9
Reꞌ Jesus xiyew rajawric quikꞌorbal
take cablaj chi nahsil raj tahkanel
(Mt. 10.5-15; Mr. 6.7-13)
Nok cu wilic pa riyukꞌul Calile̱ya, pan jenaj kꞌi̱j reꞌ Jesus ximol quiwach take cablaj chi nahsil raj tahkanel eh jeꞌ wili xikꞌor queh:
«Tinipahba̱ꞌ tak chi wihꞌok awajawric tak chi quitꞌermejic lok take maꞌ tob laj uxlabal cu̱cꞌ take cꞌacharel choplic quina̱ cuꞌum, jeꞌ woꞌ chi resmejic lok quiyaꞌbilal take yowaꞌi̱b, nqui queh.
Ru̱cꞌ take kꞌoric reꞌreꞌ xitakꞌa̱ꞌ je take cu̱cꞌ i tinamit chi quicowsjic take yowaꞌi̱b jeꞌ woꞌ chi rikꞌormojic queh chi reꞌ Dios reꞌ nkꞌatbic kꞌoric ra̱j richopom quina̱ take cꞌacharel. Jeꞌ woꞌ, xkꞌormojic woꞌ queh chi jeꞌ wili ruꞌum Jesus naxiꞌo̱j:
«Maꞌxta bih aweh tak na̱cꞌamam tak je reh wach abe̱h tak ruꞌum aloqꞌuem ti awi̱b na̱wojic tak. Chi jeꞌ aj reꞌ ma̱cꞌam je achꞌimim tak, ma̱cꞌam je awaꞌ aha̱ꞌ tak, ma̱cꞌam je atzꞌa̱k tak eh ma̱cꞌam woꞌ chic jenoꞌ ajalba̱l tak. Wi xatquicꞌul pan jenoꞌ tinamit reꞌ na̱ponic tak wi̱ꞌ, to̱b ta xa nicꞌ paꞌ ti wach i pa̱t nariyeꞌjic wi̱ꞌ apatal tak, ar tiwi̱ꞌ tak cu rehtal chic telic tak je chipam tinamit reꞌreꞌ. Tzꞌa̱b ruꞌ wi maꞌ xatquicꞌul tak chipam tinamit reꞌreꞌ telen tak je ar eh chi quiwach take cꞌacharel reꞌreꞌ chapuh tak lok i poklaj pa ro̱k aper-xijab tak, reh chi enquirak chiri̱j chi reꞌ Dios naritakꞌa̱b cho tiꞌcꞌaxic chi quina̱, nqui xkꞌormojic queh ruꞌum Jesus.
Nok quibiram chic take kꞌoric reꞌreꞌ, reꞌ take cablaj reꞌreꞌ xiꞌo̱j woꞌ pan tak tinamit eh xquikꞌor i holohic laj kꞌoric chi reꞌ Dios xichop chic quina̱ chi kꞌatal kꞌoric. Jeꞌ woꞌ, xquicowsaj woꞌ take yowaꞌi̱b wilque̱b chipam take tinamit xiꞌiqꞌuic ponok wi̱ꞌ. Nok reꞌ take cablaj reꞌreꞌ cꞌahchiꞌque̱b chi ribanaric i camanic xyeꞌeric je chi quina̱, reꞌ Hero̱res reꞌ nkꞌatbic kꞌoric chipam riyukꞌul Calile̱ya chꞌi̱l i Pere̱ya, naxibiraj ribiral i Jesus kꞌe̱ꞌ naxsahchic ricꞌux maj chi quixilac take tinamit ribiraj chi wilic take jeꞌ wili nquikꞌor chiri̱j i Jesus:
«Reꞌ ranxelex i Wa̱n aj kahsem haꞌ xcꞌacharic woꞌ chic cho eh reꞌreꞌ wilic ru̱cꞌ i Jesus, nqui nquikꞌor.
