16
Reꞌ ribiral ructic cho i Jesus
chi quixilac camnak
(Mt. 28.1-10; Lc. 24.1-12; Jn. 20.1-10)
1 Xa reꞌ woꞌ ti xponic waki̱b o̱ra reh xikꞌek reꞌ ncuxꞌic wi̱ꞌ i hiꞌlbal kꞌi̱j, reꞌ Mari̱ya aj Majta̱la, chꞌi̱l Salomeh eh chꞌi̱l woꞌ Mari̱ya reꞌ ritu̱t Jaco̱wo reꞌ ricab richa̱kꞌ i Jesus, xiꞌo̱j chi rilokꞌoric jenaj ncꞌohnic laj ikꞌo̱m buchꞌbal ritiꞌjolal i Jesus.
2 Naxsakꞌic lok reh Tomincuꞌ kꞌi̱j reꞌ pe̱t kꞌi̱j reh xama̱na chi keh hoj ra̱ꞌ riꞌsil cho maꞌ Israhel, xa cu suksuk woꞌ ti relic cho i kꞌi̱j reꞌ take xib chi ixok reꞌreꞌ xquicꞌam je ncꞌohnic laj ikꞌo̱m eh xiꞌo̱j cu reꞌ muklic cho wi̱ꞌ i Jesus.
3 Nok behic chic ncaꞌn je, xiꞌoquic chi ribirmijic chi quiwach chi hab woꞌ wach naritoꞌbonic queh chi ricꞌuyuꞌsjic lok i maꞌ laj abaj ntzꞌapbic chi̱ꞌ i mukꞌunbal,
4 xa reꞌ laꞌ naxiꞌo̱j cꞌolok ar, xquilow chi reꞌ maꞌ laj abaj reꞌreꞌ cꞌuyuꞌsumaj chic lok.
5 Chi tehlic chic chi̱ꞌ i mukꞌunbal, xiꞌoquic cok chipam eh nok wilque̱b chic cok ar xquilow wach jenaj qꞌuijol reꞌ tzꞌuklic cho chi ricorquil je pan quisecꞌa̱j take ixok reꞌreꞌ. Reꞌ risoꞌ i qꞌuijol wili xa nim chic ro̱k eh xa nrepretic chic risakil. Reꞌ take ixok reꞌreꞌ yohbal wach naxiyoꞌjic ruꞌum.
6 Ar aj ruꞌ, reꞌ raj tzꞌeꞌ wa̱ch i Dios jeꞌ wili xikꞌor queh take ixok reꞌreꞌ:
«Maꞌ tiyoꞌjic tak ruꞌum chi wilqui̱n ayuꞌ. Reꞌ hat-tak xatcꞌulic nak tak lok ayuꞌ chi risiqꞌuiric i Jesus reꞌ ribihnej chi aj Nasaret, majeꞌ? Coric, reꞌreꞌ xcansjic wach curu̱s xa reꞌ laꞌ maꞌxta chic ayuꞌ ruꞌum nok xuctic chic chi quixilac take camnak. Quim tak kꞌuruꞌ, toque̱n tak cho pa rimukꞌunbal eh chawilow tak chi maꞌxta chic ayuꞌ.
7 Yuꞌna chi xawilow tak chic chi coric reꞌ xnikꞌor aweh tak, hiy chaloqꞌuej awi̱b tak chi ojic cu̱cꞌ take awich aj tahkanel tak eh chakꞌor tak queh chi reꞌ Jesus xuctic chic chi quixilac take camnak. Jeꞌ woꞌ, chakꞌor tak queh chi nachimol ri̱b awu̱cꞌ tak ar pa riyukꞌul i Calile̱ya, reꞌreꞌ pe̱t narojic chawach tak eh ar na̱rakam awi̱b tak richꞌi̱l jeꞌ ricab woꞌ rikꞌorom cho aweh tak nok jaꞌ ncansjic ta nak. Chiꞌnchel i wili curman chi til narehtꞌalim woꞌ i Luch. Jeꞌ reꞌ nok til chakꞌor woꞌ tak reh ruꞌ, nqui queh.
