4
Ma̱cana̱ꞌ rikꞌormojic riCꞌuhbal i Dios
1 Yuꞌna reh chi wilic take enquiyew quichi̱ꞌ chi reꞌ hin coric wach i cꞌuhtunic cꞌahchiꞌ nibanam je aweh, nicoj jenaj i kAja̱w Dios chꞌi̱l woꞌ i Lokꞌ laj Ajabe̱s Jesus reꞌ Pahbamaj chi Kꞌatal Kꞌoric. Reꞌreꞌ wilic rajawric chi rikꞌataric kꞌoric chi quina̱ take cu cꞌacharic ncaꞌn nacꞌolok woꞌ chic lok eh jeꞌ woꞌ reꞌ chi quina̱ take camnak chic take je. Chi quiwach aj take reꞌ, til nipahkaj aweh chi
2 xa tikilca̱t ok woꞌ chi rikꞌormojic ricorquilal riCꞌuhbal i Dios. Chaniqꞌuej akꞌi̱j kꞌuruꞌ chi rikꞌormojic nok xa riyew ri̱b chi kꞌormojic eh jeꞌ woꞌ nok chi cꞌaxic chic rikꞌormojic. Ru̱cꞌ i cꞌuhbal reꞌreꞌ chakꞌil take cꞌacharel, chacoj woꞌ quinoꞌjbal chi nacaꞌnam i coric, chachꞌubsaj quicꞌux ru̱cꞌ i cꞌuhbal eh ticuyunok woꞌ chi quitijiljic ru̱cꞌ i coric laj cꞌuhbal reꞌreꞌ.
3 Jeꞌ reꞌ ajic nipahkaj aweh chi na̱banam jeꞌ ricab xnikꞌor aweh chi na̱banam maj cꞌulic lok reh take kꞌi̱j chi kawach nok reꞌ take tinamit maꞌxta ricꞌulum quicꞌux ribirmijic tijbal ncꞌuhtunic reh ricorquil ribiral i Dios, reꞌ laꞌ chic nacaꞌnam, nacoquic chi ribanaric haj wilic ncotowej ribanaric. Chi jeꞌ reꞌ naquitahkem take toco̱m chic aj tijinel reꞌ naquikꞌoric reh xa paꞌ jaric tzꞌakoj wach ribiral jeꞌ ru̱cꞌ xa ricꞌul chic quixiquin ribirmijic.
4 Ru̱cꞌ reꞌreꞌ ajic maꞌxta chic cajwam ribirmijic i coric laj cꞌuhbal, reꞌ chic take xa tzꞌakoj wach ribiral suk naquibiram.
5 Ruꞌum aj reꞌ nikꞌor je aweh chi reꞌ anoꞌjbal i hat maꞌ ok jeꞌ ricab quinoꞌjbal take reꞌ, xa naꞌlic laꞌ ok woꞌ aweh chi ricojoric rehtal chaj bih take cꞌahchiꞌ ricꞌuluric. Jeꞌ ricab wi xcꞌulic lok tiꞌcꞌaxic chana̱ ruꞌum i camanic naꞌn chacuy ransil eh chatik juꞌ rikꞌormojic i ribiral i Jesus reh chi jeꞌ reꞌ na̱banam acamaj chi manlic wach
6 maj xa nicꞌ yuꞌ maꞌ eta chic tinitoꞌbej chipam acamaj ruꞌum nok reꞌ hin xa maꞌ naht ta chic wilqui̱n china̱ acꞌal wili. Jeꞌ ricab nanponic riꞌorahil riquimic jenoꞌ me̱ꞌ ncꞌataric chi si̱ chiwach i Dios, reꞌ haꞌ tikꞌimaj ru̱cꞌ ri̱s u̱wa nchihcjic china̱ i me̱xa reꞌ ncꞌataric wi̱ꞌ i me̱ꞌ, jeꞌ woꞌ reꞌ i hin yuꞌna, xcꞌulic woꞌ lok i kꞌi̱j chi nanicansjic je.
7 Wi jeꞌ reꞌ xcꞌuluric, ta woꞌ re̱t chi wi̱n maj wehtꞌalim chi jeꞌ ricab nok jenoꞌ aj ajamanel xa cow chic riyew ricꞌux nanoquic chipam jenoꞌ pajoj ajamanic, cow woꞌ xniyew nicꞌux i hin chi ribanaric nicamaj chiwach i Jesus. Wehtꞌalim woꞌ chi xninimej chi manlic i camanic yeꞌo̱j wi̱n chi nanibanam eh reꞌ take kꞌoric takꞌamaj rikꞌormojic wi̱n ruꞌum i Dios xnikꞌor chic chi manlic.
