10
Reꞌ Cꞌuhbal Yeꞌo̱j reh Moyses canamaj reh chi reꞌ cꞌacharel erichꞌica̱ꞌ ricꞌux chiri̱j i Jesus
Hat-tak was nicha̱kꞌ aj niminel reh Jesus, ruꞌum reh tiꞌcꞌaxic chalic reh chi quina̱ take wich ra̱ꞌ riꞌsil cho maꞌ Israhel ruꞌum reh quimahc, reꞌ hin kꞌe̱ꞌ nwa̱j chi reꞌ take jaꞌ quiꞌoquic ta chi rinimjic i Jesus eta nak quicoꞌljic chiwach i tiꞌcꞌaxic reꞌreꞌ eh reh chi encꞌuluric chi jeꞌ reꞌ, reꞌ hin kꞌe̱ꞌ suk wi̱n i pahkanic chiqui̱j naniban niti̱j chiwach i Dios ru̱cꞌ i capew-bal reꞌ nikꞌor wi̱ꞌ reh chi reꞌ take richiho̱j cho chi ritinami̱t chicoꞌlej woꞌ take. Jeꞌ reꞌ nikꞌor maj reꞌ wili ninaꞌbej chiqui̱j take cꞌacharel reꞌreꞌ: Chi reꞌ take reꞌ til nca̱j quinimem i Dios xa reꞌ laꞌ to̱b ta chiwach i Dios riwi̱ꞌ nak chi queh chi naquiniminic chiwach, maꞌ nquirak ta woꞌ chiri̱j reꞌreꞌ. Nikꞌor chi jeꞌ reꞌ maj reꞌ take reꞌ maꞌ quicojom ta rehtal chi coric chaj bih camanic xiban i Dios chiqui̱j reh chi naquicahnic chi coric chic wach quicꞌux. Chi queh ruꞌ reꞌ nbanic chi quicahnic chi coric wach quicꞌux reꞌ laꞌ rinimjic take cꞌuhbal nquicꞌuhtaj eh ruꞌum reꞌ maꞌ nca̱j ta quicꞌulum i chaj bih xiban i Dios chi ricorsjic wach quicꞌux. Ru̱cꞌ aj ncaꞌn take wich ra̱ꞌ riꞌsil cho maꞌ Israhel jeꞌ ru̱cꞌ jaꞌ quiꞌoquic ta chi rinimjic i Jesus, jaꞌ nquirak ta chiri̱j chaj bih riwi̱ꞌ naxyeꞌeric queh i Cꞌuhbal Yeꞌo̱j reh Moyses. Jeꞌ reꞌ nikꞌor maj reꞌ riwi̱ꞌ chi xyeꞌeric i cꞌuhbal reꞌreꞌ reh chi naquichꞌica̱b nak quicꞌux chiri̱j i Jesus reꞌ Pahbamaj chi Kꞌatal Kꞌoric. Chi jeꞌ aj reꞌ riwi̱ꞌ nok yeꞌo̱j cho i cꞌuhbal reꞌreꞌ, xa hab wach cꞌacharel reꞌ erichꞌica̱ꞌ ricꞌux chiri̱j i Jesus nyeꞌeric reh chi eriban chi coric chic wach ricꞌux.
Chi reꞌ Cꞌuhbal Yeꞌo̱j reh Moyses riban chi enwihꞌic chi coric wach ricꞌux jenoꞌ cꞌacharel ricꞌam na̱ i nicꞌ paꞌ nimal rikꞌor chipam, reꞌreꞌ xa nok woꞌ xikꞌor cho Moyses naxitzꞌihmbaj cho chi jeꞌ wili:
“Reꞌ cꞌacharel ncꞌambic na̱ i nicꞌ paꞌ nimal rikꞌor chipam i cꞌuhbal wili,
nariyeꞌeric reh chi encꞌacharic chi junelic, nqui xitzꞌihmbaj cho Moyses.
Reꞌ cok ruꞌ to̱b ta reꞌreꞌ xitzꞌihmbaj chi jeꞌ reꞌ, maꞌ jaruj ta riban chi coric chic wach ricꞌux i cꞌacharel ncꞌambic na̱ nicꞌ paꞌ nimal rikꞌor chipam i cꞌuhbal reꞌreꞌ ruꞌum nok chi maꞌ jenoꞌ nchol ricꞌamaric na̱ chi manlic i cꞌuhbal reꞌreꞌ. Haj cok wilic i til rikꞌor i cꞌuhbal reꞌreꞌ, reꞌ chi xa reꞌ wach i cꞌacharel reꞌ richꞌica̱ꞌ ricꞌux chiri̱j i Jesus ncahnic chi coric chic wach ricꞌux. Jeꞌ aj wili rikꞌor i cꞌuhbal reꞌreꞌ:
“Ma̱kꞌor tak chic pan acapew-bal tak, hab wach narojic johtok pan taxa̱j, nqui rikꞌor.
