4
Reꞌ Dios til nponic chiwach rinoꞌjbal i cꞌacharel reꞌ maꞌ rinimsaj ta ti ri̱b
Yuꞌna reꞌ chic i wili nwa̱j kꞌoric chiri̱j chi jeꞌ wili: Chaj woꞌ waꞌric wilic peletenic, jeꞌ woꞌ take kꞌakꞌanic chaxilac tak nok nacapaj tak? Reꞌ take cꞌahbilal laj noꞌjbal reꞌreꞌ ar nchalic pan awa̱mna tak reꞌ wilic cho wi̱ꞌ i cꞌahbilal nawotowej tak ribanaric. Ruꞌum aj reh cꞌahbilal laj noꞌjbal reꞌreꞌ nok reꞌ hat-tak nacꞌax tak wach jenoꞌ xa chaj bih jaric wilic ayuꞌ wach acꞌal eh nanawilow chi maꞌ nwihꞌic ta woꞌ aweh tak, jeꞌ wili ncꞌuluric awu̱cꞌ tak: Reꞌ hat-tak nanawilow tak chi maꞌ nwihꞌic ta aweh tak reꞌ wilic reh i jenaj chic cꞌacharel, nchalic ixowonic pan awa̱mna tak, cu rehtal toquic tak chi peletenic eh jeꞌ woꞌ chi cansanic ruꞌum. To̱b ta woꞌ jeꞌ reꞌ naꞌn tak xa ta nak chi jeꞌ reꞌ narak tak i haj wilic nacꞌax tak wach maj maꞌ napahkaj ta tak reh Dios. Wilic woꞌ nak pech napahkaj tak johtok reh Dios chi nariyeb cho aweh i chaj bih nawa̱j tak, xa reꞌ laꞌ maꞌ riyew ta cho aweh tak maj reꞌ hat-tak xa reh yeꞌbal chi suk atiꞌjolal abakil tak nawa̱j tak wi̱ꞌ i napahkaj tak reh.
Reꞌ hat-tak cꞌacharel reꞌ maꞌ xa reꞌ ta Dios wilic chawach tak jeꞌ ricab riban jenoꞌ winak chi nkajic pan cꞌoyomal ruꞌum chi maꞌ xa reꞌ ta i rehqꞌue̱n wilic chiwach, chabiraj tak chi coric i nanikꞌorom wili: Reꞌ hat-tak awehtꞌalim tak chi coric chi nok nawa̱j tak ribanaric i noꞌjbal ncaꞌn take cꞌacharel aj ayuꞌ wach acꞌal reꞌ quixowonic reh i Dios, reꞌ hat-tak nacoj woꞌ tak awi̱b chiwach i Dios chi raj ixowonel. Ruꞌum aj reꞌ nikꞌor aweh tak chi reꞌ take cꞌacharel nca̱j caꞌnam i noꞌjbal ncaꞌn take aj ayuꞌ wach acꞌal reꞌ quixowonic reh i Dios, reꞌ take cꞌacharel reꞌreꞌ nquicoj qui̱b chi raj ixowonel i Dios take. Nikꞌor chi jeꞌ reꞌ maj reꞌ Dios ricꞌraj reh jeꞌ ricab ricꞌraj jenoꞌ winak riban caxa̱ra chi xa reꞌ wach i rehqꞌue̱n tiꞌ ricꞌraj. Jeꞌ wili rikꞌor chiri̱j ruꞌ ar chipam i Lokꞌ laj Hu̱j reꞌ wilic wi̱ꞌ i riCꞌuhbal i Dios:
“Reꞌ Dios riban chi reꞌ Lokꞌ laj Uxlabal encꞌacharic ku̱cꞌ i hoj aj niminel reh Jesus
eh reꞌ rUxlabal reꞌreꞌ til kꞌe̱ꞌ ra̱j chi xa reꞌ wach i Dios tiꞌ nakicꞌram, nqui rikꞌor.
Jeꞌ reꞌ kꞌuruꞌ reꞌ Dios ricꞌuhtaj richakꞌlamil queh take maꞌ nquinimsaj ta qui̱b chiwach eh kꞌe̱ꞌ woꞌ chic rinimal richakꞌlamil riban cu̱cꞌ jeꞌ ricab rikꞌor chipam i Lokꞌ laj Hu̱j reꞌ tzꞌihmbimaj wi̱ꞌ i riCꞌuhbal i Dios. Ar jeꞌ wili rikꞌor:
“Reꞌ Dios ricꞌuhtaj rijoskꞌil chi quina̱ take cꞌacharel reꞌ nquinimsaj qui̱b,
raj laꞌ chi quina̱ take cꞌacharel reꞌ xa chꞌu̱b ti quiwach, reꞌreꞌ ricꞌuhtaj cho richakꞌlamil chi quina̱, nqui rikꞌor.
