5
Reꞌ lokꞌonic wach i Dios ncaꞌn take quejeb chi rijeb laj cꞌacharel quichꞌi̱l take quejeb ricajwinak (24) chi rijeb tak winak quichꞌi̱l woꞌ riqꞌuihal take raj tzꞌeꞌ wa̱ch i Dios
1 Chiri̱j aj chic reꞌ, xwilow chi reꞌ tzꞌuklic chipam i tzꞌuka̱b kꞌatbal kꞌoric wilic pa risecꞌa̱j kꞌab jenaj hu̱j botomaj wach eh cꞌultar tzꞌihmbimaj wach. Reꞌ hu̱j reꞌreꞌ wuktꞌu̱r chi kꞌolbal kꞌolomaj wi̱ꞌ i chi̱ꞌ reh chi maꞌ eta chic nteh wach.
2 Nok jeꞌ reꞌ cꞌahchiꞌ wilom, xwilow wach jenaj raj tzꞌeꞌ wa̱ch i Dios til nim chic riwaꞌric. Reꞌreꞌ xa cow chic cꞌahchiꞌ rikꞌorom chi jeꞌ wili:
«Hab wach wilic rajawric chi eresaj take wuktꞌu̱r chi kꞌolbal eh chi eriteh wach i hu̱j wili chi narilmijic wach? nqui cꞌahchiꞌ rikꞌorom.
3 Jeꞌ reꞌ xikꞌor maj maꞌ xrakmajic ta jenoꞌ hab wach wilic rajawric chi eresaj take wuktꞌu̱r chi kꞌolbal reꞌreꞌ, maꞌ woꞌ chi erilow wach i hu̱j. Maꞌ woꞌ haj ta xcan jenoꞌ aj tehol wach i hu̱j reꞌreꞌ, xa ta nak pan taxa̱j, xa ta nak wach acꞌal eh xa ta nak woꞌ chipam i yeꞌa̱b reꞌ quiꞌo̱j wi̱ꞌ take cꞌacharel naquiquimic je.
4 Naxwilow chi jeꞌ reꞌ, reꞌ hin kꞌe̱ꞌ naxinokꞌic jok ruꞌum chi maꞌ haj ta xrakmajic jenoꞌ wilic rajawric chi riteheric wach i hu̱j reꞌreꞌ eh xa ta woꞌ nak je chi erilow pa̱m.
5 Chiri̱j i wili xchalic jenaj queh take winak reꞌ wilic quiwaꞌric jeꞌ ricab quiwaꞌric take rijeb tak cꞌacharel eh xikꞌor wi̱n chi jeꞌ wili:
«Chacana̱ꞌ okꞌic maj cu wilic jenaj chic cꞌacharel reꞌ eriban chi eresaj i wuktꞌu̱r chi kꞌolbal kꞌolomaj wi̱ꞌ i hu̱j reꞌreꞌ eh jeꞌ woꞌ chi eriteh wach i hu̱j reꞌreꞌ. Reꞌ cꞌacharel wili “Cakcoj” nkꞌormojic reh reꞌ xiyew pa ro̱k i cꞌahbilal ruꞌum reh rinimal wach rajawric wilic. Reꞌreꞌ ar chalanak riraꞌil chi quixilac take ra̱ꞌ riꞌsil cho maꞌ Jurah. Jeꞌ woꞌ, ra̱ꞌ riꞌsil woꞌ cho kꞌatal kꞌoric maꞌ Tawiy, nqui wi̱n.