8 Chi jeꞌ reꞌ ajic reꞌ take ixok reꞌreꞌ xiꞌo̱j cajim chi rikꞌormojic i nicꞌ paꞌ nimal xkꞌormojic je queh. Reꞌ take reꞌ chi xa yoꞌjic chic wilque̱b naxiꞌelic cho chipam i mukꞌunbal eh ruꞌum reꞌreꞌ nok ojic ncaꞌn, maꞌ hab ta wach aj eh jeꞌ ru̱cꞌ xquicꞌul je wach be̱h, xquikꞌor reꞌ xquibiraj eh xquilow cho pan mukꞌunbal reꞌreꞌ.
Reꞌ take raj tahkanel i Jesus
maꞌ xquicoj ta wach ructic
(Mt. 28.9-10; Jn. 20.11-23; Lc. 24.13-35)
9 Nok uctunak aj chic cho Jesus chi quixilac take camnak chipam i Tomincuꞌ kꞌi̱j, reꞌ Mari̱ya aj Majta̱la, reꞌreꞌ i pe̱t be̱h chi rilmijic wach i Jesus naxicꞌuhtaj ri̱b reh cu wahkꞌek ti. Reꞌ Mari̱ya wili ru̱cꞌ aj woꞌ reꞌ xesmejic lok ruꞌum i Jesus take wuku̱b chi maꞌ tob laj uxlabal reꞌ nchoponic nak na̱ ricꞌacharic.
10 Jeꞌ reꞌ ajic nok rilom chic wach i Jesus, xo̱j cu̱cꞌ take aj tahkanel tzoklic quiwach pan jenaj yeꞌa̱b reꞌ okꞌic nak ncaꞌn wi̱ꞌ ruꞌum ritiꞌquilal quicꞌux chiri̱j riquimic i Jesus eh ar xikꞌor queh chi reꞌ Jesus cꞌachlic woꞌ chic,
11 xa reꞌ laꞌ naxikꞌor i Mari̱ya chi reꞌ Jesus cꞌachlic woꞌ chic eh chi til xilow wach ruꞌ, reꞌ take reꞌ maꞌ xquicoj ta wach reh.
12 Chi jeꞌ aj woꞌ reꞌ, reꞌ Jesus xicꞌuhtaj woꞌ chic ri̱b chi quiwach take qui̱b chic chi raj tahkanel ojic ncaꞌn pan quipa̱t ar chiri̱j lok i tinamit Jerusalen, xa reꞌ laꞌ, ruꞌum chi toco̱m chic riwi̱ꞌ rilbal naxicꞌuhtaj ri̱b, maꞌ xquinaꞌbej ta wach chi reꞌ poꞌ nchel i Jesus xicꞌuhtaj ri̱b queh.
13 Naxquirak chiri̱j chi reꞌ poꞌ nchel i Jesus xquilow wach, reꞌ take reꞌ xisoljic woꞌ chic je ar Jerusalen chi rikꞌormojic queh quichꞌi̱l chi xquilow wach i Jesus chi cꞌachlic woꞌ chic, xa reꞌ laꞌ ruꞌ reꞌ take reꞌ xa ta woꞌ nak chi jeꞌ reꞌ xquicoj wach chi xcꞌacharic woꞌ chic cho.
14 Chiri̱j aj chic chiꞌnchel reꞌreꞌ, reꞌ Jesus ruhmumaj chic cok chi quiwach take junlaj chi raj tahkanel nok tzokolque̱b chi wiꞌc ncaꞌn. Ar aj ruꞌ reꞌreꞌ xinak take ruꞌum reh ricowil quicꞌux reꞌ xbanic queh chi maꞌ xquicoj ta wach chaj bih xkꞌormojic queh. Jeꞌ reꞌ xiban maj naxkꞌormojic queh cuꞌum take xiꞌilbic reh chi cꞌachlic chic naxuctic cho chi quixilac camnak, maꞌxta bih xquicoj wach.
