8
Curman chi reꞌ Lokꞌ laj Uxlabal naribehsenic reh kacꞌacharic i hoj aj niminel
Ruꞌum chi reꞌ Jesus reꞌ Pahbamaj chi kaKꞌatal Kꞌoric ncoꞌlonic keh, reꞌ woꞌ wili nikꞌor aweh tak yuꞌna chi ncꞌuluric ku̱cꞌ i hoj raj tahkanel: Ruꞌum chi kojcꞌacharic chi maꞌ chopo̱j ta kana̱ ruꞌum i noꞌjbal reꞌ wilic wi̱ꞌ i ritutil i mahc reꞌ laꞌ chic i Lokꞌ laj Uxlabal reꞌ chic reꞌ nchopbic kana̱, reꞌ hoj maꞌ wilic ta chic i tiꞌcꞌaxic chi kana̱ reꞌ narichalic nak chi kana̱ ruꞌum kamahc. Jeꞌ reꞌ nikꞌor maj jeꞌ ricab ncꞌuluric ru̱cꞌ jenaj aj camanom reꞌ ncahnic chi tehlic chic ri̱j nok toco̱m chic ajabe̱s nesenic reh chi riꞌsil rajawric ajabe̱s wilic nak wi̱ꞌ, reꞌ Jesus reꞌ Pahbamaj chi kaKꞌatal Kꞌoric xiban chi reꞌ Lokꞌ laj Uxlabal reꞌ nyeꞌbic keh i acꞌ kacꞌacharic nchopbic kana̱ eh ru̱cꞌ reꞌreꞌ, reꞌ Jesus xojresaj chi rehquen rajawric i ritutil i mahc. Jeꞌ woꞌ xiban chi maꞌ eta kojcahnic chi maꞌ eta kojcꞌacharic ru̱cꞌ i Dios nok hoj chic camnak je.
Reꞌ xiban i Jesus reꞌreꞌ maꞌ jaruj ta xcꞌuluric nok cu wilco̱j chi chopo̱j kana̱ ruꞌum i Cꞌuhbal Yeꞌo̱j reh Moyses. Jeꞌ reꞌ nikꞌor maj to̱b ta reꞌ cꞌuhbal reꞌreꞌ ritakꞌa̱ꞌ keh ribanaric i coric, reꞌ hoj maꞌxta ransil i kanoꞌjbal chi ribanaric. Ruꞌum chi jeꞌ nak reꞌ kawi̱ꞌ, reꞌ wili xiban i Dios chi toꞌbal keh: Reꞌreꞌ xitakꞌa̱ꞌ cho ayuꞌ wach acꞌal i Jesus reꞌ rAcꞌu̱n reh chi reꞌ chic reꞌ xcꞌulbic reh i tiꞌcꞌaxic nariyeꞌeric nak keh hoj chiꞌnchel cꞌacharel ruꞌum kamahc. Jeꞌ woꞌ, reꞌ Dios xiban woꞌ chi reꞌ Jesus xasjic chi wilic ritiꞌjolal ribakil jeꞌ ricab katiꞌjolal kabakil i hoj cꞌacharel aj mahc. Chi jeꞌ reꞌ riwi̱ꞌ i Jesus, reꞌ Dios xiban woꞌ chic i wili: Reꞌreꞌ xiyew reh chi reꞌ ritutil i mahc reꞌ wilic nak chi kana̱, xesmejic lok ruꞌum. Chaj bih riwi̱ꞌ chi xiban i Dios chiꞌnchel reꞌreꞌ? Reꞌ Dios xiban chi jeꞌ reꞌ reh chi reꞌ hoj reꞌ ekojcꞌacharic chi maꞌ reꞌ ta chic ritutil i mahc wilic rajawric chi kana̱ reꞌ laꞌ chic rajawric i Lokꞌ laj Uxlabal wilic chi kana̱ eh ru̱cꞌ reꞌreꞌ echic nkaꞌn canar rinimjic take takꞌanic bano̱j chipam i Cꞌuhbal Yeꞌo̱j reh Moyses.