6 Nok rikꞌorom chic wi̱n chi jeꞌ reꞌ, ar woꞌ pan yejal reh lokꞌ laj yeꞌa̱b reꞌ wilic wi̱ꞌ i tzꞌuka̱b kꞌatbal kꞌoric chi sutumaj ri̱j cuꞌum take quejeb ricaꞌwinak chi winak (24) reꞌ wilic quiwaꞌric jeꞌ ricab quiwaꞌric take rijeb tak winak eh chi sutumaj woꞌ ri̱j cuꞌum take quejeb chi cꞌacharel reꞌ wilic nakꞌ quiwach chiqui̱j chi quiwach, xwilow chi ar paꞌlic i Jesus reꞌ rijalwachem ri̱b chi jeꞌ jenaj Qꞌuijol Me̱ꞌ. Reꞌ rijalwachej ri̱b chi qꞌuijol me̱ꞌ reꞌreꞌ jaꞌ sahchanak take rehtalil tiꞌcꞌaxic bano̱j reh naxquicansaj chi jeꞌ ricab nok quicansjic take qꞌuijol me̱ꞌ reꞌ quikꞌahsjic chi si̱ chiwach i Dios. Jeꞌ woꞌ xnicoj rehtal chi reꞌ rijalwachej ri̱b chi qꞌuijol me̱ꞌ reꞌreꞌ til wilic rajawric eh jeꞌ reꞌ nikꞌor maj xwilow chi wilic wuku̱b rucꞌaꞌ. Reꞌreꞌ wilic woꞌ wuku̱b nakꞌ wach reꞌ rijalwachej i wuku̱b chi uxlabal reꞌ wilic cu̱cꞌ i jenaj queh wuku̱b chi manlic wach noꞌjbal wilic reh Dios. Reꞌ take uxlabal wili reꞌ woꞌ take xitakꞌabjic je ruꞌum i Dios chi naquicamanic chi junsut wach acꞌal.
7 Jeꞌ reꞌ ajic reꞌ Cꞌacharel reꞌ rijalwachem ri̱b chi jeꞌ jenaj Qꞌuijol Me̱ꞌ, xijil cok ri̱b ru̱cꞌ i tzꞌuklic cho chipam i tzꞌuka̱b kꞌatbal kꞌoric eh xichop i hu̱j botomaj wach reꞌ wilic pan risecꞌa̱j kꞌab i tzꞌuklic cho ar.
8 Ar aj ruꞌ naxichop i hu̱j reꞌreꞌ, reꞌ take quejeb chi cꞌacharel reꞌ wilic nakꞌ quiwach chiqui̱j chi quiwach quichꞌi̱l take quejeb ricaꞌwinak (24) chi cꞌacharel reꞌ wilic quiwaꞌric jeꞌ ricab quiwaꞌric take rijeb tak winak, quipachꞌa̱ꞌ qui̱b chiwach i Cꞌacharel reꞌ rijalwachem ri̱b chi jeꞌ jenaj Qꞌuijol Me̱ꞌ chi rehtalil rilokꞌonjic wach xcaꞌn. Reꞌ take cꞌacharel reꞌreꞌ wilic juꞌjun quiculc tikꞌimaj ru̱cꞌ kꞌanworic laj chꞌihchꞌ nujunak chi se̱nsa reꞌ rijalwachej quiti̱j take aj niminel. Reꞌ take culc reꞌreꞌ xquikꞌahsaj chiwach i Cꞌacharel rijalwachem ri̱b chi jeꞌ jenaj Qꞌuijol Me̱ꞌ. Jeꞌ woꞌ, reꞌ take reꞌ wilic cu̱cꞌ quikꞌojbal reh banoj bi̱ch reꞌ a̱rpa ribihnal
9 eh ru̱cꞌ reꞌ pꞌuht quibichem wach jenaj acꞌ laj bi̱ch jeꞌ wili rikꞌor:
“Reꞌ hat til ricꞌul chaweh chi enachop i hu̱j botomaj wach eh chi enawesaj lok i wuktꞌu̱r chi kꞌolbal nlutzꞌbic reh i hu̱j reꞌreꞌ
maj jeꞌ ricab ricꞌul i qꞌuijol me̱ꞌ nankꞌahsjic chi si̱ chiwach i Dios,
reꞌ hat xacꞌul woꞌ rinimal tiꞌcꞌaxic naxatcansjic je
eh jeꞌ ricab jenoꞌ aj camanom ntojoric ri̱j ricꞌacharic ruꞌum jenoꞌ ajabe̱s ruꞌum chi ra̱j rehcham,
ru̱cꞌ woꞌ aquimic i hat xaꞌn chi nicꞌ paꞌ qꞌuihal tinamit xa rehreh wach quima̱m catiꞌt,
xa rehreh wach quikꞌorbal eh xa rehreh woꞌ wach quitinamital wilque̱b chic chi ritinami̱t i kAja̱w Dios.
10 Jeꞌ woꞌ chic, reꞌ hat xatbanic chi reꞌ chic i Dios wilic chi kꞌatal kꞌoric chi quina̱ chiꞌnchel take cꞌacharel ritinami̱t chic
eh chi wilque̱b chic chiwach ruꞌ chi aj kꞌahsem si̱.
