86
1 MAIN Ieowa, kom kotin kapaike don ia karon omui kan o mani ia, pwe nai me luet o jamama.
2 Kom kotin apali maur i, pwe nai me lelapok. Main Kot, kom kotin jauaja ia, japwilim omui ladu men et, me liki komui.
3 Main, kom kotin maki on ia, pwe i kin likwir on komui ni anjau karoj.
4 Kom kotin kaperenda monion en japwilim omui ladu, pwe monion i kin anane komui Main.
5 Pwe komui Main me mau o kalanan, o kom kotin kalanan on ir karoj, me kin likwir on komui.
6 Main Ieowa, kom kotin ereki ai kapakap, o kotin mani nil en ai nidinid.
7 Ni ai apwal akan i kin likwir on komui, pwe kom, kotin mani ia!
8 Main, jota me dueta komui nan pun en kot akan; o jota me kak wiawia dueta komui.
9 Men liki kan karoj pan pwarado, pwen kaudoki on komui Main, o wauneki mar omui.
10 Pwe komui me lapalap, me kin wiada manaman, o komui ta me Kot.
11 Main Ieowa, re kotin kajale on ia al omui, pwe i en weweid ni omui melel, kom kotin kolekol monion i on iet eta: Majak mar omui.
12 I men kapina komui Main, ai Kot, jan nan monion i, o wauneki mar omui kokolata.
13 Pwe omui kalanan me laud on ia; komui dore maur i jan nan wajan mela.
14 Main Kot, me aklapalap akan kin palian ia, o pwin en me weit akan kin majamajan maur i, o re jota kin weweid mon jilan omui.
15 A komui Main Kot, me dir en kalanan, o mak, o kanonama, o omui kapunlol o melel me lapalap.
16 Kom kotin wukidoki don ia, o maki on ia, o kamaui kida japwilim omui ladu omui manaman, o kotin jauaja nain japwilim omui lidu!
17 Kom kotiki on ia kilel eu, me i pan paie kida, pwe ai imwintiti kan en kilan, rap namenok kila omui kotin jauaja ia, Main Ieowa, o kom kotin kamait ia la.