Jeꞌ reꞌ kꞌuruꞌ ru̱cꞌ i nikꞌorom chic lok, nkilow chi wilic caꞌchꞌuk wach cꞌacharel: Reꞌ take cꞌacharel reꞌ quicꞌacharic chi reꞌ ritutil mahc nchopbic na̱ quinoꞌjbal eh ruꞌum reꞌ eli̱c woꞌ wilic pan quicapew-bal ribanaric i mahc reꞌ rotowej i noꞌjbal reꞌreꞌ. Reꞌ chic take junchꞌuk, reꞌ chic i Lokꞌ laj Uxlabal nchopbic quina̱ eh ruꞌum reꞌ, reꞌ ricꞌamaric na̱ i haj paꞌ wilic noꞌjbal nyeꞌeric queh ruꞌum i Lokꞌ laj Uxlabal reꞌ woꞌ reꞌ ncaꞌn ribanaric. Chiqui̱j take quicꞌacharic chi cꞌahchiꞌ quicꞌamam na̱ take noꞌjbal nyeꞌeric queh ruꞌum i Lokꞌ laj Uxlabal, nikꞌor aweh tak chi reꞌ take reꞌ xa suk laj cꞌacharic woꞌ nacaꞌnam chi junpech ar ru̱cꞌ Dios ra̱j take quicꞌacharic chi cꞌahchiꞌ caꞌnam i cꞌahbilal rikꞌor cho i quicapew-bal, nikꞌor aweh tak chi reꞌ take reꞌ naquiquimok je maꞌ reꞌ ta ru̱cꞌ i Dios naquicꞌacharic chi junpech. Jeꞌ reꞌ nikꞌor chi ncꞌuluric ruꞌum ncꞌulmujic woꞌ wili cu̱cꞌ take cꞌacharel cꞌahchiꞌque̱b chi cꞌahbilal ruꞌum chi maꞌ riban ta chi queh chi nquiyew qui̱b pan kꞌab i Dios: Reꞌ take cꞌacharel reꞌreꞌ quiꞌo̱j mikrok chi ra̱j ixowonel chic i Dios take ruꞌum reh quicapew-bal reꞌreꞌ.
Chi jeꞌ reꞌ ncꞌuluric reꞌ take cꞌacharel reꞌreꞌ, reꞌ quicꞌacharic chi reꞌ ritutil i mahc nchopbic na̱ quinoꞌjbal, maꞌ jaruj ta nquisuksaj ricꞌux i Dios ru̱cꞌ cꞌahchiꞌque̱b. Ra̱j awu̱cꞌ hat-tak maꞌ jeꞌ ta reꞌ ncꞌuluric ruꞌum nok reꞌ hat-tak maꞌ ticꞌacharic ta tak chic chi chopo̱j ana̱ tak ruꞌum ritutil i mahc. Reꞌ chic hat-tak ticꞌacharic laꞌ tak chi chopo̱j ana̱ tak ruꞌum i Lokꞌ laj Uxlabal reꞌ til wilic awu̱cꞌ tak. Ruꞌum chi reꞌ Lokꞌ laj Uxlabal reꞌ riyeb aweh tak i Dios chꞌi̱l i Jesus reꞌ Pahbamaj chi Kꞌatal Kꞌoric wilic awu̱cꞌ tak, reꞌreꞌ ncꞌuhtunic lok wi̱ꞌ chi reꞌ hat-tak, hat-tak aj niminel reh Jesus. Jeꞌ reꞌ nikꞌor maj reꞌ cꞌacharel reꞌ maꞌ wilic ta ru̱cꞌ i Lokꞌ laj Uxlabal kehtꞌal chi maꞌ reꞌ ta raj tahkanel. 10 Raj i hat-tak til wilic awu̱cꞌ tak i Lokꞌ laj Uxlabal eh chi jeꞌ reꞌ, reꞌ Jesus reꞌ Pahbamaj chi Kꞌatal Kꞌoric, til xa wilic woꞌ awu̱cꞌ tak. Ruꞌum aj reꞌ xa cu reꞌ woꞌ nok xiban i Dios chi coric chic wach acꞌux tak, reꞌ Lokꞌ laj Uxlabal xiban woꞌ chi junelic chic i cꞌacharic xacꞌul tak ru̱cꞌ, to̱b ta woꞌ til pa ricorquilal hoj chiꞌnchel nakaquimic je. 11 Reꞌ cok ruꞌ to̱b ta woꞌ nariponic i kꞌi̱j chi reꞌ katiꞌjolal reꞌ quimic ri̱j yuꞌna narisahchic wach nakojquimok je, reꞌ hoj xa maꞌxta woꞌ kaquimic je chi junpech ruꞌum chi wilic ku̱cꞌ i Lokꞌ laj Uxlabal reꞌ xucsunic cho reh chi quixilac take camnak i Jesus reꞌ Pahbamaj chi Kꞌatal Kꞌoric. Maꞌ xa reꞌ ta reꞌ, jeꞌ laꞌ woꞌ ruꞌum chi wilic ku̱cꞌ ruꞌ naribanam woꞌ chi reꞌ katiꞌjolal naricꞌacharic woꞌ chic cho.