Reꞌ takꞌanic xiyew cahnok i Jesus
chi quina̱ take raj tahkanel
(Mt. 28.16-20; Lc. 24.36-53; Jn. 20.19-23; Hch. 1.6-8)
15 Nok ojic chic johtok reh Jesus pan taxa̱j, jeꞌ wili xikꞌor queh take junlaj chi raj tahkanel:
«Reꞌ hin tinitakꞌa̱ꞌ tak chi nawojic tak cu̱cꞌ chiꞌnchel tinamit chi junsut wach acꞌal eh chakꞌor tak queh i niCꞌuhbal reꞌ nyeꞌbic sukquil cꞌuxlis, reh chi enquicoj wach.
16 «Til nikꞌor aweh tak chi xa hab paꞌ wach ericoj wach niCꞌuhbal, reꞌreꞌ naricoꞌljic ruꞌum i Dios chiwach i take tiꞌcꞌaxic nariyeꞌeric chi quina̱ take aj mahc. Reꞌ naricojbic wach niCꞌuhbal, chatakꞌa̱ꞌ woꞌ tak reh chi kahsjok riha̱ꞌ, tzꞌa̱b ruꞌ hab paꞌ wach maꞌ eta ricoj wach niCꞌuhbal, reꞌreꞌ narichꞌukuric kꞌoric china̱ ruꞌum i Dios chi naricꞌulum tiꞌcꞌaxic, nqui queh.
17 Jeꞌ woꞌ, xikꞌor woꞌ queh chi jeꞌ wili:
«Reꞌ take quicojbic wach niCꞌuhbal jeꞌ wili take lokꞌ laj nawa̱l nacaꞌnam: Ru̱cꞌ rinimal wach wajawric naniyeb queh, reꞌ take reꞌ naquesam take lok maꞌ tob laj uxlabal nchopbic na̱ quicꞌacharic take cꞌacharel. Jeꞌ woꞌ, naquicholic woꞌ kꞌoric pan toco̱m chic kꞌoric.
18 Wi jenoꞌ a̱kꞌ jeꞌ ru̱cꞌ kꞌe̱ꞌ woꞌ chic riqui̱ chi cansanic, eritiw take on wi xyeꞌeric queh chi ucꞌjic jenoꞌ ikꞌo̱m ncansanic, reꞌ take reꞌ maꞌxta woꞌ wi̱ꞌ naroquic queh. Maꞌ xa reꞌ ta reꞌ, jeꞌ laꞌ woꞌ nacaꞌn quiti̱j chiri̱j jenoꞌ yowa̱b, ewoꞌ nelic lok riyaꞌbilal i cꞌacharel reꞌreꞌ naquicoj i quikꞌab china̱, nqui queh.
19 Nok kꞌoro̱j chic chiꞌnchel reꞌreꞌ queh take raj tahkanel i Jesus, cu reꞌ aj ruꞌ reꞌ Dios xiban chi reꞌ Jesus xcꞌamaric johtok pan taxa̱j reꞌ xyeꞌeric wi̱ꞌ reh jenaj rinimal rilokꞌil ruꞌum i Dios jeꞌ ricab rilokꞌil ricꞌul jenoꞌ cꞌacharel nanyeꞌeric reh chi ntzꞌuhkic cok pa nisecꞌa̱j jenoꞌ kꞌatal kꞌoric.
20 Chiri̱j chic reꞌ xponic woꞌ kꞌi̱j chi reꞌ take raj tahkanel i Jesus xiꞌelic je chipam tinamit Jerusalen eh xiꞌo̱j woꞌ chi cꞌuhbalanic xa haj yu̱kꞌ qꞌuixca̱b. Jeꞌ reꞌ ncaꞌn chi cꞌahchiꞌ quitobjic ruꞌum i Ajabe̱s Jesus chi ribanaric take rehreh wach i lokꞌ laj nawa̱l reꞌ ncamanic chi cꞌuhtbal chi quiwach take cꞌacharel chi reꞌ take raj tahkanel i Jesus, reꞌ woꞌ i coric laj cꞌuhbal cꞌahchiꞌ quikꞌorom ribiral.
Reꞌ wili ribiral ncohlsjic wi̱ꞌ wach i hu̱j wili.