16
Reꞌ jalwach kꞌoric chiri̱j i jenaj
tꞌulic laj aj camanom
1 Chiri̱j chic reꞌ, reꞌ Jesus jenaj woꞌ chic tijbal xikꞌor queh take raj tahkanel ru̱cꞌ jalwach kꞌoric wili:
«Junpech, wihꞌic cho jenaj biho̱m laj winak wihꞌic jenaj raj camanom ilol reh chiꞌnchel racꞌa̱l. Pan jenaj kꞌi̱j xponic quikꞌor rimahc aj ilol reꞌreꞌ ru̱cꞌ i biho̱m laj winak chi jeꞌ wili:
‹Ha̱w, reꞌ tojbal ri̱j awacꞌa̱l maꞌ cꞌahchiꞌ ta rimolom awaj camanom. Jeꞌ reꞌ kꞌuruꞌ xa kꞌebol atzꞌa̱k nok wilic, nqui xponic quikꞌor reh.
2 «Chalic i biho̱m laj winak naxibiraj chi jeꞌ reꞌ xitakꞌa̱ꞌ je ricꞌamaric i raj camanom. Naxcꞌulic lok ru̱cꞌ jeꞌ wili xkꞌormojic reh ruꞌum i biho̱m reꞌreꞌ:
‹Reꞌ hat maꞌxta chic acamanic wu̱cꞌ chi waj camanom maj reꞌ hin xnirak chiri̱j chi xa hat kꞌebol nitzꞌa̱k nok wilca̱t. Yuꞌna kꞌuruꞌ chacꞌam cho wi̱n ahu̱j reꞌ natzꞌihmbaj take wi̱ꞌ hab wach wilic quicꞌa̱s wu̱cꞌ reh chi nawilom, nqui xkꞌormojic reh.
3 «Reꞌ aj camanom naxibiraj chi jeꞌ reꞌ jeꞌ wili xikꞌor pa ricꞌux:
‹Reꞌ nicamaj chi hin ilol reh racꞌa̱l i wajabe̱s narimakꞌam wi̱n yuꞌna. Chaj woꞌ bih nanibanam kꞌuruꞌ? maj reꞌ hin maꞌ quinchol ta cow laj camanic eh chi nawoquic ta nak chi pahkanic wiꞌc chiꞌ tak pa̱t kꞌe̱ꞌ quinqꞌuixꞌic.
4 Ha̱ꞌ, reꞌ hin xnirak chic chiri̱j chaj bih nanibanam: Nanitoꞌbem take wilic quicꞌa̱s ru̱cꞌ biho̱m wili eh chi jeꞌ reꞌ nachimakꞌ nicamaj chi aj ilol ruꞌ, reꞌ take reꞌ equinquicꞌul cu̱cꞌ chi equinquitoꞌbej, nqui xikꞌor pa ricꞌux.
5 «Jeꞌ reꞌ kꞌuruꞌ naxelic je aj camanom reꞌreꞌ ru̱cꞌ biho̱m laj winak, xiyukꞌej chi quijuꞌjunal take wilic quicꞌa̱s ru̱cꞌ biho̱m reꞌreꞌ. Naxcꞌulic lok i pe̱t aj cꞌa̱s jeꞌ wili xkꞌormojic reh ruꞌum camanom reꞌreꞌ:
‹Chaj bih acꞌa̱s ru̱cꞌ ajabe̱s? nqui reh.
6 —Ha̱ꞌ, reꞌ hin hoꞌcꞌahl (100) chi nimak lo̱sa xun chi kꞌenaꞌ nicꞌa̱s ru̱cꞌ, nqui reh.
—Chacꞌul rihujil acꞌa̱s wili kꞌuruꞌ, titzꞌu̱k ayuꞌ eh xa chic ok lajeb roxcꞌahl (50) chi nimak lo̱sa xun acꞌa̱s chatzꞌihmlom chiwach, nqui reh.
