24
Reꞌ take rehtalil narilmijic
nacuxꞌok i wach acꞌal
(Mr. 13.1-2; Lc. 21.5-6)
Nok cꞌahchiꞌ chic relic je Jesus chipam i pa̱t reꞌ nlokꞌonjic wi̱ꞌ wach i Dios reꞌ hoj raj tahkanel xkajil cok ki̱b ru̱cꞌ eh jeꞌ wili xkakꞌor reh:
«Ha̱w, chawilow ti! Kꞌe̱ꞌ woꞌ chic holonquilal ritikꞌinjic bano̱j i pa̱t wili, kojqui reh.
Chalic i Jesus jeꞌ wili cꞌuꞌlunic xiban keh:
«Kꞌe̱ꞌ nak ruꞌ holonquilal ncꞌutunic, xa reꞌ laꞌ nikꞌor aweh tak chi reꞌ pa̱t wili til narisacharic wach chi junpech chi maꞌ jenoꞌ chic abaj naricahnic chi tuslic wach, nqui xikꞌor keh.
Chiri̱j i wili, nok wilco̱j chic ponok chipam i yeꞌa̱b reꞌ ribihnej “Yeꞌa̱b queh take tic Oli̱wo ribihnal”, reꞌ hoj raj tahkanel naxkilow chi xa rutquel chic tzꞌuklic i Jesus, xkajil cok ki̱b ru̱cꞌ eh xkabiraj reh chi jeꞌ wili:
«Ajabe̱s, chacuy chakꞌor keh jaruj naricꞌuluric nicꞌ nimal xakꞌor keh chiri̱j i kꞌi̱j natisoljok cho ricaꞌpech eh jeꞌ woꞌ nicꞌ wach nacuxꞌok wach chiꞌnchel ayuꞌ. Chakꞌor woꞌ keh, haj wilic take rehtalil nariwihꞌic chi pe̱t chi cꞌuhtbal reh chi qꞌuisi̱n chic maꞌ nponic i kꞌi̱j reꞌreꞌ? kojqui reh.
Reꞌ Jesus jeꞌ wili kacꞌuꞌljic xiban:
«Xa naꞌlic ok woꞌ aweh tak reh chi maꞌ hab ta wach enjotꞌbic aweh tak. Jeꞌ reꞌ nikꞌor, maj yohbal wach take tinamit naquijotꞌoric cuꞌum take riqꞌuihal aj jotꞌo̱l nacuctic cho reꞌ nacaꞌnam qui̱b chi xa jeꞌ chic reꞌ hin take eh jeꞌ wili naquikꞌorom:
‹Reꞌ hin, i hin Pahbamaj chi Kꞌatal Kꞌoric, nqui naquikꞌorom.
«Reꞌ hat-tak na̱biram woꞌ tak ribiral chi wilic take tinamit cꞌahchiꞌque̱b chi kꞌakꞌanic chi quiwach on chi nacoquic chi kꞌakꞌanic. Nachabiraj tak reꞌreꞌ, maꞌ riban ti naho̱l awach tak chi ricapewjic chi xponic chic ricuxꞌic wach chiꞌnchel. Coric, reꞌ rikꞌijil sachbal wach chiꞌnchel nariponic wach xa reꞌ laꞌ maꞌ jaꞌ yuꞌna ta ti maj curman chi pe̱t naricꞌuluric lok chiꞌnchel nanikꞌorom take wili: Reꞌ take nimak chi cucꞌtak tinamit xa naquicꞌuꞌlem chic qui̱b chi kꞌakꞌanic chi quiwach. Jeꞌ woꞌ xa haj chic yeꞌa̱b, nariwihꞌic rehreh wach yaꞌbilal, nariwihꞌic wiꞌjalel eh naribanam woꞌ take cow laj hihc. Nacꞌulurok take reꞌreꞌ chacoj tak rehtal chi xa cu reꞌ pe ti pꞌuhtbal reh i cꞌaxquilal cꞌahchiꞌ richalic china̱ acꞌal wili. Chi jeꞌ aj reꞌ, kꞌe̱ꞌ woꞌ chic qꞌuihal take cꞌacharel naquixowonic awach tak ruꞌum chi reꞌ hin quinanimej tak. Jeꞌ reꞌ nikꞌor maj reꞌ take reꞌ naca̱t tak quikꞌahsam pan quikꞌab take aj cꞌamol quibe̱h take tinamit reh chi nacaꞌnam tiꞌcꞌaxic aweh tak cu rehtal wilic aweh tak naquicansjic.
