1 PARIJAR o jaunkawewe kan ap ko don i jan Ierujalem, kalelapok re a: 2 Menda japwilim omui tounpadak kan tiakedi padok en kaua ko? Pwe re jota kin omiom ni ar pan kan prot. 3 A i kotin japen majani on irail: Menda komail pil tiakedi kujoned en Kot pweki omail padok kan? 4 Pwe Kot kotin kujonedadar majanier: Kakaki jam om o in om, o meamen lalaue jam a de in a, i en kamela. 5 A komail kin inda: Meamen indan jam a o in a: Korpan, iet wewe: Mairon eu, me koe men aneki jan ia; komail inda, dene jota dip a; i ari jota pan kakaki jam a o in a. 6 Iduen omail tiakedi kujoned en Kot pweki omail padok kan. 7 Malaun akan komail, nan melel, me Iejaia kokopadar iran komail, ni a majani: 8 Aramaj pukat kin kaka kin ia au arail, a monion arail me doo jan ia; 9 Ari, me mal ar kaudok ia, pwe kujoned en aramaj eta, me re kin kaukawewe. 10 I ari molipe pena aramaj akan majani on irail: Ron o weweki! 11 Kaidin me kin ko on nan aua kin kajaminela aramaj, a me kin ko jan nan aua, i me kin kajaminela aramaj. 12 Tounpadak kan ap kodo, potoan on i: Re kotin mani, me Parijar akan makar kida ni ar ronadar majan o? 13 A kotin japen majani: Tuka karoj, me kaidin Jam ai nanlan, padukedier, pan weiweida. 14 Puei jan irail; irail me majkun, ap kalua me majkun akan. A ma me majkun amen pan kalua me majkun, nan ira karoj pan pupedi on nan por o. 15 Petruj ap japen potoan on i: Re kotin kawewe on kit karajeraj pot et. 16 I ari kotin majani: Komail pil jota lolekon? 17 Komail jaikenta weweki, meakaroj, me kin ko on nan aua kin kodilon on nan kaped o ap kin kajapokela? 18 A me kin ko jan nan aua, kin tapida jan nan monion, o i me kin kajaminela aramaj. 19 Pwe jan nan monion o lamelam jued kin tapi jan ia: Kamela aramaj, o kamal, o nenek, o pirap, o kadede likam, o lalaue. 20 Jon pukat, me kin kajaminela aramaj. A jo omiom ap mana jota kin kajaminela aramaj. 21 Iejuj ap kotila jan waja o, kotilan wein Tiruj o Jidon. 22 A kilan, li en Kanaan amen, me kodo jan waja o, likelikwir on i, potoan on: Kupura ia! Main, ir me japwilim en Dawid! Nai jereipein waiwairokki tewil. 23 A a jota kotin japen i meakot. Japwilim a tounpadak kan ap kai don i poeki re a potoan on: Re kotin kadarala i, pwe a kin likelikwir don kitail. 24 A kotin japen majani: Jota me I pakadara don, pwin jip en jaun Ijrael eta, me jalonalar. 25 A a kodo, poridi on i potoan on: Main, re kotin kupura ia! 26 A kotin japen majani: A jota mau, en ale en jeri ar tunol prot ap kajedi on ren kijin kidi kan. 27 A potoan on: Melel Main, ari jo, kijin kidi kan kin namenam maremor akan, me kin pupedi jan ni tepel en ar jaumaj. 28 Iejuj ap kotin japen majani on i: O li, om pojon mo laud! A pan wiaui on uk duen me koe inon ion. Na jeripein ap kelailadar ni auer ota. 29 Iejuj ari kotila jan waja koti don liman jed en Kalilaa a lao kotida pon dol eu ap kaipokedi waja o. 30 O pokon kalaimun pokondon i, me wado me danidan kai, o me majkun, o me loton, o me jikilikil, o jon toto, ap pwilikidi ni aluwilua. A ap kotin kakelail ir ada. 31 Pokon o ap puriamwuiki ni ar kilan, me loton akan lokolokaia, o me jikilikil akan kelailadar, o me danidan kan alialu, o me majkun akan kilan waja; rap kapina Kot en Ijrael. 32 Iejuj lao molipe pena japwilim a tounpadak kan a kotin majani: I ap pokela pokon en, pwe re mi re i ran jilu ap jota kan ar mana, a I jota pan kadar ir ala ni ar jota manaer, pwe ren der dupokala pon al o. 33 Japwilim a tounpadak kan ap potoan on i: Je pan kijan ia prot toto, men kamedela pokon et nan jap tan wet? 34 lejuj kotin majani on irail: lopon en prot me depa mi re omail? Irail potoan on: Me iju o kijin mam kij. 35 I ari kotin majani on pokon ii, on mondi on nan pwel o, 36 Ap kotikidar lopon en prot iju o kijin mam akai, laolaoki, pwilitiki pajan o kotiki on sapwilim a tounpadak kan, a tounpadak kan ap nek on pokon o. 37 Irail karoj ari manaer, o medier; irail ap deuk pena kopou iju luan kamadip o. 38 A irail, me manaer, me ol pakid, a li o jeri kan jota ian wadawader. 39 A lao kotin kadar pajan pokon o, a kotilan pon jop pot, koti don impan Maktala.