Jeꞌ aj reꞌ rikꞌor cuꞌum queh nquicapaj chi xa reꞌ wach wi reꞌ Jesus reꞌ Pahbamaj chi Kꞌatal Kꞌoric enchalic woꞌ chic cꞌacharok ayuꞌ wach acꞌal, cu reꞌ aj nak ruꞌ enquichꞌica̱ꞌ quicꞌux chiri̱j.
Jeꞌ woꞌ chic, reꞌ cꞌuhbal reꞌreꞌ jeꞌ wili rikꞌor:
“Ma̱kꞌor tak chic pan acapew-bal tak,
hab wach narojic jok chipam richamil jul quiyeꞌa̱b camnak, nqui rikꞌor.
Jeꞌ aj reꞌ rikꞌor cuꞌum queh nquicapaj chi xa reꞌ wach wi reꞌ Jesus reꞌ Pahbamaj chi Kꞌatal Kꞌoric enucsjic woꞌ chic cho chi quixilac take camnak, cu reꞌ aj nak ruꞌ enquichꞌica̱ꞌ quicꞌux chiri̱j.
Jeꞌ aj reꞌ maꞌ reꞌ ta quicapew-bal take cꞌacharel reꞌreꞌ ra̱j banaric, reꞌ laꞌ ra̱j banaric reꞌ woꞌ rikꞌor i cꞌuhbal kꞌoro̱j chiri̱j ruꞌ ruꞌum i Cꞌuhbal Yeꞌo̱j reh Moyses nok rikꞌor chi jeꞌ wili:
“Reꞌ hat-tak wilic chic awu̱cꞌ tak i kꞌoric kꞌoro̱j cho ruꞌum i Dios
reh chi ru̱cꞌ chiꞌnchel awa̱mna enacoj tak wach
eh jeꞌ woꞌ chi enayew akꞌorbal tak chiri̱j, nqui rikꞌor.
Reꞌ cꞌuhbal reꞌreꞌ, reꞌ aj reꞌ nkakꞌor i hoj reh chi reꞌ take cꞌacharel enquichꞌica̱ꞌ quicꞌux chiri̱j i Jesus. Reꞌ cꞌuhbal nkakꞌor reꞌreꞌ jeꞌ wili rikꞌor:
“Reh chi eticoꞌljic tak, chaꞌn tak i wili: Chacoj tak wach ru̱cꞌ chiꞌnchel awa̱mna tak chi reꞌ Jesus xuctic woꞌ chic cho chi quixilac take camnak. Chiri̱j chic wili chakꞌor tak queh chiꞌnchel cꞌacharel chi reꞌ Jesus reꞌreꞌ i pahbamaj chi pe̱t Ajabe̱s chi quina̱ chiꞌnchel, nqui rikꞌor.
10 Jeꞌ reꞌ nkakꞌor maj reh chi eriban chi coric ok chic wach ricꞌux jenoꞌ cꞌacharel eh reh chi ewoꞌ ncoꞌljic, curman chi naricojom wach ru̱cꞌ chiꞌnchel ra̱mna i cꞌuhbal chiri̱j i ructic cho i Jesus reꞌreꞌ eh jeꞌ woꞌ chi eriyew rikꞌorbal chiri̱j i Jesus.
Xa hab wach cꞌacharel ericꞌul
pa ra̱mna i cꞌuhbalanic nbanaric
chiri̱j i Jesus, naricoꞌljic
11 Chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios rikꞌor chi jeꞌ wili:
“Xa hab wach narichꞌica̱b ricꞌux chiri̱j ruꞌ
maꞌ jaruj ta narojic chi kꞌe̱b i riniminic, nqui rikꞌor.