Jeꞌ reꞌ kꞌuruꞌ tiniminok tak chiwach i Dios eh ma̱cꞌam tak na̱ paꞌ bih noꞌjbal ricoj aj Yahm pan acapew-bal tak, chakꞌihtaj laꞌ tak awi̱b chi riyeꞌeric pan acꞌal i rajawric reh chi jeꞌ reꞌ etiricana̱ꞌ tak. Jeꞌ woꞌ chic, chajunehtej awi̱b tak ru̱cꞌ i Dios eh reꞌreꞌ erijunehtej woꞌ cho ri̱b awu̱cꞌ tak. Raj nchel hat-tak aj mahc, chacoj tak rehtal i wili: Chacana̱ꞌ tak ribanjic i cꞌahbilal. Reꞌ hat-tak reꞌ quib acꞌux tak, chawesaj tak lok pan awa̱mna tak i noꞌjbal reꞌreꞌ eh chasakbej wach awa̱mna tak. Jeꞌ woꞌ, reꞌ hat-tak aj mahc chꞌi̱l xa quib wach acꞌux tak, chapahkaj cuybal amahc tak chi cꞌahchiꞌ ayotꞌom acꞌux tak ruꞌum amahc tak. Tiꞌbok acꞌux tak eh chayotꞌ woꞌ acꞌux tak ru̱cꞌ okꞌic. Reꞌ awihꞌic tak chi xa seꞌel awach tak mikrok ta nak chi okꞌic eh reꞌ risukquil acꞌux tak mikrok ta nak chi ntzꞌiric laj cꞌuxlis. 10 Jeꞌ reꞌ ajic chachꞌubsaj wach anoꞌjbal tak chiwach i kAja̱w eh reꞌreꞌ erijohsaj wach awaꞌric tak.
11 Hat-tak was tak nicha̱kꞌ aj niminel reh Jesus, ma̱tzꞌuj tak jenoꞌ awich cꞌacharel tak maj reꞌ ritzꞌuj i ras richa̱kꞌ on richꞌuk kꞌoric china̱ jenoꞌ ras richa̱kꞌ, reꞌ aj niminel reꞌreꞌ cꞌahchiꞌ rikꞌebem riwaꞌric i Cꞌuhbal Yeꞌo̱j reh Moyses eh cꞌahchiꞌ woꞌ riqꞌuic kꞌe̱ꞌ china̱ i cꞌuhbal reꞌreꞌ. Ma̱ban tak jeꞌ reꞌ, reꞌ laꞌ chaꞌn tak chacꞌam tak na̱ i cꞌuhbal reꞌreꞌ chi coric. 12 Reꞌ hat-tak kꞌuruꞌ maꞌxta awaꞌric tak chi richꞌukuric kꞌoric china̱ awas acha̱kꞌ tak, xa reꞌ laꞌ woꞌ Dios wilic rajawric chi ribanaric reꞌreꞌ maj xa reꞌ woꞌ reꞌ wilic chi aj chꞌukul wach i mahc eh xa reꞌ woꞌ reꞌ kꞌorel wi etiricoꞌlej on erikꞌor chi enyeꞌeric tiꞌcꞌaxic chana̱ tak ruꞌum reh amahc tak.
Chiꞌnchel reꞌ nacapaj tak ribanaric chacana̱ꞌ tak pan kꞌab i Dios
13 Chaxilac hat-tak wilic take quikꞌoric chi jeꞌ wili:
«Chiwach i kꞌi̱j wili on reh kꞌi̱j reh ikal nakojic chipam jenaj chic tinamit. Ar nakacꞌacharic chiwach jenaj ha̱b. Ar woꞌ nakaꞌnam kayac reh chi ar nakaꞌnam canar qꞌuih katzꞌa̱k, nqui nquikꞌor.
Reꞌ hat-tak reꞌ jeꞌ reꞌ nakꞌor tak chabiraj tak i wili: 14 Ma̱kꞌor tak chic chi jeꞌ reꞌ maj maꞌ awehtꞌalim ta woꞌ tak chaj bih naricꞌuluric ikal. Jeꞌ reꞌ nikꞌor maj reꞌ kacꞌacharic chiꞌnchel i hoj xa jeꞌ na ricab riwi̱ꞌ i su̱tzꞌ maj chawil ruꞌ, to̱b ta nak cu reꞌ woꞌ ti cꞌahchiꞌ awilom tak wach eh pa̱m juncꞌam chic nsahchic woꞌ ti wach. 15 Reꞌ cok haj wilic i ricorquilal kꞌoric raj chi na̱banam tak, reꞌ i wili:
«Wi laꞌ reꞌ kAja̱w ra̱j chi cu wilic chic soꞌ kacꞌacharic, ar nakawihꞌic ponok eh chi jeꞌ reꞌ na woꞌ kaꞌnam ribanaric take paꞌ bih nkacapaj chi nakaꞌnam, tiquirok tak.
16 Jeꞌ nak reꞌ ruꞌ ra̱j banaric xa reꞌ laꞌ hat-tak reꞌ chic i wili naꞌn tak: Reꞌ hat-tak maꞌ reꞌ ta ru̱cꞌ chꞌublic wach cꞌuxlis tikꞌoric tak chiri̱j i paꞌ bih nawa̱j abanam tak, xa nanimsaj laꞌ chic awi̱b tak ru̱cꞌ i kꞌoric naꞌn tak. Til nikꞌor aweh tak chi reꞌ take noꞌjbal chi nimsinic i̱b, reꞌreꞌ maꞌ holohic ta nechꞌ ok chi banaric. 17 Jeꞌ reꞌ ajic chaꞌn tak i coric wach noꞌjbal maj reꞌ xa hab wach cꞌacharel reꞌ rehtꞌalim ribanaric haj wilic i coric laj noꞌjbal, xa reꞌ laꞌ ruꞌ maꞌ riban ta i haj wilic rehtꞌal chi coric chi banaric, reꞌ cꞌacharel reꞌreꞌ nmahcanic chiwach i kAja̱w.