Wilic woꞌ nquikꞌor chi reꞌ Eli̱yas reꞌ kꞌorol riCꞌuhbal i Dios najtir kꞌi̱j wilic woꞌ chic chi quixilac ruꞌum chi xuctic cho chi quixilac camnak. Wilic woꞌ take quikꞌoric chi jenoꞌ chic richꞌi̱l i Eli̱yas jeꞌ ru̱cꞌ rich kꞌorol cho riCꞌuhbal i Dios xuctic woꞌ cho chi quixilac camnak. Ru̱cꞌ take kꞌoric reꞌreꞌ, reꞌ Hero̱res jeꞌ wili xikꞌor pa ricꞌux:
«Reꞌ nquikꞌor i tinamit chiri̱j i winak reꞌreꞌ kꞌe̱ꞌ ncꞌulic lok ribiral pa nixiquin. Hab woꞌ wach i winak reꞌreꞌ kꞌuruꞌ? Reꞌ winak reꞌreꞌ maꞌ reꞌ ta Wa̱n aj kahsem haꞌ maj reꞌ Wa̱n til hin xintakꞌanic reh riyocꞌoric lok i na̱, nqui pa ricꞌux.
Jeꞌ reꞌ nok, xa ji̱kꞌ chic pa ricꞌux chi narinaꞌbem hab wach i Jesus.
Reꞌ quiqueteric take cablaj ikꞌob
lajcꞌahl chi tinamit xiban i Jesus
(Mt. 14.13-21; Mr. 6.30-44; Jn. 6.1-14)
10 Chiri̱j aj wili naxquicohlaj cho camanic take cablaj chi nahsil raj tahkanel, xisoljic woꞌ chic cho eh pꞌuht quikꞌorom reh Jesus nicꞌ nimal i camanic xponic caꞌn cho. Chiri̱j chic ruꞌ reꞌ Jesus xo̱j pan jenaj yu̱kꞌ reꞌ maꞌxta wi̱ꞌ patanel reꞌ wilic pa riyukꞌul tinamit Wetsa̱yra ribihnal eh xa reꞌ woꞌ ti take cablaj reꞌreꞌ xicꞌam je take chiri̱j 11 xa reꞌ laꞌ naxquehtꞌalij take tinamit chi reꞌ Jesus ar xo̱j chipam tinamit reꞌreꞌ, xquitahkej je. Naxquirak je wach be̱h, reꞌ Jesus xiyew kꞌab queh chi xiwihꞌic ru̱cꞌ. Ar aj ruꞌ xitokꞌa̱ꞌ rikꞌormojic queh chi reꞌ Dios reꞌ nkꞌatbic kꞌoric ra̱j richopom quina̱ take cꞌacharel eh xicowsaj woꞌ take yowaꞌi̱b wilque̱b chi quixilac i tinamit reꞌreꞌ. 12 Chiri̱j reꞌ naxquilow take cablaj chi nahsil raj tahkanel chi xo̱j chic i kꞌi̱j, xquijil cok qui̱b ru̱cꞌ i Jesus eh jeꞌ wili xquikꞌor reh:
«Ha̱w, enak riban chi enatakꞌa̱ꞌ je take tinamit wili pan tak abixbal on pan tak pa̱t maꞌ naht ta je ayuꞌ reh chi enquirak quipatal eh encaꞌn quiwaꞌ quiha̱ꞌ. Jeꞌ reꞌ nkacapaj maj ayuꞌ maꞌ haj ta enquirak quiwaꞌ quiha̱ꞌ ruꞌum wilco̱j pan jenaj chik yu̱kꞌ maꞌxta wi̱ꞌ cꞌacharel, nqui take reh.
13 Reꞌ Jesus jeꞌ wili xikꞌor queh:
«Coric nakꞌor tak, xa reꞌ laꞌ reꞌ take tinamit wili reꞌ hat-tak na̱quetbic tak queh, nqui Jesus.
Reꞌ take cablaj reꞌreꞌ jeꞌ wili xquikꞌor woꞌ chic reh:
«Xa reꞌ woꞌ chi eta nak koj-o̱j i hoj lokꞌol wiꞌc enak nkaꞌn canar quiqueteric i riqꞌuihal tinamit wili maj xa reꞌ ti wach hoꞌo̱b chi caxlan wiꞌc chꞌi̱l quib chi joxomaj car wilic ku̱cꞌ, nqui take reh.
14 Jeꞌ reꞌ xquikꞌor reh Jesus ruꞌum chi xquicoj rehtal chi kꞌe̱ꞌ woꞌ chic qꞌuihal i tinamit xquimol qui̱b ar, xa reꞌ ti take winak wilque̱b na cablaj ikꞌob lajcꞌahl (5,000) ok take. Chi jeꞌ reꞌ ajic reꞌ Jesus jeꞌ wili xikꞌor queh:
«Chakꞌor tak queh tinamit chi quitzꞌuka̱ꞌ qui̱b chi tzohkil chi laj tak roxcꞌahl (50) quiwi̱ꞌ, nqui queh.