10 «Chiwach aj take rikꞌijil i tiꞌcꞌaxic reꞌreꞌ, qꞌuihal queh take awich aj niminel tak nariyojic quicꞌux chiwi̱j. Chi quixilac take jeꞌ reꞌ nacaꞌnam, wilic take cꞌul naquixowem qui̱b eh wilic woꞌ cꞌul naquikꞌahsam qui̱b pan quikꞌab aj ixowonel. 11 Jeꞌ woꞌ chi quixilac take reꞌ, qꞌuihal take nacuctic chi xa chucul aj kꞌorol riCꞌuhbal i Dios take eh yohbal wach take cꞌacharel naquijotꞌom ru̱cꞌ i cꞌuhtunic nacaꞌnam. 12 Chi jeꞌ aj reꞌ, ruꞌum chi chaxilac hat-tak aj niminel wi̱n naquiqꞌuihbic take aj banol reh cꞌahbilal, qꞌuihal woꞌ aweh hat-tak narichuhpic wach i cꞌaxoj i̱b cu̱cꞌ. 13 Til nikꞌor kꞌuruꞌ, tiwi̱ꞌ tak chi xa naꞌlic ok woꞌ aweh tak maj xa reꞌ woꞌ i cꞌacharel reꞌ cu chꞌiclic ricꞌux chiwi̱j hin naponok wach ricuxꞌic take kꞌijil reꞌreꞌ, xa reꞌ woꞌ reꞌ naricoꞌlem ri̱b.
14 «Jeꞌ woꞌ, chiwach take kꞌi̱j reꞌreꞌ, reꞌ holohic laj kꞌoric nikꞌor i hin chi reꞌ Dios narikꞌatbic kꞌoric chi quina̱ i tinamit, narojic lok rikꞌormojic chi junsut wach acꞌal wili reh chi naribirmijic cuꞌum chiꞌnchel cꞌacharel. Nok ojonak ok chic lok wach rikꞌormojic niCꞌuhbal, cu reꞌ aj ruꞌ naricꞌulic lok i ricuxꞌic wach chiꞌnchel. 15 Chi jeꞌ reꞌ ajic, reꞌ hat-tak reꞌ tilbic tak wach i hu̱j tzꞌihmbimaj cho ruꞌum aj kꞌorol riCꞌuhbal i Dios reꞌ Tanyel ribihnal, nachawilow tak chi chipam i pa̱t reꞌ nlokꞌonjic wi̱ꞌ wach i Dios, reꞌ yibel wach cꞌahbilal chi kawach hoj ra̱ꞌ riꞌsil cho maꞌ Israhel xbanaric chic cuꞌum take sachol wach i tinamit wili, charak tak chiri̱j chi reꞌreꞌ i rehtalil chi xponic chic i orahil chi nawelic tak je chipam i tinamit wili. 16 Nachawilow tak reꞌreꞌ kꞌuruꞌ, reꞌ hat-tak reꞌ wilca̱t tak chi junsut riyukꞌul Jure̱ya hiy tak pan tak qꞌuiche̱ꞌ chi ricꞌoloric awi̱b tak ar. 17 Jeꞌ ricab wi wilic ok nchel jenoꞌ aweh tak rij ripa̱t wilic lok, maꞌ noquic chic cok chi ricꞌamaric paꞌ bih aweh tak. 18 On wi pan awabi̱x ok wilca̱t tak cho maꞌ tisoljic woꞌ tak chic cho pan apa̱t tak chi ricꞌamaric jenoꞌ ajalba̱l tak.