7 «Jeꞌ woꞌ, naxcꞌulic woꞌ lok jenaj chic aj cꞌa̱s jeꞌ woꞌ chic wili xikꞌor reh aj camanom reꞌreꞌ:
‹Chaj bih acꞌa̱s ru̱cꞌ ajabe̱s? nqui reh.
—Ha̱ꞌ, reꞌ hin hoꞌcꞌahl (100) birin chi ixi̱m nicꞌa̱s ru̱cꞌ, nqui reh.
—Chacꞌul rihujil acꞌa̱s wili eh xa chic ok caj winak (80) birin chi ixi̱m acꞌa̱s chatzꞌihmlom chiwach, nqui reh.
8 «Jeꞌ aj reꞌ ruꞌ ru̱cꞌ noꞌjbal xiban i maꞌ holohic ta laj aj camanom reꞌreꞌ, reꞌ ajabe̱s jeꞌ wili xikꞌor reh:
‹Kꞌe̱ꞌ hat tꞌulic ru̱cꞌ acapew-bal chi xacapaj ri̱j nicꞌ wach ritobjic awi̱b na̱banam, nqui reh.
«Ru̱cꞌ ribiral i aj camanom reꞌreꞌ ncꞌuhtunic chi reꞌ take cꞌacharic chic ncaꞌn pa risakomil rikꞌorbal i Dios maꞌ kꞌe̱ꞌ ta woꞌ chic quichol risiqꞌuiric ri̱j nicꞌ wach ritobjic qui̱b nacaꞌnam ru̱cꞌ atoꞌbil ncaꞌn, jeꞌ ricab ncaꞌn take nquichꞌica̱ꞌ quicꞌux chiri̱j quibihomal ayuꞌ wach acꞌal.
9 Ruꞌum aj reꞌ, reꞌ hin til nikꞌor aweh tak chi ru̱cꞌ abihomal reꞌ namol tak wach ayuꞌ wach acꞌal ticholok tak ricꞌamaric awi̱b tak pan sukquilal cu̱cꞌ awas acha̱kꞌ tak. Chi jeꞌ reꞌ nok maꞌxta chic camaj aweh abihomal tak ruꞌum nok hat-tak chic camnak, holohic acꞌuluric tak naribanaric ru̱cꞌ i Dios reꞌ wilic wi̱ꞌ cꞌacharic chi junelic.
10 «Reꞌ hat-tak kꞌuruꞌ chacoj tak rehtal i coric laj kꞌoric wili: Reꞌ coric laj aj camanom to̱b ta tꞌuch wach on to̱b ta nim wach ricamaj, reꞌreꞌ xa ewoꞌ rinimej ricamaj. Raj laꞌ reꞌ maꞌ coric ta laj aj camanom to̱b ta tꞌuch wach on to̱b ta nim wach ricamaj, reꞌreꞌ xa maꞌ eta woꞌ rinimej ricamaj.
11 Ruꞌum aj reꞌ nikꞌor aweh tak chi chanimej tak chi coric acamaj tak riyew i Dios eh chacamanej tak wach abihomal tak chi coric maj wi maꞌ naꞌn ta tak i coric ru̱cꞌ abihomal tak, nicꞌ wach nok chi reꞌ Dios erichꞌica̱ꞌ ricꞌux chawi̱j tak chi enacamanej tak wach ribihomal?
12 On wi maꞌ xaꞌn tak i coric ru̱cꞌ abihomal tak reꞌ xa okxaꞌnamaj pan akꞌab tak, nicꞌ woꞌ wach nok reꞌ Dios erichꞌica̱ꞌ ricꞌux chi riyeꞌeric pan akꞌab tak i ribihomal reꞌ na̱wehcham tak?
