19
1 Ocmɨ ammatoŋ tu̱m jɨ̱yi tsa̱m mɨj. Pɨ̱mi jɨyyajpa jáyaŋ pɨxiñt́am sɨŋyucmɨ. Nɨmyajpa:
¡Aleluya! Jém tanJa̱tuŋ Dios wɨa̱p icɨacput jém pɨxiñt́am.
Tsa̱m wɨ̱ jém tanDios, wɨa̱p iwat it́u̱mpɨy cosa.
2 Jém tanJa̱tuŋ Dios iñu̱mcɨɨpiŋ jém malopɨc yo̱mo,
jém pejoypaap jém mɨjpɨc attebet,
porque tsa̱m icmalwatne jém it́yajwɨɨp yɨ́p naxyucmɨ con jém malopɨc jɨ̱xi.
Sɨɨp Dios ichécum jém ipɨxiñt́am iñɨɨpiñ, jém accaata̱wɨɨp je̱m.
3 Jesɨc e̱ybɨct́im nɨmyaj:
—¡Aleluya! Jém ijo̱co químpa it́u̱mpɨy tiempo.
4 Jesɨc jém veinticuatro wɨd́ayt́am con jém cuatro vivopɨc cosa tocsne actɨŋ naxyucmɨ iga ijɨ̱syajpa Dios jém co̱ñwɨɨp jém aŋjagooyi ico̱ñcuyyucmɨ. Nɨmyajpa:
—¡It́um wɨ̱! ¡Aleluya!
5 Jesɨc put tu̱m jɨ̱yi de ju̱t́ it́ jém aŋjagooyi ico̱ñcuy. Nɨmpa:
Cujíptaamɨ jém tanJa̱tuŋ Dios, mimicht́am,
jém iŋcuyo̱xatampáppɨc Dios,
jém iŋcɨ̱ŋtampáppɨc,
mixut́utampɨc y mimɨjtampɨc.
Jém Cristo ipɨctsoŋpa jém ipɨxiñt́am
6 Jesɨc ammatoŋ tu̱m jɨ̱yi tsa̱m mɨj juuts jɨyyajpa tsa̱m jáyaŋ pɨxiñt́am, tu̱m aŋjɨ̱yi juuts ju̱pa jáyaŋ nɨ, juuts pɨ̱mi t́i̱ñpa jém majɨywiñ. Nɨmpa:
¡Aleluya! Porque sɨɨp tsucumneum iga iŋjacpa yɨ́p naxyucmɨ jém tanO̱mi Dios jém iniit́wɨɨp it́u̱mpɨy ipɨ̱mi.
7 Sɨɨp tamaymáya̱támiñ.
Wɨ̱ iga tanait́t́ámiñ jém maymáya̱ji tána̱namaŋjo̱m y taŋcujíptámpa Dios
porque sɨɨp núcneum jém ja̱ma iga aŋcoomɨ́ypa jém Cordero.
Jém iyo̱mo nawɨ̱tsacneta̱wom. (Yɨ́p nɨmtooba jém Dios ipɨxiñt́am.)
8 Jém yo̱mo agui wɨ̱cuyajne.
Chiit́a̱ jém wɨbɨc puctu̱cu, jém lino agui cuáyñe, jém aguipɨc tsocpa.
Jém wɨbɨc puctu̱cu nɨmtooba iga wɨ̱tsagayñeta̱wum jém Dios ipɨxiñt́am it́áŋca. It́yajum listo iga nɨcpa iwaganait́yaj Cristo.
9 Jesɨc jém sɨŋyucmɨpɨc pɨ̱xiñ anɨ́máy:
—Jaycaamɨ así: “Agui maymay jém pɨ̱xiñ jém iŋwejayñeyajwɨɨp Dios iga nɨcpa sɨ́ŋa̱jiyaj cuando aŋcoomɨ́ypa jém Cordero.”
Anɨ́máyt́im:
—Yɨ́bam jém nu̱mapɨc aŋma̱t́i, jém michiiñewɨɨp Dios.
10 Jesɨc aco̱ste̱ñ jém sɨŋyucmɨpɨc pɨ̱xiñ ipuycɨɨm iga anjɨ̱spa. Pero anɨ́máy:
—Odoy wa̱tɨ je̱mpɨc. Ɨch aŋcuyo̱xa̱pt́im Dios juuts mimich y juuts jém iñt́ɨ̱wɨtam jém it́úŋɨypáppɨc jém Jesús iŋquímayooyi, jém nu̱mapɨc. Odoy ajɨ̱sɨ aɨch, jɨ̱sɨ Dios.
Jém nu̱mapɨc aŋma̱t́i, jém tachiiñewɨɨp jém tánO̱mi Jesús, jeet́im jɨ̱xi juuts jém ichiiñewɨɨp Dios jém wiñɨcpɨc iŋmat́cɨɨwiñ.