8 Yuꞌna kꞌuruꞌ xa reꞌ chic nwuyꞌej chi nachirak cho rikꞌijil richꞌukbal kꞌoric china̱ chiꞌnchel cꞌacharel, reꞌ kAja̱w Jesus, reꞌ manlic aj chꞌukul wach mahc, nariyeb i nico̱ch cꞌolo̱j lok wi̱n ruꞌum jeꞌ woꞌ nariyeb queh take nicꞌ nimal tiꞌ nquicꞌraj i Jesus eh ruꞌum reꞌ cꞌahchiꞌ cuyꞌem chi naricꞌulic woꞌ chic lok.
Reꞌ take atoꞌbil ripahkaj
je maꞌ Lu̱ꞌ reh Timote̱yo
9 Reꞌ chic yuꞌna nipahkaj je aweh chi chaloqꞌuej ti cho awi̱b chi etichalic chi wiliric,
10 maj wilic take wichꞌi̱l maꞌ wilque̱b ta chic wu̱cꞌ jeꞌ ricab i maꞌ Te̱mas. Reꞌreꞌ ruꞌum reh ricꞌaxaric wach xa suk laj wihꞌic ricꞌam cho i na̱ acꞌal wili, xo̱j pan tinamit Tesalo̱nica. Reꞌ chic i maꞌ Crese̱nte xo̱j rilow take aj niminel wilque̱b pa riyukꞌul i Cala̱sya eh reꞌ Ti̱to xo̱j chipam i riyukꞌul i Talma̱sya chi quilmijic woꞌ take aj niminel wilque̱b ar.
11 Yuꞌna xa chic ti reꞌ maꞌ Cax wilic wu̱cꞌ eh ruꞌum reꞌ nipahkaj je atoꞌbil aweh chi natichalok wu̱cꞌ, chacꞌam cho maꞌ Cus chawi̱j ruꞌum nok reꞌreꞌ kꞌe̱ꞌ encamanic wi̱n ayuꞌ chi waj toꞌo̱l chipam ricamaj i kAja̱w Dios.
12 Wilic jenaj chic waj toꞌo̱l maꞌ wilic ta woꞌ chic wu̱cꞌ reꞌ Ti̱quico ribihnal. Reꞌreꞌ xnitakꞌa̱ꞌ je ar pan tinamit E̱peso.
13 Natichalok ayuꞌ, chacuy chacꞌam cho wi̱n take paꞌ bih wi̱n xnicana̱ꞌ cho pa ripa̱t i kasbe̱s maꞌ Ca̱rpo ar Tro̱yas, jeꞌ ricab i maꞌ laj nijuc ro̱k tzꞌih nicoj reh nicꞌuxic, chꞌi̱l take nihu̱j quicamanic wi̱n eh reꞌ til kꞌe̱ꞌ nwa̱j chi na̱cꞌamam cho wi̱n reꞌ take nihu̱j tikꞌimaj ru̱cꞌ queꞌemaj wach tzꞌuhu̱m.
14 Jeꞌ woꞌ chic Timote̱yo nwa̱j nikꞌorom je aweh, chi reꞌ maꞌ Lej reꞌ aj chꞌeyol wach chꞌihchꞌ, yohbal wach tiꞌ xiban wi̱n, xa reꞌ laꞌ hin xnicana̱ꞌ pan kꞌab i kAja̱w Dios chi reꞌreꞌ tikꞌinok wach reh ru̱cꞌ nicꞌ paꞌ nimal i cꞌahbilal xiban wi̱n.
15 Ruꞌum aj woꞌ reh jotꞌo̱j riban, reꞌ hin nikꞌor je aweh chi reꞌ hat chayohbalej awi̱b ru̱cꞌ i winak reꞌreꞌ ruꞌum nok maꞌ nechꞌ ricꞌul wach i cꞌuhbalanic nkaꞌn, cꞌahchiꞌ laꞌ rikꞌehtam ri̱b chiwach riCꞌuhbal i Dios.