15 Reꞌ take cablaj chi nahsil raj tahkanel naxquibiraj chi jeꞌ reꞌ, xquinimej xikꞌor i Jesus eh xquitzꞌuka̱ꞌ woꞌ take tinamit reꞌreꞌ. 16 Chiri̱j chic ruꞌ reꞌ Jesus xichop johtok i hoꞌo̱b chi caxlan wiꞌc chꞌi̱l quib chi joxomaj car eh naxilbic johtok pan taxa̱j xitioxej johtok reh i Dios. Chiri̱j chic reꞌ xixer i caxlan wiꞌc chꞌi̱l take joxomaj car reꞌreꞌ eh pꞌuht riyeb take pan tak chacach, reh chi reꞌ take nahsil raj tahkanel naquicojom chi quiwach take juꞌjun tzohk chi tinamit. 17 Jeꞌ aj reꞌ ruꞌ reꞌ take tinamit reꞌreꞌ xcaꞌn quiwaꞌ chi suk eh to̱b ta woꞌ kꞌe̱ꞌ qꞌuihal take tinamit xiwiꞌc, cu cablaj chic chacach chi caxlan wiꞌc reꞌ maꞌ xcꞌuhlic ta xquimol wach take cablaj chi nahsil reꞌreꞌ.
Reꞌ maꞌ Luch xikꞌor chi reꞌ Jesus reꞌ
i Kꞌatal Kꞌoric Pahbamaj ruꞌum i Dios
(Mt. 16.13-20; Mr. 8.27-30)
18 Chiri̱j chic ruꞌ pan jenaj chic kꞌi̱j nok xa reꞌ ti take cablaj chi nahsil raj tahkanel wilque̱b ru̱cꞌ Jesus chipam i yeꞌa̱b cꞌahchiꞌ wi̱ꞌ chi ti̱j, reꞌ Jesus jeꞌ wili xikꞌor queh cablaj reꞌreꞌ:
«Chaj woꞌ bih nquikꞌor i tinamit chiwi̱j i hin? nqui queh.
19 Reꞌ take cablaj reꞌreꞌ jeꞌ wili xquikꞌor reh:
«Wilic tinamit nquikꞌor chi reꞌ hat, hat i Wa̱n reꞌ aj kahsem haꞌ reꞌ camnak chic je. Wilic woꞌ take quikꞌoric chi reꞌ hat, hat i Eli̱yas on jenoꞌ chic queh rich aj kꞌorol riCꞌuhbal cho i Dios najtir kꞌi̱j xuctic cho chi quixilac camnak, nqui take reh.
20 Reꞌ Jesus naxibiraj chi jeꞌ reꞌ, jeꞌ woꞌ chic wili xikꞌor queh:
«Raj hat-tak, chaj bih nakꞌor tak chiwi̱j hin? nqui queh.
Chalic maꞌ Luch jeꞌ wili xikꞌor reh:
«Reꞌ hat, hat i Pahbamaj chi Kꞌatal Kꞌoric kꞌoro̱j ruꞌum i Dios chi naritakꞌa̱b cho, nqui reh.
21 —Til maꞌ hab wach eh nakꞌor tak i wili, nqui Jesus queh.
Jeꞌ aj reꞌ ruꞌ reꞌ xikꞌor maꞌ Luch til xipahkaj queh chi maꞌxta pe rikꞌororic lok. 22 Jeꞌ woꞌ chic, xikꞌor woꞌ queh chi jeꞌ wili:
«Reꞌ hin Acꞌunbe̱s reꞌ wilic wajawric chi quina̱ cꞌacharel kꞌe̱ꞌ nimal tiꞌcꞌaxic nanicꞌulum naquincansjok. Jeꞌ woꞌ, reꞌ nicꞌuhbal maꞌxta ricꞌulmujic cuꞌum take nahsil chipam katinami̱t i hoj ra̱ꞌ riꞌsil cho maꞌ Israhel. Reꞌ chic take aj cꞌamol quibe̱h aj cꞌatol si̱ chiwach i Dios chꞌi̱l take aj tijem ri̱j Cꞌuhbal Yeꞌo̱j reh Moyses jeꞌ woꞌ reꞌ nacaꞌnam maj chiꞌnchel reꞌreꞌ chꞌi̱l i wuctic cho chi quixilac camnak pa ro̱x kꞌi̱j niquimic, curman chi naricꞌulmujic, nqui Jesus queh raj tahkanel.