12 Jeꞌ aj reꞌ kꞌuruꞌ was tak nicha̱kꞌ, jeꞌ ricab ncꞌuluric ru̱cꞌ jenoꞌ aj cꞌa̱s chi reꞌ nwihꞌic rajawric china̱ reꞌ woꞌ i cꞌacharel reꞌ nyeꞌbic riquime̱l, jeꞌ woꞌ reꞌ awu̱cꞌ hat-tak. Jeꞌ reꞌ nikꞌor maj reꞌ Lokꞌ laj Uxlabal wilic awu̱cꞌ tak reꞌ chic reꞌ wilic rajawric chana̱ tak yuꞌna. Chi jeꞌ reꞌ kꞌuruꞌ chi maꞌ reꞌ ta chic i ritutil i mahc wilic rajawric chana̱ tak, maꞌ riban ta chic chi eticꞌacharic tak chi cu cꞌahchiꞌca̱t tak chi mahcanic. 13 Jeꞌ reꞌ nikꞌor maj wi cu jeꞌ reꞌ cꞌacharic naꞌn tak, maꞌxta acꞌacharic tak ru̱cꞌ i Dios chi junpech natiquimok tak je. Ra̱j nchel wi nayew tak kꞌab reh Lokꞌ laj Uxlabal chi eribehsaj acꞌacharic tak eh chi jeꞌ reꞌ maꞌxta chic riwihꞌic pan acꞌacharic tak i cꞌahbilal xaꞌn tak cho naxatcꞌacharic tak cho pan mahc, reꞌ hat-tak na̱cꞌacharic tak ru̱cꞌ i Dios chi junpech 14 ruꞌum nok reꞌ hat-tak til hat-tak chic racꞌu̱n rixkꞌu̱n i Dios. Jeꞌ reꞌ nikꞌor maj reꞌ take cꞌacharel nanquiyew kꞌab reh Lokꞌ laj Uxlabal chi enbehsenic reh quicꞌacharic, nquicꞌuhtaj lok chi reꞌ take reꞌ til racꞌu̱n rixkꞌu̱n i Dios chic take.
15 Jeꞌ reꞌ ajic reꞌ hat-tak chayew tak kꞌab reh Lokꞌ laj Uxlabal chi eribehsaj acꞌacharic tak. Reꞌ cok ruꞌ wi jeꞌ reꞌ naꞌn tak xa ruꞌum chi tiyoꞌjic tak, maꞌ tare̱t ta. Jeꞌ reꞌ nikꞌor maj reꞌ Dios maꞌ xiyew ta aweh tak i Lokꞌ laj rUxlabal reh chi naricꞌuluric awu̱cꞌ tak jeꞌ ricab ncꞌuluric ru̱cꞌ i jenoꞌ aj camanom reꞌ riban i camanic pahkamaj reh xa ruꞌum chi kꞌe̱ꞌ nyoꞌjic chiwach ajabe̱s china̱. Awu̱cꞌ tak i hat maꞌ jeꞌ ta reꞌ ra̱j chi ncꞌuluric maj reꞌ Dios maꞌ xiyew ta aweh tak i Lokꞌ laj rUxlabal reh chi naricojom cho yoꞌjic chana̱ tak, xiyew laꞌ aweh tak reh chi na̱wehtꞌalim tak i xiban i Dios wili: Chi reꞌ hat-tak, hat-tak chic racꞌu̱n rixkꞌu̱n chiwach. Jeꞌ reꞌ ajic ruꞌum chi reꞌ Lokꞌ laj Uxlabal maꞌ ricoj ta cho yoꞌjic chi kana̱, yuꞌna riban chic chi keh chi enkakꞌor “Pah” reh Ajabe̱s Dios nakojkꞌoric ru̱cꞌ 16 eh jeꞌ reꞌ nikꞌor maj ruꞌum kꞌoric riban i Lokꞌ laj Uxlabal pan ka̱mna, reꞌ hoj nkehtꞌalij chi hoj chic racꞌu̱n rixkꞌu̱n i Dios.