12 Ruꞌum chi jeꞌ reꞌ rikꞌor, reꞌ hin nikꞌor i cꞌuhbal maꞌ xa ta queh take wich ra̱ꞌ riꞌsil cho maꞌ Israhel jeꞌ laꞌ woꞌ queh take maꞌ reꞌ ta ra̱ꞌ riꞌsil cho maꞌ Israhel. Jeꞌ reꞌ niban maj chiwach i Dios reꞌ take wich ra̱ꞌ riꞌsil cho maꞌ Israhel xa jenaj kawach quichꞌi̱l take junchꞌuk chic tinamit eh chi jeꞌ reꞌ, reꞌ hoj ra̱ꞌ riꞌsil cho maꞌ Israhel chꞌi̱l take junchꞌuk chic reꞌreꞌ xa jenaj woꞌ Ajabe̱s wilic chi kana̱. Reꞌ Ajabe̱s reꞌreꞌ til yohbal wach ricuseꞌsbal riyew cho chi kana̱ eh til ritoꞌbej woꞌ take nicꞌ paꞌ qꞌuihal cꞌacharel ncaꞌn johtok quiti̱j chiwach. 13 Ruꞌum aj woꞌ reꞌ jeꞌ wili rikꞌor chipam i Lokꞌ laj Hu̱j tzꞌihmbimaj wi̱ꞌ riCꞌuhbal i Dios:
“Xa hab wach jenoꞌ queh aj niminel reh i Lokꞌ laj Ajabe̱s eripahkaj reh pan ti̱j chi encoꞌljic,
xa reꞌ woꞌ reꞌ narirakam ricoꞌlbal, nqui rikꞌor.
14 Reꞌ cok ruꞌ to̱b ta jeꞌ reꞌ rikꞌor i Cꞌuhbal reꞌreꞌ, reꞌ cꞌacharel wi maꞌ richꞌica̱ꞌ ta ricꞌux chiri̱j i Jesus maꞌ eta woꞌ riban ripahkaljic ratoꞌbil i Dios. Jeꞌ woꞌ reꞌ, wi maꞌ ribiram ta ribiral i Jesus maꞌ eta woꞌ riban chi erichꞌica̱ꞌ ricꞌux chiri̱j, maj hab aj woꞌ wach enbirinic reh ribiral reꞌreꞌ wi maꞌ hab wach cꞌahchiꞌ rikꞌorbic queh? 15 On maꞌ eta woꞌ riban chi enkꞌormojic ribiral i Jesus wi maꞌxta jenoꞌ takꞌamaj cho ruꞌum i Dios chi rikꞌormojic i ribiral reꞌreꞌ. Jeꞌ aj reꞌ cuꞌum queh take takꞌamaj take cho chi aj kꞌoro̱l cꞌuhbal nchalic i sukquil cꞌuxlis chi quina̱ take cꞌacharel. Reꞌ Lokꞌ laj Hu̱j tzꞌihmbimaj wi̱ꞌ riCꞌuhbal i Dios jeꞌ wili rikꞌor chiri̱j reꞌreꞌ:
“Kꞌe̱ꞌ sukquil cꞌuxlis ricꞌam cho quicꞌulic take lok aj kꞌoro̱l
reꞌ quikꞌoric reh take holohic laj kꞌoric nyeꞌbic sukquil quicꞌux take cꞌacharel, nqui rikꞌor.
16 Reꞌ cok ruꞌ to̱b ta jeꞌ reꞌ rikꞌor i Lokꞌ laj Hu̱j, maꞌ chiꞌnchel ta take wich ra̱ꞌ riꞌsil cho maꞌ Israhel xquicꞌul chi suk i maꞌ birimaj ta laj kꞌoric chiri̱j i Jesus. Ru̱cꞌ i noꞌjbal xcaꞌn reꞌreꞌ, til coric i xitzꞌihmbaj cho maꞌ Isayi̱yas naxikꞌor cho chi jeꞌ wili:
“K-Aja̱w Dios, maꞌ nicꞌ ta ti qꞌuihal quiniminic reh cꞌuhbal nkakꞌor, nqui xikꞌor.
17 Jeꞌ reꞌ ajic nok maꞌ chiꞌnchel ta take wich ra̱ꞌ riꞌsil cho maꞌ Israhel quicojbic wach i cꞌuhbalanic nkaꞌn, reꞌreꞌ ncꞌuhtunic lok chi reꞌ ribirmijic i kꞌoro̱j chic cho ruꞌum i Dios chiri̱j i Jesus reꞌ Pahbamaj chi Kꞌatal Kꞌoric, reꞌ aj reꞌ riwi̱ꞌ chi encaꞌn take cꞌacharel reh chi enquichꞌica̱ꞌ quicꞌux chiri̱j i Jesus.