23 Chiri̱j reꞌreꞌ, jeꞌ woꞌ chic wili xikꞌor queh:
«Reꞌ hab wach nariyeb ricꞌux chi nitahkaljic chikꞌeb lok chiri̱j ricꞌux nicꞌ nimal nesenic lok reh ricapew-bal chiwi̱j i hin. Jeꞌ woꞌ, maꞌ xa reꞌ ok pan sukquilal naquiritahkem, jeꞌ laꞌ ok woꞌ pan tiꞌcꞌaxic jeꞌ ricab chi cꞌahchiꞌ ta nak ritehlam ricuru̱s kalakal. 24 Jeꞌ reꞌ nikꞌor maj hab wach reꞌ xa reꞌ sukquil cꞌuxlis ra̱j pa ricꞌacharic, maꞌxta rehcham i junelic cꞌacharic ru̱cꞌ i Dios raj nchel i maꞌ rikꞌor ta bihnal ricꞌuluric i tiꞌcꞌaxic nbanaric reh ruꞌum chi waj tahkanel, reꞌ cok reꞌ narehcham i junelic cꞌacharic. 25 Jeꞌ reꞌ kꞌuruꞌ maꞌ quinakꞌeb lok chiri̱j acꞌux tak ruꞌum chi chiri̱j chic i bihomal enayew acꞌux tak maj chaj bih eritik aweh tak i moloj wach bihomal, wi enakꞌeb tak i sukquil acꞌux tak ru̱cꞌ i Dios? Xa ta chic reꞌ nicꞌ paꞌ nimal i bihomal nmoloric wach ayuꞌ wach acꞌal enyeꞌbic jelow-bal aweh tak i sukquil cꞌuxlis enakꞌeb tak reꞌreꞌ!
26 «Maꞌ quinakꞌeb tak lok chiri̱j acꞌux tak kꞌuruꞌ eh maꞌ tiqꞌuixꞌic woꞌ tak chi rikꞌormojic chi hat-tak waj tahkanel maj wi jeꞌ reꞌ xaꞌn tak, reꞌ hin Acꞌunbe̱s reꞌ wilic wajawric chi quina̱ cꞌacharel naquinsoljok woꞌ chic cho chi sutumaj wi̱j ru̱cꞌ rinimal wach sakomil nsutunic ri̱j i wAja̱w chꞌi̱l nsutunic qui̱j take raj tzꞌeꞌ wa̱ch, xa quinqꞌuixꞌic chic nanikꞌorom woꞌ aweh tak chi maꞌ reꞌ ta hat-tak waj tahkanel, nqui Jesus.
27 Chiri̱j chic ruꞌ, reꞌ Jesus jeꞌ wili xikꞌor queh:
«Til coric nikꞌor chi wilic aweh tak jeꞌ ru̱cꞌ wilca̱t tak ayuꞌ yuꞌna cu na̱wilom tak nicꞌ wach riwi̱ꞌ kꞌatoj kꞌoric riban i Dios. Reꞌ hat-tak reꞌreꞌ cu jaꞌxta pe aquimic tak je maꞌ jaꞌ nawilow tak reꞌreꞌ, nqui queh.
