ru̱cꞌ laꞌ i junchꞌuk chic chi cꞌacharel reꞌ maꞌ jancꞌal ta elenak cho jenoꞌ aj kꞌahsem si̱ chi quixilac.
14 Nikꞌor chi jeꞌ reꞌ ncꞌuluric maj til woꞌ ehtꞌalamaj chi reꞌ Jesus ar ru̱cꞌ maꞌ Jurah xchalic rijaꞌquil, to̱b ta nchel chipam i Cꞌuhbal Yeꞌo̱j reh Moyses maꞌ haj ta rikꞌor chi reꞌ take ra̱ꞌ riꞌsil cho maꞌ Jurah naquicamanic chi aj kꞌahsem si̱ chiwach i Dios.
15 Reꞌ chic i takꞌanic bano̱j cho chi xa ru̱cꞌ i maꞌ Lewih nariwihꞌic quijaꞌquil take aj kꞌahsem si̱, xjalaric chic wach eh ncꞌutunic lok wach chi manlic ru̱cꞌ i wili: Wilic jenaj chic Pe̱t Nahsil aj Kꞌahsem Si̱ chiwach i Dios eh reꞌreꞌ, reꞌ aj i Jesus. Reꞌreꞌ maꞌ jeꞌ ta ricab take aj kꞌahsem si̱ chalanak quijaꞌquil ru̱cꞌ maꞌ Lewih, jeꞌ laꞌ ricab i maꞌ Melquiserec.
16 Chi jeꞌ reꞌ riwi̱ꞌ, reꞌreꞌ maꞌ pahbamaj ta jeꞌ ricab rikꞌor i Cꞌuhbal Yeꞌo̱j reh Moyses chi xa ca̱ꞌ quiꞌsil qui̱b nacoquic chi aj kꞌahsem si̱ reꞌ laꞌ reꞌreꞌ xpahbabjic ruꞌum i Dios chi wilic ru̱cꞌ rajawric, jeꞌ ricab i rajawric xcꞌaꞌchsanic woꞌ chic cho reh naxquimic je.
17 Nikꞌor chi xpahbabjic ruꞌum i Dios maj chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios jeꞌ wili kꞌoro̱j cho ruꞌum i Dios chiri̱j i Jesus:
“Reꞌ hat tinipahba̱ꞌ chi Nahsil aj Kꞌahsem Si̱ chi junelic kꞌi̱j sakom
eh reꞌ awaꞌric naribanam jenaj wach chꞌi̱l riwaꞌric xwihꞌic cho i Pe̱t aj Kꞌahsem Si̱ najtir kꞌi̱j reꞌ Melquiserec, nqui kꞌoro̱j.
18 Chiri̱j chic i takꞌanic canamaj cho najtir kꞌi̱j chi xa reꞌ take ra̱ꞌ riꞌsil cho maꞌ Lewih naquiwihꞌic chi aj kꞌahsem si̱, kꞌoro̱j chic cho chi maꞌxta chic ricꞌamaric na̱ ruꞌum nok maꞌxta woꞌ chic bih naricamanic wi̱ꞌ. Chi jeꞌ reꞌ kꞌuruꞌ maꞌxta woꞌ chic rajawric chi quina̱ take cꞌacharel.
19 Jeꞌ reꞌ nikꞌor maj ru̱cꞌ i takꞌanic reꞌreꞌ maꞌ xquinimej ta chi manlic i quicamaj take aj kꞌahsem si̱ chiwach i Dios. Ruꞌum aj reꞌ, reꞌ Dios xiban chi chiri̱j chic i Jesus enkachꞌica̱ꞌ kacꞌux. Kꞌe̱ꞌ woꞌ chic tare̱t chi nkaꞌn chi jeꞌ reꞌ maj reꞌ woꞌ kAja̱w Jesus xbanic chi xoj-oquic chi aj lokꞌem chic wach i Dios.
20 Reꞌ camanic riban i Jesus chi Nahsil aj Kꞌahsem Si̱, til reꞌ Dios xtakꞌanic reh rikꞌormojic naxiyew cho rikꞌorbal chi til coric chi jeꞌ reꞌ naribanam i Jesus.
21 Ruꞌum chi jeꞌ reꞌ xiban i Dios, reꞌ Jesus maꞌ jeꞌ ta ricab take toco̱m chic take aj kꞌahsem si̱. Jeꞌ reꞌ nikꞌor maj reꞌ take reꞌ naxipahbabjic pan quicamaj maꞌ xbanaric ta cu̱cꞌ jeꞌ ricab xbanaric ru̱cꞌ i kAja̱w Jesus chi xyeꞌeric jenaj kꞌoric chiri̱j. Jeꞌ reꞌ xiban i Dios naxpahbabjic i Jesus pa ricamaj. Reꞌreꞌ xiyew rikꞌorbal chi jeꞌ wili:
“Reꞌ hin Ajabe̱s Dios niyew nikꞌorbal chawi̱j eh maꞌ eta riban chi enijal wach i nikꞌorbal wili:
Reꞌ hat chi junelic kꞌi̱j sakom na̱cahnic chi Pe̱t Nahsil aj Kꞌahsem Si̱,
eh reꞌ awaꞌric naribanam jenaj wach chꞌi̱l riwaꞌric xwihꞌic cho i Pe̱t aj Kꞌahsem Si̱ najtir kꞌi̱j reꞌ Melquiserec, nqui xikꞌor i Dios.