13 Jeꞌ aj reꞌ ruꞌ, maꞌ eta riban chi quib ta nak enachꞌica̱ꞌ wi̱ꞌ acꞌux tak, chiri̱j ta nak i Dios eh jeꞌ woꞌ chiri̱j abihomal tak jeꞌ ricab nok maꞌ eta riban chi jenoꞌ camanom encamanic ru̱cꞌ quib chi ajabe̱s ruꞌum nok, wi erichꞌica̱ꞌ ricꞌux chi ribanaric ricamaj i jenaj ajabe̱s, narikꞌebem lok chiri̱j ricꞌux i ricamaj i jenaj chic ajabe̱s. Wi chiri̱j ricamaj i jenaj chic ajabe̱s erichꞌica̱ꞌ ricꞌux, ra̱j rikꞌorom chi ewoꞌ chic rikꞌeb cho chiri̱j ricꞌux ricamaj i jenaj chic ajabe̱s reꞌ xichꞌica̱ꞌ nak wi̱ꞌ ricꞌux chi camanic chi pe̱t, nqui Jesus queh.
14 Chiri̱j wili reꞌ take cow laj aj niminel reh Cꞌuhbal Yeꞌo̱j reh Moyses naxquibiraj i kꞌoric xikꞌor i Jesus, tohkꞌ quiseꞌlam ruꞌum nok ji̱kꞌ quicꞌux chiri̱j quibihomal.
15 Ruꞌum aj reꞌ jeꞌ wili xkꞌormojic queh ruꞌum Jesus:
«To̱b ta reꞌ hat-tak nacꞌuhtaj tak lok awi̱b chi quiwach i tinamit chi xa coric chic wach acꞌux tak, chiwach i Dios reꞌ nehtꞌalanic reh awa̱mna tak sakom wach chi xa ji̱kꞌ chic acꞌux tak chiri̱j bihomal. Jeꞌ reꞌ nok reꞌ Dios nyiꞌbic cho ruꞌum atijbal tak eh to̱b ta nak kꞌe̱ꞌ nim rilokꞌil atijbal tak chi quiwach i tinamit, yuꞌna pꞌuht rojic wach acꞌal.
16 Ruꞌum aj chi jeꞌ reꞌ, reꞌ Wa̱n reꞌ xbanic cho kahsanic haꞌ maꞌ xitik ta chic juꞌ rixermejic wach i Cꞌuhbal Yeꞌo̱j reh Moyses, chꞌi̱l i quicꞌuhbal take aj kꞌorol riCꞌuhbal i Dios. Chi jeꞌ aj reꞌ ru̱cꞌ Wa̱n xpꞌuhtic cho rikꞌormojic chi reꞌ Dios reꞌ nkꞌatbic kꞌoric ra̱j richopom quina̱ take cꞌacharel eh ruꞌum aj reꞌ yohbal wach take cꞌacharel cꞌahchiꞌ quichopom quicꞌux chi reꞌ Dios nariwihꞌic chi quina̱ chi kꞌatal kꞌoric.
17 Ruꞌum aj chi jeꞌ reꞌ, reꞌ hin nikꞌor aweh tak chi reꞌ atijbal hat-tak cꞌahchiꞌ rojic wach acꞌal to̱b ta nchel reꞌ hat-tak nakꞌor chi jeꞌ wili:
‹Coric, reꞌ taxa̱j richꞌi̱l acꞌal narisahchic wach nacuxꞌok wach i cꞌacharic, xa reꞌ laꞌ maꞌ jenoꞌ tꞌuch kꞌilo̱j jeꞌ ru̱cꞌ wilic chipam Cꞌuhbal Yeꞌo̱j reh Moyses jeꞌ ricab jenoꞌ tꞌuch rehtalil kꞌoric, narojic wach acꞌal, nqui nakꞌor tak.