Reꞌ Jesus xiban chi xa
nchꞌabchꞌatic chic rilbal
(Mt. 17.1-8; Mr. 9.2-8)
28 Wahxaki̱b na chic kꞌi̱j kꞌoro̱j cho kꞌoric reꞌreꞌ, reꞌ maꞌ Luch chꞌi̱l i Wa̱n chꞌi̱l i Jaco̱wo xicꞌamaric je ruꞌum i Jesus china̱ jenaj yu̱kꞌ reꞌ xo̱j riban wi̱ꞌ riti̱j. 29 Ar china̱ i yu̱kꞌ reꞌreꞌ nok cꞌahchiꞌ chi ti̱j i Jesus, xo̱j riban chi toco̱m chic ncaꞌyic rilbal maj xa nchꞌabchꞌatic chic xiban. Reꞌ risoꞌ xiban xa saksa̱k chic eh xa nrepretic woꞌ chic xiban. 30 Ar aj ruꞌ ruhmumaj peꞌ chic cho quib aj kꞌorol riCꞌuhbal i Dios aj najtir kꞌi̱j, reꞌ Moyses chꞌi̱l Eli̱yas. Reꞌ take quib reꞌreꞌ xiꞌoquic chi kꞌoric ru̱cꞌ i Jesus 31 eh chi xa nrepretic chic sakomil quitiꞌjolal cꞌahchiꞌ woꞌ quikꞌoric chiri̱j i Jesus chi ar Jerusalen nariquimic reh chi jeꞌ reꞌ narojic elok wach reꞌ kꞌoro̱j cho chiri̱j ruꞌum i Dios. 32 Nok jeꞌ reꞌ kꞌoric ncaꞌn take qui̱b reꞌreꞌ, reꞌ maꞌ Luch chꞌi̱l take richꞌi̱l to̱b ta chopolque̱b nak chi coric ruꞌum wiric, cu xquicowej qui̱b chi rilmijic risakomil rilbal i Jesus jeꞌ woꞌ take quib chi winak wilque̱b ru̱cꞌ. 33 Chiri̱j wili nok cꞌahchiꞌ chic cojic Moyses chꞌi̱l Eli̱yas, reꞌ maꞌ Luch jeꞌ wili xikꞌor reh Jesus:
«Ha̱w kaj tijinel, kꞌe̱ꞌ tare̱t chi wilco̱j ayuꞌ. Chayew kꞌab keh kꞌuruꞌ chi enkatikꞌa̱ꞌ xib ok chi cucꞌ pahpaꞌx. Jenaj aweh hat, jenaj reh maꞌ Moyses eh jenaj woꞌ reh Eli̱yas, nqui reh.
Jeꞌ reꞌ xikꞌor maꞌ Luch ruꞌum chi maꞌ xirak ta chic jenoꞌ chajaric kꞌoric narikꞌorom.
34 Xa cu reꞌ peꞌ woꞌ ti xicohlaj kꞌoric i maꞌ Luch, jenaj su̱tzꞌ xkajic cho china̱ i yeꞌa̱b wilque̱b wi̱ꞌ eh naxisutej qui̱j, reꞌ maꞌ Luch chꞌi̱l take richꞌi̱l chalic jenaj yoꞌjic cu̱cꞌ. 35 Ar chipam su̱tzꞌ reꞌreꞌ, reꞌ xiꞌoquic wi̱ꞌ Moyses chꞌi̱l maꞌ Eli̱yas xelic cho jenaj kꞌoric chi jeꞌ wili:
«Reꞌ Jesus wili til kꞌe̱ꞌ tiꞌ nwicꞌraj maj wAcꞌu̱n aj nawil. Chabiraj aj tak rikꞌorbal kꞌuruꞌ, nqui kꞌoric xbanjic cho.
36 Xa reꞌ woꞌ xquicohlaj ribirmijic i kꞌoric reꞌreꞌ, reꞌ maꞌ Luch chꞌi̱l take richꞌi̱l xquilow chi xa rutquel woꞌ chic xcahnic ar i Jesus. Jeꞌ aj reꞌ xquilow take xib chi nahsil aj tahkanel reꞌreꞌ, xa reꞌ laꞌ nok chi cu cꞌachlic i Jesus maꞌ hab ta wach eh xquikꞌor xa xquicꞌol laꞌ pan quicꞌux chiꞌnchel xquilow reꞌreꞌ.
Reꞌ Jesus xesaj lok jenaj maꞌ tob laj
uxlabal ru̱cꞌ jenaj tꞌuch acꞌun
(Mt. 17.14-21; Mr. 9.14-27)
37 Jeꞌ chic ikal naxkajic cho Jesus china̱ yu̱kꞌ reꞌreꞌ chꞌi̱l take xib chi nahsil raj tahkanel, juntuhm chi tinamit xiꞌo̱j cꞌulul reh. 38 Chi quixilac take riqꞌuihal tinamit wilque̱b ar, jenaj winak xiqꞌuer je chi̱ꞌ chi jeꞌ wili:
«Ha̱w aj tijinel keh, chacuy chawilow ti wi̱n wacꞌu̱n wili reꞌ xa jenaj ti chi niwach 39 maj ntzꞌaꞌjic ruꞌum maꞌ tob laj uxlabal. Ruꞌum aj reꞌ ritokꞌa̱ꞌ xa nchokonic chic chi rutquel nancuturic wach acꞌal eh ritokꞌa̱ꞌ xa ritolem chic ri̱b cu rehtal riban xa nwoxkꞌonic chic ri̱s chi̱ꞌ. Jeꞌ reꞌ ricꞌul, cu cꞌaxic chic nancanabjic ruꞌum maꞌ tob laj uxlabal. 40 Reꞌ take nahsil awaj tahkanel xacana̱ꞌ take cahnok ayuꞌ xnipahkaj atoꞌbil queh chi naquitꞌerem nak lok maꞌ tob laj uxlabal ru̱cꞌ i wacꞌu̱n xa reꞌ laꞌ maꞌ xcaꞌn ta lok canar ritꞌermejic, nqui reh Jesus.