Reꞌ take racꞌu̱n rixkꞌu̱n i Dios
uyuꞌunic ncaꞌn chi
naquicꞌulum quilokꞌil
17 Ruꞌum chi reꞌ hoj, hoj chic racꞌu̱n rixkꞌu̱n i Dios, wilic take cuseꞌsbal nariyeꞌeric keh. Reꞌ hin nikꞌor chi jeꞌ reꞌ ruꞌum i wili: Reꞌ Dios reꞌ xbanic chi enkacꞌul take ricuseꞌsbal xitikꞌa̱ꞌ chic wach chi nankacꞌul take tiꞌcꞌaxic ruꞌum reh kaniminic jeꞌ ricab xcꞌuluric ru̱cꞌ i Jesus chi xicꞌul woꞌ i tiꞌcꞌaxic, reꞌ hoj woꞌ enkacꞌul take kacuseꞌsbal jeꞌ ricab xcꞌuluric ru̱cꞌ Jesus reꞌ Pahbamaj chi Kꞌatal Kꞌoric chi xicꞌul woꞌ take ricuseꞌsbal. Jeꞌ reꞌ xitikꞌa̱ꞌ wach i Dios reh chi reꞌ hoj enkacꞌul i kalokꞌil jeꞌ ricab xcꞌuluric ru̱cꞌ i Jesus chi xicꞌul woꞌ rilokꞌil. 18 Ruꞌum aj reꞌ chiwach take tiꞌcꞌaxic nkacꞌul ruꞌum reh kaniminic, reꞌ wili nicapew-bal i hin chiri̱j reꞌreꞌ: Reꞌ hoj aj niminel maꞌxta bih ericamanej keh chi enkacoj rehtal take tiꞌcꞌaxic nkacꞌul, reꞌ laꞌ til kꞌe̱ꞌ woꞌ chic encamanic keh reꞌ ricojoric rehtal i kalokꞌil nariyeꞌeric naponok rikꞌijil ricꞌuluric reꞌ narilmijic woꞌ cuꞌum toco̱m chic cꞌacharel. 19 Nikꞌor chi jeꞌ reꞌ ruꞌum i wili: Nicꞌ paꞌ chic nimal tikꞌimaj take ruꞌum i Dios xa nca̱j chic quilom wach chaj bih naricꞌuluric chipam i kꞌi̱j reꞌ xa cꞌahchiꞌ chic cuyꞌem wi̱ꞌ chi ncꞌuhtjic chi reꞌ hoj til hoj racꞌu̱n rixkꞌu̱n i Dios 20 maj cu̱cꞌ take nicꞌ paꞌ chic nimal reꞌreꞌ xcꞌuluric chi reꞌ nim laj holonquilal xa̱j nak riyeb i Dios queh chi manlic maꞌ jaꞌ nmahnic ta chic wach cu̱cꞌ eh jeꞌ reꞌ xcꞌuluric cu̱cꞌ maꞌ ruꞌum ta chi reꞌ take reꞌ xca̱j chi xcꞌuluric chi jeꞌ reꞌ, ruꞌum laꞌ chi reꞌ Dios xa̱j chi reꞌ take reꞌ encuyꞌej i kꞌi̱j nok reꞌ take racꞌu̱n rixkꞌu̱n i Dios enquicꞌul quilokꞌil.