Jeꞌ woꞌ, reꞌ hat xaꞌn chi kꞌatoj kꞌoric chic nkaꞌn chi quina̱ tinamit wach acꞌal, nqui rikꞌor i bi̱ch xcaꞌn.
11 Chiri̱j chic reꞌ, ar woꞌ chic pan yejal i lokꞌ laj yeꞌa̱b wilic wi̱ꞌ i tzꞌuka̱b kꞌatbal kꞌoric, xwilow riqꞌuihal raj tzꞌeꞌ wa̱ch i Dios reꞌ xquisutej ri̱j i tzꞌuka̱b reꞌreꞌ sutumaj woꞌ ri̱j cuꞌum take quejeb ricaꞌwinak (24) chi cꞌacharel reꞌ wilic quiwaꞌric jeꞌ ricab quiwaꞌric take rijeb tak winak eh jeꞌ woꞌ sutumaj ri̱j cuꞌum take quejeb chi winak reꞌ wilic nakꞌ quiwach chiqui̱j chi quiwach. Reꞌ take aj tzꞌeꞌ wa̱ch reꞌreꞌ, reꞌ kꞌe̱ꞌ woꞌ chic qꞌuihal take chi maꞌ hab ta wach eriban canar cajaljic
12 jeꞌ wili bichinic ncaꞌn chi cow:
«Jeꞌ ricab i qꞌuijol me̱ꞌ nkꞌahsjic chi si̱ chiwach i Dios,
reꞌ hat xatkꞌahsjic woꞌ pan quimic.
Ruꞌum aj reꞌ xa reꞌ woꞌ hat ricꞌul chaweh chi enacꞌul i lokꞌil wili:
Reꞌ rikꞌormojic chi reꞌ hat riraꞌil i rinimal wach awajawric,
riraꞌil i bihomal, riraꞌil i noꞌjbal, riraꞌil i ansil
eh reꞌ woꞌ hat manlic coric wach kꞌatoj kꞌoric naꞌn.
Ruꞌum reh chiꞌnchel reꞌreꞌ, ricꞌul chaweh chi enacꞌul rinimal alokꞌil,
chi enacꞌul alokꞌonjic eh jeꞌ woꞌ chi enacꞌul ribichjic awach, nqui take.
13 Nok kꞌoro̱j aj chic reꞌreꞌ, reꞌ hin xnibiraj chi chiꞌnchel take cꞌacharel jeꞌ chi wilque̱b pan taxa̱j, jeꞌ chi wilque̱b wach acꞌal chꞌi̱l woꞌ take camnak chic je take jeꞌ ricab take ximuhkic pan acꞌal eh chꞌi̱l woꞌ take xmuhkic quina̱ pan maꞌ laj haꞌ, xiꞌoquic chi bichinic chi jeꞌ wili:
«Hat Dios reꞌ tzꞌukulca̱t chipam i tzꞌuka̱b kꞌatbal kꞌoric
chꞌi̱l woꞌ i hat reꞌ ajalwachem awi̱b chi jeꞌ ricab jenaj qꞌuijol me̱ꞌ,
chi junelic kꞌi̱j sakom yeꞌerok alokꞌil tak.
Nayeꞌerok alokꞌonjic tak, banjok ribichjic awach tak
eh kꞌormojok woꞌ chi reꞌ hat-tak xa manlic woꞌ wach i kꞌatoj kꞌoric naꞌn tak, nqui take.
14 Nok kꞌoro̱j aj chic reꞌreꞌ, reꞌ take quejeb chi cꞌacharel reꞌ wilic nakꞌ quiwach chiqui̱j chi quiwach xquikꞌor chi jeꞌ ta nak reꞌ banarok. Reꞌ chic take quejeb ricaꞌwinak (24) chi rijeb tak winak reꞌ wilic quiwaꞌric jeꞌ ricab quiwaꞌric take rijeb tak winak, xquipachꞌa̱ꞌ qui̱b chi rilokꞌonjic wach i Dios chꞌi̱l woꞌ i Jesus reꞌ xijalwachej ri̱b chi qꞌuijol me̱ꞌ. Quicabchel reꞌreꞌ cꞌachalque̱b take chi junelic kꞌi̱j sakom.