1 I ARI kotilon on nan kanim Ieriko, ap kotin daulula. 2 A kilan, ol kapwapwa men mia, ad a Jakauj, me jaumaj en jaunopwei kan. 3 A men kilan Iejuj, pwen aja, ij i, ap jota kak, pweki pokon o, o a jakakair. 4 I ari tion mo ’rail, dauda nin tuka pot, pwen kak kilan i, pwe a pan kotin daulul waja o. 5 A lao lel waja o Iejuj ap kotin majanda diar i, majani on i: Jakauj, madan daudi, pwe I pan pedelon on nan im om ran wet. 6 I ari madan daudi kajamo i pereperen. 7 Irail lao kilaner met, karoj ap lipanedeki inda: A pedeloner, pwen kairu ren ol dipan amen. 8 A Jakauj potodo potoan on Kaun o: Main re kotin mani, apali en ai kapwa i pan kijakijaki me jamama kan, o ma i kotaue amen, i kin kajapal won i pan pa pak laude jan. 9 Iejuj kotin majani on i: Maur me pwara don nan im wet ran wet, pwe a pil nain Apraam amen. 10 Pwe Nain aramaj pwara don rapaki o kamaureda me jalonalar. 11 A ni ar ronadar mepukat, a pil kotin majani karajeraj eu, aki koren ion Ierujalem, o re kiki on, me wein Kot pan madan janjaleda. 12 A kotin majani: Ol lapalap amen kolan jap doo eu, pwen nine mar a, ap pan puredo. 13 I me eker pena na ladu ek, o ki on irail paun eijok, indan irail: Komail dodokki, i lao puredo. 14 A na aramaj akan kailonki i, kadarala mur i kaireki lan i: Je jota mauki, ol men et en kaun kit. 15 Kadekadeo a lao puredo, murin a aleer wei o, ap ilakelan ladu kan, me a ki on na moni, pwen aja duen en amen amen ar kalaudelar na moni. 16 Men maj ap pwarado indada: Main, omui paun kareda paun eijok. 17 A indan i: Meid pai ladu mau koe, aki om apapwali mau me tikitik, koe pan id kaunda kanim eijok. 18 O kariamen ap pwarado indada: Main, omui paun me kareda paun limau. 19 A pil indan i: Koe pan kaunda kanim limau. 20 O pil amen pwarado indada: Main, mani, ietet japwilim omui paun, me i nekidala nan lim en pudo. 21 Pwe i majak komui, pwe I petik amen komui. Komui kin aleda, me kaidin komui kidier, o dolun jan, me kaidin komui padukedier. 22 A indan i: Jan nan au om I pan kadeik kin uk ada ladu jued koe. Koe ajaer, me ol petik amen nai, me kin ale, me kaidin nai kidier o dolun jan, me kaidin nai padukidier. 23 Menda koe jota wala nai moni wajan kanaitik, o i lao puredo, i pan ale me udan ai ianaki moni naitik. 24 A indai on irail me u impa: Ale jan i paun o, ki on ren me a paun eijok! 25 Irail indai on i: Main, nan a nainekier paun eijok. 26 Pwe I indai on komail, meamen, me a mia, ekij pan ko on, a me jota a mia, nan a pwitikatik pil pan katia jan. 27 A ir, ai imwintiti, me kan, I en kakaun ir, wa ir do, o kame ir ala mo i! 28 A lao kotin kaimwijokala a majan pukat, ap kotiwei kotidala Ierujalem. 29 Kadekadeo a lao koti don Petpake o Petanien impan dol me ad a Oliwe, ap kotin poronela japwilim a tounpadak riamen, 30 Majani: Koma ko on nan kanim monen, koma lao pedelon, koma pan diarada ejel pul amen jalidi, me aramaj amen jaik mohdi poa. Lapwada i, ap karedo! 31 A ma meamen pan idok re oma: Da me koma lapwa kida i? Koma ap pan inda: Kaun o men dake. 32 A ira me pakadara wei, ap kola o diarada, duen a kotin majani on ira. 33 A ni ara lawada ejel pul o, ol oko, me naineki, ap indan ira: Da me koma lawa kida ejel pul en? 34 Ira ap indada: Kaun o men dake. 35 Ira ari wado ren Iejuj, ap irepadi pon ejel pul arail likau kan ap potoan dan Iejuj poa. 36 Ni a kotikot kokowei, irail ap irepakidi arail likau kan nani al. 37 A lao kotin korendor kotidila dol Oliwe tounpadak kan karoj ap wiaki eu nil laudeda kapina Kot, pweki manaman akan karoj, me re kilaner, 38 Indada: Kapina on Nanmarki, me kotido ni mar en Kaun! Nanlan en popol o linan waja ileile! 39 A Parijar kai kijan pokon o indai on i: Jaunpadak, kotin kidaue japwilim omui tounpadak kan. 40 I ari kotin japen majani on irail: I indai on komail, ma mepukat pan nenenla, takai pan id kadededa. 41 A lao kotin korendor, ap majani kanim o, ap tontonireki, 42 Majani: O i men, koe en dedeki om ran mau wet, me pan kare on uk popol: Ari, a rir janer mon maj om. 43 Pwe ran apwal ko pan lei on uk, me om imwintiti pan kele kin uk pena o it pena jan ni pali karoj; 44 O irail pan kaje uk ala ianaki noum jeri kan, o re pan karonk uk ala; jota eu takai pan mimieta pon eu, pweki om jota dedeki anjaun om kajojon. 45 I ari kotilon on nan im en kaudok, ap jikon jan me netinet lole, 46 Majani on ir: Nan a intinidier: Im ai im en kapakap, a komail wiaki deun lolap akan. 47 I ari kotin kaukawewe nan im en kaudok ran karoj. A jamero lapalap, o jaunkawewe, o me lapalap akan ren aramaj raparapaki, en kamatala i. 48 A re jota kak diar, me ren wiada, pwe aramaj karoj apwali i kaualap o men ron i.