21 Jeꞌ reꞌ kꞌuruꞌ ruꞌum chi reꞌ take racꞌu̱n rixkꞌu̱n i Dios naquicꞌulum quilokꞌil, nicꞌ paꞌ chic qꞌuihal take ritikꞌinic i Dios ncꞌulmujic woꞌ cu̱cꞌ, jeꞌ na ricab ncꞌuluric ru̱cꞌ jenaj cꞌacharel reꞌ nteheric ri̱j chi camanic chiwach jenoꞌ ajabe̱s reh chi naripꞌutum ricꞌacharic jeꞌ ricab quicꞌacharic take rich cꞌacharel tehlic qui̱j chi cꞌacharic. Jeꞌ reꞌ nikꞌor chi naricꞌuluric maj jeꞌ ricab chi reꞌ take racꞌu̱n rixkꞌu̱n i Dios nok quicꞌulum chic quilokꞌil maꞌ jaruj ta chic narisahchic wach quitiꞌjolal quibakil, reꞌ riholonquilal i nicꞌ paꞌ chic qꞌuihal ritikꞌinic i Dios narimanlajic wach eh maꞌ jaruj ta chic narisahchic wach. 22 Raj yuꞌna maꞌ jaꞌ ncꞌuluric ta reꞌreꞌ. Jeꞌ reꞌ nikꞌor ruꞌum nok kehtꞌalim chi jeꞌ ricab ncꞌuluric ru̱cꞌ jenoꞌ yowa̱b ixok ponic chic wach rikꞌijil rasjic rihaꞌlacꞌu̱n reꞌreꞌ ruyꞌej chi rilow wach sakom i rihaꞌlacꞌu̱n chi xa qꞌueric chic chi̱ꞌ chi okꞌic ruꞌum ritiꞌquilal nchalic chiri̱j, jeꞌ woꞌ reꞌ ncꞌuluric cu̱cꞌ nicꞌ paꞌ chic nimal ritikꞌinic i Dios. Jeꞌ reꞌ nikꞌor maj to̱b ta pan tiꞌcꞌaxic wilque̱b, xa uyuꞌunic woꞌ ncaꞌn cu rehtal nmanlajic wach quiholonquilal.
23 Maꞌ xa reꞌ ta woꞌ reꞌ uyunic ncaꞌn, jeꞌ laꞌ woꞌ i hoj racꞌu̱n rixkꞌu̱n i Dios cꞌahchiꞌ woꞌ kuyꞌem chi nariyeꞌeric i kalokꞌil. Jeꞌ ricab chi reꞌ take tic muꞌu̱n nanquipꞌut cho wachanic, reꞌ aj ehcham reh ricꞌam cho take pe̱t wach chiwach i Dios rehtalil chi cu wilic take wach ritic narimolom, jeꞌ woꞌ reꞌ i Lokꞌ laj Uxlabal wilic chic ku̱cꞌ yuꞌna rehtalil chi chikawach johtok wilic i kꞌi̱j chi nariyeꞌeric i kalokꞌil uyuꞌumaj kuꞌum. Ruꞌum aj chi jeꞌ reꞌ naricꞌuluric, reꞌ hoj yuꞌna to̱b ta pan tiꞌcꞌaxic wilco̱j, nkatik juꞌ ruyuꞌnjic i kꞌi̱j nok chi jelow-bal i katiꞌjolal wilic yuꞌna enyeꞌeric keh jenaj toco̱m chic acꞌ laj tiꞌjolal. Nok cꞌulu̱j chic chi jeꞌ reꞌ, encꞌutunic woꞌ lok wach chi manlic chi reꞌ hoj chiwach i Dios til hoj racꞌu̱n rixkꞌu̱n. 24 Jeꞌ reꞌ nikꞌor maj reꞌ hoj, chi hoj chic racꞌu̱n rixkꞌu̱n i Dios maꞌ jaꞌ ncꞌutunic ta lok wach chi manlic xa reꞌ laꞌ ruꞌ xa reꞌ woꞌ kacojom cho wach i ribiral chi reꞌ Dios xojricoꞌlej chiwach i tiꞌcꞌaxic wilic nak chi kana̱, xa ar woꞌ kapꞌutum cho richꞌiquinjic kacꞌux chi ruyuꞌnjic i kꞌi̱j naricꞌuhtunic lok wi̱ꞌ chi manlic chi hoj chic racꞌu̱n rixkꞌu̱n i Dios.