Jém iquímcanewɨɨp jém po̱pcawaj
(Jn. 1:1; 1 Jn. 1:1)
11 Jesɨc ánix iga áŋáyñe jém sɨŋ. It́ tu̱m po̱pcawaj. Jém iquímcanewɨɨp jém cawaj d́a nunca mɨgóypa y siempre iccupacpa juuts nɨmpa. Nu̱mcɨɨpíŋóypa y áŋa̱pa con justicia.
12 Agui tsocpa jém iixcuy juuts yótpa juctɨ. Jém ico̱bacyucmɨ accámayñeta̱ wa̱t́i jém corona. Jaycámneta̱ tu̱m nɨ̱yi, pero d́a i̱ icutɨɨyɨ́ypa solamente je mismo.
13 Accámayñeta̱ tu̱m yoot́i mujne con nɨɨpiñ. Jém iñɨ̱yi jém Dios Iŋma̱t́i.
14 Jém sɨŋyucmɨpɨc soldado it́úŋɨyyajpa. Cada tu̱mtu̱m iquímcane tu̱m po̱pcawaj. Accámayñeyajta̱ jém wɨbɨc puctu̱cu agui po̱po, cuáyñe.
15 Jém aŋjagooyi jém iquímcanewɨɨp jém po̱pcawaj putpa ijɨpjo̱m tu̱m espada agui tsu̱pa. Con yɨ́p espada iccoowa̱p jém naciónyaj icuwɨ̱t́i yɨ́p naxyucmɨ. Iŋjacpat́im con tu̱m tɨ́ŋcuy vara. Iñepnepcotspa jém uvas con ipuy iga it́obáypa jém iñɨ. Yɨ́p nɨmtooba iga ichiiba castigo it́u̱mpɨy jém malopɨc pɨxiñt́am. Porque Dios, jém iniit́wɨɨp it́u̱mpɨy ipɨ̱mi, tsa̱m pɨ̱mi ijóyixáypa jém pɨxiñt́am it́áŋca.
16 Jaycámneta̱ jém iyoot́yucmɨ y jém iwɨt́puyyucmɨ: “Jém Rey de it́u̱mpɨy reyyaj, jém tánO̱mi Dios it́u̱mpɨy io̱miyaj.”
17 Ocmɨ ánix tu̱m sɨŋyucmɨpɨc pɨ̱xiñ te̱ñ ja̱mjo̱m. Pɨ̱mi jɨypa. Iŋwejáypa it́u̱mpɨy jém jonyaj jém quecyajpáppɨc sɨŋyucmɨ. Nɨmpa:
—Mi̱ñɨ miŋtuuma̱jit́am yɨɨm. Mi̱ñɨ miwiiquit́am ju̱t́ iwatpa Dios tu̱m mɨjpɨc sɨŋ.
18 Miñt́aamɨ iga iŋcudáyiñ jém reyyaj ima̱yi y jém capitán ima̱yi, y jém pɨ̱mipɨc pɨ̱xiñ ima̱yi. Iŋcɨɨspa jém icawaj ima̱yi y jém cawaj io̱mi ima̱yi. Iŋcɨɨspa it́u̱mpɨy jém pɨxiñt́am ima̱yi jém esclavo jém d́apɨc je esclavo jém mɨjpɨc y jém xut́upɨc.
19 Ocmɨ ánix jém mɨjpɨc ani̱mat con yɨ́p naxyucmɨpɨc reyyaj con jém soldadoyaj, aŋtuuma̱neyaj iga áŋa̱yajpa contra jém co̱ñwɨɨp jém po̱pcawajyucmɨ y contra jém soldadoyaj.
20 Matsta̱ jém mɨjpɨc ani̱mat y jém malopɨc profeta jém nɨ́maŋtaaya̱newɨɨp iga Dios icutsatne. Yɨ́pyaj iwatyaj jém milagro jém mɨjpɨc ani̱mat iwiñjo̱m iga imɨgóyayyajpa jém pɨxiñt́am, jém ipɨctsóŋayñeyajwɨɨp jém ani̱mat imarca iwiñpacyucmɨ, jém ijɨ̱syajpaap jém ani̱mat iwatnas. Icuɨstɨc sɨwiñ cotyajta̱ jém juctjo̱m jém laguna ju̱t́ naps juctɨ jém tsa̱mpɨc pɨ̱mi yótpa con azufre.
21 Jesɨc it́u̱mpɨy jém pɨxiñt́am jém tsɨ́yñeyajwɨɨp, accaayajta̱p con jém espada jém putnewɨɨp jém mɨjpɨc aŋjagooyi ijɨpjo̱m, jém iquímcanewɨɨp jém cawaj. Jesɨc it́u̱mpɨy jém jonyaj cusum icɨɨsyaj jém pɨxiñt́am ima̱yi.