21
1-2 Rong dahme I ndinda;
ihte soangen kansenamwahu me I peki sang rehmwi.
3 Mweidohng ie mahs I en koasoi oh mwuhr,
ni ei pahn kaimwisakala ei koasoi, kumwail nek kouruhrkin ie.
4 Ei akupwung kaidehn ong aramas;
mie kahrepe ehu me I solahr kak nennekihla.
5 Kumwail kilang ie. Met sohte itar
kumwail en kilikilang oh nennenkihla amwail pwuriamwei?
6 Ni ei kin medemedewe dahme wiawihong ie,
I kin pwuriamweila, oh rerrerki ei masak.
7 Dahme Koht kin ketin mweidikihong aramas suwed kan en momour,
mweidohng irail en mour werei oh paiamwahu?
8 Re neitik seri oh neirail seri kan pil neitik,
oh re kin momour pwe re en kilang irail ni ar kekeirda.
9 Koht sohte kin ketikidohng kahpwal nan imwarail kan;
re sohte kin ahneki mour kamasepwehk.
10 Ei, neirail kou kan kin kaparapar
oh neitik ni sohte kahpwal.
11 Neirail seri kan kin tangseli oh mwadongseli rasehng sihmpwul kan
12 oh kahlengki ngilen arp oh keseng pepeuk kan.
13 Re kin momour ni popohl
oh mehla sohte lokolok.
14 Me suwed kan kin patohwanohng Koht en dehr ketin kedirepwe irail;
re sohte kin men ese kupwure ong irail.
15 Re kin medemedewe me sohte anahnepen re en papah Koht,
oh pil sohte kamwahupen ar pahn kapakapohng.
16 Re kin kosekose me dene re pweida sang ni pein ar kehl,
ahpw I sohte kak pwungki arail lamalam.
17 Marain en me suwed akan kin kak kunla?
Mie emen irail kin lelohng apwal?
Koht kin ketin kaloke me suwed akan nan sapwellime engieng
18 oh ipirirailla rasehng dihpw meng nan kisinieng,
de pwelpar nan melimel?
19 Kumwail kin kosekose me Koht kin ketin kaloke seri men pwehki dipen eh pahpa.
Soh! Koht en ketin kalokehki me dipan akan pein diparail kan;
en ketin kasalehda me e wia met pwehki diparail kan.
20 Me dipan akan en pein toutoukihla ar lokolok;
re en pein pehm engieng en Koht Wasa Lapalahpie.
21 Ni mour en aramas emen eh imwiseklahr,
ia duwe, e kin nsenohki ma nah seri kan nsenamwahu?
22 Mie aramas emen kak padahkihong Koht mehkot,
Koht me pil kin ketin kapwung me lapalap akan?
23-24 Ekei aramas kin kekehlailte lao lel rahn me re kin mehla;
re kin mehla ni nsenamwahu oh meleilei,
paliwararail kan kin kaselelki mwenge mwahu.
25 Ekei sohte kin nsenamwahu;
re kin momour oh mehla nan ar kapehd toutou.
26 Ahpw koaros duwepenehte me kin mehla oh seridi;
irail koaros mwahs kin kadirehla paliwararail.
27 I ese amwail lamalam suwed kan.
28 Kumwail kin idek, “Ia imwen ohl lapalapo met,
ohl me kin wia me suwedo?”
29 Kumwail koasoiengehr aramas akan me kin seiloak?
Kumwail sohte ese pakair kan me re kin wa kohdo?
30 Ni rahn me Koht kin ketin kaloke aramas akan nan sapwellime engieng,
me suwed kan kin pitla ahnsou koaros.
31 Sohte me kin kedipa aramas suwed,
de dupukohng mehkoaros me e wiadahr.
32 Ni eh kin wisiklahng wasahn seridi en me melahr akan,
ong ni eh sousou me silasil mwahu,
33 kapar en aramas ngeder kin iang kolahng ni sousowo,
oh e pil kin wonohn nan pwehl mwuterek.
34 Oh kumwail! Kumwail song en kansenamwahwihkin ie lokaia mwahl!
Pasapeng koaros me kumwail wia me likamw!