19 «Ruꞌum chi kꞌe̱ꞌ cꞌaxquilal wach i elic naribanjic chiwach take kꞌi̱j reꞌreꞌ, kꞌe̱ꞌ niquetelej quiwach take yowa̱b ixok chꞌi̱l take tutbe̱s cu wilic quicucꞌta̱k. 20 Ruꞌum aj reꞌ, til nikꞌor aweh tak chi chaꞌn tak ati̱j reh chi maꞌ ok chipam rikꞌijil i kꞌelej encꞌuluric reh chi suk elic enaꞌn tak je, on chi maꞌ woꞌ chipam jenoꞌ hiꞌlbal kꞌi̱j reh chi maꞌ eta narak tak acꞌaxquilal ru̱cꞌ rikꞌor i Cꞌuhbal Yeꞌo̱j reh Moyses. 21 Nipahkaj aweh tak chi chaꞌn ati̱j tak maj reꞌ tiꞌcꞌaxic reꞌreꞌ til woꞌ chic cow wach naribanam chiwach take chiꞌnchel tiꞌcꞌaxic cꞌulu̱j cho cu richꞌihquic cho chiꞌnchel wach acꞌal cu rehtal nponic rikꞌijil i tiꞌcꞌaxic reꞌreꞌ. Til woꞌ chic maꞌ ilo̱j ta wach i tiꞌcꞌaxic naricꞌuluric reꞌreꞌ eh maꞌ woꞌ narilmijic chic johtok wach chiri̱j take kꞌi̱j nacꞌulurok lok reꞌreꞌ. 22 Kꞌe̱ꞌ woꞌ chic tiꞌquilal naricꞌuluric chi reꞌ Dios naritokom wach rinimal ro̱k rikꞌijil tiꞌcꞌaxic reꞌreꞌ awuꞌum aweh hat-tak reꞌ xatrichih tak chi naca̱t tak ricoꞌlem chiwach i tiꞌcꞌaxic reꞌreꞌ. Maꞌ ta jeꞌ reꞌ eriban, maꞌ hab ta woꞌ nak wach ericoꞌlej ri̱b chiwach.
23 «Chiwach rikꞌijil i tiꞌcꞌaxic reꞌreꞌ, qꞌuihal take cꞌacharel nacoquic chi jotꞌo̱j. Chi quixilac take reꞌ, wilic take naquikꞌorom chi jeꞌ wili:
‹Quim tak, chawilow tak: Ayuꞌ wilic on wuluꞌ wilic i Pahbamaj chi Kꞌatal Kꞌoric, nqui naquikꞌorom.
«Nachabiraj tak chi jeꞌ reꞌ ma̱coj tak wach 24 maj jeꞌ ricab chi yohbal wach take jotꞌo̱l nacuctic cho chi cꞌahchiꞌ quikꞌorom qui̱b chi reꞌ take reꞌ i Pahbamaj chi Kꞌatal Kꞌoric, yohbal woꞌ wach take jotꞌo̱l nacuctic cho chi naquikꞌorom qui̱b chi aj kꞌorol riCꞌuhbal i Dios take. Kꞌe̱ꞌ woꞌ chic naquijotꞌom take cꞌacharel ru̱cꞌ take kꞌoric nacaꞌnam eh ru̱cꞌ take riqꞌuihal nimak tak wach lokꞌ laj nawa̱l nacaꞌnam, naquiniqꞌuem woꞌ quikꞌi̱j chi quijotꞌoric take richiho̱j i Dios chi naquicoꞌljic. 25 Jeꞌ reꞌ kꞌuruꞌ maꞌ riwi̱ꞌ ta chic chi etijotꞌoric tak maj reꞌ hin pe̱t cꞌahchiꞌ nikꞌorom aweh tak chiꞌnchel reꞌreꞌ chi jaꞌ ncꞌuluric ta. 26 Chi jeꞌ reꞌ ajic ma̱tahkej tak je take jeꞌ wili enquikꞌor aweh tak:
‹Reꞌ Pahbamaj chi Kꞌatal Kꞌoric, ar wilic cho pan chik yu̱kꞌ, tak-tak kilow tak cho kꞌuruꞌ, nqui enquikꞌor.
«Jeꞌ woꞌ ma̱coj tak wach quikꞌorbal take jeꞌ wili enquikꞌor aweh tak:
‹Reꞌ Pahbamaj chi Kꞌatal Kꞌoric ar ricꞌolom cho ri̱b pan jenaj yeꞌa̱b, nqui enquikꞌor.