22 Chi riyeb rikꞌorbal i Dios chiri̱j i Jesus, reꞌ aj woꞌ reꞌ i pahbamaj chi xo̱j elok wach i jenaj chic tikꞌinic reꞌ kꞌe̱ꞌ woꞌ chic tare̱t chiwach i tikꞌinic bano̱j cho cu̱cꞌ take kama̱m katiꞌt ruꞌum i Dios.
23 Jeꞌ reꞌ ajic kꞌe̱ꞌ woꞌ chic tare̱t chi reꞌ Jesus wilic yuꞌna chi Nahsil aj Kꞌahsem Si̱ chiwach i Dios. Nikꞌor chi jeꞌ reꞌ maj juꞌjun queh take qꞌuihal Pe̱t aj Kꞌahsem Si̱ wihꞌinak take cho xa xponic woꞌ wach rikꞌijil chi xiquimic je. Ruꞌum chi jeꞌ reꞌ xquicꞌul cho, reꞌ camanic reꞌreꞌ xa xitik cho ri̱b richoporic na̱ chi quiwach.
24 Raj nchel i Jesus maꞌ jeꞌ ta reꞌ ncꞌuluric ru̱cꞌ, maꞌ hab ta wach jenoꞌ enoquic chi rijelow-bal pa ricamaj chi Pe̱t Nahsil aj Kꞌahsem Si̱ chiwach i Dios ruꞌum nok reꞌreꞌ maꞌ jaruj ta chic nariquimic je xa cꞌachlic laꞌ woꞌ chi junelic kꞌi̱j sakom.
25 Ruꞌum chi junelic kꞌi̱j sakom cꞌahchiꞌ chi camanic chiwach i Dios chi aj pahkanel quitoꞌbal take cꞌacharel, reꞌreꞌ rinimej chi manlic i ricamaj chi aj yeꞌol quicoꞌlbal take tinamit yuꞌna eh jeꞌ woꞌ reꞌ johtok chi junelic kꞌi̱j sakom cu̱cꞌ take nicꞌ paꞌ qꞌuihal quichalic chiwach i Jesus chi cꞌahchiꞌ quichꞌica̱b quicꞌux chiri̱j ruꞌ.
26 Jeꞌ reꞌ nok til curman chi keh hoj chi reꞌ kAja̱w Jesus xwihꞌic chi Pe̱t Nahsil Cꞌamol quiBe̱h take aj Kꞌahsem Si̱ chiwach i Dios. Jeꞌ reꞌ nikꞌor maj xa ru̱cꞌ reꞌreꞌ ncꞌuhtunic take noꞌjbal wili: Reꞌreꞌ maꞌ jancꞌal ta mahcanak cho, maꞌ jancꞌal ta richꞌuwaꞌrsam wach ricapew-bal ru̱cꞌ take maꞌ to̱b ta laj capew-bal eh maꞌ xiban ta jenaj wach rinoꞌjbal ku̱cꞌ hoj aj mahc. Jeꞌ reꞌ ajic ruꞌum rinoꞌjbal reꞌreꞌ, reꞌ kAja̱w Jesus til ricꞌul chi xwihꞌic chi Pe̱t Nahsil aj Kꞌahsem Si̱ chiwach i Dios eh jeꞌ woꞌ ruꞌum chi reꞌreꞌ kꞌe̱ꞌ woꞌ chic rinimal wach rilokꞌil wilic ar pan taxa̱j.
27 Jeꞌ reꞌ ajic reꞌ Jesus maꞌ jeꞌ ta ricab take toco̱m chic nahsil cꞌamol quibe̱h take aj kꞌahsem si̱. Nikꞌor woꞌ chic chi jeꞌ reꞌ maj reꞌ take reꞌ curman chi kalakal xquicansaj cho take chicop chi pahkbal cuybal quimahc chiwach i Dios eh cu reꞌ aj chic ruꞌ chiri̱j chic quimahc i tinamit quicansaj cho take chicop chi si̱ chiwach i Dios. Raj chic yuꞌna chi jelow-bal take chicop quicansjic eli̱c ha̱b, reꞌ Jesus xiyew ri̱b pan quimic wach curu̱s eh yuꞌna johtok chi junelic, ru̱cꞌ i riquimic reꞌ xa junpech woꞌ xicꞌul, reꞌ woꞌ reꞌ ncamanic chi cuybal quimahc take tinamit chiwach i Dios.
28 Jeꞌ woꞌ chic, reꞌ Jesus maꞌ jeꞌ ta ricab take nahsil cꞌamol quibe̱h take aj kꞌahsem si̱ chiwach i Dios, maj reꞌ take reꞌ maꞌ xa ta reꞌ chi aj mahc take jeꞌ laꞌ woꞌ reh chi xiꞌoquic chipam quicamaj chi aj kꞌahsem si̱ chiwach i Dios, cu reꞌ nchel i Cꞌuhbal Yeꞌo̱j reh Moyses xcamanic chi chihbal quiwach. Ra̱j nchel Acꞌunbe̱s Jesus, til reꞌ Dios xpahbanic reh eh reꞌ rikꞌorbal i Dios chi ripahba̱bjic i Jesus xiyew cho nok reꞌ hoj ra̱ꞌ riꞌsil cho maꞌ Israhel kacꞌulum nak chic cho i Cꞌuhbal Yeꞌo̱j reh Moyses. Jeꞌ reꞌ ajic chi pahbamaj chic i Jesus, reꞌreꞌ cꞌahchiꞌ ribanam ricamaj chi manlic yuꞌna eh jeꞌ woꞌ chi junelic kꞌi̱j sakom.