1 TOUN pokon karoj ap kajinenda kalualan i ren Pilatuj. 2 Irail ari pikikidi impimpa i indada: Je diarada lap men et, me a kin kaweid japun aramaj akan o inapwiedi, ender nopwei on nanmarki, ap inda, me dene pein i Krijtuj o nanmarki. 3 Pilatuj ari idok re a majani: Nanmarki en Juj akan komui? A kotin japen i majani: Komui me inda. 4 Pilatuj ap majani on jamero lapalap akan o pokon o: Jota dip, me i diar ren aramaj men et. 5 A irail nidinideki i indada: A kin kapeida aramaj ni a kaukawewe jili nan Iudaa, tapiada Kalilaa kokodo lel jap wet. 6 Pilatuj lao ronadar Kalilaa, ap idok, ma i aramaj en Kalilaa men. 7 A i lao ronadar, me kijan toun wein Erodej, ap kadarala I en Erodej, me pil kotikot Ierujalem ni ran oko. 8 Erodej lao majani Iejuj, ap perenda kaualap, pwe me warai a kin anane udial i, pweki me toto a ronadar iran i, o a pil kaporoporeki, me a pan udial kilel eu jan re a. 9 I ari kalelapok re a ni majan toto. A i jota kotin man japen i. 10 A jamero lapalap o jaunkawewe kan kajinenda o impimpa I kaualap. 11 A Erodej o na jaunpei kan mamaleki i o likauki i likau puetepuet o kapure won i ren Pilatuj. 12 A ni ran ota Pilatuj o Erodej injenemau pena, pwe maj o ira imwintiti pena. 13 A Pilatuj kapokon pena jamero lapalap, o monjap, o aramaj akan, 14 Ap majani on irail: Komail wa don ia aramaj men et, dene kaweid japun aramaj akan. A kilan, i kalekalelapok re a mo ’mail, ap jota dip, me i diar ren aramaj men et, duen me komail katikatipiaki i. 15 Erodej pil jo, pwe i kadar won i komail. A kilan, jota me a wiadar pwen kame kila i. 16 Ari, i pan woki i ap lapwada. 17 Pwe a pan udan lapwa dan irail meamen nin kamadip o. 18 Irail karoj ap likelikwir indada: Kajapokela men et o lapwa don kit Parapaj! 19 Me lokidokilar nan imaten aki moromoron eu o kamela en aramaj amen, me wiauier nan kanim o. 20 Pilatuj ari men lapwada Iejuj, ap pil majani on irail. 21 A irail likelikwir indada: Kalopuela, kalopuela i! 22 A majani on irail kajilepak: Pwe me jued da, me a wiadar? Jota me i diaradar re a, me i en kamata kila. Ari, i pan woki i ap lapwada. 23 A irail nantion weriwereda nidinidiki i, me a en lopuela; o ar weriwer o en jamero lapalap akan lalaudelar. 24 Pilatuj ap inda, me ar poeki poek en pwaida, 25 Ap lapwada i, me lokido kilar nan imaten aki moromoron eu o kamela en aramaj amen, me irail poeki, ap mueid on irail Iejuj, en wiai on i duen injen arail. 26 O ni arail kalua wei i, re ap jaikidi Jimon men Kirene, me kodo jan nan jap o. Ir ari kidan po a lopu, pwen wala murin Iejuj. 27 O pokon kalaimun idauenla i, o li kai me janejan o mamaukeki i. 28 Jejuj kotin jaupei don irail majani: Li en Ierujalem akan, ender janejan kin ia, a janejan kin pein komail o noumail jeri kan. 29 Pwe kilan, ni ran oko kokodo aramaj pan indinda: Meid pai li dapwan o irail me jota naitik, o didi kan, me jota kadidi! 30 Re ap pan pikikidi ekeker on nana kan: Pupedi on po at! O on dol akan: Kadupal kit edi! 31 Pwe ma re wiadar mepukat on tuka maur, da me re pan wia on tuka monedi? 32 A pil lolap riamen ian i kalua wei kamela. 33 Irail lao lei waja, me adaneki pondal en mon, ap kalo puela i o me lolap oko, amen ni pali maun o amen ni pali main. 34 Iejuj ap kotin majani: Jam (ai), Kom kotin maki on irail, pwe irail jaja, me re wiawia. Irail ari nene pajan japwilim a likau kan o kadoropwa kida. 35 Aramaj me u kankakil o monjap akan ian irail kapikapiti I indada: A kamaureda akai, i en kamaureda pein i, ma i Krijtuj japwilim en Kot. 36 A jaunpei kan pil kapikapiti i, kai on i, ki on i pinika, 37 Indada: Ma koe Nanmarki en Juj akan, en kapitila pein uk. 38 A pil intin eu, me intinidier ponanen i ni lokaia en Krik, o Latain, o Ipru: let Nanmarki en Juj akan. 39 A amen ren lolap oko, me lanadar, lalaue i indada: Kaidin koe Krijtuj Kapit i jan pein uk o kit! 40 Me teio ap japen, kapun on i indada: Koe pil jota majak Kot ni om ian kadeik wet? 41 Pwe ata kalokolok me pun, pwe iduen ata wiawia kan, a ol men et jota wiadar meakot me jued. 42 Ap potoan on Iejuj: Main, re kotin kupura ia, lao re kotida nan wei ar. 43 Iejuj ap kotin majani on i: Melel I indai on uk, ran wet koe pan ian ia mi nan paradij. 44 Ni auer kawonu ap rotorotala nan jap karoj lao lel auer kaduau, 45 O katipin rotorotala, o likau en pera en im en kaudok o dei pajan jan poa lei pa. 46 Iejuj ap kotin kapitie laudeda majani: Jam (ai), i muei dalan nen i nan lim omui kan. A lao kotin majanier met, ap kotin poular. 47 A jaumaj en jaunpei o, ni a kilaner me wiauier, ap kapikapina Kot indada: Melel, aramaj men et me pun. 48 O aramaj karoj me pokon penaer pwen ian kilan, lao kilaner me wiauier, ap pikir maramar arail o pure pajan. 49 A kompokepa kan karoj o li akan, me idauendo i jan Kalilaa, u kailawei, kilekilan mepukat. 50 O kilan ol amen, me mar a Iojep, jaunkapun amen, ol mau o pun amen, 51 Me jota apali on irail ni ar kapukapun o wiawia kan, men Arimatia, kanim eu en ludiia, me pil auiaui wein Kot, 52 I me poto don Pilatuj poekipoeki kalep en Iejuj. 53 I ari kidi jan i o kidimki pena likau linen kajelel o kidi on nan joujou, me weiweida nan paip, waja me jaikenta amen jaredi ia. 54 A ran o ran en kaonop o japat korendor. 55 A li akan, me ian i kodido jan Kalilaa, pil ian udial joujou o, waja me kalep a nekinekid ia. 56 Irail ap purer o kaonopada potik kai o men ujor, re ap kamol ni ran en japat duen kujoned o.