41 Ar ajic reꞌ Jesus jeꞌ wili cꞌuꞌlunic xiban:
«Ha̱ꞌ, reꞌ cok hat-tak til cow chic ana̱ tak chi rinimjic nicꞌuhbal ruꞌum jotꞌo̱j chic anoꞌjbal tak! Ma̱capaj tak nchel kꞌuruꞌ chi chiwach i quib xib chic kꞌi̱j wilqui̱n chaxilac tak xa cu naca̱t woꞌ tak nicuyum ru̱cꞌ ricowil anoꞌjbal tak reꞌreꞌ, nqui quikꞌilmijic xiban.
Chiri̱j chic ruꞌ jeꞌ wili xikꞌor reh winak:
«Chacꞌam cho wi̱n awacꞌu̱n ayuꞌ, nqui reh.
42 Chalic i winak reꞌreꞌ xicꞌam woꞌ cho i racꞌu̱n ru̱cꞌ i Jesus, xa reꞌ laꞌ nok reꞌ racꞌu̱n cꞌahchiꞌ rijilim cok ri̱b ru̱cꞌ Jesus, xkꞌojoric woꞌ chic pan acꞌal ruꞌum maꞌ tob laj uxlabal eh cow xiquichꞌquij wach. Reꞌ Jesus naxilow chi jeꞌ reꞌ, xikꞌor reh maꞌ tob laj uxlabal chi narelic lok ru̱cꞌ acꞌun reꞌreꞌ. Jeꞌ reꞌ nok naxelic lok i maꞌ tob laj uxlabal, reꞌ Jesus xikꞌahsaj je acꞌun reꞌreꞌ pan kꞌab i raja̱w chi suk chic ricꞌux.
Reꞌ Jesus nkꞌoric woꞌ chic
chiri̱j riquimic
(Mt. 17.22-23; 18.1-5; Mr. 9.30-37)
43 Chiri̱j chic ricowsjic acꞌun reꞌ, reꞌ take tinamit sahchic quicꞌux jeꞌ wili xquikꞌor pan quicꞌux:
«Kꞌe̱ꞌ woꞌ chic nimal rajawric i Dios, nqui take.
Jeꞌ aj reꞌ chi cu xa nsahchic chic quicꞌux i tinamit, reꞌ Jesus jeꞌ wili xikꞌor queh nahsil raj tahkanel:
44 «Til maꞌ niqꞌuic pan acꞌux tak i kꞌoric nquikꞌor i tinamit chiri̱j i rajawric i Dios maj naponok i kꞌi̱j chi reꞌ hin Acꞌunbe̱s reꞌ wilic wajawric chi quina̱ cꞌacharel nanikꞌahsjic pan quikꞌab take cꞌacharel reꞌ naquicansanic wi̱n, reꞌ Dios naricꞌuhtam rajawric chi wucsjic cho chi quixilac camnak, nqui queh.
45 Reꞌ take cablaj chi nahsil raj tahkanel maꞌ xquirak ta chiri̱j chaj waꞌric naxikꞌor i Jesus chi jeꞌ reꞌ maj poylic wach quinoꞌjbal chi rirakmajic chiri̱j reꞌreꞌ. Maꞌ xquibiraj ta woꞌ reh Jesus chaj bih ra̱j rikꞌorom ruꞌum chi quiyoꞌjic chiwach.