Jeꞌ reꞌ kꞌuruꞌ ruꞌum chi jaꞌ nponic ta wach rikꞌijil reꞌreꞌ, curman chi nakatikim juꞌ richꞌiquinjic kacꞌux chiri̱j. Wi ta nak xcꞌuhtunic chic lok wach chi manlic, maꞌxta nak chic riwi̱ꞌ chi keh chi cu enkachꞌica̱ꞌ kacꞌux chiri̱j reꞌreꞌ, majeꞌ? Nikꞌor chi jeꞌ reꞌ maj maꞌ hab ta jenoꞌ wach reꞌ cꞌahchiꞌ ruyꞌem jenoꞌ paꞌ bih, cu eritik juꞌ ruyuꞌnjic wi xilow chi xcꞌuluric chic. 25 Jeꞌ reꞌ kꞌuruꞌ xa cu cꞌahchiꞌ woꞌ kuyꞌem riponic i kꞌi̱j reꞌreꞌ, to̱b ta nchel chi ruꞌum ruyuꞌnjic nchalic tiꞌcꞌaxic chi kana̱ reꞌ nkacuy ransil 26 ruꞌum chi reꞌ Lokꞌ laj Uxlabal wilic ku̱cꞌ chi katobjic, jeꞌ woꞌ ricab nakojritoꞌbej pan kati̱j nok reꞌ hoj maꞌxta kanoꞌjbal chi pahkanic. Reꞌ hin jeꞌ reꞌ nikꞌor maj coric ruꞌ, nankaꞌn kati̱j qꞌuih pech maꞌ nkarak ta chiri̱j haj wilic take kꞌoric ra̱j kꞌormojic chiwach i Dios eh ruꞌum reꞌ maꞌ nkarak ta chic kakꞌorbal chiwach. Xa reꞌ laꞌ nankacꞌul chi jeꞌ reꞌ, reꞌ chic i Lokꞌ laj Uxlabal nkꞌoric pan kajelow-bal ru̱cꞌ take kꞌoric jeꞌ ru̱cꞌ maꞌ eta woꞌ kojchol rikꞌormojic i hoj. 27 Jeꞌ reꞌ ajic nok reꞌ hoj maꞌ kehtꞌalim ta chaj bih take kꞌoric ra̱j kꞌormojic pan kati̱j chiwach i Dios, reꞌ Lokꞌ laj rUxlabal ruꞌ kojritoꞌbej chi kꞌoric ru̱cꞌ eh reꞌ Dios reꞌreꞌ, reꞌ rehtꞌalim take capew-bal xa pan kacꞌux wilic cho, til rehtꞌalim woꞌ chi pa ricapew-bal i rUxlabal xa reꞌ woꞌ katobjic i hoj wilic cho. Ruꞌum aj reꞌ xa̱j chi reꞌ rUxlabal enkꞌoric chiki̱j pan kati̱j.
Maꞌ jenoꞌ tiꞌcꞌaxic enesenic lok reh ricꞌaxbal i Jesus chi kana̱
28 Jeꞌ woꞌ chic, reꞌ hoj kehtꞌalim woꞌ i wili chiri̱j i Lokꞌ laj rUxlabal i Dios: Chi nok wilco̱j pan tiꞌcꞌaxic reꞌ woꞌ reꞌ ntoꞌbonic keh hoj reꞌ tiꞌ nkicꞌraj i Dios. Ruꞌum reh toꞌbonic nkacꞌul reꞌreꞌ, chiꞌnchel ncꞌuluric ku̱cꞌ ncamanic keh chi yeꞌbal sukquil cꞌuxlis pan kacꞌacharic. Reꞌ aj i wihꞌic pan sukquil laj cꞌuxlis ncꞌuluric ku̱cꞌ i hoj ruꞌum chi reꞌ Dios xojriyukꞌej chi enkacꞌul i tikꞌinic xiban. 