27 «Jeꞌ reꞌ nikꞌor maj jeꞌ ricab chi narirehpaj cho risakomil i cohok ar pan taxa̱j, cu nilmijic cho chi junsut wach acꞌal, jeꞌ woꞌ reꞌ naricꞌuluric naquinsoljok cho hin Acꞌunbe̱s reꞌ wilic wajawric chi quina̱ cꞌacharel 28 na̱wehtꞌalim woꞌ tak haj wilqui̱n hin jeꞌ ricab nanehtꞌaljic chi haj paꞌ nquimol wi̱ꞌ qui̱b take cꞌuch, ar woꞌ wilic jenoꞌ camnak chicop.
Reꞌ take rehtalil naricꞌuhtunic
cho wi̱ꞌ risoljic i Jesus
(Mr. 13.24-37; Lc. 21.25-36; 17.25-36; 12.41-48)
29 «Chiri̱j chi iqꞌuinak chic nicꞌ nimal tiꞌcꞌaxic naricꞌuluric chipam take kꞌi̱j reꞌreꞌ, reꞌ take sakombal pan taxa̱j naripaꞌlajic quisakomil eh jeꞌ reꞌ naricꞌuluric maj reꞌ kꞌi̱j chꞌi̱l i poh maꞌxta chic quiyeb cho quisakomil. Jeꞌ woꞌ reꞌ take chꞌimi̱l, chi xa jeꞌ nak chic naquikꞌehbic cho wach acꞌal naꞌilmijok, maꞌxta woꞌ chic quisakomonic cho. 30 Cu chiri̱j aj chic reꞌreꞌ, reꞌ rehtalil cho nicꞌulic hin Acꞌunbe̱s reꞌ wilic wajawric chi quina̱ cꞌacharel naricꞌuhtunic woꞌ cho pan taxa̱j. Ruꞌum reh rehtalil reꞌreꞌ, kꞌe̱ꞌ riyotꞌquil cꞌuxlis naroquic cho cu̱cꞌ take tinamit maꞌxta quiniminic wi̱n ruꞌum chi naquirakam chiri̱j chi xincꞌulic lok chi richꞌukuric wach mahc. Jeꞌ reꞌ nikꞌor maj naquincꞌolok lok nah rinimal su̱tzꞌ i hin Acꞌunbe̱s reꞌ wilic wajawric chi quina̱ cꞌacharel, narilmijic wach rinimal risakomil nichꞌa̱b chꞌi̱l woꞌ i wajawric wilic.
31 «Nachirak aj cho nichalbal, reꞌ hin nanitakꞌa̱b take cho waj tzꞌeꞌ wa̱ch reh chi nacojic chi junsut yu̱kꞌ qꞌuixca̱b china̱ acꞌal wili chi rimoloric quiwach take cꞌacharel chiho̱j take quiwach wuꞌum, jeꞌ ricab nanmoloric quiwach take tinamit cuꞌum take aj su̱b nok xa cow chic quikꞌoꞌrjic je chi su̱b. 32 Ruꞌum aj chi jeꞌ reꞌ naricꞌuluric, reꞌ hat-tak chacoj tak rehtal take rehtalil cꞌuhtbal reh nichalic jeꞌ ricab naꞌn tak ru̱cꞌ i che̱ꞌ reꞌ I̱co ribihnal. Nanawilow tak chi ripꞌut cho toxlonic take acꞌ xak, nawehtꞌalij tak chi reꞌ sikꞌjil xiqꞌuic chic lok rikꞌijil eh chi reꞌ chic kꞌelej oquic cho reh. 33 Jeꞌ woꞌ reꞌ chaꞌn tak chi nachawilow tak chi cꞌahchiꞌ chic ricꞌulmujic take xnikꞌor lok aweh tak chi naricꞌulmujic, charak tak chiri̱j chi maꞌ naht ta chic wilic i kꞌi̱j chi nanichalic. 