18 «Raj laꞌ hin nikꞌor aweh tak chi maꞌ jeꞌ ta reꞌ. Jeꞌ ricab yuꞌna chi rijelow-bal atijbal naꞌn tak chiri̱j i kꞌilo̱j reꞌ rikꞌor chi reꞌ winak richꞌak rehqꞌue̱n eh ricꞌam chic jenoꞌ toco̱m ixok nkajic pan cꞌoyomal, reꞌ chic nicꞌuhtunic i hin chiri̱j i kꞌilbal reꞌreꞌ nbirmijic eh reꞌ cꞌuhtunic reꞌreꞌ rikꞌor chi reꞌ winak ricꞌam chi rehqꞌue̱n jenoꞌ toco̱m ixok chꞌako̱j cho ruꞌum ribahi̱l, nkajic woꞌ pan cꞌoyomal, nqui Jesus queh.
Reꞌ jalwach kꞌoric chiri̱j i jenaj
biho̱m laj winak chꞌi̱l i La̱saro
19 Chiri̱j chic ruꞌ, reꞌ Jesus xikꞌor woꞌ chic queh jenaj jalwach kꞌoric chi jeꞌ wili:
«Pan jenaj tinamit xwihꞌic cho jenaj biho̱m laj winak reꞌ xcꞌacharic cho chi jeꞌ ricab riwi̱ꞌ jenaj kꞌatal kꞌoric maj kalakal xa chiꞌnchel wach cꞌuxbal wilic nah rime̱xa chi naricꞌuxum eh xa chakꞌ wach laj tzꞌih woꞌ wilic chiri̱j.
20 Chipam woꞌ tinamit reꞌreꞌ xcꞌacharic cho jenaj niba̱ꞌ laj winak nujunak ri̱j chi kꞌa̱ La̱saro ribihnal. Reꞌ La̱saro reꞌreꞌ eli̱c nponic canabjok cho chiwach ritzꞌahp ripa̱t i biho̱m reꞌreꞌ.
21 Nanwihꞌic ar xa ricꞌax nak chic wach chi narinuksam ri̱b reh take rixe̱r wiꞌc ricana̱ꞌ i winak reꞌreꞌ nah rime̱xa, xa reꞌ laꞌ maꞌ nyeꞌeric ta woꞌ reh. Haj ti wilic i quiꞌoquic cok ru̱cꞌ La̱saro xa reꞌ ti take tzꞌiꞌ reꞌ no̱j quirekꞌ wach i rikꞌa̱.
22 «Jenaj aj chi reꞌ, xponic rikꞌijil chi reꞌ take quib chi winak reꞌreꞌ xiquimic je. Reꞌ niba̱ꞌ laj winak xcꞌamaric johtok cuꞌum take raj tzꞌeꞌ wa̱ch i Dios ar pan taxa̱j reꞌ wilic wi̱ꞌ jenaj ninkꞌi̱j eh chi jeꞌ reꞌ xcojoric nah me̱xa ar chi riche̱l i maꞌ Awraham. Ra̱j nchel i biho̱m laj winak, naxmukꞌunjic je
23 xo̱j cꞌolok chipam i yeꞌa̱b Ha̱res ribihnal reꞌ nquicꞌul wi̱ꞌ tiꞌcꞌaxic take maꞌ holohic ta quinoꞌjbal. Nok wilic chic chipam i tiꞌcꞌaxic reꞌreꞌ, reꞌ biho̱m laj winak xilow johtok wach i La̱saro chi tzꞌuklic cok chi riche̱l maꞌ Awraham cu maꞌ wili johtok
24 eh xiqꞌuer johtok chi̱ꞌ chi jeꞌ wili:
‹Ajabe̱s maꞌ Awraham, reꞌ hin yohbal woꞌ chic wach tiꞌquil cꞌahchiꞌ nicꞌulum chipam i kꞌa̱kꞌ wili. Chacuy, chakꞌor wi̱n reh La̱saro chimuh cho jenoꞌ juꞌ kꞌab pan haꞌ eh cꞌolok ritꞌaksaj soꞌ wi̱n pa nichi̱ꞌ chi jotꞌsbal soꞌ wach nitiꞌquil, nqui johtok i biho̱m reꞌreꞌ.