Reꞌ xa chꞌublic ti wach ricꞌux reꞌreꞌ naricahnic chi nahsil aj cꞌamol be̱h
(Mt. 18.1-5; Mr. 9.33-37)
46 Ar aj ruꞌ chi maꞌ xquirak ta chiri̱j take kꞌoric xikꞌor i Jesus, wilic take nahsil raj tahkanel pꞌuht quichokonem qui̱b chiri̱j hab wach queh naricahnic chi pe̱t aj toꞌo̱l reh Jesus nachitokꞌa̱ꞌ kꞌatoj kꞌoric. 47 Jeꞌ reꞌ nok naxinaꞌbej chi jeꞌ reꞌ wilic pan quicapew-bal reꞌ Jesus xicꞌam cho jenaj tꞌuch acꞌun, xipahba̱ꞌ cok ru̱cꞌ 48 eh jeꞌ wili xikꞌor queh:
«Reꞌ waj tahkanel nanitakꞌa̱b je chi nijelow-bal curman chi naribanam chi xa chꞌublic ti wach rinoꞌjbal jeꞌ ricab rinoꞌjbal i tꞌuch acꞌun wili. Ruꞌum aj reꞌ xa hab wach nariniminic reh rikꞌorbal i nanitakꞌa̱b je chi nijelow-bal, reꞌ woꞌ nikꞌorbal i hin cꞌahchiꞌ rinimem jeꞌ ricab woꞌ cꞌahchiꞌ ricꞌuluric yuꞌna chi reꞌ rinimej nikꞌorbal i hin, reꞌ woꞌ rikꞌorbal xtakꞌanic cho wi̱n cꞌahchiꞌ rinimem. Jeꞌ reꞌ kꞌuruꞌ reꞌ til kꞌe̱ꞌ woꞌ chic chꞌublic wach rinoꞌjbal, reꞌreꞌ naricahnic chi pe̱t aj toꞌo̱l wi̱n, nqui queh.
Reꞌ ripitiric i jenaj winak chi
resmejic lok take maꞌ tob laj uxlabal
(Mr. 9.38-40)
49 Chiri̱j wili, reꞌ Wa̱n jeꞌ wili xikꞌor reh Jesus:
«Ha̱w kaj tijinel, reꞌ hoj xkilow chi jenaj winak cꞌahchiꞌ resam lok take maꞌ tob laj uxlabal chi cꞌahchiꞌ rikꞌorom chi reꞌ hat xatyeꞌbic rajawric. Reꞌ hoj xkapit chi ribanaric reꞌreꞌ maj maꞌ reꞌ ta chi kaxilac wilic, nqui take reh.
50 Reꞌ Jesus jeꞌ wili xikꞌor:
«Maꞌxta, ma̱pit tak chi ribanaric reꞌreꞌ maj reꞌ cꞌacharel wi maꞌ yojo̱l nok wilic, ra̱j rikꞌorom chi katoꞌoric cꞌahchiꞌ ribanam, nqui Jesus.
Reꞌ Jesus xikꞌil i Jaco̱wo chꞌi̱l i
Wa̱n ruꞌum reh pahkanic xcaꞌn
51 Nok reꞌ Jesus cꞌahchiꞌ chic riponic rikꞌijil chi naricꞌuluric woꞌ chic cho pan taxa̱j, xichop je ribe̱h ar Jerusalen chi xa jenaj wach ricꞌux. 52 Jeꞌ reꞌ nok pan jenaj kꞌi̱j jeꞌ wili xikꞌor queh juꞌjun raj tzꞌeꞌ wa̱ch:
«Hiy tak, cꞌahchiꞌ ok abe̱h tak je, nqui queh.
Jeꞌ reꞌ nok xiꞌo̱j woꞌ take aj tzꞌeꞌ wa̱ch reꞌreꞌ eh xiꞌoquic cok chi sicꞌoj ripatal i Jesus pan jenaj tꞌuch yeꞌa̱b ar pan quiyukꞌul aj Sama̱rya. 53 Chiri̱j chic ruꞌ, reꞌ Jesus xichop je ribe̱h chipam tꞌuch yeꞌa̱b reꞌreꞌ, xa reꞌ laꞌ naxponic ar maꞌ xyeꞌeric ta kꞌab reh chi nariwihꞌic ar ruꞌum xquilow chi ojic riban ar Jerusalen. 54 Ar ajic naxquilow chi jeꞌ reꞌ take quib chi nahsil aj tahkanel, reꞌ Jaco̱wo chꞌi̱l i Wa̱n, jeꞌ wili xquikꞌor reh Jesus:
«Ha̱w, nawa̱j chi enkasach quiwach take tinamit wili ru̱cꞌ ripahkaljic johtok kꞌa̱kꞌ pan taxa̱j jeꞌ ricab xiban i Eli̱yas najtir cho kꞌi̱j reh? nqui take reh.