34 Til coric nikꞌor chi reꞌ xnikꞌor aweh tak naricꞌuluric nok cu jaꞌ ta ncuxꞌic rinimal ro̱k quicꞌacharic take cꞌacharel cꞌachalque̱b yuꞌna. 35 Jeꞌ reꞌ nikꞌor aweh tak maj chiꞌnchel reꞌ xnikꞌor lok i hin, til woꞌ naricꞌuluric maꞌxta nchel risahchic wach jeꞌ ricab naricꞌulum i taxa̱j richꞌi̱l i acꞌal. 36 Reꞌ cok ruꞌ to̱b ta nchel xnikꞌor lok haj wilic take rehtalil naricꞌutunic wi̱ꞌ nichalic, maꞌ hab ta chic wach xa reꞌ woꞌ Dios nehtꞌalanic reh rikꞌijil chꞌi̱l riꞌorahil chi naricꞌuluric reꞌreꞌ. Xa ta nak reꞌ take raj tzꞌeꞌ wa̱ch i wAja̱w wilque̱b ar pan taxa̱j, quehtꞌalim reꞌreꞌ. Ruꞌum aj chi xa reꞌ woꞌ Dios nehtꞌalanic reh reꞌreꞌ, 37 reꞌ hin nikꞌor aweh tak chi reꞌ take tinamit quicꞌacharic naquincꞌolok lok i hin Acꞌunbe̱s reꞌ wilic wajawric chi quina̱ cꞌacharel, naquicꞌulum queh jeꞌ ricab xquicꞌul cho take tinamit xicꞌacharic cho pa rikꞌijil cho ricꞌacharic i maꞌ Noheh. 38 Jeꞌ reꞌ nikꞌor maj pa rikꞌijil cho ricꞌacharic i Noheh naxchalic chi quina̱ tinamit i jenaj rinimal jab chꞌi̱l buht haꞌ xelic cho pan acꞌal, reꞌ take reꞌ xa suk chic quicꞌux quiꞌiqꞌuic kꞌi̱j pan tak ninkꞌi̱j on pan tak caxarahil eh maꞌ xquicoj ta soꞌ rehtal chi chalic reh jenaj tiꞌcꞌaxic chi quina̱. Jeꞌ aj reꞌ xcaꞌn cu rehtal xoquic i Noheh chꞌi̱l take raj pan pa̱t chipam i jenaj maꞌ laj cano̱wa jeꞌ riwi̱ꞌ pa̱t. 39 Cu reꞌ chic ruꞌ, ruꞌum chi maꞌ xquicoj ta rajawric reꞌ xkꞌormojic queh ruꞌum i Noheh chi narichalic jenaj rinimal jab, chiꞌnchel take cꞌacharel reꞌreꞌ xsahchic quiwach ruꞌum i buht haꞌ xelic cho pan acꞌal.
«Reꞌ hin nikꞌor woꞌ aweh tak chi naquincꞌolok lok i hin Acꞌunbe̱s reꞌ wilic wajawric chi quina̱ cꞌacharel, jeꞌ woꞌ wili naricꞌuluric: 40 Wi wilic quib ok chi winak camanic ncaꞌn ponok pan abixbal, jenaj queh naresmejic chiwach i tiꞌcꞌaxic eh reꞌ jenaj chic naricanabjic cahnok chipam. 41 Jeꞌ woꞌ reꞌ, wi wilic quib ok chi ixok queꞌc ncaꞌn, xa jenaj woꞌ queh naresmejic chiwach i tiꞌcꞌaxic eh reꞌ jenaj chic naricanabjic cahnok chipam.