25 «Chalic maꞌ Awraham jeꞌ wili ricꞌuꞌljic xiban cho:
‹Bi̱l, cꞌolok pan acꞌux chi nok wilca̱t tak cho wach acꞌal, reꞌ hat xa sukquil cꞌuxlis xacꞌul cho, raj i La̱saro wili xa reꞌ woꞌ tiꞌquil cꞌuxlis xicꞌul cho ar. Yuꞌna, reꞌ chic i La̱saro naricꞌulum sukquil ricꞌux ayuꞌ eh reꞌ hat na̱cꞌulum i tiꞌcꞌaxic ar.
26 Jeꞌ woꞌ chic, chi kaxilac i hoj chꞌi̱l i hat-tak wilic jenaj rinimal jul cahk reh chi reꞌ hoj chꞌi̱l hat-tak, to̱b ta nak cꞌultar nka̱j je kꞌahxic, maꞌ eta nkaꞌn canar, nqui banol cho reh.
27 «Reꞌ biho̱m reꞌreꞌ jeꞌ woꞌ chic wili xikꞌor:
‹Ha̱w maꞌ Awraham wi maꞌ riban chi jeꞌ reꞌ kꞌuruꞌ, chacuy chatakꞌa̱ꞌ je wi̱n i La̱saro pa ripa̱t i waja̱w,
28 ar cu̱cꞌ take hoꞌo̱b chi was chꞌi̱l nicha̱kꞌ chi rikꞌororic queh i tiꞌcꞌaxic wilqui̱n wi̱ꞌ hin. Jeꞌ reꞌ nipahkaj aweh chi chaꞌn maj wi maꞌ xo̱j rikꞌor queh, ewoꞌ quichalic ayuꞌ chipam tiꞌcꞌaxic wili, nqui johtok reh.
29 «Reꞌ maꞌ Awraham jeꞌ woꞌ chic wili xikꞌor cho reh:
‹Bi̱l, maꞌ eta riban jeꞌ ricab napahkaj i hat. Reꞌ take awas chꞌi̱l take acha̱kꞌ wi maꞌ nca̱j chi nacojic chipam i tiꞌcꞌaxic wilca̱t wi̱ꞌ, quinimej i riCꞌuhbal i Dios canamaj cahnok ruꞌum i Moyses jeꞌ woꞌ i riCꞌuhbal i Dios quicana̱b cahnok take aj kꞌorol riCꞌuhbal najtir kꞌi̱j maj reꞌ aj camaj naxcanabjic cahnok take cꞌuhbal, nqui xikꞌor cho reh.
30 «Chalic i biho̱m jeꞌ woꞌ chic wili xikꞌor johtok reh:
‹Jeꞌ nak reꞌ ruꞌ Ha̱w maꞌ Awraham, xa reꞌ laꞌ maꞌ nquicoj ta wach i cꞌuhbal reꞌreꞌ. Ruꞌum aj reꞌ nipahkaj aweh chi eta nak natakꞌa̱ꞌ je jenoꞌ hab wach chi kaxilac i hoj camnak, ewoꞌ nak nquijal wach quinoꞌjbal, nqui woꞌ chic i biho̱m reꞌreꞌ.
31 Reꞌ maꞌ Awraham, naxibiraj chi jeꞌ reꞌ jeꞌ wili xikꞌor cho reh:
‹Wi reꞌ take awas chꞌi̱l take acha̱kꞌ maꞌ nquijal ta wach quinoꞌjbal nanquibiraj i riCꞌuhbal i Dios ruꞌum Moyses, jeꞌ woꞌ i cꞌuhbal quicana̱b cahnok take aj kꞌorol riCꞌuhbal i Dios najtir kꞌi̱j, maꞌ nicꞌ ta woꞌ chic wach naquijal wach quinoꞌjbal, to̱b ta nak uctok je jenoꞌ hab wach chi kaxilac i hoj camnak chi rikꞌormojic queh i cꞌuhbal, nqui Awraham, nqui Jesus queh.