55 Reꞌ Jesus xitzꞌehtaj je take eh jeꞌ wili quikꞌiliric xiban:
«Reꞌ hat-tak xa cu jaꞌ narak ta woꞌ tak chiri̱j chi reꞌ nicapew-bal hin toco̱m woꞌ chiwach acapew-bal hat-tak. 56 Jeꞌ reꞌ nikꞌor aweh tak maj reꞌ hin Acꞌunbe̱s reꞌ wilic wajawric chi quina̱ cꞌacharel maꞌ xinchalic ta chi risacharic quiwach i tinamit, xinchalic laꞌ chi quicoꞌljic chiwach i tiꞌcꞌaxic, nqui queh.
Chiri̱j wili xiꞌo̱j woꞌ chic chi sicꞌoj patal pan toco̱m chic yeꞌa̱b.
Wilic take winak xca̱j nak
quitahkem i Jesus
(Mt. 8.18-22)
57 Nok cꞌahchiꞌ cojic chi sicꞌoj patal, wilic take winak xquirak je pan be̱h. Jenaj queh take winak reꞌreꞌ jeꞌ wili xikꞌor reh Jesus:
«Ajabe̱s, reꞌ hin nwa̱j nibanam chi hin awaj tahkanel. Naca̱t nitahkem kꞌuruꞌ xa paꞌ eto̱j, nqui reh.
58 Reꞌ Jesus jeꞌ wili ricꞌuꞌljic xiban:
«Tare̱t, quinatahkej. Xa reꞌ laꞌ reꞌ hin Acꞌunbe̱s reꞌ wilic wajawric chi quina̱ cꞌacharel maꞌxta jenoꞌ niyeꞌa̱b haj ta nak nanihiꞌlic wi̱ꞌ chi eli̱c, maꞌ jeꞌ ta nicab take ya̱c xa paꞌ wilic quiju̱l on jeꞌ ricab take cucꞌ tzꞌiquin chi xa paꞌ wilic quike̱s, nqui cꞌuꞌlunic xiban Jesus.
59 Chiri̱j chic ruꞌ jenaj chic queh winak reꞌreꞌ xyukꞌunjic ruꞌum Jesus eh jeꞌ wili xkꞌormojic reh:
«Quinatahkej i hat, nqui xkꞌormojic reh.
Raj laꞌ i winak reꞌreꞌ jeꞌ wili xikꞌor reh Jesus:
«Ajabe̱s, chayew pe kꞌab wi̱n chi cu pe̱t nanimukꞌa̱b cahnok i waja̱w. Cu reꞌ aj ruꞌ naca̱t nitahkem xa paꞌ eto̱j, nqui reh Jesus.
60 Reꞌ Jesus jeꞌ wili xikꞌor reh:
«Reꞌ hat ma̱ban aweh ncaꞌn take tinamit maj reꞌ take reꞌ nanquimukꞌa̱ꞌ je quicamnak maꞌ nquikꞌor ta ribiral i rajawric i Dios queh take cahnel chic cahnok. Jeꞌ reꞌ ncaꞌn ruꞌum nok jeꞌ woꞌ camnak take ru̱cꞌ quinoꞌjbal. Reꞌ aj hat hiy chi rikꞌormojic i ribiral chi reꞌ Dios reꞌ nkꞌatbic kꞌoric ra̱j richopom quina̱ take cꞌacharel, nqui Jesus.
61 Chiri̱j wili jenaj woꞌ chic queh winak jeꞌ wili xikꞌor reh Jesus:
«Ha̱w, reꞌ hin til nwa̱j ojic chawi̱j xa reꞌ laꞌ chayew pe kꞌab wi̱n chi pe̱t nawojic cho pan pa̱t chi rikꞌororic wi̱b queh hab wach wi̱n, nqui reh.
62 Reꞌ Jesus jeꞌ wili xikꞌor reh:
«Jeꞌ ricab jenoꞌ aj camanom maꞌ reꞌ ta risurcahil ritic cꞌahchiꞌ rilom cok nok cꞌahchiꞌ ricꞌotom je pan racꞌa̱l, maꞌ reꞌ ta holohic laj aj camanom, jeꞌ woꞌ reꞌ jenoꞌ aj cꞌuhbalanel wi maꞌ china̱ ricamaj chi cꞌuhbalanic wilic ricapew-bal, reꞌreꞌ maꞌ ricꞌul ta chi erikꞌor queh tinamit i ribiral chi reꞌ Dios reꞌ nkꞌatbic kꞌoric ra̱j richopom quina̱ take cꞌacharel, nqui Jesus.