5
Jém libro y jém Cordero
1 Jesɨc ánix iga jém co̱ñwɨɨp jém co̱ñcuyyucmɨ imatspacne tu̱m libro iŋwɨ̱cɨɨmɨ. Jém libro juuts tu̱m yagatspɨc to̱to wotneta̱. Jayñet́im aŋsɨ̱cmɨ y jayñet́im jojmɨ. Jém to̱to aŋtsajne con siete sello.
2 Jesɨc ánix tu̱m sɨŋyucmɨpɨc pɨ̱xiñ tsa̱m iniit́ ipɨ̱mi. Agui jɨypa. Nɨmpa:
—¿I̱ iniit́ jém autoridad iga íŋáypa jém libro iga ijacpa jém sello?
3 Pero d́a i̱ jém wɨa̱paap íŋáy. Ni jém sɨŋyucmɨpɨc, ni jém naxyucmɨpɨc, ni jém más nascɨɨmpɨc d́a i̱ wɨa̱p íŋáy jém libro ni d́a i̱ wɨa̱p iám.
4 Jesɨc tsa̱m pɨ̱mi awej porque d́a quej ni tu̱m pɨ̱xiñ jém wɨa̱paap íŋáy jém libro iga imaypa. Ni d́a i̱ wɨa̱p iám.
5 Jesɨc tu̱m de jém wɨd́ayt́am anɨ́máy:
—Odoy we̱jɨ. Mannɨ́máypa iga jém León jém tsucumnewɨɨp de jém tribu de Judá, jém rey David io̱cma̱nɨc, icoñwɨ́y it́u̱mpɨy jém ienemigoyaj. Je wɨa̱p íŋáy jém libro. Wɨa̱p ijac jém siete sellos.
6 Ánix jém Cordero noco te̱ñ jém aŋjagooyi ico̱ñcuyaŋna̱ca ju̱t́ it́ jém cuatro vivopɨc cosa, jém veinticuatro wɨd́ayt́am iwiñjo̱m. Quejpa iga accaaneta̱ id́ɨc jém Cordero, pero sɨɨp pɨsneum. Iniit́ siete iwaŋ y siete iixcuy. Yɨ́p nɨmtooba jém siete espíritu jém icutsatnewɨɨp Dios icuwɨ̱t́i yɨ́p naxyucmɨ.
7 Jém Cordero miñ ipɨc jém libro ju̱t́ imatspacne iŋwɨ̱cɨɨmɨ jém co̱ñwɨɨp jém aŋjagooyi ico̱ñcuyyucmɨ.
8 Cuando ipɨc jém libro, jesɨc jém cuatro vivopɨc cosa y jém veinticuatro wɨd́ayt́am ico̱ste̱ñáypa jém Cordero iwiñjo̱m. Cada tu̱mtu̱m de jém wɨd́ayt́am iniit́ tu̱m arpa y tu̱m xa̱nu de oro. Comne jém xa̱nu con jém wɨbɨc po̱ma. Jém po̱ma nɨmtooba jém oraciones jém iwatnewɨɨp jém Dios ipɨxiñt́am.
9 Jesɨc iwanyajpa tu̱m jo̱mipɨc wa̱ñi. Nɨmyajpa:
Mich wɨa̱p impɨc jém libro.
Wɨa̱p iñjac jém siete sellos.
Porque miccaata̱ iga anyojayt́a antáŋca.
Iñt́egáy iññɨɨpiñ iga iñjúyayñe para Dios
pɨxiñt́am de it́u̱mpɨy raza,
jém iŋmatyajpáppɨc tuŋgac aŋma̱t́i,
jém it́yajwɨɨp tuŋgac naxyucmɨ y de jém tuŋgac naciónyaj.
10 Dios accámta iga aŋjagooyi y apa̱nijt́am
iga aŋcuyo̱xatámpa Dios
iga anaŋjactámpa jém it́yajwɨɨp yɨ́p naxyucmɨ.
11 Ocmɨ ánix iga aŋtuuma̱neyaj tsa̱m jáyaŋ jém sɨŋyucmɨpɨc pɨxiñt́am. Ammatóŋáy ijɨ̱yi. Icute̱ñxe̱tneyaj jém aŋjagooyi ico̱ñcuy ju̱t́ it́ jém cuatro vivopɨc cosa y jém wɨd́ayt́am. It́yaj millones y millones de jém sɨŋyucmɨpɨc pɨxiñt́am.
12 Tsa̱m pɨ̱mi jɨyyajpa. Nɨmyajpa:
Taŋcujíptámpa jém Cordero jém accaaneta̱wɨɨp id́ɨc
porque tsa̱m wɨa̱p.
Wɨ̱ iga ipɨctsoŋ it́u̱mpɨy ipɨ̱mi
y jém riqueza y jém wɨbɨc jɨ̱xi.
Wɨ̱ iga jém pɨxiñt́am icujípyajiñ
y ichiiyajiñ gloria.
13 Ammatoŋt́im iga jɨyyajpa it́u̱mpɨy jém Dios iwa̱t́i, jém it́yajwɨɨp sɨŋyucmɨ, jém it́yajwɨɨp naxyucmɨ, jém it́yajwɨɨp nascɨɨm, jém it́yajwɨɨp jém lamar y it́u̱mpɨy cosa ju̱t́iŋquej. Nɨmyajpa:
Wɨ̱ iga taŋwɨ̱wadayt́ámiñ jém co̱ñwɨɨp jém aŋjagooyi ico̱ñcuyyucmɨ
y jém Cordero para it́u̱mpɨy tiempo.
Taŋcujíptámpa,
tanchiit́ámpa gloria,
aŋwɨ̱aŋja̱mta iga aŋjactámpa.
14 Jesɨc jém cuatro vivopɨc cosa nɨmyajpa:
—Amén. It́um wɨ̱.
Jém veinticuatro wɨd́ayt́am co̱steeñactɨŋyaj. Moj ijɨ̱syaj Dios, jém d́apɨc nunca cuyajpa ivida.