42 «Ruꞌum aj chi wilic take naquicanabjic pan tiꞌcꞌaxic ruꞌum chi maꞌxta quicojom rajawric i xkꞌormojic queh, reꞌ hin nikꞌor aweh tak chacoj tak rajawric i kꞌoric xnikꞌor chic aweh tak wili chi xa icꞌlic ok woꞌ ana̱ tak chiri̱j nicꞌulic lok i hin ajabe̱s chana̱ tak. Jeꞌ reꞌ chaꞌn tak maj maꞌ awehtꞌalim ta tak jaruj nchel rirak cho kꞌi̱j reh nisoljic, 43 jeꞌ ricab xicꞌul i jenaj ajabe̱s reꞌ maꞌ xehtꞌalij ta i kꞌi̱j naxcꞌulic lok jenaj aj lekꞌ chi relkꞌjic pa̱m ripa̱t. Ar aj ruꞌ xoquic pa ripa̱t eh xelkꞌaj je chiꞌnchel paꞌ bih wilic reh. Wi ta nak reꞌ ajabe̱s reꞌreꞌ xehtꞌalij chaj bih kꞌijal naricꞌulic lok wi̱ꞌ aj lekꞌ reꞌreꞌ, til xichaꞌjej nak chi xa icꞌlic chic na̱ eh maꞌ xiyew ta nak chi xelkꞌjic pa̱m ripa̱t, majeꞌ? 44 Jeꞌ reꞌ ajic, ruꞌum chi reꞌ hin Acꞌunbe̱s reꞌ wilic wajawric chi quina̱ cꞌacharel nanicꞌulic lok nok maꞌ hab ta wach ncapewenic reh, reꞌ hat-tak xa icꞌlic ok woꞌ ana̱ tak.
45 «Chacapaj tak ri̱j i wili: Reꞌ jenoꞌ ajabe̱s nok ojic chic reh chi naht, maꞌ reꞌ ta na jenoꞌ raj camanom jeꞌ ru̱cꞌ wilic rinoꞌjbal eh jeꞌ ru̱cꞌ chꞌiquem cꞌuxlis naripahba̱b cahnok chi ricꞌamaric quibe̱h chiꞌnchel raj camanom wilque̱b pa ripa̱t, on chi riyeꞌeric quiwaꞌ quiha̱ꞌ pa riꞌorahil? Til pan coric reꞌ aj camanom reꞌ jeꞌ reꞌ rinoꞌjbal, reꞌreꞌ naricanabjic cahnok chi aj ilo̱l. 46 Kꞌe̱ꞌ je ato̱b reh aj camanom npahbabjic cahnok chi cꞌamol be̱h ruꞌum i ajabe̱s, wi reꞌ camanic kꞌoro̱j cahnok reh chi naribanam, reꞌ woꞌ reꞌ cꞌahchiꞌ rinimem i nacꞌolok rakmajok 47 maj til pan coric nikꞌor aweh tak chi reꞌ camanom reꞌreꞌ narijohsjic wach ricamaj ruꞌum ajabe̱s chi cꞌaxbal reh eh chi jeꞌ reꞌ naricojoric cahnok chi chopol na̱ chiꞌnchel paꞌ bih wilic reh i ajabe̱s reꞌreꞌ. 48 Ra̱j nchel, wi reꞌ cꞌahbil laj camanom reꞌreꞌ, maꞌ riban ta ricamaj chi coric ruꞌum ricapaj pa ra̱mna chi jaꞌ cꞌulic ta lok reh ajabe̱s 49 eh chi jeꞌ reꞌ enoquic chi quichꞌeyeric take rich camanom jeꞌ woꞌ enoquic chi ninkꞌijinic on chi xohcꞌric quichꞌi̱l take aj xohcꞌrel, 50 kꞌe̱ꞌ je tiꞌquil naricꞌulum aj camanom reꞌreꞌ. Jeꞌ reꞌ ajic nacꞌolok lok i ajabe̱s chipam i kꞌi̱j nok reꞌ aj camanom reꞌreꞌ maꞌ rehtꞌalim ta soꞌ, on chipam i juncꞌam nok maꞌ cꞌahchiꞌ ta ricapam soꞌ ricꞌulic lok i ajabe̱s, 51 naricꞌulic rakmajok chi jeꞌ reꞌ cꞌahchiꞌ ribanam. Jeꞌ aj reꞌ, reꞌ aj camanom reꞌreꞌ naricahnic chiwach i ajabe̱s chi xa jeꞌ chic ricab jenoꞌ queh take aj camanom jeꞌ ru̱cꞌ xa cu reꞌ ncaꞌn quiwach chi camanic nok wilic cok i ajabe̱s cu̱cꞌ. Ru̱cꞌ aj naribanaric reh aj camanom reꞌreꞌ, til narokꞌic eh narikirichꞌem nah re̱ ruꞌum rinimal tiꞌquil cꞌuxlis naroquic cho ru̱cꞌ.