29 Jeꞌ reꞌ nikꞌor maj chiki̱j i hoj reꞌ hoj poꞌ chic rinaꞌbem cho Dios chi nakachꞌica̱b kacꞌux chiri̱j i Jesus, reꞌ Dios xiban i wili: Nok jaꞌ kojritikꞌa̱ꞌ ta cho i hoj cꞌacharel, reꞌ Dios xitikꞌa̱ꞌ chic cho wach chi reꞌ Jesus reꞌ rAcꞌu̱n, reꞌreꞌ nariwihꞌic chi kasbe̱s reh chi jeꞌ reꞌ, reꞌ kanoꞌjbal i hoj naribanam jeꞌ ricab i rinoꞌjbal ruꞌ. Jeꞌ woꞌ chic, reꞌ Dios xiban i tikꞌinic reꞌreꞌ reh chi reꞌ Jesus nariwihꞌic riqꞌuihal take richa̱kꞌ reꞌ equiyeꞌbic rilokꞌil jeꞌ ricab ricꞌul jenoꞌ pe̱t acꞌun ru̱cꞌ take richa̱kꞌ. 30 Reh chi encꞌuluric ku̱cꞌ i tikꞌinic bano̱j reꞌreꞌ chi reꞌ Jesus reꞌ enwihꞌic chi kasbe̱s i hoj, reꞌ Dios xojriyukꞌej eh xiban woꞌ chi maꞌxta chic kamahc chiwach. Maꞌ xa reꞌ ta reꞌreꞌ xiban, jeꞌ laꞌ woꞌ xiban chi reꞌ lokꞌil ricꞌulum chic i Jesus ewoꞌ nkacꞌul i hoj.
31 Jeꞌ reꞌ kꞌuruꞌ nankacoj rehtal chiꞌnchel i ribanam chic cho i Dios chiki̱j, reꞌ wili riyew ri̱b chi enkakꞌor: To̱b ta nak wilic jenoꞌ nkꞌetbic pan kabe̱h, reꞌ hoj maꞌ eta kojyoꞌjic ruꞌum maj reꞌ Dios wilic ku̱cꞌ chi riyeꞌeric keh i paꞌ bih toꞌbonic nka̱j. 32 Chaj waꞌric nanikꞌor i reꞌreꞌ? Nikꞌor ruꞌum reh i wili: Reh chi reꞌ hoj xojcoꞌljic, reꞌ Dios maꞌ xipohꞌaj ta ricꞌux chi riyeꞌeric cho pan quimic i Jesus reꞌ rAcꞌu̱n, reꞌ laꞌ xiban xikꞌahsaj i rAcꞌu̱n pan quimic chiki̱j i hoj cꞌacharel. Ruꞌum chi jeꞌ reꞌ xiban i Dios til nkehtꞌalij chi reꞌreꞌ nariyeb woꞌ cho keh chiꞌnchel i toꞌbonic. 33 Jeꞌ reꞌ ajic ruꞌum chi reꞌ Dios xa wilic woꞌ ku̱cꞌ eh ribanam chic chi maꞌxta kamahc chiwach, reꞌ hoj yuꞌna reꞌ xojrichih i Dios chi racꞌu̱n rixkꞌu̱n maꞌ hab ta chic wach enkayohlej chi ericoj kamahc chiwach i Dios. 34 Maꞌ kojyoꞌjic ta chic kꞌuruꞌ chi hab wach jenoꞌ encojbic kamahc maj reꞌ chic i Jesus reꞌ Pahbamaj chi Kꞌatal Kꞌoric enkꞌoric chiki̱j ru̱cꞌ i Dios chi kacoꞌljic. Reꞌ Jesus wili xcansjic je xa reꞌ laꞌ xucsjic woꞌ chic cho chi quixilac take camnak eh yuꞌna ar wilic ru̱cꞌ i Dios cꞌahchiꞌ ricꞌulum rinimal rilokꞌil jeꞌ ricab ricꞌul jenaj cꞌacharel nanyeꞌeric riwaꞌric chi tzꞌuhkic cok chi riche̱l jenoꞌ kꞌatal kꞌoric. 