Reꞌ take maꞌ reꞌ ta ra̱ꞌ riꞌsil cho maꞌ Israhel reꞌ peꞌ chic take reꞌ xicojbic wach i Dios
18 Nok nikꞌorom chic lok chi jeꞌ reꞌ, wilic enquibiraj wi̱n chi jeꞌ wili:
«Ru̱cꞌ i xakꞌor lok ra̱j na rikꞌorom chi reꞌ take ra̱ꞌ riꞌsil cho maꞌ Israhel jaꞌ quibiram ta i kꞌoro̱j chiri̱j i Jesus? nqui enkꞌormojic wi̱n.
Reꞌ hin quincꞌuꞌlunic ru̱cꞌ take kꞌoric kꞌoro̱j cho wili chipam i Cꞌuhbal Yeꞌo̱j reh i Moyses:
“Sut chic cu̱cꞌ chiꞌnchel take cꞌacharel pononak chic ribiral i cꞌuhbal nkꞌormojic
eh xa haj paꞌ tinamit wilque̱b take ruꞌ til nquibiraj woꞌ i cꞌuhbal reꞌreꞌ, nqui i kꞌoro̱j cho.
19 Naniban i cꞌuꞌlunic reꞌreꞌ, reꞌ woꞌ chic wili i birinic enbanjic wi̱n:
«Coric ta woꞌ chi reꞌ take ra̱ꞌ riꞌsil cho maꞌ Israhel maꞌ xquirak ta chiri̱j i kꞌoro̱j cho queh? nqui enkꞌormojic wi̱n.
Chi ricꞌuꞌljic i birinic reꞌreꞌ, pe̱t nwa̱j nikꞌorom chi reꞌ take reꞌ quirakam chic chiri̱j i kꞌoro̱j queh xa reꞌ laꞌ maꞌ nca̱j ta quicꞌamam na̱. Ruꞌum aj chi jeꞌ reꞌ ncaꞌn, reꞌ Moyses xitzꞌihmbaj woꞌ cho i kꞌoric xiban i Dios chi jeꞌ wili:
“Reꞌ hin Dios nanibanam chi naribanam kꞌa̱b acꞌux tak chiwi̱j cuꞌum queh cꞌacharel jeꞌ ru̱cꞌ maꞌ reꞌ ta nak nitinami̱t take.
Reꞌ take cꞌacharel reꞌreꞌ, coric nakꞌor tak chiqui̱j chi maꞌ nquirak ta chiri̱j i kꞌoro̱j wuꞌum,
raj yuꞌna nanijohsam acꞌa̱ tak ru̱cꞌ rirakmajic chiri̱j nacaꞌnam take reꞌreꞌ, nqui xitzꞌihmbaj i Moyses.
20 Jeꞌ woꞌ, reꞌ raj kꞌorol i Dios reꞌ maꞌ Isayi̱yas ribihnal xkꞌoric woꞌ chiri̱j chaj bih ncꞌuluric nok reꞌ take ra̱ꞌ riꞌsil cho maꞌ Israhel maꞌ nquicꞌul ta haj wilic kꞌoro̱j queh ruꞌum i Dios. Reꞌ aj kꞌorol reꞌreꞌ til riteh wach chi coric i kꞌoric reꞌreꞌ chi jeꞌ wili:
“Reꞌ hin Dios xquicoj niwach take cꞌacharel reꞌ maꞌ ncapewjic ta nak chi naquicojom niwach.
Reꞌ take reꞌ, to̱b ta nak maꞌ cꞌahchiꞌ ta quibiram wi̱n hab wach i hin, xniyew woꞌ chi ehtꞌaljic queh hab wach i hin, nqui xikꞌor.
21 Reꞌ xikꞌor reꞌreꞌ chiqui̱j take maꞌ reꞌ ta ra̱ꞌ riꞌsil cho maꞌ Israhel xkꞌormojic, raj naxkꞌoric cho chiqui̱j take wich ra̱ꞌ riꞌsil cho Israhel, reꞌ wili kꞌoric xikꞌor cho:
“Reꞌ take cꞌacharel wili xa eli̱c woꞌ nipahkaj queh chi enquichꞌica̱ꞌ quicꞌux chiwi̱j
xa reꞌ laꞌ take reꞌ, kꞌe̱ꞌ chic xquicowsaj i ca̱mna chi maꞌeta nquibiraj i niCꞌuhbal
eh jeꞌ woꞌ maꞌeta nquinimej i nicꞌ paꞌ nimal i kꞌoro̱j queh, nqui maꞌ Isayi̱yas.