16 Chiwach take cho kꞌi̱j reꞌreꞌ nok cu reꞌ pe̱t nikꞌorbal chi ricoꞌljic wi̱b chiri̱j riCꞌuhbal i Dios, xa wutquel ti xinwihꞌic maj maꞌ hab ta wach queh take wichꞌi̱l xiwihꞌic wu̱cꞌ. Ruꞌum aj reh xcꞌuluric lok reꞌreꞌ, reꞌ hin nipahkaj reh Dios chi nicꞌ paꞌ nimal take xicananic wi̱n chi wutquel, maꞌ ta encojoric mahc chi quina̱ ru̱cꞌ xcaꞌn wi̱n reꞌreꞌ.
17 Jeꞌ reꞌ kꞌuruꞌ to̱b ta woꞌ xincahnic chi maꞌ jenoꞌ chic waj toꞌo̱l wilic wu̱cꞌ, reꞌ kAja̱w Dios xa xwihꞌic woꞌ wu̱cꞌ eh xa xiyew woꞌ wansil chꞌi̱l ricowil nicꞌux chi rikꞌormojic ricꞌuhbal queh take tinamit xiwihꞌic chipam i pe̱t nikꞌorbal xniban chi ricoꞌljic wi̱b. Chi jeꞌ reꞌ, reꞌ take maꞌ reꞌ ta ra̱ꞌ riꞌsil cho maꞌ Israhel xiwihꞌic ar xquibiraj woꞌ take kꞌoric xniban chi quiwach. Ruꞌum chi ar xwihꞌic wu̱cꞌ i kAja̱w Dios, reꞌ hin xincoꞌljic woꞌ chi quiwach take waj ixowonel jeꞌ ricab nanesmejic jenoꞌ chakꞌlam laj chicop chiwach jenoꞌ cakcoj reꞌ naricꞌuxbic nak reh.
18 Yuꞌna kꞌuruꞌ ruꞌum reh nicoꞌljic ribanam cho Dios riman chic nichꞌica̱ꞌ nicꞌux chiri̱j i wili: Reꞌreꞌ naquiricoꞌlem chiwach take maꞌ holohic ta laj bano̱j nca̱j caꞌnam johtok wi̱n chi niwach eh jeꞌ woꞌ chic, reꞌreꞌ til naquirichaꞌjem reh chi reꞌ hin equinwihꞌic chi quixilac take narikꞌataric kꞌoric chi quina̱ ar pan taxa̱j. Lokꞌomaj ta nak i kAja̱w Jesus chi junelic kꞌi̱j sakom. Jeꞌ ta nak reꞌ banarok.
Reꞌ take cohlsbal wach rikꞌorbal
i maꞌ Lu̱ꞌ ru̱cꞌ i Timote̱yo
19 Timote̱yo, nipahkaj je aweh chi chayew risukquilal ricꞌux i tiꞌ Pirsi̱la chꞌi̱l Aqui̱la reꞌ ribahi̱l. Jeꞌ woꞌ chayew risukquil ricꞌux i maꞌ Onesi̱poro chꞌi̱l chiꞌnchel take i raj pan pa̱t.
20 Nikꞌor woꞌ je aweh chi reꞌ Era̱sto xcahnic cho ar Cori̱nto eh reꞌ Tro̱pimo xnicana̱ꞌ cho ar Mile̱to ruꞌum chi xchop cho reh jenaj yowabjic.
21 Jeꞌ reꞌ kꞌuruꞌ Timote̱yo til chaloqꞌuej ti cho awi̱b chi chalic wu̱cꞌ chi cu jaꞌ nponic ta rikꞌijil i kꞌelej. Reꞌ take aj niminel ayuꞌ cꞌahchiꞌ woꞌ quitakꞌa̱b je risukquil acꞌux jeꞌ ricab maꞌ E̱wulo, reꞌ maꞌ Pure̱nte, reꞌ maꞌ Li̱no, reꞌ tiꞌ Cala̱wya chꞌi̱l woꞌ take chiꞌnchel aj niminel wilque̱b ayuꞌ.
22 Ru̱cꞌ ricohlsjic wach i hu̱j wili, reꞌ wili i ti̱j niban i hin yuꞌna: Reꞌ ta nak kAja̱w Jesus enwihꞌic awu̱cꞌ chi ricowsjic acꞌux eh reꞌ ta woꞌ nak ricꞌaxbal i Dios wihꞌok chana̱ i hat chꞌi̱l take nicꞌ qꞌuihal aj niminel wilque̱b ar. Jeꞌ ta nak reꞌ banarok awu̱cꞌ tak. Reꞌ wili niti̱j niban chiwach i kAja̱w Dios.