35 Jeꞌ reꞌ kꞌuruꞌ reꞌ hoj maꞌ kojyoꞌjic ta eh xa ta woꞌ nak ekojyoꞌjic chiwach i tiꞌcꞌaxic bano̱j keh reh chi reꞌ Jesus reꞌ Pahbamaj chi Kꞌatal Kꞌoric maꞌ eta chic kojricꞌax. Jeꞌ woꞌ chic to̱b ta nak wilic jenoꞌ hab wach enbanic chi enchal tiꞌcꞌaxic on cꞌaxquilal chi kana̱, on to̱b ta woꞌ wilic jenoꞌ enbanic chi enkacuy kawaꞌ kaha̱ꞌ, on to̱b ta nchel chi maꞌ eta chic nwihꞌic kasoꞌ, on to̱b ta woꞌ wilic nak take cꞌacharel xa echic kojquitahkej chi kacansjic eh chi jeꞌ reꞌ ekojquiyew pan yohbalil, chiꞌnchel i cꞌaxquilal reꞌreꞌ maꞌ jaruj ta eriban chi reꞌ Jesus maꞌ eta chic kojricꞌax. 36 Jeꞌ reꞌ nikꞌor maj nok wilco̱j pan tiꞌcꞌaxic xa cꞌahchiꞌ kacꞌulum jeꞌ ricab rikꞌor take kꞌoric xikꞌor cho maꞌ Tawiy reh Dios, naxitzꞌihmbaj cho chi jeꞌ wili pan Lokꞌ laj Hu̱j reꞌ wilic wi̱ꞌ riCꞌuhbal i Dios:
“Reꞌ hoj, hoj atinami̱t Ha̱w eh ruꞌum reꞌ, reꞌ take toco̱m chic cꞌacharel xa eli̱c nquisicꞌ ri̱j kacansjic.
Chi queh take cꞌacharel reꞌreꞌ tare̱t chi ekojquimic jeꞌ ricab naquicansjic take me̱ꞌ pan cansbal chicop, nqui rikꞌor.
37 Jeꞌ reꞌ kꞌuruꞌ to̱b ta coric chi wilic take tiꞌcꞌaxic chi kana̱, reꞌ hoj xa nkacuy woꞌ ransil eh maꞌ nkapohꞌaj ta woꞌ kacꞌux chiri̱j kaniminic maj reꞌ Jesus reꞌ xa kojricꞌax woꞌ, reꞌ woꞌ reꞌ entoꞌbonic keh. 38 Ruꞌum chi jeꞌ reꞌ, reꞌ hin til wehtꞌalim i wili: Coric ruꞌ nok cu cꞌachalco̱j pe ayuꞌ wach acꞌal, wilic take tiꞌcꞌaxic nakacꞌulum eh xa cu wilco̱j woꞌ pan quimic. Jeꞌ woꞌ, wehtꞌalim woꞌ i wili: Chi reꞌ take aj tzꞌeꞌ wa̱ch jeꞌ ru̱cꞌ ximikric chi raj toꞌo̱l chic take i aj Yahm, reꞌ take maꞌ ato̱b laj uxlabal eh jeꞌ woꞌ reꞌ take toco̱m chic quikꞌatbic kꞌoric pan te̱w cꞌuxic ruꞌum reh cajawric wilic, chiꞌnchel take reꞌ nca̱j nak chi maꞌ ta nak chic tiꞌ ekojricꞌra̱j i Jesus xa reꞌ laꞌ maꞌ jaruj ta eriban chi jeꞌ reꞌ eriban ruꞌ. Jeꞌ reꞌ kꞌuruꞌ xa ta nak reꞌ chaj bih ncꞌuluric lok yuꞌna, on reꞌ naricꞌuluric lok chi kawach, xa ta nak reꞌreꞌ eriban chi reꞌ Jesus maꞌ ta nak chic tiꞌ ekojricꞌra̱j. 39 Jeꞌ woꞌ, reꞌ take wilic cajawric ar pan te̱w cꞌuxic, on wilic cajawric ayuꞌ wach acꞌal, maꞌ hab ta wach queh reꞌ xa ta nak woꞌ jenoꞌ chic jeꞌ ru̱cꞌ tikꞌimaj woꞌ cho ruꞌum i Dios, eriban chi maꞌ eta chic nwihꞌic chi kana̱ i cꞌaxbal reꞌ ricꞌuhtaj keh i Dios ruꞌum chi reꞌ Jesus reꞌ Pahbamaj chi Kꞌatal Kꞌoric wilic chic chi Ajabe̱s chi kana̱.